Khuurakikha 32

Yakobo ni Esawu

1Nga ibyo byaweele biryo, Yakobo wenyukha wahaamba intsila yeewe waatsya, lwanyuma bamalayika ba Wele beetsa baamwakaanana. 2Ne Yakobo n'abona bamalayika abo, waaloma ari, “Lino nilyo liiye ly'Omukasya!” Shikila alaanga shiifwo isho lisiina ari Mahanayimu.

3Lwanyuma Yakobo waarumana baarume beewe khuuraangila benyoowe iburaangisi weewe, khukhwakaananamwo ni waandaaye Esawu, mu shisiintsa sha Seyiri, mu shibala sha Edomu. 4Aryo waababoolelela ari, “Nga mwooleleyo, kane muwe Esawu buurume buno muri, ‘Umwakaanisi woowo Yakobo akhuboolela iwe ari, niye waamenyakilekho wa Labani, niyo isi abeele khukhwoolesa ni shaleelo shino. 5Ari bona naayiindila ni tsiyeeyi, tsisikilya, kamasheese, ni tsimbusi, ni khuutubaasakho babaakaanisi besaani ni bekhasi. Musakhulu, ari ikhwakaanisa buurume buno isi uli, nga ikhuloomba ndi untsakaanile buulayi.’ ”

6Baryo baarume bano baatsya isi Esawu, lwanyuma baakobola isi Yakobo, baamureerera buurume nga baloma bari, “Khwoolile isi waandaayo Esawu, ni naye aryo ali khukhwiitsa khuukhwakaanana iwe nga ali ni basaani babaandi bitoondo bine (400).” 7Ilomo iyo yaakila Yakobo waarya luukali naabi, weetsula kumutaambo. Kila awukhanisamwo babaandu be muungo mweewe mu matuuli kabili, atweela ni kamasheese keene, ni tsimbusi, ni tsikhaafu, atweela ni tsiŋamila tseene. 8Lwekhuuba mu mwoyo kweewe eyambaasa ari, “Siinga Esawu ebwaakala lituuli litweela, kane manya liliramile lititukhe.”

9Lwanyuma kila Yakobo aloomba ari, “O Wele wa kuuka wase Iburayimu, luundi Wele wa paapa wase Isaaka! Iwe Umukasya niye uwaanomela ise uri niileyo mu shibala she weefwe, ni isi baalebe baase. Iwe waasuubisa ise uri, kane unjeetatsake bibiindu bintsiile buulayi! 10Iseese sinakhila khuufuna shiisa shoowo ni bubwiyikinwa bwoowo ta, byeesi ubeele untsokesanisa ise umwakaanisi woowo ta. Ise nga ni naama ingo weefwe, naaba nga siindikho na shiindu shoosi ta, khuurusakho imiimbo isi naaba nitiila, nga ni naambukha luluutsi luno Yorudaani. Ne ari bona nakobola nga ndi ni bibiindu bino byoosi byeesi naawukhanisilemo kimiluundi kibili. 11Ari ikhuloomba ndi umbonese ise khukhwaama isi waandaayase Esawu. Lwekhuuba ise naariire ndi nga khwakaanaane ni naye khu ntsila, anyala waantsira ise, atweela ni baakyelama baase ni babaana beene. 12#Rak 22.17Ne iwe waasuubisa ise uri kane uniindatsake buulayi, luundi ubalaayise liisaaye lyase, liyiimbe lifwaane busa nga kumuyeekhe kukuuli khu ndulo khwe nyaantsa, nga si babalikha na khubalikha ta.”

13Aryo Yakobo waarama mu shifwo mweesi aaba mweene umwo, waakonelawo shiilo isho, waarobora mu biindu byeesi aaba nabyo shiiwaanwa isi Esawu; 14Tsimbusi tsiikhasi bitoondo bibili (200), ni tsindurume natso kamakhumi kabili (20), kamakheese bitoondo bibili (200) ni kamamiiku nako kamakhumi kabili (20), 15tsiŋamila tsiikhasi kamakhumi kataru (30) atweela ni tsinyana tsatso, tsikhaafu kamakhumi kane (40) ni tsiwuunwa likhumi (10), tsisikilya tsiikhasi kamakhumi kabili (20), ni tsiseetsa likhumi (10). 16Aryo waabiwaambisa babaakaanisi beewe, buli bisolo mu lituuli lyabyo. Kila alomela babaakaanisi abo ari, “Ni muraangile mutsye iburaangisi wase, nga akari a buli bisolo, nga ni bitsya biloondekhana, mulekhawo libaanga.”

