Cakirok 47

1Ameno Yakobo okwanyo wutmin abic to kidho bongi Farawo. Owaco ni, “Baba gi wutmera jobino wok Kanan gi mwendi pajo, dhok, kodi lim pajo je. Onyo pama jonitie iy'adec ma Gosen.” 2Kenyo go onyutho Farawo wutmin abic. 3Farawo openjo jo ni, “Witimo tic aŋo?”

Jodwoko ni, “Wabedo jokwath jadwoŋ paka kwarere mawan. 4Wabino bedo i piny me rupiri i piny Kanan kec gway m'ongoye lum ri mwendi. Mondo yey ŋecin perin jowobedi iy'adec ma Gosen.” 5Kenyo Farawo owaco ri Yozefu ni, “Benin gi wutmin in jobino bongin 6aka lowo ma Misir nitie ruwaŋin; weyi jowobedi iy'adec ma Gosen, adec ma lowo maber loyo. Aka k'iŋeyo cwo ma jonitie gi nyalo kwoŋ jo, kethi jowokuri ogwaŋe paran.”

7Kenyo Yozefu okelo Yakobo bamere to nyutho Farawo aka Yakobo omiyo Farawo silwany. 8Aka Farawo openjo Yakobo ni, “Ija oro adi?”

9Yakobo odwoko ni, “Kwo paran ma woth otieko oro 130. Oro no jobedo manok to ma teko, makiweno paka oro mabor ma woth pa kwarere paran.” 10Yakobo omiyo Farawo silwany, osewila go to kadho. 11Kenyo Yozefu omiyo bamere gi wutmin kabedo i Misir; aka omiyo jo lim i lowo maber loyo i tindi madwoŋ Rameses paka Farawo oyido owodho or. 12Yozefu omiyo bamere gi wutmin kodi jopeco pa bamere je cemo kiri gi nyithindho.

Kec

13Onyo kec oyido gway ma cemo oyido ongoye kisi kamoro; ma ji ma Misir gi Kanan jolocere ro kec. 14Paka jonyewo ŋano, Yozefu ocoko pesa je to tero i cel pa kere 15Munyo pesa ma Misir gi Kanan orumo, Jomisir jobino bongi Yozefu to jowaco ni, “Miy wan cemo! Ikir'iwey watho. Tim gimoro! Pesa mawan orumo.”

16Yozefu odwoko ni, “Keli win ogwaŋe mewin; abino miyo win cemo t'awilo gine ka pesa mewin orumo.” 17Ameno jokelo ogwaŋe pajo bongi Yozefu, aka omiyo jo cemo to wilo gi kayina, rombo, diegi, dhok kodi punde. I oro no omiyo jo cemo to wilo g'ogwaŋe.

18Aka munyo oro no orumo, jobino bonge i oro ma luwo to jowaco ni, “Wakilamuŋin jadwoŋ ni pesa mawan orumo, aka dhok mawan jobedo aperin; ongoye gima wadoŋ gine ma wanomiyin kwanyowoko delkwoŋ wan gi lowo mawan. 19Ikir'iwey watho. Tim gimoro! Ikir'iwey lowo mawan wojwangere. Nyew wan kiri gi lowo mawan i wil gi cemo. Walabedo ŋecin pa Farawo aka go ladoŋ gi lowo mawan. Miy wan ŋano ŋey wakwo wakiri watho kodi kodhi ma cwoyo i ndelin mawan.”

20Ameno Yozefu onyewo lowo ma Misir gipi ri Farawo. Kisi Jamisir oromere kitana lowo pere, rupiri kec oyido gway. Lowo olokere apa Farawo; 21aka Yozefu oloko ji ŋecin wok i gike ma Misir acel tundo i meca. 22Nyaka lowo pa jocway ri Were i wi migam ama go k'onyewo; rupiri oyido Farawo miyo jo gi kwo, aka am'omiyo jok'otana lowo pajo. 23Kenyo Yozefu owaco ri ji ni, “Neni, konon me anyewo win gi lowo mewin ri Farawo. Onyo kodhi ee riwin ma cwoyo i ndelin mewin 24I hongo ma kec, wilamiyo acel wiy abic ri Farawo, aka m'odoŋ amewin ma kodhi kodi cemo riwin kodi pecin mewin.”

25Jodwoko ni, “Itieko botho kwo mawan; inyutho wan bero jadwoŋ, aka wabino bedo ŋecin pa Farawo.” 26Ameno Yozefu oketho paka cik i lowo ma Misir ni acel wiy abic ma nyak ripo bedo apa Farawo. Cik me fodi cungo kiri konon; kwanyowoko lowo pa jocway ri Were i wi migam ama k'olokere lowo pa Farawo.

Kwayo pa Yakobo macowe

27Joisiraili jobedo i Misir iy'adec ma Gosen kama joŋaŋ'iye to jonywolo nyithindho kweth. 28Yakobo obedo i piny Misir ma oro apar g'abirio, cuka otundo oro 147. 29#Cak 49:29-32; 50:6Munyo hongo odhire cegin rigo ma tho, olwoŋo wode Yozefu aka owaco rigo ni, “K'inen pama atieko nwaŋo wor ruwaŋin, kethi cingin i ŋangan aka ikwoŋere ran nike ikilayikan i Misir, 30t'ilayikan kama bacere paran jonitie iye; tiŋan wok i Misir aka iyikan kam'oyik'iye jo.”

Yozefu odwoko ni, “Abino timo paka iwaco.”

31Yakobo owaco ni, “Kwoŋere ran n'ibino timo.” Yozefu otimo ameno, aka Yakobo omiyo foyo kenyo i wi kanindo pere.

Currently Selected:

Cakirok 47: DHOCDC

Highlight

Copy