Luka 10

Yesu dhiro ji piero abirio g'ario woko

1Rumacen Rwoth oyero ji piero abirio g'ario man aka ooro jo yuwiye jario jario, i kisi tindi kodi kamoro je ma go onwaŋo yiko tund'iye. 2#Mat 9:37-38Owaco rijo ni, “Keco opikere, to jotic ama nok, am'omiyo kway win Rwoth ma won keco wodhiri jotic jowokec rigo. 3#Mat 10:16Onyo kadhi win pama won. Eno, adhiro win pa rombo i dier arara. 4Wikiri witiŋ mugowa pesa, kosa mugowa cemo, kendo kada war. 5I ot moro je ma widonj'iye, kutho mothi win jo ni, ‘Siem wobedi i ot me.’ 6Aka k'inen onwaŋere ŋata jolo siem kenyo, siem mewin bino doŋ rigo; to kak'ameno, bino gik riwin. 7#1 Kor 9:14; 1 Tim 5:18Bedi win i ot acel munyo wijolo cemo kodi gir'amadha ma jomiy win, rupiri jatic camo gikwok pere. Wikiri wikowere i udi man. 8Ka widonjo i tindi moro t'ijolo win, cami win gim'okethi ruwaŋ win. 9Bothi win jotwo man kenyo aka wiwaci rijo ni, ‘Ker pa Were ocore cegin gi win.’ 10#Tim 13:51To ka widonjo i tindi moro aka k'ojol win, kidhi win i royo ma tindi no to wiwaco ni, 11#Mat 10:7-14; Mar 6:8-11; Luk 9:3-5 ‘Onyo wateŋo woko kiri fukefuke ma tindi mewin m'oyido odoŋ i par tiendi wan wodoŋ i wiy win; to kad'ameno ŋey win ni Ker pa Were ocore cegin.’ 12#Cak 19:24-28; Mat 11:24; Mat 10:15Awaco riwin, i ndelo ma thumo banja, Sodom bino limo gir'acula ma dhe ye loyo tindi no.”

Tindin ma jokiŋuti

(Mat 11:20-24)

13 # Isa 23:1-18; Eze 26:1—28:26; Yowel 3:4-8; Amos 1:9-10; Zek 9:2-4 “Kidamba otundi rin, Korazin! Kidamba otundi rin, Bethsayida! Kole bedi gir'aura m'otimi i win tim i Tire kodi Sidon, di cango joŋuto con, aka di jobedo piny to joruko kutiya, to jobukere gi buru ma nyutho ni joŋuto reco. 14Were bino nyutho wor madwoŋ i ndelo ma thumo banja ri Tire kodi Sidon loyo riwin. 15#Isa 14:13-15Aka in Kapernaum, onwaŋo iyenyo tiŋirok malo tundo i polo? Ibino bolin i piny pa jom'otho ayino!” 16#Mat 10:40; Mar 9:37; Luk 9:48; Yoh 13:20Yesu owaco ri jofonjirok pere ni, “Ŋata winjo win, meno winjan; ŋata kwero win meno kweran; aka ŋata kweran, meno kwero Ŋat'ooran.”

Jofonjirok piero abirio g'ario jodwoko

17Jofonjirok piero abirio g'ario ca jodwoko munyo josangala, ka jowaco ni, “Rwoth, kiri jwogi je jowinjo wan ka waoro nyingin.” 18Yesu odwoko jo ni, “Aneno Sitan munyo podho pa lithkoth m'owok i polo. 19#Zab 91:13Onyo atieko miyo win meni ma nyono gi tiendi win thwole kodi thwolgwok, gi nyalo woko meni pa jakwor je; kendo ongoye gima bino timo win marac. 20To wikiri wisangala ni cuny m'ocido jowinjo win; kucel sangala win ni nyingi win ondiki i polo ayino.”

Yesu sangala

(Mat 11:25-27; 13:16-17)

21I hongo no won Yesu osangala i Cuny Maleŋ aka owaco ni, “Afoyin Baba, Rwoth ma polo kodi piny, paka ipano gigipiny me ri jomariek kodi jom'ofonjere t'inyutho nyithindho ayin. Ey Baba, gime otimere paka iyenyo ni wotimere.”

