Zekaria 14

Yerusalem kodi nonin

1Neni, ndelo pa Rwoth bino, ma gim'onyaga wok bongin ilapoko i dier win. 2Alacoko nonin je i Yerusalem ri lweny, ilamako tindi madwoŋ, ilakinyaga udi, cwo jolapodho kwoŋ mon to jonindo gi jo akar, aka adec ma tindi madwoŋ lakadho i piny man; aka ji ma jodoŋ k'oŋadi jo woko wok kwoŋ tindi madwoŋ. 3Rwoth lakidho lweny gi nonin no, paka go lwenyo i ndelo ma lweny. 4I ndelo no par tiende lacungo wi Got Oliv manitie ruwaŋ Yerusalem yuwok ceŋ, aka Got Oliv labare i diere to pokere dirio wok yuwok ceŋ kodi yupodho ceŋ to weyo milelo madwoŋ swa. Adec ma Got acel lapokere yumalo, aka adec man yupiny. 5Wiladwire gi milelo ma gote; kole milelo ma gote latundo kiri Azel, aka wilaringo paka wiringo woko kwoŋ yengirok pa piny i hongo pa Uziya kere ma Yuda; aka Rwoth Were paran labino, kanyacel gi jomaleŋ je.

6I ndelo no lero kosa ŋico k'obedi. 7To labedo ndelo acel m'oŋeyere ri Rwoth, k'obedi odieceŋ kosa wor, kole i hongo m'othieno lero labedo.

8 # Eze 47:1; Yoh 7:38; Meny 22:1 I ndelo no pi ma kwo lamol wok i Yerusalem, adec mere lamol kadho i nam yuwok ceŋ aka adec lamol kadho i nam yupodho ceŋ; lamedere i milengela kodi i cwir. 9Rwoth labedo kere ma piny gibe; i ndelo no Rwoth labedo acel aka nyingi go acel.

10Piny gibe lawire, paka Araba wok i Geba tundo i Rimon yupiny ma Yerusalem. To Yerusalem ladoŋ ay malo i kabedo pere wok i Waŋkac pa Benyamin tundo i waŋkac marapena, kiri i Waŋkac ma Sonda, kodi wok iy'acurcur ma Hananel tundo i kadhiŋo vini pa kere. 11#Meny 22:3Ji jolabed'iye, aka langoye rerok man kendo; aka Yerusalem labedo i siem.

12Me labedo two nundu ma Rwoth lagoyo gine ji ma jolwenyo gi Yerusalem; delkwoŋ jo latop kareno jocungo gi tiendi jo, waŋ jo latop i kombe waŋ jo, aka lew jo latop i dhok jo.

13I ndelo no, Rwoth labolo nywowirok madwoŋ i dier jo, aka kisi dhano laketho cinge kwoŋ nyawote, kisi dhano latiŋo cinge kwoŋ nyawote. 14Yuda bende lalweny i Yerusalem; aka lim pa nonin je thoko ilacoko kanyacel, zahabu, feza, kodi nangin, i thotho swa.

15Thoyamo ma cale gi me bende lamako kayinin, ŋamia, kodi punde, kodi ogwaŋe je ma jobedi i wemin.

16 # Jolevi 23:39-43 Bino bedo, ma kisi dhano m'obothi wok i nonin je m'olweny gi Yerusalem, labino kisi oro lamo Kere, Rwoth pa lwak jolweny, kodi timo kalima ma Kayindi. 17Bino bedo ka pecin moro je ma i piny k'okidhi malo i Yerusalem lamo Kere, Rwoth pa lwak jolweny, jok'olim koth moro je kwoŋ jo. 18Aka ka peco ma Misir k'okadho malo to jonyuthere, kenyo labino two nundu ma Rwoth goyo gine nonin ma jokidhi malo timo kalima ma kayindi. 19Me labedo gir'acula ri reco pa Misir kodi gir'acula ri reco pa nonin je ma jok'okidhi malo timo kalima ma kayindi.

20I ndelo no ilandiko iy'olaŋere ma kayinin ni, “Leŋo ri Rwoth.” Degi ma Ot pa Rwoth lacale paka acerin ma ruwaŋ migam. 21Degi je i Yerusalem kodi i Yuda labedo maleŋ ri Rwoth pa lwak jolweny, aka jono je ma jolabino miyo cowirok jolatero to joted'iye. I ndelo no, jamitan kilabedo i Ot pa Rwoth pa lwak jolweny.

Currently Selected:

Zekaria 14: DHOCDC

Highlight

Copy