Mariko 5

Umusaani uwaba ni kimisaambwa kimibi

(Mat 8.28-34; Luk 8.26-39)

1Yezu ni baloondeleli beewe bakhalisa inyaantsa ilaangibwa Galilaaya, baatsya boola mu shiriimba shishilaangibwa shiri Gerasene. 2Yezu n'amala busa ari khurura mu likhoŋolo, umusaani uwabakho kimisaambwa kimibi watima wamwiitsayo. 3Umusaani yuno abe amenya mu mafuluma abe esi basiikha baafu. Abe umusaani yuno wakhasila ilala babaandu boosi, nga imbaawo unyala wamubowa ta, akhaba abe khuraambisa kiminyololo. 4Abe bakhakakho khaale khumubowa bikyele ni kamakhono nga baraambisa kiminyololo, ne abe bino byoosi abikhalaka wabinyusakho. Ari abe imbaawo umuundu uli ni kamaani ke khumuliindila mu shifo shitweela ta. 5Abe kumuusi ni mu shilo ekhala mu biliindwa ni mu njiinji, nga akukuula nalundi nga umweene ekhalaka ni kamabaale.

6Umusaani yuno n'abona Yezu nga ashiili aleeyi, watima wamutsyayo, wafukhama asi. 7Kila akukuula ni likono likali nga aloma ari, “Yezu, Umwaana uwa Wele uwe Angaaki Naabi, ise umeentsakho shiina? Mu lisiina lya Wele, nakhwikontselele ukhambonabonisa ta.” 8Umusaani yuno aloma aryo khulwekhuba abe Yezu walakiile shisaambwa shiibi khumururakho.

9Yezu wamureeba ari, “Iwe bakhulaanga bari naanu?”

Umusaani welamo ari, “Ise banaanga bari liiye likali; khulwekhuba khuli bakali.” 10Kila umusaani ekontselela Yezu ari akhakitimisa kyatsya ta.

11Ne abawo lituuli lye tsimbiitsi, nga lili mu bikiingi nga tsilikho tsaaya. 12Kila kimisaambwa kimibi ikyo kikontselela Yezu kiri akisindikhe kitsye kingile mu mbiitsi itsyo. 13Yezu walomela kimisaambwa kimibi ari kitsye. Kimisaambwa kimibi ikyo kyarura mu musaani uyo, kyatsya kyenjila mu mbiitsi. Lituuli lyoosi lilyaba lyoolisa nga tsimbiitsi kimikaanda kibili, lyafulumukha, lyawungukha ilumya, lyaweela mu nyaantsa, tsaafwa.

14Babaayi be tsimbiitsi itsyo batima baatsya baboolela babaandu be mu shiriimba ni be mu byaalo kamakhuuwa kano. Babaandu nabo beetsa khubona shinaanu shishibelewo. 15Ni beetsa isi Yezu aba, babona umusaani tsana uwabakho kimisaambwa kimibi nga wekhaale awo, wakwaarire tsingubo, nga ari wekyelile umulamu. Ni babona shino, baaba ni khuurya. 16Abo babaabawo babona nga umusaani uwabakho kimisaambwa kimibi n'awonesebwa, ni bibyakholikha khu mbiitsi nga ni tsaweela mu nyaantsa, baboolela babaandu nga ni byaba. 17Kila babaandu barakikha khukhwikontselela Yezu bari arure khu shaalo shabwe atsye.

18Yezu n'aba nga aniina mu likhoŋolo ari atsye, umusaani esi awoonakho kimisaambwa kimibi kila amwikontselela ari atsye ni naye. 19Ne Yezu walekha khufukiilila ta, kila amulomela ari, “Kobolayo ingo isi balebe boowo, ubaboolele bibiindu bikali byeesi Umukasya akhukholele, nalundi nga n'akhuwambiile iwe shiisa.”

20Umusaani watsya waboolela babaandu be mu biriimba bibilaangibwa biri Dekapoli,#5.20 Dekapoli: Dekapoli shimanyisa biriimba liikhumi. Abe binyoolikhana ibwama nyaanga wa Samariya. bibiindu byeesi Yezu amukholela. Babaandu boosi beyaanga.

