Luka 20

Yezu bamureeba khu bunyala bweewe

(Mat 21.23-27; Mrk 11.27-33)

1Khu shifukhu shitweela mu bifukhu ibyo, Yezu n'aba nga aleekela babaandu mu Lisaayilo Likhulu, lundi nga aboolela kamakhuuwa kamalayi, basaayi bakhulu ni baleekeli be kamakaambila ka Musa, atweela ni basakhulu beetsa is'ali, bamuloma bari, 2“Khuboolele, uli na bunyala shiina bubukila iwe wakhola bibiindu bino byoosi? Naanu uwakhuwa iwe bunyala buno?”

3Yezu wabelamo ari, “Nase khambareebe shireebo; ni mumboolele, 4Khubatisa khwa Yohana khwama mwikulu namwe khwama mu baandu?”

5Kila bakanikhanamo bonyene na bonyene nga baloma bari, “Ni kane khulome khuri, khwama mwikulu, kane akhulome ari, ne lwashiina mukhamufukiilila? 6Ne ni kane khulome khuri, khwama mu baandu, babaandu kane bakhuupe kamabaale lwekhuba bashiŋaŋasila ilala bari, Yohana Umubatisa aba Umuŋoosi.”

7Kila belamo bari, “Sikhumanya ena esi khwama ta.”

8Ni Yezu naye wabelamo ari, “Ni nase singene imbaboolele nywe bunyala shiina bubukila nakhola bibiindu bino ta.”

Lusimo lwe baraambi mu mukuunda:

(Mat 21.33-46; Mrk 12.1-12)

9 # Isay 5.1 Nga bashirekeeresa bilomo bino, Yezu weloosela nga ababoolela lusimo luno ari: “Abawo umusaani mutweela uwabyaala kumukuunda kweewe kwe kimisabibu, wakupaangisa isi balimi, watsya mu shiibala she aleeyi, khumalayo imbuka. 10Ne imbuka ye likyesa ni yoola, warumana umwakaanisi weewe mutweela isi balimi ari bamuwekho khu byaamo bye mu mukuunda kwe kimisabibu. Ne balimi beesi apaangisa, bakhupaka umwakaanisi uyo, bamuwoona busa na shiindu twa. 11Aryo weloosela khurumanayo umwakaanisi ukuundi, ne ni nooyo bamukhupa, bamubirisaka shifwabi, bamuwoona busa na shiindu twa. 12Lundi ndi warumanayo umwakaanisi uwe khataru, oyu bamukhupa kamakuma, bamukholowa ibulafu.

13“Lwanyuma umweene mukuunda waloma ari, ‘Ne ari kane ikhole ndyeena? Kane indumeyo umwaana wase isi ingana naabi, winyoola niye kane bamuwe shiriifwa nga bamuboone.’

14“Ne balimi ni baabona umwaana bekutila atweela bonyene bari, ‘Oyu niye umusikha, ni mwiitse khumwiire, busikha buno manya bwaba bubweefwe.’ 15Baryo bamuwamba bamutuuma ibulafu we kumukuunda, bamwiira.”

Lwanyuma Yezu wabareeba ari, “Mwambaasa muri balimi ibo, umweene mukuunda alibakhola aryeena? 16Aliitsa ahese balimi ibo, ni kumukuunda akuwe babaandu babaandi.”

Ne babaandu ni bawulila bilomo bino, baloma bari, “Taawe, bikhaba biryo ta.”

17 # Zab 118.22 Yezu wabalola kila abaloma ari, “Ne shiina sheesi shisharonebwa shino shimanyisa shishiloma shiri, ‘Libaale lyeesi babombekhi bekaana nilyo lilyekyela lye musoonda?’ 18Buli mundu yeesi wukwa khwibaale lino, alifuniakikhaka mu bipatu, ni nooyo isi libaale lino lilikwakho, lilimubulyungulaka busa.”

Shireebo khu bye khuwaanda kumusolo

(Mat 22.15-22; Mrk 12.13-17)

19Baryo baleekeli be Kamakaambila ka Musa, ni basaayi bakhulu, baweentselesa isaambo yeesi banyala bamuwambilamo khangu akho, lwekhuba baamanya bari, akanikha lusimo luno nga lubawamba khu nibo. Ne baarya babaandu. 20Ne ni baaba nga bashimwayilisa baryo, barumana babeeyi babekalusa khuuba babaandu balayi, nio akile bamuwambilise mulomo tseewe, nio bari bamuwaaneyo isi buwuli bwa gafana. 21Baryo babeeyi bano babakhakilisa bamureeba bari, “Umuleekeli, ifwe khwamanya khuri iwe uleekela lundi ukanikha bya ŋali, ate ndi s'uromboosa mu baandu ta, ne uleekela kumukhoosi kwa Wele nga wimikha mu ŋali. 22Nashiryo, khuboolele, shilayi ifwe khuuwa kumusolo isi Kayisaali, namwe ta?”

