Luka 1

Shitsiilililwa she khuurona kamakhuuwa

1Uwe lukoosi Tefilo, babaandu bakali baakhakakho nga esi banyala khurona ni khukhwimenielesa naabi kamakhuuwa kakolelesebwa mwiifwe. 2Baarona bibiindu bibyakholewa ni naabo babaabibona ni tsimoni tsaawe khukhwaama makiboole, lundi nga nibo bababoolela shilomo sha Wele.

3Ni nashiryo, Uwe lukoosi Tefilo, nga nase n'imbimenielesile naabi khukhwaama shimantsamaantsa, shambonekhele nga shilayi khukhuronela iwe bulayi nga ni bilondekhana. 4Shino ise naashikholile nio nawe wikurire ilala bwa ŋali bwe bibiindu byeesi baakhuleekela iwe.

Khusaalikha khwa Yohana Umubatisa

5 # 1 Kim 24.10 Mu bifukhu bya Herode, umuyiinga uwe Bayudaaya, abaawo umusaayi lisiina lyeewe bari Zekariya, nga ali uwe mwibuli lye busaayi bwa Abiya; n'umukyelema weewe abe alaangibwa bari Elisabeti, naye uwaba uwe munda ya Aroni. 6Nibo boombi baaba babaandu balayi mu moni tsa Wele, nga bakhola mu bwitsufu byoosi byeesi kamakaambila k'Omukasya kaloma. 7Ne si baaba ni babaana ta, lwekhuba Elisabeti abe umukuumba lundi nga boombi bawangaale mu miiko.

8Shifukhu shitweela, Zekariya aba ali khu luwalo lwe khukhwakaanisa nga umusaayi mu Lisaayilo Likhulu lya Wele. 9Nga ni yaba isaambo ye basaayi, Zekariya baamurobola nga bakhupa khakokha, khuutsya Mwisaayilo ly'Omukasya khukhwoosha bubaani.#1.9 khukhwoosha bubaani shakholekha kimiluundi kibili mu shifukhu: kumutikhinyi ni angoloobe. 10Ulwo imbuka ni yoola iye khukhwoosha bubaani, lituuli lye babaandu baaba baloombela ibulafu.

11Malayika w'Omukasya wabonekhela Zekariya. Malayika abonekha nga wimikhile khu luwande lwe kumukhono kumulayi lwe shisheeso she khukhwokhelakho bubaani. 12Ne Zekariya nga n'amubona wesindukha, warya naabi. 13Ne malayika wamuloma ari, “Zekariya, ukharya ta, lwekhuba Wele wawuliile khuloomba khwoowo, n'umukyelema woowo Elisabeti alikhusaalila umwaana umusiinde, ni nawe ulimutwiikha lisiina uri Yohana. 14Umwaana yuno alikhureerera kumwikhoyo ni khukhwikitya, ni babaandu baliikhoya lwe khusaalikha khweewe, 15#Bala 6.3lwekhuba aliba umuundu umukhulu mu moni tsa Wele. Nashiryo, s'akhila khunywakho iviini yoosi ta, namwe shishimeesa shoosi ta. Alitsusibwa n'Umwoyo Umukhosefu khukhwamila ilala khu khusaalikha khweewe. 16Alikobosa bakali khu baana ba Isiraeli isi Umukasya, Wele waabwe. 17#Mal 4.5,6; Sir 48.10,11Aliitsya iburaangisi w'Omukasya mu mwoyo ni kamaani nga Eliya n'aba, khushuusa kimyoyo kye ba paapa khukobola isi babaana baawe, ni khushuusa ibo babaali bamiinyi bambaasile mu khumanya khwe bukwalaafu, aryo aŋoonaŋoone babaandu khukhwirekekhela khukhwiitsa khw'Omukasya.”

18Zekariya wareeba Malayika ari, “Ne shino kane ishimanye indyeena ndi kane shikholikhe? Lwekhuba ise ndi musakhulu, lundi n'umukyelema wase naye ali umuloosi naabi.”

19 # Dan 8.16; 9.21; Tob 12.15 Malayika wamwiilamo ari, “Ise indi Gabulyeli. Ise ndi umwakaanisi wa Wele, lundi narumanibwile khukhwiitsa khukanikha is'uli, ni khukhuboolela iwe Kamakhuuwa Kamalayi kano. 20Ne lwekhuba iwe siwakhufukiilila burume bwase bubulyoolelela khu mbuka inyene ta, kane ube wawuma, ulekhe khunyala khukanikha ta, khukhwoolesa khu shifukhu sheesi bino byoosi bilyoolelela.”

21Khu mbuka iyo, babaandu baaba baliindile Zekariya, nga beyaanga lwashiina ayila imbuka indeeyi Mwisaayilo Likhulu. 22Ne Zekariya n'arura ibulafu, walekha khunyala khukanikha isi bali ta. Baryo bamanya bari, Zekariya waboone khubonekhelwa Mwisaayilo Likhulu, lwekhuba aba abamesela busa ni kamakhono keewe, nga s'anyala khukanikha ta.