Umukhaana wa Yayiro n'umukhasi uwaba umulwaale

(Mat 9.18-26; Luk 8.40-56)

21Lwanyuma nga Yezu wamalile khukhwinjila mu likhoŋolo wakhalisile watsiile shanjelekha we nyaantsa, nga ashiili khu ndulo khwayo, babaandu bakali babusanila esi aba. 22Mutweela khu baraangilisi be mu ntsu ye khukhwisaayilamo, nga lisiina lyeewe bari Yayiro, woola watsya isi Yezu. Kila afukhamila asi ibweeni wa Yezu. 23Wamuloomba nga amuloma ari, “Umwaana wase umukhaana ali buubi, akana khufwa! Ni wiitse umurekho kamakhono kyoowo nga umuloombela, umuwonese.” 24Aryo Yezu watsya ni Yayiro. Ne lituuli lye babaandu likali lyamulondelela nga liyindakana.

25Mu lituuli umwo mwabamo umukhasi abe uwalwala khukhwibeena khwe kamafuki khumala kimiiko liikhumi na kibili. 26#Tob 2.10Abe umukhasi yuno watsya mu bakaangi bakali ari bamuyeete, ne abe bamuloosela busa butsiina. Abe wasasula tsinusu tseewe tseesi aba ni natso nga akana ari awone, ne abe butsiina bwiloosela busa.

27Umukhasi yuno abe wawulila bibiwaamba khu Yezu. Nashiryo wetsila mu lituuli nga amila imukoongo wa Yezu, watiila khu ngubo yeewe. 28Khulwekhuba abe walomele mu mwoyo kweewe ari, “Abe nakhatiila busa khu ngubo yeewe shonyene, kane imbonesewe.” 29Khaangukho khukhwibeena khwe kamafuki khwakama, n'umweene wewulila mu mubili ari wawonisibwile butsiina bweesi aba ni nabwo.

30Ni abweene awo Yezu wewulila nga kamaani mwibili mweewe kamuwamo. Kila ashuukha areeba lituuli lye babaandu ari, “Naanu uwaambile khu ngubo tsase?”

31Kila baleekelwa beewe bamuloma bari, “Waboone lituuli lye babaandu nga ni lilikho liyindakana, unyala uryeena wareeba uri ‘Naanu uwumambilekho?’ ” 32Ne Yezu umwene wanyukanyuka khubona naanu ushikholile.

33Kila umukhasi tsana nga wamanyile bulayi shishiindu shimukholikhilekho, wetsa nga anikina nalundi nga wariire, wafukhama ibweeni wa Yezu. Aryo waboolela Yezu bya ŋali byoosi nga ni byaba.

34Yezu walomela umukhasi tsana ari, “Mukhaana wase, lwe khufukiilila khwoowo wawonisibwile. N'utsye ni lukoosi, ni bubukhutsiina bwawonele.”

35Yezu n'aba nga ashiloma aryo, abawo babaandu babaama mungo mwa mw'omuraangirisi tsana bamuboolela bari, “Umwaana woowo wafwiile. Shiina kila utaambisa Umuleekeli lundi?”

36Ne Yezu walekha khukhwinaana khu byeesi baloma ta, ne walomela umuraangilisi uyo ari, “Ukheyembelela ta. Iwe ba busa ni khufukiilila.”

37Yezu walekha khufukiilisa umuundu yeesi khumuloondakho ta, akhali Petero, Yakobo ni yaayawe Yohana.

38Ni boola ango w'omuraangilisi, babona babaandu bakali nga besasala, balila, bakhupa kimibala. 39Kila Yezu enjila mu ntsu abareeba ari, “Lwashiina mwisasala nga mukhupa kimibala? Umwaana siwafwile ta, akhali ndi alikho akona busa liilo.” 40Babaandu bamutsekhelela.

Lwanyuma Yezu waloma babaandu boosi khurura antsye. Wayila paapa ni maayi b'omwana, ni baleekelwa beewe bataru, baatsya isi umwaana umufu aba. 41Wahaamba kumukhono kw'omwaana kila amuloma ari, “Talitha, koum,” shishimanyisa mu lulomo lu Aramaika shili, “Namukhaana, yinyukha!” 42Khaangukho umukhaana wenyukha, warakikha khukyenda, khulwekhuba abe ali uwe kimiiko nga liikhumi na kibili. Buli mutweela weyaanga naabi. 43Yezu wabakhonyakilila ari bakhaboolelakho umuundu yeesi shishiindu shino ta. Wabaloma ari bawe umukhaana tsana she khuulya.

Currently Selected:

Mariko 5: LCE

Highlight

Copy