Yohana 2

Kamayiiya ke Bukhwale i Kana

1Khu shifukhu shikhola khataru, abawo kamayiiya ke bukhwaale i Kana, mu Galilaaya, ni maayi wa Yezu naye abayo. 2Yezu ni baleekelwa beewe nabo baaba babalaangile khu mayiiya.

3Ne iviini niyawawo, maayi wa Yezu wamuloma ari, “Si bali n'iviini ta.”

4Yezu wamulomela ari, “Maayi, iwe ukana khundakila ise she khuukhola? Imbuka yase ishiili khukhwoola taawe.”

5Ne maayi weewe waloma babakaanisi ari, “Ni mukhole shoosi shoosi sheesi kane abalomele.”

6Abawo kamayingu kaseesaba ke kamabaale, nga buli litweela litsyamo tsisoongwe nga tsitaru. Kamayingu kano kaaraambisibwa ni Bayudaaya lwe khukhwipyeluusa, nga isaambo yaabwe ni yaba. 7Yezu waloma babakaanisi ari, “Ni mwitsuse kamayingu ako ni kameetsi.” Nabo baketsusa khukhwoolela ilala khu minwa. 8Lwanyuma wabaloma ari, “Ni mutahekho muyilile umuraangilisi we kamayiiya.”

Babakaanisi batahakho bamuyilila.

9Umuraangilisi we kamayiiya n'amuusakho kameetsi ari kakaaba kekyelile iviini, walekha khumanya isi yaama ta. Ne babakaanisi babataha kameetsi nibo baaba abe bamanyile. Aryo walaanga umusaani ukhweele, wamwiisa andulo, 10wamuloma ari, “Buli mundu anyoowa khukaba iviini ifuura bulayi, nio lwanyuma lwayo wesawo ilikho asi, nga babaandu bekurire. Ne bona iwe wabiikhile iviini indayi inyene khukhwoolesa ari.”

11Khano nikho khabonelo khe kamakaanga kheesi Yezu anyoowelakho khukholela i Kana, mu Galilaaya. Aryo wokesanisa shiriifwa sheewe, ni baleekelwa beewe bamufukiililamo.

12 # Mat 4.13 Lwanyuma lwe'sho, Yezu weekha i Kaperunaumu, nga ali atweela ni maayi weewe, ni bayaaya beewe, ni baleekelwa beewe. Ibweene iyo, bamalayo bifukhu bikyeekhe biri.

Yezu atsya mu Lisaayilo Likhulu

(Mat 21.12-13; Mrk 11.15-17; Luk 19.45-46)

13 # Luky 12.1-27 Kamayiiya ke Bayudaaya ke Khubirakho kaaba abe kali ambi khukhwoola, kila Yezu aniina i Yerusalemu. 14Ne mu Lisaayilo Likhulu wanyoolamo babaandu nga bakulisa tsikhaafu, tsisheese, ni kamawuusi. Ni babaandi nga bekhaale abweene awo, bayuusaŋana tsinusu. 15Aryo Yezu wabukula kimikosi warukhamo kumusariti, wabatimisa boosi khurura mu Lisaayilo Likhulu, atweela ni tsisheese, ni tsikhaafu. Wahanyaka tsinusu ts'abo babaaba nga bayuusaŋana tsinusu. Wafumalikhaka ni tsimeetsa tsaabwe.

16Waloma abo babakulisa kamawuusi ari, “Bino ni mubirusewo ano! Shimwaakha mwakalusa intsu ya Paapa wase, mwakikesa khuuba intsu ye khukulaanilamo ta.”

17 # Zab 69.9 Baleekelwa beewe bashebulila bibyaronebwa bikhosefu bibiloma biri, “Libuba lye khukana intsu yoowo liburukha mus'iise nga kumulilo.”

18Baryo baraangilisi be Bayudaaya bakobolamo Yezu nga bamureeba shireebo bari, “Khabonelo shiina khe kamakaanga kheesi uli ni nakho khukhwokesana khari uli ni bunyala khukhola bibiindu bino?”

19 # Mat 26.61; 27.40; Mrk 14.58; 15.29 Yezu wabeelamo ari, “Ni mufuniaake Lisaayilo Likhulu lino, ni nase indilyombekhela mu bifukhu bitaru.”

20Bayudaaya kila bamwiilamo bari, “Lisaayilo Likhulu lino lyayila kimiiko kamakhumi kane na kisesaba khulyombekha, ne iwe unyala khulyombekhela mu bifukhu bitaru byonyene?”

21Ne Lisaayilo Likhulu lyeesi Yezu aba nga alomakho, lyaba kumubili kweewe kumweene. 22Ne n'amala khulamukha khukhwaama mu bafu, baleekelwa beewe bashebulila bari aloma shino. Baryo bafukiilila bibyaronebwa bikhosefu ni bilomo byeesi Yezu aloma.

Khumanya khwa Yezu khwe bulamu bwe bubundu

23Aryo Yezu n'aba nga ali mu Yerusalemu khu Mayiiya ke Khubirakho, babaandu bakali bafukiilila lisiina lyeewe, khulwe bubonelo bwe kamakaanga bweesi akhola. 24Ne Yezu walekha khubeyikina ta, lwekhuba abe wabamanya boosi bulayi. 25Sishekombebwa umuundu yeesi khumuboolela khubiwamba khu baandu ta, lwekhuba umweene amanya bibiindu bibyaba mu myoyo kye babaandu.

Currently Selected:

Yohana 2: LCE

Highlight

Copy