Yohana 19

Yezu bamukhalila kwe khuufwa

1Lwanyuma Pilato wayila Yezu, walakila ari bamunywekhe tsikhoba. 2Basilikhale balukha lihabi kye kamawa, balira khu murwe kwa Yezu, bamukwaarisa ni ingubo imbesemu. 3Beetsa isi Yezu bamuloma bari, “Mulembe, Umuyiinga uwe Bayudaaya!” Baryo bamukhupa tsiimbi mu moni.

4Pilato warura lundi ibulafu waloma Bayudaaya ari, “Bona, ndi khumurusa, imureera isi muli khubamanyisa inywe ndi ise s'imubonamo ilomo yoosi, imufunanisa kumusaango ta.”

5Yezu warura ibulafu nga wakwaarire lihabi lye kamawa, ni ngubo imbesemu. Pilato wabaloma ari, “Umuundu mwene niye uyu.”

6Khaangukho Basaayi bakhulu ni basilikhale ni baabona Yezu, bayokesela angaaki, baloma bari, “Mutsaangilile khu musalaba! Mutsaangilile khu musalaba!”

Pilato wabaloma ari, “Inywe mwabeene ni mumuyile mumutsaangilile, khulwekhuba ise s'imbona ilomo, ikila kumusaango kwamufuura ta.”

7Ne Bayudaaya bamwiilamo bari, “Ifwe khuli ni likaambila, ni khulondekhana ni likaambila ilyo, akhiile khuufwa! Khulwekhuba elaangaatsaka ari niye ali Umwaana uwa Wele.”

8Ne Pilato n'awulila aryo, weloosela khuurya naabi. 9Shikila wenjila lundi mu lwanyi lwe kimisaango, wareeba Yezu ari, “Iwe wama waheena?” Ne Yezu walekha khumwiilamo ilomo yoosi ta.

10Pilato wamureeba ari, “S'unyala wakanikha ni nase ta? Iwe s'umanya uri ise ndi ni bunyala bwe khukhulekhuula, namwe bwe khukhutsaangilila khu musalaba ta?”

11 # Makh 6.3 Yezu wamwiilamo ari, “Bunyala ubwo bulekha khukhuwebwa khukhwaama angaaki, khali s'ulikho ni bunyala bwoosi nakhafwiiti khus'ise ta. Nashiryo uyo uwuntsakaanisileyo isi iwe, niye uli ni shishonako shishifuurisa.”

12Ni khukhwaama khu mbuka iyo, Pilato wakhala kamakyesi ke khulekhuula Yezu. Ne Bayudaaya beloosela khuyokesela angaaki bari, “Iwe n'ulekhuula umusaani uyu, uba s'uli umusaale wa Kayisaali ta. Umuundu yeesi uwilaanga khuuba umuyiinga, aba akhaandisa Kayisaali.”

13Aryo Pilato nga awulila bino, warusa Yezu ibulafu, wekkhala khu shitsoloŋo she khukhalilakho kimisaango, mu shifwo shishilaangibwa shiri “Kamabaale kamalile,” namwe mu lulimi Luheburaniya bari, “Gabaza.” 14Ni shifukhu sheene isho, shaba she khukhwirekekhela Kamayiiya kakalaangibwa kari ke Khubirakho. Tsyaba tsisaawa nga tsisesaba. Pilato waloma Bayudaaya ari, “Bona umuyiinga wenywe.”

15Ne nibo bayokesela angaaki bari, “N'umurusewo! N'umurusewo! Mutsaangilile khu musalaba! Mutsaangilile khu musalaba!”

Pilato wabareeba ari, “Intsaangilile khu musalaba umuyiinga wenywe?”

Basaayi bakhulu belamo bari, “Ifwe si khuli n'umuyiinga ukuundi ta, akhali Kayisaali yenyene.” 16Ikhumalilisa, khulwe khukana khubasangaasa, Pilato wawanayo Yezu mu mikhono kyabwe, ari batsye bamutsaangilile khu musalaba.

Batsaangilila Yezu

(Mat 27.32-44; Mrk 15.21-32; Luk 23.26-43)

17Ni abweene awo, basilikhale bayila Yezu, nga bamwibotokhelele, bamuliindile lukali. Yezu warura antsye nga wasutile kumusalaba kweewe umweene, khuutsya mu shifwo shishilaangibwa shiri “Shiifwo she shihaanga,” namwe mu lulimi Luheburaniya bari “Gologosa.” 18Abweene awo, bamutsaangilila, atweela ni babaandi babili nga bali ni naye. Mutweela khu lubeka lunyeletsi, ukuundi khu lubeka lulayi, nga Yezu ali akari.

19Ne Pilato aba waronile burone khubura khu musalaba nga buloma buri, “Yezu uwe Nazareti, Umuyiinga uwe Bayudaaya.” 20Bakali khu Bayudaaya basoma burone buno, khulwekhuba shifwo mweesi Yezu atsaangililwamo khu musalaba shaba ambi ni shiriimba. Lundi burone buno bwaronebwa mu lulimi Luheburaniya, ni mu Lulatini, ni mu Luyonaani. 21Lwanyuma Basaayi bakhulu be Bayudaaya baloma Pilato bari, “Ukharona uri ‘Umuyiinga uwe Bayudaaya’ ta, ne rona uli ‘Umusaani yuno elaanga ari umuyiinga uwe Bayudaaya.’ ”

22Ne Pilato welamo ari, “Ise sheesi imalile khurona, naronile.”