23Ne Yezu waba nga wamanyile luwomelo lwe mu myoyo kyaawe, wabaloma ari, 24“Ni muntsokese idinari. Shifwani shino shishiilikho, ni burone buno bya naanu?”

Nabo bamwiilamo bari, “Bya Kayisaali.”

25Kila Yezu abelamo ari, “Aso, bya Kayisaali, ni mubiwe Kayisaali, ni bya Wele, mubiwe Wele.”

26Nabo balekha khunyalisa khumuwambilisa mwiibyo byeesi aloma mu lubuula ta. Ne beyaanga busa ibyo byeesi abelamo, basila busa.

Shireebo khu bye khulamukha mu bafu

(Mat 22.23-33; Mrk 12.18-27)

27 # Bur 23.8 Ulwo balala khu Basadukaayo nga nibo babaloma bari, mbaawo khulamukha khwe baafu ta, beetsa isi Yezu, nabo bamureeba bari, 28#Maka 25.5“Umuleekeli, ifwe Musa akhuronela likaambila ari, ‘wandaaye w'omundu n'afwa, ne walekha namulekhwa, ne nga bakhusaala babaana ta, wandaaye w'omusaani umufu, akha wiila khu namulekhwa, asaalile wandaaye babaana.’ 29Aso abaawo be buulebe musaafu; umukiboole wakhwa umukhasi, ne wafwa nga si basaalile babaana ta. 30Wandaaye uwe khabili wamwiilakho, 31n'uwe khataru naye aryo, khukhwoolesa musaafu boosi ni bamwiilakho ne baafwa nga mbaawo umwaana ta. 32Lwanyuma lwa boosi, umukhasi naye wafwa. 33Ari iwe wambaasa urye? Imalamukha ke bafu, umukhasi yuno aliiba mwene wa naanu khu bano? Lwekhuba boosi musaafu baaba ni naye nga umukhasi wawe.”

34Yezu wabelamo ari, “Babaandu be khu shiibala khuno, bakhwa lundi bakhwalikha. 35Ne ibo babaakha khulamukha khukhwaama mu bafu babe balamu mu shiibala isho, si balikhwa namwe si balikhwalikha ta, 36lwekhuba baliiba si bashiifwa lundi ta. Ne baliiba nga bamalayika lundi baliba babaana ba Wele, lwekhuba baliba baalamukhile khukhwaama mu bafu. 37#Luky 3.6Ni Musa naye okesanisa ari baafu balilamukha khukhwaama mu bafu, nga n'okesana mu byaronebwa khu shitsakha she kamawa nga shaburukha; akanikha khu Mukasya ari, ‘Wele wa Ibulayimu, Wele wa Isaaka, lundi Wele wa Yakobo.’ 38Lwekhuba Wele niye s'ali Wele we baafu ta, ne ali Wele we balamu.”

39Batweela khu baleekeli be Kamakaambila baloma bari, “Umuleekeli walomele bulayi.” 40Baloma baryo lwekhuba mbaawo uwanyalisa khumureeba lundi bireebo bibiindi ta.

Shireebo shishiwamba khu Kristu

(Mat 22.41-46; Mrk 12.35-37)

41Lwanyumakho ndi, Yezu wabaloma ari, “Babaandu banyala baryeena khuloma bari, Kristu Umwitsukhulu wa Daudi? 42#Zab 110.1Daudi umweene mu burone bwe Tsizabuli aloma ari,

‘Umukasya aloma Umukasya wase ari,

yikhala khu mukhono kwase kumulayi,

43khukhwoolesa ni ndikalusa basiku boowo

khuuba shitsoloŋo sheesi usambakho bikyele byoowo.’

44Ari bona, noola Daudi umweene amulaanga ari Umukasya, ari anyala aryeena khuuba umwaana weewe?”

Yezu areewula khubiwaamba khu baleekeli

(Mat 23.1-36; Mrk 12.38-40)

45Awo babaandu boosi ni baaba nga bashimurekeeresa, Yezu waloma baleekelwa beewe ari, 46“Ni mwitsililise baleekeli be Kamakaambila ka Musa babakana naabi khukyenda nga bakwaarire tsingubo tsindeeyi, lundi bakana naabi khusheesebwa mu butale, ni khukhwikhala khu bitsoloŋo bye angaaki mu ntsu tsye khukhwisaayilamo, ni mu bifwo bye shiriifwa khu mayiiya. 47Lundi banuula bibiindu mu ntsu tsye banamulekhwa, lundi besaaya Wele lwe khukhwiyokesana nga baloomba lukali. Babeenebo balikhalilwa kumusaango kukufuura bukali.”

Currently Selected:

Luka 20: LCE

Highlight

Copy