23Imbuka yeewe iye khukhwakaanisa ni yawakho, Zekariya wilayo ingo weewe.

24Nga imbuka yabirirewo, umukyelema weewe Elisabeti waba shisoombo, webisa mu ntsu khumala kimyeesi kiraano. 25Elisabeti waloma ari, “Aluno, Umukasya wanjeetile ise. Mu bifukhu bino wantsokesaane khukana khweewe lundi wandusilekho kamaŋaanyu mu baandu.”

Malayika akukuula khusaalikha khwa Yezu

26Mu mweesi kwe khasesaba kwe shisoombo sha Elisabeti, Wele warumana Malayika Gabulyeli, mu shiriimba she Galilaaya shilaangibwa Nazareti, 27#Mat 1.18isi umukhaana ulaangiwa Mariya, abe uweliinda, lundi uwaba erengarengekhela bukhwaale khu musaani ulaangiwa Yozefu, uwe mu shikuuka sh'Omuyiinga Daudi. 28Malayika watsya is'ali wamuloma ari, “Nakhushesele, iwe uli ni tsiikhabi, nalundi Umukasya ali ni nawe!” 29Mariya wesindukha naabi khu lwe bilomo bya Malayika bino, lundi weyaanga naabi khusheesa khuno sheesi khumanyisa.

30Ne Malayika wamuloma ari, “Mariya, ukharya ta! Lwekhuba wanyoolile tsikhabi mu moni tsa Wele. 31#Mat 1.21Lola, uliba shisoombo, usaale umwaana umusiinde, ulimutwiikha lisiina uri, Yezu. 32#2 Sam 7.12,13,16; Isay 9.7Niye aliba mukhulu naabi, lundi alilaangibwa ari, Umwaana uwa Wele Uli Angaaki Lukali; Umukasya Wele aliimuwa shitsoloŋo sha kuuka weewe Daudi. 33Lundi aliba umuwuli uwe babetsukhulu ba Yakobo nga Umuyiinga, biilo ni biilo, ni buyiinga bweewe sibuliwawo ta.”

34Mariya wareeba Malayika ari, “Ne shino shilinyalikha shiryeena? Lwekhuba ise sinabatsakakho n'umuseetsa yeesi ta!”

35Malayika wamwiilamo ari, “Umwoyo Umukhosefu alikhwikhakho, ni kamaani ka Wele Uli Angaaki Lukali kalikhufuusilisa. N'umwaana umukhosefu ulisaalikha alilaangibwa Umwaana uwa Wele. 36Akhaba n'umulebe woowo Elisabeti, ali shisoombo mu buloosi bweewe, niye uwalaangiwatsaka khuuba umukuumba busa. Ari kuno nikwo kumweesi kwe khasesaba kwe shisoombo sheewe. 37#Rak 18.14Lwekhuba imbaawo shishikhaasa Wele ta.”

38Mariya welamo ari, “Ise ndi umwakaanisi w'Omukasya, kha shikholikhe shiryo khwiise nga n'ulomele.” Ulwo Malayika wenyukhawo, waatsya.

Mariya akyeniyila Elisabeti

39Mu bifukhu byeene ibyo, Mariya weŋoonaŋoona, watsya wangu mu shiriimba shishiili mungoongo, mu shaalo shishilaangibwa Yuda. 40Winjila mu ntsu iya Zekariya, washeesa Elisabeti. 41Aryo Elisabeti nga n'awulila khusheesa khwa Mariya, umwaana wesutaka munda mweewe, Elisabeti witsusibwa n'Umwoyo Umukhosefu. 42#Yuds 13.18Elisabeti walomela angaaki mwikono likali ari, “Uli ni khabi imbiririfu mu bakhasi boosi, n'umwaana isi ulisaala ali ni khabi. 43Ni nase ifunile indyeena ikhabi yino, indi maayi w'Omukasya wase khukhwiitsa wangeniyila? 44Lwekhuba nga ise n'imbuliile likono lye khusheesa khwoowo, umwaana wesutakila munda mwase lwe sangaalo. 45Nga uli n'ikhabi khuuba nga wafukiilila uri burume bw'Omukasya bulyoolelela nga n'akhulomela.”

Mariya abuyila Wele

46Mariya waloma ari,

“Kumwoyo kwase kuruuya Umukasya,

47ni kumwoyo kwase kwekhoyeele mu Wele umuwonesi wase,

48 # 1 Sam 1.11 lwekhuba Wele wakhebuliile ise, waboone umwakaanisi weewe uwe asi, lwekhuba khukhwaama ni shaleelo, babaandu be kimiboolo ni kimiboolo, kane banaangatsake bari uwe tsikhabi,

49lwekhuba umunyali wa byoosi wakholele ise bibiindu bikhulu. Lisiina lyeewe likhosefu naabi.

50Ni shiisa sheewe shimalaatana mu baandu boosi babamurya, khukhwaama khu muboolo mutweela khukhwoola khu kuundi.

51Wakholile bibiindu bikhulu ni kumukhono kweewe kwe kamaani, wasalanisile ibo babaali ni bibaaso bye khukhwininisa angaaki mu myoyo kyaabwe.

