Khuurakikha 24

Isaaka ni Rebeka

1Khu mbuka yino, Iburayimu aaba nga wahangala mu miiko, nga ali umusakhulu. Umukasya aaba nga waamuwa tsikhabi tse buyiindifu, nga ali buulayi mu biindu byoosi byeesi aakholatsaka. 2Shifukhu shitweela, Iburayimu waalaanga umwakaanisi weewe abe ufuura bubwiyikinwa mu boosi, abe ulolelela bibiindu byoosi byeesi Iburayimu aaba ni nabyo, kila amuloma ari, “Ingana ure kumukhono kwoowo mu maraango kaase untsitsubile 3mu lisiina ly'Omukasya Wele, uwula likulu ni shibala, nga uloma uri singene uyilile umusooleli wase Isaaka umukhasi khukhwaama mu bakhaana be babaandu ba Kanaani, beesi imenyamwo bano ta. 4Ne ulome uri kane utsye mu shibala she weefwe isi nasaalikha, ufunile umusooleli wase Isaaka umukhasi mu balebe baase babeene.”

5Umwakaanisi yuno naye waareeba Iburayimu ari, “Ne siinga nga umukhasi mweene alekha khufukiilila khukhwiitsa ni nase ino? Ise inyala neesayo umusooleli woowo mu shibala isho sheesi iwe wasaalikhamwo?”

6Iburayimu naye waamwiilamwo ari, “Waakha khuushibona uri s'uwisayo umusooleli wase ibweene iyo ta. 7Umukasya uwula likulu ni shibala, niye uwandeera ise ino, khukhwaama mu shibala mweesi nasaalikha, waasuubisa ari kane ambe ise liloba lino khuuba lilyase biilo ni biilo. Ise naamanyile ndi iwe n'ukane utsye ibweene iyo, Umukasya kane akhurumanile malayika weewe khuukhuyeeta iwe, unyalise khuufunila umusooleli wase umukhasi. 8Ne siinga umukhasi uyo alekha khufukiilila khukhwiitsa ni nawe ta, shishitsubo shino singene shikhuwaambekho ta. Ne waakha khuubona uri s'uwisayo umusooleli wase ibweene iyo ta.” 9Aryo umwakaanisi yuno waara kumukhono kweewe akari e kamaraango#24.9 Kumukhono kweewe akari e kamaraango: Yino yaba isaambo yaabwe iye khukhwitsubila umuundu umukhulu uri sheesi witsubile kane usholelese ka Iburayimu, nga amwiitsubila ari kane oolelese byoosi byeesi aamuloomba khuukhola.

10Lwanyuma lweebyo, umwakaanisi waabukula tsiŋamila tsa Iburayimu likhumi, waasuta ni biwaanwa bye lisuno bibiindi swa busa. Aryo wenyukha waarakikha lukyeendo lweewe khuutsya mu shiriimba sha Nahori, shishaba mu shisiintsa Mesopotamiya she ngaaki. 11Nga n'amala khukhwoolayo, waakhola tsiŋamila khuukonakho aasi tsiwolekho aambi ni luluutsi lwe kameetsi lwe shiriimba. Tsinyaanga tsaba tse angoloobe tseesi bakhasi be mu shiriimba beetsilamwo khuutaha kameetsi.

12Abweene awo, umwakaanisi yuno waaloomba ari, “O Umukasya Wele isi umukoosi wase Iburayimu esaaya. Ikhuloomba umbe sheesi nitsililiile, woolelese shisuubiso shoowo isi umukoosi wase shaleelo. 13Bona ise neemikhile aambi ni isebele iye kameetsi yino, mweesi bakhaana be mu shiriimba bakana khukhwiitsa batahe. 14Ne umukhaana isi kane inoombe kameetsi indi, ‘Numbekho kameetsi inywekho khukhwaama mu soongwe yoowo.’ Ne naye waaloma ari, ‘N'unywe ni tsiŋamila tsoowo natso tsinywe,’ ise kane imanyile ilala ndi, umweene uyo niye isi uroboore, naluundi kane ishimanye ndi, woolelesile shisuubiso shoowo isi umukoosi wase.”