22 # Yoh 3:35; Yoh 10:15 “Baba otieko miyan gimoro je; aka ongoye ŋat'oŋeyo Wode kwanyo woko Bamere, kendo ongoye ŋat'oŋeyo Baba kwanyo woko Wode kodi joma Wode oyero nyutho jo Bamere.”

23Gikenyo Yesu owire ri jofonjirok pere to waco rijo nyaliŋliŋ ni, “Josilwany a joma waŋ gin neno gima wineno! 24Aka awaco riwin, jotuci wac Were kodi kerin mathoth, cango joyenyo neno gima wineno to jok'oneno, gi winjo gima wiwinjo to jok'owinjo.”

Ageca pa Jasamaria maber

25 # Mat 22:35-40; Mar 12:28-34 Gikenyo jafonji ma Cik moro omito temo Yesu; oay to penjo ni, “Jafonji, mitere atim aŋo ŋey adonji i kwo makirum?” 26Yesu bende openjo go ni, “Cik waco nedi? Somere nedi?” 27#Cik 6:5; Jolevi 19:18Odwoko ni, “Mari Rwoth Were perin g'adundo perin je, gi cunyin je, gi meni perin je, gi paro perin je, kendo mari nyawotin paka iwon imare.” 28#Jolevi 18:5Yesu owaco rigo ni, “Idwoko m'otire; ere tim ameno aka ibino kwo.”

29To paka ŋato onwaŋo yenyo nyutho tiro pere, openjo Yesu ni, “Nyawotan a ŋa?” 30Yesu odwoko ni, “Jal moro oyido wotho i royo kareno owok Yerusalem kidho Yeriko, to podho i cingi jokwo, ma jolunyo kwoŋe nangin je, jogoyo go, to joweyo go kenyo ma cunye kende ama gudere. 31Gikenyo jacway ri Were i wi migam moro oyido luwo royo no, to munyo oneno ŋato, oluwo i thengi royo to kadhakadha. 32Ameno bende Jalevi m'obino kenyo oneno go, to kadho kwoŋe gi i thengi royo. 33#2 Kigana 28:15To munyo Jasamaria moro otundo bonge, am'omako gi go wor munyo oneno go; 34okidho bonge to cako tweyo adholin pere, to konj'iye mo gi vini. Rumacen otiŋo go to ketho go wi kayina pere won, aka otero go i ot wendo, to miyo go kony kenyo. 35Yawere mere okwanyo siringi ario to culo jakur ot wendo ka waco ni, ‘Kuri ran go maber, aka ka adwoko abino culin gimoro je m'inomedi oro ma konyo go.’ 36Onyo kwoŋ ji adek me, iparo ni ŋa m'obedo nyawoti jal m'opodho i cingi jokwo no?” 37Go odwoko ni, “Ŋat'onyutho go wor.” Yesu odwoko ni, “Ibende kidhi itimi ameno.”

Yesu limo Marita kodi Maria

38 # Yoh 11:1 Munyo Yesu gi jofonjirok pere jomedo woth, jotundo loka moro, to dhako moro ma nyinge Marita jolo go i ot pere. 39Dheno oyido nitie gi nyamin m'ilwoŋo ni Maria, m'obino to bedo piny dho ka tiendi Yesu to winjo fonji pere. 40To Marita won oyido nigi mindin madit m'ogeŋo go winjo fonji m'omiyo owaco ni, “Rwoth, ikipar paka nyamera oweyan gi tic kendan? Mondo waci rigo wokonyan.” 41To Rwoth odwoko ni, “Marita, Marita, cunyin ramin kendo rembo kwoŋ mathoth, 42ma to nyaka gimoro acel won ama mitere. Maria ayino am'oyero gimaber mere, ma k'okwany kwoŋe.”

Currently Selected:

Luka 10: DHOCDC

Highlight

Copy