17Lwanyuma waawa babaakaanisi babaaraangila iburaangisi ibweene biilakilo bino ari, “Nga waandaayase Esawu waabakaanaane, ne waabareeba ari, ‘Umukhulu weenywe niye naanu? Mulikho mutsya waaheena? Ni bibyaayo bibiili iburaangisi weenywe bili bya naanu?’ 18Nanywe mumwiilamo muri, ‘Bino bili by'omukulwa woowo Yakobo. Niye waabyakaanisile nga shiwaanwa isi umukhulu weewe Esawu. Ni naye umweene alikho eetsa inyuma iyo.’ ” 19Musaambo iyo niyo ndweela, waalakila babaakaanisi babaaba mu lituuli lye khaabili, ni lye khataru, ni kamatuuli kakaandi kakeelakho, nga abalomela ari, “Mweesi muli ni khuuloma shishiindu nisho shitweela sheene nga mwaakanaane ni Esawu. 20Mweesi muli ni khuumulomela muri, ‘Umwakaanisi woowo Yakobo ali khukhwiitsa inyuma iyo.’ ” Byaba biryo, lwekhuuba Yakobo aambaasa mu mwoyo kweewe ari, “Kane imuwose kumwoyo nga naamuweele biwaanwa bino byoosi bibiraangiile iburaangisi wase, nio manya lwanyuma nga samweene namwaakanaane, antsakaanile buulayi.” 21Musaambo iyo, bibiindu byeesi aaba nga atsya khumuwa nga shiwaanwa, byaamwinyoowayo iburaangisi, ne niye umweene, waarama mu kaambi yeewe isi aakonela.

Yakobo arekana ni Wele

22Mu shilo sheene isho, Yakobo wenyukha waayila baakyelama beewe boombi, atweela ni babaakaanisi beewe baabili, khuutubakho ni babaana beewe likhumi na mutweela, baatsya baakhalisa Luluutsi Yaboko. 23#Makh 10.12Baryo boosi baatsya baakhalisa baambukha luluutsi, na buli shiindu shoosi sheesi aaba ni shasho. 24#Hos 12.3-4Aryo nga Yakobo waaramile shaanjelekha yenyene, yabawo umusaani uweetsa, waarekana ni naye khuumala shiilo shoosi, khukhwoolesa antsye ni bwabuluukha. 25Umusaani uyo n'abona ari s'ali khuunyala khuuwula Yakobo ta, waamukhoonola likuumba lyasiiso, khukhwiikha khu liraango, lyaarura mu shifwo shalyo. 26Lwanyuma kila umusaani alomela Yakobo ari, “Indekhuule intsye, bona antsye bulikho bubuluukha.”

Yakobo naye waamwiilamwo ari, “Sinakhulekhuula utsye ta, khuurusakho nga waamalile khukhuunoombela ise tsikhabi.”

27Kila umusaani tsana uyo amureeba ari, “Ne iwe lisiina lyoowo bari naanu?”

Naye weelamwo ari, “Ise bari Yakobo.”

28 # Rak 35.10 Lwanyuma umusaani waamulomela ari, “Lisiina lyoowo singene libe luundi bari Yakobo ta. Khukhwaama shaleelo, lisiina lyoowo kane bakhulaangatsake bari Isiraeli#32.28 Isiraeli: Limanyisa “Uyo urekana ni Wele”, lwekhuuba iwe waarekanile ni Wele atweela ni babaandu, ate waafuurire.”

29 # Baka 13.17-18 Kila Yakobo naye areeba umusaani uyo ari, “Nawe imboolele, naakhwikoontseleele, lisiina lyoowo bari naanu?”

Umusaani naye waamukobolamo ari, “Lwashiina undeeba ise lisiina lyase?” Abweenewo awo, umusaani waasibula Yakobo, wenyukhawo waatsya.

30Lweesho Yakobo waatwiikha shiifwo lisiina ari Peniyeli#32.30 Peniyeli: Mu Luheburaniya lisiina lino limanyisa “Mu moni mwa Wele”, nga aloma ari, “Ise naabonaane ni Wele mu moni khu moni, ate naarama nga ishiili mulamu.” 31Inyaanga yaarura nga Yakobo alikho aama i Peniyeli, waakyeenda nga alikho ayikila lwe lyasiiso. 32Shisheene isho shishikila babaandu ba Isiraeli, si balya kimikotyo kye khu likuumba lyasiiso ta, lwekhuuba bashebulila bari lyasiiso lya Yakobo lyakhoonokha.

Currently Selected:

Khuurakikha 32: LCE

Highlight

Copy