Luka 7
7
Yezu awonesa umwakaanisi w'omusilikhale
(Mat 8.5-13)
1Ulwo nga Yezu wamalile khukanikha bilomo bino byoosi isi babaandu, watsya i Kaperunaumu. 2Bona, abawo umusilikhale umukhulu we liihe lye basilikhale umu Roma, uwaba n'umukulwa weewe isi aba akana naabi, ne nga mulwaale, nga ali ambi khuufwa. 3Umukhulu yuno n'awulila bibiwaamba khu Yezu, warumanayo batweela khu bakhulu be Bayudaaya is'ali, nga amwikontselela ari etse awonese umukulwa weewe. 4Bakhulu bano biitsa isi Yezu, bamwikontselela naabi bari, “Umusaani uyu akhila buyeeti bwoowo. 5Lwekhuba akana naabi linaambo lyeefwe, nalundi niye uwakhwombakhila intsu iye khukhwisaayilamo.”
6Aryo Yezu watsya ni nabo. Ne n'aba nga ali ambi khukhwoola khu ntsu, umukhulu we basilikhale tsana wamurumanila basaale beewe, nga amuloma ari, “Umukasya ukhetaambisa ta, lwekhuba ise sishintsakhila iwe khukhwinjila mu ntsu yase ta; 7namwe nase samweene sinambaasa nga nakhila khukhwiitsa is'uli ta. Ne loma bulomi ilomo, n'umukulwa wase kane awone. 8Ni nase samweene ndi umuundu uwulibwa, lundi nase ndi ni basilikhale beesi imbila asi ase. Ne ni noma mutweela ndi, ‘Tsya,’ atsya. Ne ni nomela ukuundi ndi, ‘Yiitsa,’ etsa. Ni noma umukulwa wase ndi, ‘Khola shino,’ ashikhola.”
9Yezu n'awulila bilomo bino, wamwiyaanga naabi, ne nga washukhiile lituuli lye babaandu babamuloondelela, wabaloma ari, “Abeele ishiili khubonakho khufukiilila nga khuno ta, akhaba ni mu Isiraeli ta!”
10Baryo basaani babarumaniwa belayo mu ntsu y'omusilikhale umukhulu, banyoola nga umukulwa weewe uwaba umulwaale wawonile.
Yezu enyusa umusoleeli wa namulekhwa
11Lwanyumakho lwe mbuka ndiini, Yezu ni baleekelwa beewe ni lituuli lye babaandu bamuloondakho, watsya mu shiriimba shishilaangibwa Naini. 12Ne nga ali ambi khukhwoola khu shilibwa she shiriimba, bona, babaandu nga basutile umufu bamurusa; umufu uyu uwaba umwaana isi maayi weewe asaala mutweela yenyene, nalundi nga maayi weewe aba namulekhwa. Ni babaandu bakali be mu shiriimba nga bali ni naye. 13Umukasya n'abona namulekhwa yuno, wamusaasila naabi, wamuloma ari, “Ukhalila ta.”
14Aryo Yezu watsya wawamba khu sanduuku, ni naabo babaaba basutile beema. Yezu waloma ari, “Musoleeli, ikhuloma ndi yinyukha!” 15Umusaani uwaba wafwiile, wenyukha wekhala, wananikha khukanikha, Yezu wamukoboselayo maayi weewe.
16Boosi buuri bwabawamba, babuyila Wele, nga baloma bari, “Umuŋoosi we kamaani wenyukhiile musiifwe!” Luundi baloma bari, “Wele wetsile khuyeeta babaandu beewe.”
17Kamakhuuwa kano kasalanila mu Yuda mwoosi, ni mu bisiintsa bibibotokhelelewo.
