Luka 19

Yezu ni Zakayo

1Yezu ni enjila mu Yeriko, aba nga abiramo busa. 2Mu shiriimba umwo, mwabamo umusaani ulaangiwa Zakayo, uwaba umukhulu we babusanisi be kumusolo, uwaba umuyindifu naabi. 3Niye wakhalawo khubonakho Yezu nga n'ali, ne walekha khunyalisa ta, lwe babaandu bakali, ate niye abe ali umuundu umwiimbi. 4Kila atimaka, waraangila ibweeni, waniina khu kusaala kukhuyu, nio akile amubone, lwekhuba Yezu aba alikhuutsya khubirira khu ntsila iyo.

5Ne Yezu n'ola mu shifwo isho, wakalama khu ngaaki waloma Zakayo ari, “Yiikha khaangu, lwekhuba shaleelo, shintsakhila khukhwikhala mu ntsu yoowo.” 6Naye khangu akho wiikha, wakaanila Yezu ni kumwikhoyo.

7Ne babaandu ni baabona shino beŋuluŋuunya, baloma bari, “Umusaani uyu watsiile nga umukyeni mu ntsu y'omundu umwonaki.”

8Ne Zakayo wenyukha weema, walomela Umukasya ari, “Bona Umukasya, aluno ari, shisiintsa she bibiindu byase kane ishiwe bataambi, ne noola nalyakhana shishiindu shabeene shoosi mu bubeeyi, kane ishilihe kimilundi kine khuminyisakho.”

9Yezu wamuloma ari, “Zakayo, shaleelo, buwonesi bwetsile mu ntsu yoowo muno, lwekhuba, umusaani yuno, naye umwaana wa Ibulayimu. 10#Mat 18.11Lwekhuba Umwaana w'Omuundu, etsa khuweentsa, ni khuwonesa, isho shishaba shakoraana.”

Lusimo lwe tsinusu

(Mat 25.14-30)

11Ni bawulila bilomo bino, Yezu weloosela khubaboolela lusimo luno lwekhuba aba ali ambi ni Yerusalemu, nalundi baaba bambaasa bari Buyiinga bwa Wele butsya khubonekhelawo khangu akho. 12Kila abaloma ari: “Abawo umusaani we shiriifwa uwatsya mu shiibala she aleeyi, khufuna buyiinga, nio lwanyuma akobole.

13Walaanga liikhumi khu bakaanisi beewe, wabawa tsinusu tsitsoola liikhumi nga buli mutweela inusu ndweela. Wabaloma ari, ‘Ni musubulemo tsinusu tsino, khukhwoolesa ni ndikobola.’

14“Ne babaandu be mu shiibala sheewe abe bamubiiyila, barumana burume khumwongakho esi atsya nga buloma buri, ‘Ifwe sikhukana umusaani uyu khuuba umuyiinga weefwe ta.’

15“Nga wamalile khufuna buyiinga wakobola. Walakila balaange babakaanisi batsana, beesi awa tsinusu, khukhwiitsa is'ali, nio amanye kamafuurisa keesi buli mutweela afuna mu khusubula.

16“Uwanyoowa weetsa ali, waloma ari, ‘Musakhulu, inusu yoowo isi wamba nafunilemo tsitsiindi liikhumi.’ 17Kila umukhulu weewe amuloma ari, ‘Uryoo! Wanyala iwe umwakaanisi wase umulayi, lwekhuba waba umwiyikinwa mu biindu bikyeekhe, aso ikhuwa bunyala khu biriimba liikhumi.’

18“Uwe khabili naye weetsa, waloma ari, ‘Musakhulu, inusu yoowo isi wamba nafunilemo tsitsiindi tsiraano.’ 19Uyo naye umukhulu wamuloma shitweela sheene ari, ‘Ni nawe ikhuwa bunyala khu biriimba biraano.’

20“Umwakaanisi ukuundi weetsa, waloma ari, ‘Musakhulu, lola, inusu yoowo iyishiina, abe nakibowa mu khakubo, nakisiikha. 21Nakhurya iwe, lwekhuba iwe, uli umuundu umuwangafu, wiyilila sheesi ukharawo ta, lundi ukyesa sheesi ukhaamiitsa ta.’

22“Umukhulu weewe wamwiilamo ari, ‘Iwe umwakaanisi umumoyaani, kane ikhukhalile kumusaango nga niima khu byamile mukhanwa mwoowo. Iwe ni wamanya uri ise ndi umuundu umuwangafu, nga niyilila sheesi ikharawo ta, lundi injesela esi ikhamiitsila ta. 23Shiina shishakhulobela iwe khuuwa babasubula inusu yase? Khali nga ni niitsile, nandifunilekho kamafuurisa.’

24“Kila aloma ibo babaaba beemile awo ari, ‘Ni mumurusekho inusu iyo, mukiwe uyo uli ni tsinusu liikhumi.’

