Mariko 7

Byeesi bakuuka baleekela

(Mat 15.1-9)

1Batweela khu Bafarisaayo ni baleekeli be kamakaambila ka Musa babeetsa khukhwaama i Yerusalemu, baatsya babusanila isi Yezu. 2Ni bemenielesa babona bari baleekelwa ba Yezu balya busa nga si banyoowele khusaaba kamakhono ta.#7.2 Khulondekhana ni kamakaambila ke Bayudaaya, abe nga umuundu wamile lukyeendo ali ni khusaaba kamakhono khukhwolisa mu khuumbo, nio alye biilyo.

3Khulwekhuba Bafarisaayo ni Bayudaaya bakali baloondelela khuleekela khwe bakuuka baabwe. 4Abe nga bamile mu khatale, si balya shishiindu shoosi ta, akhali nga bamalile khukhwipyeluusa. Iliwo ni bye kimisilo bibindi busa bikali byeesi baloondelela, nga isaambo iye khupyeluusa bikopo, tsisoongwe, ni bibiindu bibindi.

5Kila Bafarisaayo ni baleekeli be kamakaambila ka Musa bareeba Yezu bari, “Shiina kila baleekelwa boowo bakhalondelela kimisilo kye bakuuka beefwe, kila balya busa nga mbakhusaaba mukhono ta?”

6 # Isay 29.13 Yezu welamo ari, “Inywe babekholisa busa, inywe nibo beesi Yisaaya akanikhakho nga n'akhola buŋoosi ari,

‘Babaandu bano bekholisaka busa bari bantsisaaya ise,

ne kimyoyo kyabwe kili aleeyi naabi khukhwaama isi ise;

7bamala busa imbuka khukhuntsisaaya ise,

ne nga kamakaambila keesi baleekela kali busa ke babaandu.’

8“Mulekha khulondelela kamakaambila ka Wele, mwela khuleekela kimisilo kye babaandu busa.”

9Yezu weloosela ari, “Nga muli ni isaambo iye kamakyesi yeesi mwakhootsa iye khulekha khulondelela kamakaambila ka Wele, bari nio mulondelele bye kimisilo kyenywe! 10#Luky 20.12; Maka 5.16 Luky 21.17; Lev 20.9Khulwekhuba Musa aloma ari, ‘Yiisatsakamo paapa woowo ni maayi woowo lukoosi’; nalundi ari, ‘Uyo yeesi ukanikha buubi khu paapa weewe namwe maayi weewe, akha khukhwiribwa.’ 11Ne inywe muloma muri, ‘Umuundu n'alomela paapa weewe namwe maayi weewe ari sheesi nandikhuweele iwe nga buyeeti khukhwaama isi ise shili Kolubani,’#7.11 Shimanyisa shiri ise nashiwaanayo isi Wele. 12aba sashiili ni bufunisi bwe khuyeeta paapawe namwe maayi weewe ta. 13Ni nashiryo mwisa likaambila lya Wele andulo muri nio mulondelele bye bakuuka beenywe. Iliwo ni bibiindu bibindi bikali busa biibi byeesi mukhola bibifwaana nga bino.”

Bibiindu bibishuusa umuundu khuuba umunyaalu

(Mat 15.10-20)

14Yezu walaanga lituuli lye babaandu lundi kila aloma ari, “Mweesi ni murekeerese byeesi inoma, nalundi mubimanye bulayi. 15Imbaawo shishiindu shishinjila munda mw'omuundu shishimukhola wekyela umunyaalu ta; akhali bibiindu bibyaama munda mukari mw'omuundu nibyo bibimwonakisa. 16Uyo yeesi uli ni kamaru ke khuwulila n'arekeerese.”#7.16 Bitabo bilala bikhale sibyongelakho khanyilili khano, khe 16 ta.