Baarume babaama isi Yohana Umubatisa
(Mat 11.2-19)
18Baleekelwa ba Yohana Umubatisa, bamuboolela bino byoosi bibiwaamba khu Yezu. Aryo kila Yohana alaangakho babili khu baleekelwa beene. 19Yohana Umubatisa wabarumana isi Umukasya, khumureeba bari, “Iwe niye uyo abe isi khuliindilila uli khukhwiitsa, namwe khuliindilileyo ukuundi?”
20Baleekelwa bano ni beetsa isi Yezu, bamuloma bari, “Yohana Umubatisa wakhurumanile is'uli, nga aloma ari, ‘Iwe niy'oyu abe isi khuliindilila uli khukhwiitsa namwe khuliindilileyo ukuundi?’ ”
21Ni mu mbuka nyeneyo, Yezu wawonesa babaandu babaaba balwaale, ni butsiina, ni kimisaambwa kimibi, nalundi wabimbula babofu tsimoni tsaawe. 22#Isay 35.5,6 Isay 61.1Aryo kila elamo baarume ba Yohana Umubatisa ari, “Ni mwiileyo muboolele Yohana bibiindu byoosi byeesi muboone lundi byeesi muwuliile: babofu babona, babalemala bakyeenda, ibo babaali ni bulwaale bwe bikeenge bawonesebwa, bamiinyi bekukha mu maru bawulila, baafu balamusibwa, ni Kamakhuuwa Kamalayi ari kaboolelwa isi bataambi. 23Nashiryo ali ni khabi uyo ukhantsikanakana ise ta.”
24Lwanyuma nga baarume ba Yohana Umubatisa batsiile, Yezu wananikha khukanikha khu biwamba khu Yohana isi lituuli lye babaandu ari, “Inywe ni mwatsya isi Yohana mu mubiimbi, shiina sheesi mwatsiililila khubona? Lukholo luluteengasibwa ni mbewo? 25Ne shiina shesi mwatsiililila khubona? Umuundu ukwarire tsingubo tsinyenanyena? Taawe! Ibo babakwaara tsingubo tsinyenanyena naabi ni khuuba ni buyiindifu bukali, banyoolekhana mungo mw'omuyiinga. 26Ne shiina sheesi mwatsiililila khubona? Umuŋoosi? Ee, ilala mbaboolela ndi niye afuurira ilala n'umuŋoosi. 27#Mal 3.1Yohana oyu niye isi bibyaronebwa bilomakho biri, ‘Bona, indirumana umurume wase iburaangisi woowo, uliŋoonaŋoona intsila nga ushiili khukhwiitsa ta.’ 28Mbaboolela ndi, mu baandu boosi babasaalikha mu shiibala, mbaamo na mutweela ufuura Yohana Umubatisa bukhulu ta. Ne uyo ufuura bukyeekhe mu Buyiinga bwa Wele, niye umukhulu khufuura Yohana.”
29 #
Mat 21.32; Luk 3.12 Babaandu boosi, atweela ni babusanisi be kumusolo, ni bawulila bilomo bya Yezu, bafukiilila intsila ya Wele ikhosefu lwekhuba nibo baaba babatisibwa ni khubatisibwa khwa Yohana. 30Ne Bafarisaayo ni baleekeli be kamakaambila ka Musa baloba shitsiililwa sha Wele isi nibo, nashiryo bekaana khubatisibwa ni Yohana.
31Yezu weloosela khuboolela ibo babaaba bamurekeeresa ari, “Shiina sheesi unyala khufwananisa ni kumuboolo kuno? Nalundi baliinga shiina? 32Bali nga babaana babekhala mu khatale, nga balaangana ni bashaawe, nga baloma bari, ‘Khwabakhupila kimilele, ne mwalekha khushina ta, khwabakhupila tsimuungu, ne mwalekha khwantsuwa ta.’ 33Yohana Umubatisa etsa, nga abuya intsala nga s'alya biilyo, nalundi nga s'anywa iviini ta, inywe mwaloma muri, ‘Umusaani uyu, alikho shisaambwa shiibi.’ 34Umwaana w'Omuundu n'etsa nga alya, nalundi nga anywa, inywe mwaloma muri, ‘Lola umusaani uyu uwe kumukhabyo, umumeeli, lundi musaale we babusanisi be kumusolo, ni baboonaki.’ 35Ne kamakyesi ka Wele kokyesanisibwa khuuba kelala isi baloondeleli baako babeene babakakaanila.”