52 # Yob 5.11; 12.19; Sir 10.14 Wekhisile asi bawuli bakhulu khukhwaama khu bitsoloŋo byaawe, ne waniinisile angaaki ibo babaali be asi.

53Babaali ni intsala wabekusile ni bibiindu bilayi, ne bayindifu wabawoonele khuutsya nga bali busa, nga si bali ni shishiindu shoosi ta.

54Wayeetile umwakaanisi weewe Isiraeli, ni khulwe shiisa sheewe, wolelesile sheesi alomela bakuuka beefwe.

55 # Rak 17.7 # 1 Sam 2.1-10 Wakhebuliile khukhwokesa shiisa isi Ibulayimu ni babetsukhulu beewe biilo ni biilo.”

56Mariya wamenya ni Elisabeti khumala kimyeesi nga kitaru, lwanyuma welayo ingo weewe.

Khusaalikha khwa Yohana Umubatisa

57Imbuka iya Elisabeti ni yoola iye khusaala, wasaala umwaana weewe umusiinde. 58Babesanwa atweela ni balebe ni bawulila khu shiisa sheesi Umukasya amwokesana, bekhoyela atweela ni naye.

59 # Lev 12.3 Shifukhu she shinaane ni shoola, beetsa khukheba umwaana imbalu, lundi bakana khutwiikha umwaana tsana lisiina lya paapawe, bari Zekariya. 60Ne maayi weewe waloma ari, “Taawe, lisiina lyeewe kane libe bari Yohana.”

61Nabo bamuloma bari, “Ne mu shikuuka sheenywe imbaawo umuundu yeesi ulaangiwa lisiina ilyo ta.” 62Lwanyuma bamesela paapawe nga bakana babone lisiina shiina ly'akana khutwiikha umwaana.

63Zekariya waloomba ari bamuwe libaale lye khuronakho, aryo waronakho ari, “Lisiina lyeewe bari Yohana.” Boosi belaliila busa. 64Lubaluba, kumunwa kwa Zekariya kwekukha, ni lulimi lweewe lwakangulukha, aryo warakikha khukanikha nga abuyila Wele. 65Babesanwa beewe boosi lisuno lyabawamba, ni bilomo ibyo byafuma mu byaalo ibyo byoosi bye mungoongo tse i Yuda. 66Nabuli mundu yeesi uwabiwulila weyaanga nga ereeba mu mwoyo kweewe ari, “Ne umwaana yuno atsya khuba umuundu uwasaambo shiina?” Lwekhuba shabonekhelawo shiri tsikhabi tsy'Omukasya tsaba tsili khu niye.

Kumweenya kwa Zekariya

67Zekariya paapa w'omwaana witsusibwa n'Umwoyo Umukhosefu, waloma bilomo bye buŋoosi bwa Wele nga aruuya ari,

68“Umukasya Wele wa Isiraeli abuyilisibwe, lwekhuba wetsile khuyeeta babaandu beewe ni khubawonesa.

69Wakhwinyusiile ifwe umuwonesi uwe kamaani, uli umwitsukhulu w'omwakaanisi weewe Daudi.

70Wele akanikhila khaale mu baŋoosi beewe bakhosefu,

71khukhuwonesa ifwe isi basiku beefwe, ni khukhwaama mu mikhono ky'abo boosi babakhubiiyila ifwe.

72Asubisa khukhwokesanisa shiisa sheewe isi bakuuka beefwe, ni khushebulila indakaano yeewe ikhosefu,

73khukhwoolelesa shishitsubo sheesi etsubila kuuka weefwe Ibulayimu,

74khukhusikula ifwe khukhwaama mu mikhono kye basiku beefwe, nio khunyalise khumwisaaya nga si khulikho ni sheesi khuurya ta,

75nga khuli bakhosefu lundi bakwalaafu mu moni tsa Wele bifukhu byeefwe byoosi.

76 # Mal 3.1 Ni nawe mwana wase, ulilaangibwa umuŋoosi uwa Wele Uli Angaaki Lukali, lwekhuba iwe uliraangila utsye iburaangisi w'Omukasya, khu muŋoonaŋoonela tsintsila tseewe,

77Khuumanyisa babaandu beewe bibiwaamba khu buwonesi, bububirira mu khubeyakhila bibyonako byaabwe.

78Khulwe shiisa sha Wele weefwe shikali, alikhwaburusila ifwe kumuumu kwe buwonesi khukhwaama mwikulu;

79 # Isay 9.2 kulyaburukhila ibo boosi babamenya mu shilima, ni mu shiniini she khuufwa, ni khuraangilila bikyele byeefwe khuutsya mu ntsila tse lukoosi.”

80Aryo umwaana watsowa, welooselamo kamaani mu mubili ni mu mwoyo. Wamenyatsaka mu mubiimbi khukhwoolesa khu shifukhu sheesi eyokesana mu lubuula isi babaandu ba Isiraeli.

Currently Selected:

Luka 1: LCE

Highlight

Copy