15Aryo n'aba nga ashiili khumaliilisa ni khuuloomba ta, Rebeka weetsa ni soongwe yeewe nga waakisutiile khu mabeka keewe. Niye aaba umukhaana wa Besweli, umusooleli wa Milika, uwaba umukhasi wa Nahori, waandaaye wa Iburayimu. 16Umukhaana yuno aaba abonekha buulayi naabi, nga ali indungubaasi busa, ukhaabatsakakho n'umuseetsa yeesi ta. Aryo waabirawo, weekha mu sebele, waataha kameetsi, weetsusa isoongwe yeewe, waarura ibulafu.

17Umwakaanisi tsana waayubakilisa, waatsya khaangu isi umukhaana tsana waamulomela ari, “Ikhuloomba ndi umbekho kameetsi, inywekho khukhwaama mu soongwe yoowo.”

18Umukhaana naye weelamwo ari, “N'unywekho musakhulu.” Aryo weenamisa khaangu isoongwe khukhwaama khu mabeka keewe, waamuwa waanywa.

19Aryo n'amala khuumuwa waanywa, waakyelawo waamulomela ari, “Ari ingana khuutayila ni tsiŋamila tsoowo kameetsi natso tsinywe kakaatsimala.” 20Kila atsya khaangu, waatsukha kameetsi mu shitowo, waatimaka weelayo waataha kameetsi kakaandi, waareera kakaamala tsiŋamila tsoosi khuunywa. 21Biba biryo, umusaani aaba nga waasilile busa, nga alolelela khuubona oba nga Umukasya waamwiililemo sheesi aaloomba.

22Nga tsiŋamila tsaamalile khuunywa kameetsi, umusaani yuno waabukula intsiyi iye zaabu iye lisuno naabi, waakimukwaarisa, waamusabikha ni birere bye zaabu khu makhono keewe. 23Lwanyuma kila amureeba ari, “Imboolelekho, paapa woowo niye naanu? Ne manya muntsu mweenywe mulimo shiifwo mweesi khunyala khwaakona shiilo shino?”

24Kila Rebeka naye weelamwo ari, “Paapa wase niye Besweli, umusooleli wa Nahori ni Milika. 25Khuliyo ni bukono mweesi iwe ni basaani boowo munyala mwaakona, naluundi khuliyo ni bunyaasi bubunyala bwaamala tsiŋamila tsoowo buulayi naabi.”

26Umusaani uyo weenamisa kumurwe kweewe aasi wesaaya Umukasya, 27nga aloma ari, “Ikhusiima naabi iwe Umukasya Wele uw'omukoosi wase Iburayimu, uwolelesile shiisa shoowo shiikali ni bubweela bwoowo isi umukoosi wase. Naluundi bona waanaangirire buulayi waantsolesa mu balebe beewe babeene!”

28Aryo Rebeka waatimaka waatsya muungo mwaabwe, waatsya waaboolela beengo bibiindu bino byoosi. 29Rebeka aabakho n'umusaani weewe abe baamulaanga bari Labani, naye uwanyalisa khuurura waatimaka khaangu khu sebele, isi umusaani tsana aaba. 30Biba biryo, abe Labani waaboone khaale intsiyi iye zaabu, ni biirere khu makhono keewe, naluundi aaba nga waawuliile byoosi byeesi Rebeka aaloma. Kila enyukha waatsya isi umusaani tsana uyo, uwaba nga weemikhile aambi ni tsiŋamila tseewe, aambi ni sebele. 31Kila Labani amulomela ari, “N'uwiitse khutsye ingo weefwe. Iweewe uli umuundu isi Wele amalile khaale khuuwa tsikhabi. Simbona ilomo lwashiina iwe urama nga weemikhile ibulafu busa uryo ta. Ise naamalile khaale khuuŋoonaŋoona shiifwo mweesi inywe munakona, ni mweesi tsiŋamila tsoowo natso tsinakona.”

32Aryo umwakaanisi wa Iburayimu waatsya ingo ni Labani, baaruurisaka tsiŋamila bisutwa byeesi tsaba nga tsaasutile, lwanyuma baatsiwa bunyaasi khuulya. Lwanyuma ndi baareera kameetsi, baakawa umwakaanisi wa Iburayimu ni basaani beewe khuusiinga bikyele. 33Ibyo nga byaweele, baabareerera biilyo. Ne umwakaanisi wa Iburayimu waaloma ari, “Nga ishiili khulya ta, ingana khuubaboolela ilomo inyene iyindeerire ano.”

Kila Labani amulomela ari, “Kale khuboolele khubone.”

