Yohana 16

1Yezu weloosela waloma ari, “Nababooleele bino nio mulekhe khuwamo kamaani mu bye khufukiilila khweenywe ta. 2Babaandu kane babekalewo inywe khukhwaama mu ntsu iye khukhwisaayilamo, nalundi imbuka ilyoola isi umuundu yeesi ubeera inywe alyambaasa ari alikho akhola byeesi Wele akana. 3Babaandu balikhola bibiindu bino khulwekhuba si baamanya Paapa, namwe si bayiimanya ise ta. 4Ne ise nababooleele bino, nio inyaanga iye bikholwa ibyo nga yoolile, mushebulile muri ise nabareewula.

Buuraambi bw'Omwoyo Umukhosefu

“Sinababoolela bibiindu bino byoosi khukhwaama makiboole ta, khulwekhuba naba nga ndi ni nanywe. 5Ne ari ndi khuutsya isi uyo uwandumana. Ne khus'inywe mbaawo namutweela uwundeebile ari, ‘Ulikho wutsya waheena’ ta. 6Ne khulwekhuba nababooleele bibiindu bino, kimyoyo kyenywe kyetsuule kumutaambo. 7Ne mbaboolela mu ŋali ndi, khuutsya khwase khubayeeta nywe. Khulwekhuba ise ni ndekha khuutsya ta, Umuyeeti s'aliitsa ta. Ne ise n'intsya, indyakaanisa Umuyeeti isi muli. 8Umuyeeti uyo n'aliitsa, alyokesanisa buŋaŋafu isi babaandu be mu shiibala khu biwamba khu byonako, ni khubiwamba khu bukwalaafu, ni khukhala khwe kimisaango. 9Sibali batuufu khu biwamba khu byonako ta, khulwekhuba si baafukiilila ise ta. 10Sibali batuufu khu biwamba khu bukwalaafu ta, khulwekhuba ise ndi khuutsya isi Paapa, ni nanywe singane mumbonekho lundi ta. 11Sibali batuufu khu biwamba khu khukhala khwe kimisaango ta, khulwekhuba umuwuli uwe shiibala shino, naye baamala khaale khumukhalila kumusaango.

12“Ise ishiili ni bibiindu bikali bye khubaboolela, ne simunyala mwabiwamba byoosi ari ta. 13#Makh 9.11Ne Umwoyo uwa ŋali n'aliitsa, uyo urumbula bya ŋali bibiwaamba khu Wele, alibaraangilila inywe aboolese mu bya ŋali byoosi. Khulwekhuba niye s'alikanikha khulwe bunyala bubweewe ta, ne khurusakho ndi alikanikha ibyo byeesi aba wawuliile, nalundi alibaboolela ibyo bibiitsya khubawo. 14Umweene uyo akhantsisemo ise shiriifwa, khulwekhuba byeesi alibaboolela inywe, alibyaamisa khu byase. 15Ibyo byoosi byeesi Paapa ali ni nabyo, bibyase. Nashiryo kila imbaboolela inywe ndi, byeesi Umwoyo alibaboolela inywe, alibyaamisa khu byase.”

Kumutaambo kukulikyela kumwikhoyo

16Yezu weloosela waloma ari, “Mu mbuka ifwiiti iri, singene mumbone lundi ta; ne kane nga imbuka yabirirekho ifwiiti, kane mumbone.”

17Batweela khu baleekelwa beewe kila baloma bari, “Shiina kila alikho aloma aryo? Ari mu mbuka ifwiiti singene mumbone ta; nalundi ari mu mbuka ifwiiti kane mumbone? Ari khulwekhuba ndi khuutsya isi Paapa?” 18Kila bereeba bari, “Amanyisa shiina ni imbuka ifwiiti? Ifwe sikhumanya sheesi alikho ta.”

19Yezu washimanya ari bakana khumureeba, kila abalomela ari, “Mulikho mwireeba shiina shisheene sheesi ise imanyisile ninomile ndi, ‘Mu mbuka ifwiiti simunaambona ta, nalundi mu mbuka ifwiiti, kane mumbone?’ 20Ilala, ilala, imbaboolela ndi inywe mukhalile lundi mukhaakhupe kimibala, ne shiibala nga shikhoya. Inywe muliba mu mutaambo, ne kumutaambo kwenywe kulikalukha kwikyele kumwikhoyo. 21Umukhasi nga wolile mu mbuka iye khusaala, aba mu mutaambo, khulwekhuba imbuka yeewe iba yoolile. Ne n'amala khusaala, ebilila butsiina khulwe kumwikhoyo kw'omundu usaalikhile mu shiibala. 22Ni nanywe muli muryo; ari muli mu mutaambo, ne ise n'indibabona inywe lundi, kimyoyo kyenywe kiliba ni kumwikhoyo, ate mbaawo ulibarusakho kumwikhoyo kwenywe ta.

23“Ne shifukhu isho ni shilyoola, si mulinoomba shishiindu shoosi ta. Ilala, ilala, imbaboolela nywe ndi, ni muliloomba shishiindu shoosi mu lisiina lyase, Paapa alishibawa. 24Khukhwolisa ari mushiili khuloomba shishiindu shoosi mu lisiina lyase ta. Ni muloombe, kane mufune, nio kumwikhoyo kwenywe kube kumwitsufu.”

Yezu wamala khuwula bye khu shiibala

25Yezu waloma lundi ari, “Ibyo nabibabooleele nga inaambisa tsisimo. Ne inyaanga ineetsa isi ikhalibaboolela nga inaambisa tsisimo ta; nga mbaboolela lubuula bibiwaamba khu Paapa. 26Khu shifukhu isho muliloomba mu lisiina lyase, ne ise s'imbalomela ndi ise ikhabaloombele inywe isi Paapa ta. 27Khulwekhuba Paapa umweene abakana inywe. Abakana inywe khulwekhuba inywe mungana ise, nalundi mwafukiilila muri ise naama isi Wele. 28Naama isi Paapa neetsa mu shiibala. Ne ari indikhulekha shiibala intsya isi Paapa.”

29Baleekelwa beewe baloma bari, “Ari ulikho uloma lubuula, ne akhuba mu simo ta. 30Ari khwamanyile khuri wamanya buli shiindu, shiili bari uliinda bakhureebe bireebo nio ta. Khulwa shino, ari khufukiilila khuri iwe wama isi Wele.”

31Yezu wabelamo ari, “Ari mufukiilila? 32Mu mbuka ikhali iye aleeyi ta, ilala mweesi bakhabasalanise, nga buli mutweela elukhila ingo weewe, nashiryo muliindekha senyene. Ne s'indi senyene ta, khulwekhuba Paapa ali ni nase. 33Nababoolele ibyo, nio mube ni lukoosi, nga mwaramile mu butweela ni nase. Kane shiibala shibareerere khutaambisibwa, ne ni mube banyindaalifu. Ise naamalile khuwula shiibala.”

Currently Selected:

Yohana 16: LCE

Highlight

Copy