Luka 2

Khusaalikha khwa Yezu

1Mu bifukhu ibyo, Kayisaali Agusito warusa likaambila mu baandu be mu buyiinga bweewe bwoosi ari batsye khukhwiwandikhisa. 2Khuno nikhwo khuubala babaandu khukhwanyoowa khubawo nga Kuriniyo niye uwula Siriya. 3Nashiryo buli mundu watsya khukhwiwandikhisa mu shiriimba she waawe.

4Ni Yozefu naye wama i Nazareti shiriimba she Galilaaya, watsya i Yuda, mu shiriimba sha Daudi shishilaangibwa Betelehemu. Yozefu atsyayo lwekhuba naye umweene aba uwe munda nalundi uwe mu shikuuka sha Daudi. 5Yozefu atsya khukhwiwandikhisa ni Mariya esi aba akanikhisa, n'enga Mariya aba ali shisoombo. 6Ne ni baaba nga bali iyo, bifukhu bya Mariya bye khusaala byoola. 7Aryo wasaala umwaana weewe umukiboole umusiinde,#2.7 Mu Bayudaaya umwaana umusiinde umukiboole bamuwaanatsakayo isi Umukasya. wamubiimbilila mu ngubo tsye babaana baŋaalye, wamwalisa imukali mwikhoŋolo mweesi bibyaayo biliila, lwekhuba si babona shiifwo mu bukono bwe bakyeni ta.

Babaayi ni Bamalayika

8Ne mu shaalo isho, yabayo babaayi be kamasheese mu maayilo, babaaba baliinda kamasheese kaawe shiilo. 9#Tob 5.4Malayika w'Omukasya wababonekhela, ni shiriifwa sh'Omukasya shabafuusilisa nga shimulikhamulikha, nabo baarya naabi. 10Ne Malayika wabaloma ari, “Mukharya ta, lwekhuba bona nabarereere kamakhuuwa kamalayi ke kumwikhoyo kumukali kukuliba n'isi babaandu boosi. 11Shaleelo shino, mu shiriimba sha Daudi, mwasaalikhilemo Umuwonesi weenywe, niye Kristu Umukasya. 12Khano nikho khakane khabe khabonelo isi muli: kane mubone umwaana umuŋaalye wabiimbiwile mu ngubo, nga walisibwile imukali, mwikhoŋolo mweesi bibyaayo biliila.”

13Lubaluba abawo bamalayika babaandi be mwiihe lye mwikulu, nga bali ni malayika uyo, nga baruuya Wele, nga baloma bari,

14“Shiriifwa shibe isi Wele Uli Angaaki Lukali, ni mu shiibala lukoosi lube mu baandu boosi beesi Wele asiima.”

15Nga bamalayika baarurirewo isi babaayi bano belileyo mwikulu, babaayi baloma bari, “Khakhutsye i Betelehemu, khubone shishiindu shino shishibeleyo, sheesi Umukasya ama khu khumanyisa.”

16Baryo beyunakho baatsya wangu, babona Mariya ni Yozefu, n'Umwaana umuŋaalye nga bamwalisile imukali mwikhoŋolo. 17Babaayi ni baamala khubona Umwaana, baboolela babaandu bababawo shilomo sheesi Malayika akanikha khu mwana uyo, 18ni naabo boosi babawulila belaliila lwe'byo byeesi babaayi baakanikha. 19Ne Mariya waliinda bilomo ibyo byoosi, nga abyambaasakho naabi mu mwoyo kweewe. 20Babaayi belayo, nga babuyila lundi nga baruuya Wele lwe'byo byoosi byeesi bawulila lundi babona, nga byoosi bili nga malayika n'ababoolela.

Yezu bamutwiikha lisiina

21 # Lev 12.3 Luk 1.31 Bifukhu shinaane ni byoola bye khumukhebelamo imbalu, bamutwiikha lisiina bari Yezu; lisiina lyeesi malayika amuwa nga ashiili khukwa ni munda ta.

Yezu bamuwanayo mu Lisaayilo Likhulu

22Ne bifukhu ni byoola bye khukhwiŋoona nga kamakaambila ka Musa ni kaloma, Yozefu ni Mariya bayila umwaana i Yerusalemu khumuwanayo isi Umukasya, 23#Luky 13.2,12nga ni sharonebwa mu makaambila k'Omukasya shiri, “Buli shikiboole shiseetsa, kane shibatsake shikhosefu isi Umukasya,” 24#Lev 12.6-8ni khuwanayo tsisaayilo nga baloondelela byeesi kamakaambila k'Omukasya kaloma: bukuruku bubili namwe buwuusi bubwaana bubili.