34Umwakaanisi uyo waaloma ari, “Iseese ndi umwakaanisi wa Iburayimu. 35Umukasya waawa umukoosi wase tsikhabi tsingali naabi, naluundi waamuwa buyiindifu bwe kamaani naabi. Waamuwa bibyaayo nga kamasheese, tsimbusi, tsikhaafu, tsiŋamila, ni tsisikilya, atweela ni feetsa ni zaabu, ni baakulwa baakali naabi. 36Umukyelama w'omukoosi wase nga niye Sara, abe waakhusaalakho babaana ta, khukhwoolesa mu buloosi bweewe. Lwanyuma waamusaalila umwaana umusiinde mutweela isi aakabila bibiindu byoosi byeesi ali ni nabyo. 37Umukoosi wase uyo, aakholesa ise shishitsubo, nga imulomela ndi kane noolelese byoosi byeesi aandakila khuukhola. Kila anomela ari, ‘Ukhafunila umusooleli wase umukhasi khukhwaama mu baandu ba Kanaani beesi ise imenyamwo ta. 38Ne waakha khuutsya mu shibala she weefwe mweesi nasaalikha, uweentsele umusooleli wase umukhasi khukhwaama mu balebe baase babeene.’ 39Ne nase neelayo naareeba umukoosi wase nga inoma ndi, ‘Ne siinga umukhasi uyo alekha khuufukiilila khukhwiitsa ni nase?’

40“Kila umukoosi wase antsilamwo ari, ‘Umukasya isi ise niyikinatsaka akhaakhurumanile malayika weewe khukhwiitsa akhuyeete, khukhwoolesa n'ulinyoolela umusooleli wase umukhasi khukhwaama mu balebe baase babeene. 41Ne siinga baalebe baase bamwiikaanisa khukhwiitsa ni nawe, kane ube umulekhuule, ni shitsubo isho singene shikhuwaambekho ta.’

42“Ne ni noolile khu sebele shaleelo shino, inoombile Umukasya mu mwoyo kwase ndi, ‘O Umukasya Wele, isi umukoosi wase Iburayimu esaaya, ikhuloomba untsolelesile sheesi niitsile ano khuukhola. 43Bona ise neemikhile ano khu sebele yino. Ne siinga ibawo umukhaana yeesi unanyoowa khukhwiitsa ano khuutaha kameetsi, inamuloomba ambekho inywe khukhwaama mu soongwe yeewe. 44Ne siinga afukiilila waamba kameetsi naanywa, naluundi waawakho ni tsiŋamila tsase, inamanya ndi umweene uyo niye isi iwe uroboorere umusooleli w'omukoosi wase.’

45“Imbeele nga ishiili khuumaliilisa ni khuuloomba ta, Rebeka weetsa khuutaha kameetsi ni soongwe yeewe khu mabeka khweewe. Ne n'amalile khuutaha kameetsi, imuloombile ndi ambekho inywe. 46Naye aryo aruurire khaangu isoongwe yeewe waanomela ari, ‘N'unywe, lwanyuma intsye indayile tsiŋamila tsoowo natso tsinywe.’ Abweene awo ise inyweele, lwanyuma lwayo waatsya waatayila ni tsiŋamila tsase natso.

47“Lwanyuma imureebile ndi, ‘Ne iwe uli umukhaana wa naanu?’

“Naye waantsilamwo ari, ‘Ise ndi umukhaana wa Besweli, umusooleli wa Nahori ni Milika.’ Iseese abweene ni abweene, imbukuule intsiyi naamusabikha, ni birere naabisabikha khu makhono keewe. 48Lwanyuma neenama aasi kumurwe kwase, naasiima Umukasya Wele isi umukoosi wase Iburayimu esaaya, uwunaangiliile buulayi aryo, khukhuuntsolesa mu balebe b'omukoosi wase, naanyalisa khuufunila umusooleli weewe umukhasi. 49Nashiryo imbaloomba mumboolele siinga nga shinaba nga shinyalikha, khuukholela umukoosi wase bye shiisa. Ne siinga nga ta, muumboolele, imbone kumukhoosi kukuundi kweesi inyala naawaamba.”

50Kila Labani ni Besweli nabo bamwiilamwo bari, “Shino shibonekhana nga Umukasya umweene niye ushikholile. Ifwe si khulikho ni shishiindu shoosi shishiindi sheesi khunyala khwaakanikha ta. 51Bona Rebeka uyu shiina, tsya ni naye, atsye abe umukhasi uw'omusooleli w'omukoosi woowo, nga Umukasya umweene n'ashikhalilewo.”

