Cakirok 21

Nywolirok pa Isaka

1Rwoth owendo ri Sara paka oyido otieko waco, aka otimo ri Sara gima go oyido ociko. 2#Ebu 11:11Sara ogamo iye, aka onywolo ri Abraham wode i tiyo pere i hongo ma Were oyido otieko waco rigo. 3Aka Abraham ocwoko rigo nyinge ni Isaka. 4#Cak 17:12; Tim 7:8Munyo Isaka otieko ndelo aboro, Abraham othumo go paka Were oyido omiyo go or. 5Abraham oyido jaoro miya acel munyo onywol Isaka. 6Sara owaco ni, “Were otimo ran gi kisangala gi nyero. Kisi ŋat'owinji kwoŋe bino nyeran.” 7To Sara doko medo waco ni, “Ŋa m'oyido d'onyal waco ri Abraham ni Sara nyalo pidho nyithindho? Kucel onyo anywolo rigo wode i tiyo pere.”

8Aka munyo Isaka oweyo dhoth, Abraham otimo kalima madwoŋ swa.

Sara miyo Abraham riemo woko Hagar gi Isimayil

9Ndelo acel, Sara oneno wod pa Hagar Jamisir tuko gi wode Isaka. 10#Gal 4:29,30Ameno Sara waco ri Abraham ni, “Riemi woko ŋeca me gi wode, rupiri wod pa dhako me kiripi lunjo adec ma lim perin ma wodan ripo lunjo.” 11Gime oramo cuny Abraham rupiri Isimayil bende oyido obedo wode. 12To Were waco ri Abraham ni, “Ikir'irembi ri Isimayil kodi ŋeca perin Hagar, to tim gimoro je ma Sara waco rin; rupiri obedo luwo bongi Isaka, m'ibino limo nyikwayin m'atieko ciko. 13Aka abino bende miyo wod pa Hagar nyithindho, ŋey bende jowolokere nono rupiri go bende obedo wodin.”

14Abraham oay malo yawere odikin maŋic to miyo Hagar cemo gi pien m'opoŋ'iye pi, to riemo go woko. Hagar okadho to lera i thim ma Berseba. 15Munyo pi orumo, oweyo wode i tiendi dudi moro 16aka okidho to bedo piny kama romo mita miya acel bor gi wode. To waco ni, “Akinyali neno ka nyathi paran tho.” Munyo go fodi obedo kenyo, nyathi ocako ywak.

17Were owinjo dwondi nyathi, aka malaika pa Were olwoŋo Hagar wok i polo to penjo go ni, “Aŋo ma ramo cunyin Hagar? Ikir'ibedi gi lworo, rupiri Were otieko winjo dwondi nyathi kama go ywak'iye. 18Ay malo, itiŋ nyathi i cingin; rupiri abino loko go nono madwoŋ.” 19Kenyo Were oyawo waŋe aka oneno waŋ pi; okidho to poŋo pi i pien, aka omiyo nyathi to madho. 20Were oyido nitie gi nyathi no munyo dongo, aka obedo i thim ma Paran to bedo jadwar swa. 21Yokimere onwaŋo rigo dhako ma Jamisir.

Abraham gi Abimelek jotimo cikirok

22 # Cak 26:26 I hongo no Abimelek gi Fikol jamituka jolweny pere jowaco ri Abraham ni, “Were nikodin i gim'itimo je 23Riameno kwoŋere ka ruwaŋ Were nike ikibino wondan, nyithindho paran, kosa nyikwayan. To paka atiyo kodin gi genirok, apaka bende ibino tiyo kodan gi piny m'ibed'iye.”

24Abraham odwoko ni, “Akwoŋere.”

25Munyo Abraham ogeŋisa ri Abimelek kwoŋ waŋ pi ma ŋecin pa Abimelek oyido jomayo go, 26Abimelek owaco ni, “Akuya ŋat'otimo gime. Oyido fodi ikiwaco ran, aka fodi oyido akiwinjo kwoŋe tundo konon.” 27Kenyo Abraham okwanyo rombo gi megikwe to miyo Abimelek, aka jario jotimo cikirok. 28Abraham okwanyo rombo abirio ma mon kwoŋ rombo pere to ketho gicen. 29Abimelek openjo go ni, “Rombo abirio ma mon me jonyutho aŋo?”

30Abraham odwoko ni, “Jol rombo abirio ma mon me wok i cingan, k'iyeyo ni aŋat'akunyo waŋ pi me.” 31Aka kabedo no olwoŋi ni Berseba,#21:31 Berseba Me wac i dhohiburu ma nyutho ni waŋ pi abirio, kosa waŋ pi ma kwoŋirok rupiri kenyo ama jotim'iye cikirok.

32Munyo jotieko timo cikirok, Abimelek gi Fikol jamituka jolweny pere jodok i piny Filistia. 33Abraham opidho yath m'ilwoŋo ni tamarisk i Berseba, aka olamo Rwoth Were ma cil gi cil kenyo. 34Abraham obedo i piny Filistia ma hongo malac.

Currently Selected:

Cakirok 21: DHOCDC

Highlight

Copy