17Nga Yezu walekhile lituuli ibulafu wenjiile mu ntsu, kila baleekelwa beewe bamureeba khu biwaamba khu khukanikha nga araambisa tsisimo. 18Kila abelamo ari, “Ari akhaba nanywe si muli ni kamakyesi ta? Simubona muri sheesi umuundu alya shenjila munda, seshikila waba umunyaalu ta, 19khulwekhuba shinjila munda, ne akhuba mu mwoyo ta, shishimanyisa shiri shikyelawo sharura mwibili shaatsya mu khayu ta?” Mu khuloma aryo, Yezu amanyisa ari bibiliibwa byoosi sibilikho buubi ta. 20Kila eloosela ari, “Isho shishaama mu mwoyo kw'omundu nisho shishikila waba umunyaalu. 21Khulwekhuba bibiindu bibyaama mu mwoyo nibyo: bibyambaaso binyaalu, buyeyani, bubwiifwi, khukhwira, 22buyeyani, khuuba ni kumukhono kumuleeyi, ni bibiindu bibindi biibi nga; bubeeyi, kumulyuulyu, libuba, khukhomyaasa, khukhwibona ni busilu. 23Bibiindu bino byoosi byaama mu mwoyo kw'omundu, nalundi nibyo bibikila umuundu waba umunyaalu.”

Khufukiilila khw'omukhasi Umuyonaani

(Mat 15.21-28)

24Lwanyuma Yezu wama awo watsya mu bisiintsa bye Tulo ni Sidoni. Nga wolile iyo, wenjila mu ntsu nga s'akana babaandu bamanye bari aliwo ta, ne shitweela busa bamanya bari aliwo. 25Ne khangu akho, umukhasi uwaba n'umwaana weewe umukhaana nga umulwaale, khulwekhuba abe kimisaambwa kimibi kyamuwaambile, n'awulila ari Yezu wolile awo, watsya wamufukhamila mu bikyele. 26Umukhasi uyo aba Umuyonaani, nga ama mu shisiintsa shishilaangibwa shili Foyinisiya she mu Siriya. Kila ekontselela Yezu ari atimise kimisaambwa kimibi khukhwaama khu mwana weewe. 27Ne Yezu wamuloma ari, “Biilyo banyoowa khuuwa babaana be ango. Seshiba shilayi khubukula biilyo bye babaana babituumila tsiimbwa ta.”

28Umukhasi wamwilamo ari, “Niabweene Umukasya. Ne ni tsiimbwa natso tsilya bubuya bubuukwa asi khukhwaama khu meetsa ye babaana.”

29Yezu wamwilamo ari, “Khulwe khuloma uryo, ari ni wileyo; shisaambwa shiibi sharurire khu mwana woowo.” 30Kila umukhasi uyo elayo ingo, wanyoola nga umwaana weewe ali mu bulili wakonele, nga shisaambwa shiibi isho shamururirekho shatsiile.

Yezu awonesa umumiinyi nalundi umimikila

31Yezu wama i Tulo, wabirira mu Sidoni, nga alola kwe inyaantsa Galilaaya. Wabirira mu shisiintsa she biriimba liikhumi, shishilaangibwa shiri Dekapoli. 32Kila bamureerera umusaani nga ali umumiinyi, nalundi amimikila. Bekontselela Yezu bari amuwambekho kamakhono amuwonese.

33Yezu wahamba umusaani uyo wamwisa andulo, baaba bonyene busa. Kila ara tsintsala tseewe mu maru k'omusaani. Nga wamalile, wafuutsa kamare wakahakha khu lulimi lw'omusaani tsana. 34Wenyusa tsimoni walola mu ngaaki, kila ekhiliisa kumwoyo nga aloma ari, “Efufata,” shishimanyisa shiri, “Ni wikukhe.” 35Khangu akho, kamaru keewe kekukha, ni lulimi lwakangulukha, wananikha khukanikha bulayi.

36Yezu wabakhonyakilila ari balekhe khuboolela umuundu yeesi ta. Ne nga esi eloosela khubakhonyakilila, ni nabo esi beloosela khusalanisa bilomo ibyo. 37Shishiindu shino shabeyangisa naabi kila baloma bari, “Buli shiindu sheesi akhola shili shilayi. Bona ekula ni kamaru ke bamiinyi bawulila, ni babamimikila bakanikha.”

Currently Selected:

Mariko 7: LCE

Highlight

Copy