25Ne khu mbuka nyene iyo mu Yerusalemu mwabamo umusaani lisiina lyeewe Simeoni, umuundu uwaba umulayi, lundi nga arya Wele. Umusaani uyu aba waliinda khubona khuwonesebwa khwa Isiraeli, nalundi aba wayitsula Umwoyo Umukhosefu. 26Umwoyo Umukhosefu aba wamubimbulila ari s'alifwa nga ashiili khubona khu Kristu w'Omukasya ta. 27Simeoni waraangililwa n'Umwoyo Umukhosefu, wiitsa mu Lisaayilo Likhulu. Basaali ni bareera umwaana khumukholela byeesi kamakaambila ka Musa kaloma, 28Simeoni wasuta Umwaana mu makhono keewe, wabuyila Wele nga aloma ari,

29“Aso Umukasya, ari n'usiibule

umwakaanisi woowo atsye mu lukoosi, nga ni iwe ni wasuubisa,

30lwekhuba tsimoni tsase tsyaboone buwonesi bubwama is'uli,

31bweesi warengekharengekha mu moni tse babaandu boosi,

32 # Isay 42.6; 49.6; 52.10 khuuba buwaanga kwe khubimbulila shiisa shoowo isi Banaambo,

ni khureera shiriifwa shoowo isi babaandu boowo ba Isiraeli.”

33Paapa ni Maayi b'Omwana beyaanga lwe bilomo byeesi Simeoni amulomakho. 34Aryo Simeoni wabaloombela ikhabi, ne walomela Mariya ari: “Umwaana yuno warobolebwele ni Wele, lwe khukhwiisa asi baalala asi ni babaandi khulamukha khukhwaama mu bafu khu bakali mu Isiraeli, lundi aliiba khabonelo khakhaama isi Wele kheesi balikhaandisa, 35nio bimoonyo bye bibyambaaso bye kimyoyo kye babaandu bakali bibimbuliwe. Ni kumutaambo kumwooki kukuuli nga lurima, kuliwuna kumwoyo kwoowo.”

36 # Yuds 8.4,5 Abawo naye umuŋoosi uwekhasi ulaangiwa Ana, umukhaana wa Fanueli, uwe mu shikuuka sha Aseri. Anna aba umuloosi, ne mu bukhaana bweewe, abaakho n'umuseetsa mu bukhwaale khumala kimiiko musaafu kyonyene, 37ne lwanyuma lwayo wekyela namulekhwa, nga ari khu mbuka yino aba wayolesa kimiiko kamakhumi shinaane na kine kye bukhulu. Niye s'aruraatsakakho Mwisaayilo Likhulu ta, aba nga esaaya Wele shiilo ni kumuusi, nga abuya ntsala lundi nga aloomba. 38Mu mbuka nyeneyo nga Yozefu ni Mariya ni Yezu bali Mwisaayilo Likhulu, Anna naye woola isi bali, wabuyila Wele, wakanikha khu mwana, nga aboolela boosi babaaba baliindilila Wele khusikula Yerusalemu.

39 # Mat 2.23 Nga Yozefu ni Mariya bamalile khukhola byoosi nga kamakaambila k'Omukasya ni kaloma, bakobolayo i Galilaaya, mu shiriimba she waawe i Nazareti. 40Umwaana watsowa weloosela khuuba ni kamaani, witsusibwa ni kamakhula, ni bubweela bwa Wele bwamubatsakakho.

Yezu nga ali mu Lisaayilo Likhulu

41 # Luky 12.1-27; Maka 16.1-8 Abe buli mwiiko, basaali ba Yezu batsyatsaka i Yerusalemu khuuba khu Mayiiya ke Khubirakho. 42Ne Yezu n'aba nga wolisile kimiiko liikhumi na kibili kye bukhulu, baatsya ni naye i Yerusalemu khu mayiiya nga isaambo yaawe ni yaba. 43Nga bifukhu bye kamayiiya byaweelekho, basaali beewe baaba bakobolayo ingo, Yezu warama mu Yerusalemu. Ne basaali beewe balekha khushimanyakho ta. 44Ne nibo ni bambaasa bari ali mwituuli lyaawe, nashiryo bakyeenda lukyeendo lwe shifukhu shitweela. Ne lwanyuma barakikha khumuweentsa mu balebe, ni mu basaale baawe. 45Ne ni balekha khumunyoola ta, bakobolayo i Yerusalemu, nga bamuweentsa. 46Lwanyuma lwe bifukhu bitaru, bamunyoola wikhaale mu Lisaayilo Likhulu akari mu baleekeli, nga abarekeeresa lundi nga abareeba bireebo. 47Boosi babaamuwulila beyaanga lwe kamakyesi ni khukhwiilamo khweewe. 48Basaali beewe ni baamubona basamilila busa. Kila maayi weewe amureeba ari, “Mwana wase, lwashiina kila ukhukholile ifwe uri? Lola paapawo ni nase khubeele khweyembeleele naabi nga khukhuweentsa.”

49Naye wabakobolamo ari, “Lwashiina kila mubeele mumeentsa? Simwamanyile muri shintsakhila ise khuuba mu ntsu ya Paapa?” 50Ne nibo balekha khumanya bulayi sheesi abelamo ta.

51Lwanyuma Yezu wakobolayo ni nabo i Nazareti, wabawulilatsaka. Ne maayi weewe waliindatsaka bilomo ibyo byoosi mu mwoyo kweewe. 52#1 Sam 2.26; Nikh 3.4Aryo Yezu watsowa mu mubili ni mu makyesi, nga akanibwa ni Wele ni babaandu.

Currently Selected:

Luka 2: LCE

Highlight

Copy