52Aryo umwakaanisi wa Iburayimu n'awulila biilomo bino, weenamisa kumurwe kweewe aasi khwiloba, wesaaya Umukasya. 53Lwanyuma waarusayo biiwaanwa bye bikwaaro, ni khuutubaasakho izaabu ni feetsa, waabiwa Rebeka. Waabukula biwaanwa bibiindi khu nibyo waabiwa waandaaye Labani, ni bibiindi isi maayi weewe.

54Umwakaanisi wa Iburayimu atweela ni basaani beesi aaba ni nabo, baalya luundi baanywa, khukhwoolesa ni baakonela ibweene iyo. Ne ni bwasha kumutikhinyi, benyukha, kila aloma ari, “Ari imbaloomba muusiibule, niileyo isi umukoosi wase.”

55Ne Labani atweela ni maayi weewe baalomela umwakaanisi yuno bari, “Khayo Rebeka amenyekho ni nafwe ano, khuumalakho imbuka iyoolakho, biifukhu nga likhumi biri, nio lwanyuma atsye.”

56Ne naye umwakaanisi weelamwo ari, “Mukhaamenyesakho ano luundi ta. Bona Umukasya waanjeetile ise khuufunila umusooleli w'omukoosi wase umukhasi. Niimufukiilise ise niileyo isi umukoosi wase.”

57Nabo beelamwo bari, “Khakhulaange Rebeka umweene khumureebe khubone.” 58Kila nga baamulaangile baamureeba bari, “Iwe ufukiilila khuutsya n'umusaani uyu?”

Naye waabeelamwo ari, “Ee, ise ifukiilila.”

59Baryo nabo baasibula umukooko waabwe Rebeka khuutsya, nga atsya n'umukyeesa weewe umukhaana, atweela n'umwakaanisi wa Iburayimu, ni basaani beesi aaba ni nabo. 60Lwanyuma baawa Rebeka tsikhabi nga bamulomela bari, “Mukooko weefwe, khuuloomba khuri Wele akhuwe biikana ni kimikaanda kye lisaaye, naluundi babetsukhulu boowo abayeete khuuwula baasiku baabwe, bamenye mu biriimba byaabwe.”

61Lwanyuma lwayo, Rebeka ni baakyeesa beewe bekhaana, beŋoonaŋoona khuuwaamba lukyeendo. Baryo baaniina bekhala khu ŋamila tsaabwe, bawaamba lukyeendo atweela n'umwakaanisi wa Iburayimu ni basaani beesi aaba ni nabo.

62Khu mbuka iyo, Isaaka aaba nga weetsile khukhwaama i Beya Lahayi Royi#24.62 Beya Lahayi Royi: Ilomo yino imanyisa iri Isebele yooyo Uuli Umulamu Uwumbona ise, lwekhuuba aaba nga amenya mu shisiintsa she mwaalo wa Kanaani. 63Aryo Isaaka waatsya khukyeendakakho mu mukuunda khu nyaanga tse angoloobe, nga alikho ni byeesi eyambaasila. Uri enyusa tsimoni tseewe ari, waabonela aleeyikho tsiŋamila nga tsilikho tsiitsa luubeka lweewe. 64Kila Rebeka naye nga weenyusile tsimoni tseewe, waabona Isaaka, weenyukha khu ŋamila yeewe, weekha aasi. 65Kila areeba umwakaanisi wa Iburayimu ari, “Musaani shiina isi imbona uyo, nga akyeenda khukhwiitsa khukhwakaanana ni nafwe?”

Umwakaanisi naye weelamwo ari, “Uyo niye umukoosi wase.” Rebeka waabukula shitambaala she ngubo webiimbilila.

66Abweene awo, umwakaanisi waarakikha khuuboolela Isaaka bibiindu byoosi nga ni byakholekhana. 67Aryo Isaaka waareera Rebeka mu lisari mweesi maayi weewe Sara aamenyatsaka nga ashiili khufwa ta, waamuyila khuuba umukhasi weewe. Isaaka waakana naabi Rebeka, ni kumutaambo kweesi aaba ni nakwo kwe khuufwa khwa maayi weewe kwaamuwakho.

Currently Selected:

Khuurakikha 24: LCE

Highlight

Copy