Yezu nga ali mungo mwa Simoni Umufarisaayo
36Lulwoola mutweela khu Bafarisaayo waloomba Yezu khuulya biilyo ni naye. Aryo Yezu watsya mu ntsu y'Omufarisaayo wikhala ashikabilo she biilyo alye. 37#Mat 26.7; Mrk 14.3; Yoh 12.3Abawo umukhasi mutweela mu shiriimba isho uwaba wamenya mu bwonaki, n'amanya ari Yezu alikhuulya mu ntsu y'Omufarisaayo, wareela i kyupa iye bifura bibiwunya bulayi, 38wamayo wimikha imukoongo wa Yezu, ambi ni bikyele byeewe, nga alila. Waronyesa kamasika keewe khu bikyele bya Yezu. Aryo warakikha khubikhuyakakho ni litsuune lyeewe, wakwa khu bikyele byeewe, wabihakhakho bifura tsana bibiwunya bulayi ibyo. 39Umufarisaayo uwaba walaangile Yezu n'abona aryo, waloma mu mwoyo kweewe ari, “Ilala umusaani yuno aba Umuŋoosi, khali wamanyile umukhasi umuwambakho oyu nga n'afwaana, nalundi khali wamanyile bulamu bweewe nga ni buli bwe bubwonaki.”
40Yezu wamuloma ari, “Simoni, indikho ni lomo yeesi ingana khukhuboolela.” Simoni welamo ari, “Umuleekeli, imboolele khubone.”
41Yezu waloma ari, “Abawo umusaani mutweela uwaba ni babaandu babili beesi abaantsa. Mutweela nga amubaantsa dinari bitoondo biraano, n'ukuundi nga amubaantsa kamakhumi karaano. 42Ne khu boombi mbaawo uwanyala khumuwanda likobi ilyo ta. Nashiryo umusaani uyo wabiyakhila boombi. Aso, khu boombi, naanu ukana amukane khufuurisakho?”
43Simoni welamo ari, “Nambaasa ndi uyo isi eyakhila likobi liikali.”
Yezu wamuloma ari, “Wakhalilewo bulayi.”
44Nga Yezu washukhiile isi umukhasi, walomela Simoni ari, “Waboone umukhasi yuno? Nga ise ni ninjiile mu ntsu yoowo, iwe s'umbeele kameetsi ke khusiinga bikyele byase ta, ne umukhasi yuno watosile bikyele byase ni kamasika keewe, lundi wabikhuyakakho ni litsuune lyeewe. 45Iwe s'ungwilekho mu shifuba ta, ne umukhasi yuno khukhwaama nga ni enjiile ano, wakhwakama khuwaamba khu bikyele byase ta. 46Iwe s'umbakhilekho bifura khu murwe kwase ta, ne umukhasi yuno wambakhile bikyele byase bifura bibiwunya bulayi. 47Ni nashiryo ise ikhuboolela iwe ndi, lwe khukana khweewe khukali, bibyonako byeewe bikali byamwiyakhiilwe. Ni nooyo uwiyakhilwa khakyeekhe, khukana khweewe nakhwo khuba khukyeekhe.”
48Kila Yezu waloma umukhasi ari, “Weyakhiilwe bibyonako byoowo.”
49Ne babaandu babekhala ni naye nga balya barakikha khuloma bonyene na bonyene bari, “Naanu uyu, uwiyakhila bibyonako?”
50Yezu waloma umukhasi ari, “Khufukiilila khwoowo khwakhuwonesele, n'utsye mu lukoosi.”
Currently Selected:
Luka 7: LCE
Highlight
Share
Copy
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