23Basilikhale ni baamala khutsaangilila Yezu khu musalaba, babukula tsingubo tseewe, batsikabananisamo kimikabo kine, buli musilikhale kumukabo mutweela, baaramisa ingubo iye mukari. Ingubo yino yaba imbuufu busa, nga bakilukha busa yoosi. 24#Zab 22.18Kila basilikhale baloma bonyene bari, “Ingubo yino, khukhakinuulamo ta, ne khakhukipilekho khakokha, khubone naanu ukana akiyile.” Shino sholelesa bibyaronebwa bikhosefu bibiiloma biri, “Bakabanana tsingubo tsase, bakhupa khakokha khulwe shikwaro shase.” Shino nisho sheesi basilikhale bakhola.

25Bino biba biryo, ambi ni kumusalaba kwa Yezu, bababawo baaba, maayi weewe, ni yaaya uwa maayi weewe, ni Mariya umukhasi uwa Kuleopa, ni Mariya Magadalena. 26Yezu n'abona maayi weewe, atweela n'umuleekelwa abe isi niye akana naabi nga bemishile awo, kila alomela maayi weewe ari, “Maayi, bona umwaana woowo.” 27Lwanyuma walomela umuleekelwa tsana ari, “Bona maayi woowo.” Khukhwamila abweene awo, umuleekelwa uyo wamuyila ingo iweewe.

Khuufwa khwa Yezu

(Mat 27.45-56; Mrk 15.33-41; Luk 23.44-49)

28 # Zab 69.21; 22.15 Lwanyuma lweebyo, Yezu nga wamanyile ari bibiindu byoosi byaweele, ni khukhwolelesa bibyaronebwa bikhosefu, waloma ari, “Bulesa bwandya.” 29Abawo inyuungu nga yetsuule iviini ilulutsile. Baabukula shishangwe, bashisanya mu viini tsana, bashira khu lukholo luleeyi, bashiniinisa bashira khu minwa kya Yezu. 30Ni baamala khuuwa Yezu iviini iyo, waloma ari, “Shaweele.” Abweene awo, Yezu wenamisa kumurwe kweewe, wawanayo kumwoyo kweewe.

Bawuna Yezu mu mbafu

31Shifukhu isho shaba shifukhu she khukhwirekekhela Kamayiiya ke Khubirakho. Bayudaaya baatsya baloomba Pilato bari bafuniake bikyele bye babaandu beesi batsaangilila khu misalaba. Bari barusewo ni kimilaambo, kilekhe khuba khu misalaba khu shifukhu sha Sabato ta. 32Baryo basilikhale beetsa baafuniaka bikyele bye basaani boombi babatsaangililwa khu misalaba. 33Ne ni boola khu Yezu, banyoola nga wamalile khaale khuufwa, balekha khufuniaka bikyele byeewe ta. 34Ne mutweela khu basilikhale wawuna mu mbafu mwa Yezu ni liifumo. Khaangu akho, mwamamo kamafuki ni kameetsi. 35Umuundu uwabona bino awa bujulisi, ni bujulisi bweewe buli bwa ŋali. Niye wamanya ari byeesi akanikha bili bya ŋali, nio nanywe mufukiilile. 36#Luky 12.46; Bala 9.12; Zab 34.20Khulwekhuba bino byakholebwa khukhwolelesa bibyaronebwa bikhosefu biri, “Mbaawo na litweela khu makuumba keewe lyeesi balifuniaka ta.” 37#Zek 12.10; Bimb 1.7Ni bibyaronebwa bikhosefu bibiiindi byaloma biri, “Balilola khuuyo esi baawuna lifumo.”

Yezu bamusiikha

(Mat 27.57-61; Mrk 15.42-47; Luk 23.50-56)

38Lwanyuma lweebyo, Yozefu uwe Alimaseya, naye uwaba umuleekelwa uwa Yezu uwe mushimoonyo busa khulwe khuurya Bayudaaya, watsya waloomba Pilato ari amufukiilise arusewo kumulaambo kwa Yezu. Pilato n'amufuukiilisa, weetsa wasuta kumulaambo, watsya ni nakwo.

39 # Yoh 3.1,2 Ne Nikodemusi, uweetsa isi Yezu mu shilo makiboole, naye weetsa, nga wareerere bye khukhwihakha bibiwunya bulayi, bibyoolesa tsikilo nga kamakhumi musaafu na tsiraano. 40Basaani bano boombi bayila kumulaambo kwa Yezu, bakubowa mu ngubo imiliwu atweela ni bibiwunya bulayi, nga ni yaba isaambo iye Bayudaaya iye khuusiikha. 41Mu shifwo isho esi Yezu atsaangililwa abawo kumukuunda. Mu mukuunda umwo mwabamo iŋani imbya busa, nga abe bakhusiikhatsakamo umufu yeesi ta. 42Mu ŋani yeneeyo nimwo mweesi baalisa Yezu, nga ni yaba abe ili ambi, nalundi shaba shifukhu she Bayudaaya she khukhwirekekhela Kamayiiya.

Currently Selected:

Yohana 19: LCE

Highlight

Copy