Cakirok 11
11
Ot acurcur ma Babilon
1Onyo ji ma piny gibe oyido jonitie gi dhodhok acel gi wac manok. 2Aka paka jotuk wok yuwok ceŋ, jonwaŋo kama k'obedo tendere i lowo ma Sinar aka jobedo kenyo. 3Aka jowaco wegi ni, “Biye win wagoy matafal, aka wawaŋ jo matek.” Ameno jobedo gi matafal ma geto gi odok ma riwo kanyacel. 4Aka jowaco wegi ni, “Weyi wageti tindi madwoŋ gi ot acurcur ma tundo i pondeponde, ŋey wayiki nyingi wan aka wakiri waywore i piny gibe.”
5Aka Rwoth oloro piny to neno tindi madwoŋ kodi ot acurcur ma wot ji oyido jogeto. 6Aka Rwoth owaco ni, “Neni, jobedo ji acel aka joluwo dhodhok acel kende; me nyaka cakirok ma gima jokidho timo. Jolacegin cako timo gima jomito je! 7Weyi wakidhi piny aka wanywow dhodhok pajo ŋey jokiri jowoniaŋere.” 8Ameno Rwoth okedho jo i piny gibe aka joweyo geto tindi madwoŋ. 9Riameno olwoŋi tindi madwoŋ no ni Babel rupiri kenyo Rwoth onywowo dhodhok ma piny gibe; aka kenyo Rwoth okedho ji i piny gibe.
Nyikway Semu
(1 Kigana 1:24-27)
10Me nyikway Semu. Munyo Semu jaoro 100 onywol rigo wode Aripakisadi oro ario rumacen ma pi mikula; 11rumacen go okwo ma oro 500 aka olimo nyithindho man.
12Munyo Aripakisadi jaoro piero adek g'abic, onywol rigo wode Sela 13rumacen go okwo ma oro 403 aka olimo nyithindho man.
14Munyo Sela jaoro piero adek, onywol rigo wode Eber; 15rumacen go okwo ma oro 403 aka olimo nyithindho man.
16Munyo Eber jaoro piero adek g'aŋwen onywol rigo wode Peleg; 17rumacen go okwo ma oro 430 aka olimo nyithindho man.
18Munyo Peleg jaoro piero adek onywol rigo wode Reu; 19rumacen go okwo ma oro 209 aka olimo nyithindho man.
20Munyo Reu jaoro piero adek g'ario, onywol rigo wode Serug; 21rumacen go okwo ma oro 207 aka olimo nyithindho man.
22Munyo Serug jaoro piero adek, onywol rigo wode Nahor; 23rumacen go okwo ma oro 200 aka olimo nyithindho man.
24Munyo Nahor jaoro piero ario g'abuŋwen onywol rigo wode Tera; 25rumacen go okwo ma oro 119 aka olimo nyithindho man.
26Munyo Tera jaoro piero abirio, onywol rigo Abram, Nahor, kodi Haran.
Nyikway Tera
27Onyo me nyikway Tera. Tera oyido ba Abram, Nahor, Haran; aka Haran oyido ba Loti. 28Haran open tho ri bamere Tera i piny pere ma nywolirok, i Ur pa Jokaldin. 29Aka Abram onywomo Saray, aka Nahor onywomo Mika, nyar Haran, m'oyido bende obedo ba Isaka. 30Saray oyido kinywol; aka oyido ongoye gi nyithindho.
31Tera okwanyo wode Abram, kodi nyakware Loti wod pa Haran, gi Saray ciwode to kanyacel joweyo Ur pa Jokaldin aka jokidho i piny Kanan to jobedo kenyo. 32Tera otho munyo jaoro 205.
Currently Selected:
Cakirok 11: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.