25“Ne nibo bamwiilamo bari, ‘Musakhulu, ne niye ali ni tsinusu liikhumi khaale.’

26 # Mat 13.12; Mrk 4.25; Luk 8.18 “Umukhulu welamo ari, imbaboolela inywe ndi, buli mundu ulikho ni shishiindu shoosi, aliweebwa khumulooselakho, ne isi uyo ukhali nashoosi ta, ni khafwiiti abe kheesi ali nakho khalimurusibwakho. 27#Mat 25.14-30Ne basiku baase ibo, babakhaangana ise khuuba umuyiinga waabwe ta, ni mubareere ano, muberire mu moni tsase.”

Khukhwinjila mu Yerusalemu ni shiriifwa

(Mat 21.1-11; Mrk 11.1-11)

28Nga Yezu wamalile khukanikha bino, waraangila, waniina i Yerusalemu. 29Ne n'aba nga ali ambi khukhwoola i Betifage, ni Besaniya, khu lukiingi lulaangiwa bari lwe Kimisaala kimizeyituni, warumana babili khu baleekelwa beewe, 30nga abaloma ari: “Ni mutsye mu shaalo shibali ibweeni, ne nga mwinjilamo, kane munyoole ipunda nga yabowebwele awo, isi umuundu yeesi akhekhalatsakakho ta. Inyene iyo, mukyabule, mukinderere ano. 31Ne umuundu yeesi n'abareeba ari, ‘Lwashiina mukyabula?’ Inywe mumuloma muri, Umukasya akikana.”

32Abo beesi arumana baatsya banyoola nga n'abalomela. 33Ne ni baaba nga bakyabula, babeene be sikilya, babareeba bari, “Lwashiina mwabula ipunda iyo?”

34Nabo babelamo bari, “Umukasya akikana.”

35Baryo, bareera ipunda isi Yezu, bakyalakho bikwaaro byaawe, bayeeta Yezu khukikhalakho. 36Ne n'aba nga atsya, baalaka bikwaaro byaawe khu mukhoosi.

37Aryo n'etsa ambi ni Yerusalemu, khu mukhoosi kukwikhilila khu lukiingi lwe kimisaala Kimizeyituni, lituuli lyoosi lye baleekelwa beewe barakikha khubuyila Wele ni kumwikhoyo, mu makono ke angaaki, lwe bye kamakaanga byoosi byeesi baabona, nga baloma bari:

38 # Zab 118.26 “Wele awe ikhabi Umuyiinga uwitsila mu lisiina ly'Omukasya.

Lukoosi lube mwikulu ni shiriifwa shibe isi Wele.”

39Kila batweela khu Bafarisaayo babaaba mwituuli, baloma Yezu bari, “Umuleekeli, rafuyila baleekelwa boowo basile.”

40Yezu wabelamo ari: “Mbaboolela ndi, nibo ni kane basile busa, kamabaale kane kayokese.”

Yezu alila khulwa Yerusalemu

41Yezu ni esyeenda ambi ni shiriimba Yerusalemu, washibona, walila khulwe khushitsiinikhanila, 42nga aloma ari, “Iwe uba nga uwamanya khu shifukhu shino, shiina shinyala khukhureerera lukoosi! Ne ana ari shakhubisiwilekho. 43Bifukhu bilikhwoolela isi basiku boowo balikhwombekhelakho lukoba, bakhwibotokhelele, bakhuriiye khu buli lubeka. 44Balikhuupa ukwe asi, atweela ni babaandu boowo babaali mukari mu biseenge byoowo. Mbaawo ni libaale na litweela lyeesi balilekha khu libaale lyashe ta. Lwekhuba iwe siwamanya imbuka iye khukhwiitsa khwa Wele khukhukyeniyilakho ta.”

Yezu atsya mu Lisaayilo Likhulu

(Mat 21.12-17; Mrk 11.15-19; Yoh 2.13-22)

45Lwanyuma, Yezu wenjila mu Lisaayilo Likhulu, warakikha khuwoonamo ibo, babaaba bakulaana, 46#Isay 56.7; Yer 7.11nga abaloma ari: “Sharonebwa shiri, ‘Intsu yase kane ibatsake intsu ye khuloombelamo, ne inywe mwakikalusile khuuba lifuluma lye banuuli.’ ”

47 # Luk 21.37 Aryo buli shifukhu Yezu waba nga aleekelatsaka mu Lisaayilo Likhulu. Ne basaayi bakhulu ni baleekeli be Kamakaambila ka Musa, ni baraangilisi be babaandu, baaba bakhakakho naabi khukhwiira Yezu. 48Ne balekha khunyala khubona isaambo shiina ta, lwekhuba babaandu boosi bamwibowakho nga bamurekeeresa bilomo byeewe.

Currently Selected:

Luka 19: LCE

Highlight

Copy