Yohana 21

Yezu abonekhela Baleekelwa Musaafu

1Lwanyuma lwa bino, Yezu weyokesana lundi isi baleekelwa beewe khu ndulo khwe inyaantsa iye Teberiyo. Eyokesana mu saambo yino: 2Simoni Petero, ni Tomasi ulaangibwa Mukhwana, ni Nasanaeli uwe Kana, mu Galilaaya, ni babaana ba Zebedaayo, ni baleekelwa babaandi babili, baaba bali atweela. 3#Luk 5.5Simoni Petero wabaloma ari, “Ise ndikho intsya khuloba tsinyeeni.” Nabo baloma bari, “Khakhutsye ni nawe.” Baryo barura ibulafu, benjila mwikhoŋolo. Ne mu shilo isho shoosi balekha khuwambakho shishiindu shoosi ta.

4Antsye ni bwasha kumutikhinyi, Yezu wemikha khu ndulo khwe nyaantsa, ne baleekelwa balekha khumanya bari niye Yezu ta. 5Kila Yezu abareeba ari, “Basaale, mulikho na shoosi sheesi muwambisile?”

Bamwiilamo bari, “Taawe.”

6 # Luk 5.6 Yezu wabaloma ari, “Ni mutuume khatiimba kheenywe khu luwande lulayi lwe likhoŋolo, kane muwambe.” Ni baatuuma butiimba benyoola bari si banyala ni khubukhweesa ta, khulwe bukali bwe tsinyeeni.

7Lwanyuma umuleekelwa abe isi Yezu akana naabi waloma Petero ali, “Uyo Umukasya!” Simoni Petero n'awulila aryo, webowa ingubo, khulwekhuba abe wakyabuulemo. Ni abweene awo Petero wasuna mu meetsi. 8Baleekelwa babaramile mwikhoŋolo bamuloondakho, nga bakhweesa khaatimba khakhetsuule tsinyeeni, khulwekhuba baaba ambi ni khu ndulo khwe nyaantsa. Abe tsimita tsoola nga shitoondo shitweela.

9Ne ni boola khu ndulo, babona kamaanda awo nga kalikho kaaburukha, nga khulikho inyeeni, ni kumukaati. 10Yezu wabaloma ari, “Ni mureerekho tsinyeeni tseesi mwama khuwamba ari.”

11Simoni Petero waniina mwikhoŋolo, wakhweesa khatiimba wakhareera khu ndulo. Abe khetsuule tsinyeeni tsimboofu, tsitsoola shitoondo shitweela ni kamakhumi karaano na tsitaru. Ne akhaba tsinyeeni tsaba tsingali tsiryo, khatiimba sikhakhalikha ta.

12Yezu wabaloma ari, “Ni mwiitse mulyekho she kumutikhinyi.” Imbaawo na mutweela khu baleekelwa uwamureeba ari, “Iwe naanu” ta. Boosi baaba bamanyile bari uyo Umukasya. 13Yezu wabukula kumukaati, wakubawa; wabawa ni inyeeni nayo musaambo nyene iyo. 14Kuno nikwo kumulundi kukwakhola khataru, nga Yezu eyokesana isi baleekelwa beewe, lwanyuma lwe khulamukha khukhwaama mu bafu.

Yezu areeba Petero

15Baryo ni baamala khuulya, Yezu wareeba Simoni Petero ari, “Simoni, umwaana wa Yohana, ilala iwe ungana ise khufuurisa bano boosi?”

Petero wamwiilamo ari, “Ee, Umukasya iwe wamanya uri ise n'ikhukana.”

Yezu wamuloma ari, “N'uliisatsake kamasheese kaase.”

16Yezu wamureeba lundi ari, “Simoni, umwaana wa Yohana, iwe ungana ise?”

Petero wamwiilamo ari, “Ee, Umukasya iwe wamanya uri ise ikhukana.”

Yezu wamuloma ari, “Ni wayise kamasheese kaase.”

17Yezu wamureeba kumulundi kwe khataru ari, “Simoni, mwana wa Yohana, iwe ungana ise?”

Petero wakhalala, bari khulwekhuba Yezu wamureebile kumulundi kukukhola khataru ari, “Iwe ungana ise?” Ne Petero welamo ari, “Umukasya, iwe wamanya buli shiindu shoosi; wamanya uri ise ikhukana.” Yezu wamuloma ari, “Yayisatsaka kamasheese kaase. 18Ilala, ilala, ikhuboolela indi, ni waba nga ushiili umusoleeli, wamweene webowatsaka lukhoba, watsya esi wekanisatsaka. Ne n'ulikyela umusaakhulu, ulikolola kamakhono koowo, umuundu ukuundi busa akhubowe, akhusute akhuyile esi ukhekoomba khuutsya ta.”

19Yezu aloma aryo nga okesana isaambo iye khuufwa khweesi Petero alifwamo, nga awa Wele shiriifwa. Yezu n'amala khuloma aryo, waloma Petero ali, “Inondekho.”

Yezu n'umuleekelwa isi asiima

20 # Yoh 13.25 Ne Petero n'eshebukha, wabona umuleekelwa uyo esi Yezu akana naabi, nga wabalondelekho. Umweene uyo niye uweyikamilila mu shifuba sha Yezu, nga balikho balya she ashilo. Lundi niye uwaloma ari, “Umukasya, naanu niye unakhulyamo luwomelo?” 21Petero n'amubona, wareeba Yezu ari, “Umukasya, ne yuno?”

22Yezu wamuloma ari, “Ise n'ingana ndi niye aramewo umulamu khukhwolisa ise n'ingobola, iwe winaanayo shiina? Iwe n'unondekho.” 23Lwanyuma bilomo byafuma mu be buulebe biri umuleekelwa uyo s'alifwa ta. Yezu s'aloma aryo ta, ne akhali aloma ari, “Ise n'ingana ndi aramewo mulamu khukhwolisa nindikobola, iwe winaanayo shiina?”

24Umuleekelwa mweene uyo niye ulikhumanyisa bujulisi buno, nalundi waburona bwoosi. Ni nafwe khwamanya khuri bujulisi bweewe buli bwa ŋali.

25Iliwo bibiindu bibindi swa busa byeesi Yezu akhola. Ne iba nga buli shitweela shiba shisharonebwa, nambaasa ndi khali ni shiibala shoosi sishandinyalisile khubuusa buurone bwoosi bubwandironewele ta.

Currently Selected:

Yohana 21: LCE

Highlight

Copy