Khuurakikha 22

Wele akhakilisa Iburayimu

1 # Makh 10.5; Sir 44.20; Heb 11.17-19 Nga abirirewo kimiiko kikyoolakho, Wele waakhalawo khuukhakilisa Iburayimu. Kila amulaanga ari, “Iburayimu!”

Iburayimu naye weelamwo ari, “Ise niyooyu.”

2 # 2 Kim 3.1 Kila Wele amulomela ari, “Tsya uyile umusooleli woowo mutweela yenyene Isaaka uyo, isi ukana naabi! Umuyile mu shibala sha Moriya, ni nase kane ikhwookesanise lukiingi khweesi kane umuwaanilekho nga isaayilo intsoshe.”

3Aryo Iburayimu waawuuna naabi kumutikhinyi kukweelakho, waasaaka tsiikhu tse khukhwoosha shiwaanwa. Lwanyuma waatsira khu sikilya yeewe, wenyukha waatsya mu shifwo sheesi Wele aamulomela khuutsya, nga ali ni Isaaka atweela ni babaakaanisi beewe babili. 4Lwanyuma lwe khuukyeenda biifukhu bitaru, Iburayimu wenyusa tsimoni tseewe, waabona shiifwo tsana nga shili ataayikho. 5Kila alomela babaakaanisi beewe ari, “Inywe ni murame ano atweela ni sikilya. Ise n'umusooleli wase Isaaka kane khutsye khwisaayekho Umukasya mu shifwo she taayi isho. Lwanyuma kane khukobole isi muli.”

6Aryo Iburayimu wetyuukhisa Isaaka tsiikhu tsana, ne niye umweene waasuta kamaanda ke kumulilo ni kumubano. Ne ni baaba nga bakyeenda batsya, 7Isaaka waareeba paapawe ari, “Paapa, naaboone khwaasutile kamaanda ke kumulilo atweela ni tsiikhu, ne lisheese lye khukhwoosha lili eena?”

8Paapawe Iburayimu naye waamwiilamo ari, “Mwana wase, Wele umweene kane efunileyo lisheese lye khukhwoosha.” Baryo boombi baaba nga beelooselayo ni lukyeendo lwaabwe.

9 # Yak 2.21 Ni baamala khukhwoola mu shifwo sheesi Wele aamuboolelakho, Iburayimu woombekha shisheeso, lwanyuma waashipaangakho tsiikhu buulayi. Nga waamalile aryo, wahaamba umusooleli weewe Isaaka, waamubowa kimikosi, waamwaalisa khu tsikhu khu ngaaki. 10Lwanyuma waabukula kumubano tsana khuusala umusooleli. 11Ne Malayika w'Omukasya waakukuula ni likono lye angaaki khukhwaama mwikulu nga aloma ari, “Iburayimu! Iburayimu!”

Kila Iburayimu naye elamwo ari, “Ise niyooyu!”

12Malayika waamulomela ari, “Ukhasala umusooleli woowo, namwe waamukholakho shishiindu shiibi shoosi ta. Lwekhuuba ari ise naamanyiile ilala ndi, ufukiilisa luundi uwulila sheesi Wele akhulomela. Bona waafukiilila ni khuuwaanayo umwaana woowo, uuli mutweela yenyene aryo, isi ise!”

13Iburayimu wenyusa tsimoni tseewe, uri esheenga ari, waabona limiiku nga lyawaambikhiile mu shitsakha ni tsiintsika tsalyo. Aryo Iburayimu waatsya waalikhweesayo, waalireera, waaliwaanayo nga isaayilo intsoshe mu shifwo sh'omusooleli weewe. 14Kila Iburayimu atwiikha shiifwo isho lisiina ari, “Yehova Yire.” Ni khukhwoolesa ari babaandu baashiiloma bari “Khu lukiingi lw'Omukasya lweesi awaanilayo.”

15Malayika w'Omukasya waalaanga Iburayimu kumuluundi kwe khabili khukhwaama mwikulu, 16#Heb 6.13-14nga aloma ari, “Ise ndi Umukasya, nitsubila samweene mu lisiina lyase, nga inoma ndi, khukhwaama nga n'ubeele mwirekefu khuuwaanayo umwaana woowo natweela yenyene uyo, waalekha khumwiimana ta, 17#Heb 11.12Ilala kane ikhuwe iwe tsikhabi, imbalaayise lisaaye lye babetsukhulu boowo, bayiimbe babe baakali bafwaane nga tsinieniesi tse khwikulu, namwe bafwaane busa nga kumuyekhe kwe khu ndulo khwe nyaantsa. Babetsukhulu boowo bakhaasoolanise luundi bawule baasiku baabwe, bayile biriimba byaabwe abe mweesi bamenya. 18#Bur 3.25Ni kamanaambo koosi ke khu shibala kakhaafune tsikhabi khuubirira mu betsukhulu boowo, lwekhuuba iwe waawuliilisile byeesi ise inoma.”

19Lwanyuma lwayo Iburayimu waakobolayo isi aalekha babaakaanisi beewe, baryo bawaamba lukyeendo baakobolayo i Berisheba isi Iburayimu aamenyatsaka.

Lisaaye lya Nahori

20Lwanyuma lwa bino byoosi, Iburayimu waashiwulilakho ari Milika waasaalila Nahori babaana besiinde musaafu, nga nibo bano: 21Uzi niye uwaba umukiboole, ni wandaaye bari Buzi, ni Kemuweli uwaba paapa wa Aramu, 22Khesedi, Hazo, Piludashi, Jidilafu, ni Besweli. 23Besweli niye uwekyela paapa wa Rebeka. Milika aasaalila Nahori waandaaye wa Iburayimu babaana besiinde shinaane. 24Nahori aaba n'umukhasi uwe bulafu abe lisiina bari Rewuma. Rewuma yuno aasaalila Nahori babaana bano: Teba, Gahamu, Tahashi ni Maaka.

Currently Selected:

Khuurakikha 22: LCE

Highlight

Copy