Khuurakikha 20

Iburayimu ni Abimeleki

1Iburayimu waakyeenda khukhwaama awo, waatsya mu shisiintsa she Negevu, isi aamenya akari a Kadeshi ni Shuri. Lwanyuma waakyeenda waatsya i Gera, waamenya ibweene iyo. 2#Rak 12.13; 26.7Nga bali iyo, Iburayimu waaboolela buli muundu yeesi ari, Sara umukooko weewe. Isho shaakila umuyiinga Abimeleki uwe Gera, waarumanisa bamureerere Sara, waamuyila.

3Ne Wele weetsa isi Abimeleki mu marooro shiilo, waamulomela ari, “Iwe uli khuutsya khufwa lwekhuuba umukhasi yuno isi uyilile ali umukhasi umukhwaalikhe.”

4Ne shonyene ndi abe Abimeleki ashiili khumuwaambakho ta, kila alomela Umukasya ari, “Umukasya, ise s'indikho ni lomo yoosi ta. Ari ukana khuuntsira ise busa ni babaandu baase? 5Iburayimu umweene niye uwanomeele ari umukhasi yuno ali umukooko weewe, n'umukhasi umweene naye waaloma aryo. Ise shino naashikholeele mu buwaanga, mbaawo shiibi sheesi ikholile ta.”

6Kila Wele naye elamwo Abimeleki mu marooro ari, “Shili shaŋali shiri s'ulikho ni kumusaango kwoosi ta. Isho nisho shishikilile ise naalekha khukana ndi woonake ta. Ise sikhufukiilisile iwe ni khuuwaambakho khu Sara ta. 7Ari ingana umwiisileyo umukhasi weewe. Lwekhuuba niye ali umuŋoosi, kane akhuloombele iwe ulekhe khufwa ta. Ne siinga ulekha khuumwiisayo ta, uli ni khuushimanyila ilala uri iwe ni babaandu boowo mweesi mutsya khufwa.”

8Aryo Abimeleki waawuuna kumutikhinyi mamilimili, walaanga atweela baakhulu beewe boosi, lwanyuma waababoolela bibiindu bino byoosi bibyabawo. Nabo buuri bwaabawaamba naabi. 9Lwanyuma kila Abimeleki alaanga Iburayimu, waamureeba ari, “Ari shiina shino sheesi ukhukholile ifwe? Shibi shiina sheesi ise nakhukhola iwe, shishikilile waandeerera buwangafu buno bwoosi khusiise ni khu linaambo lyase? Byeesi ukholile ise abe sibyaakha khuukholekha na khakyeekhe ta.” 10Abimeleki waareeba Iburayimu luundi ari, “Ubeele na lomo shiina ikilile iwe waakhola shishiindu shino?”

11Iburayimu naye weelamwo ari, “Isho ishikholile lwekhuuba naambaasile ndi ano mbaawo umuundu namutweela uurya Wele ta, nashimanyila ilala ndi banyala baantsira nio bayile umukyelama wase. 12Ne khu luwaande luluundi ali umukooko wase. Lwekhuuba khuli ni paapa mutweela, ne ba maayi babili. 13Nga Wele n'andakila khuurura muungo mwa paapa wase, injeendaane mu bibala bibiindi, ise nalomela Sara ndi, ‘Ilala siinga uba nga ungana, buli aandu oosi isi kane khutsyatsake, ubaboolela uri ise ndi umusaani woowo.’ ”

14Lwanyuma kila Abimeleki abukula kamasheese, ni tsiyeeyi, waabiwa Iburayimu, waatubaasakho ni baakulwa besaani ni bekhasi. Lwanyuma waamukoboselayo Sara. 15Kila alomela Iburayimu ari, “Bona shibala shase shoosi shili isi uli, n'utsye umenye aandu oosi isi ukana.” 16Waakyelawo waalomela Sara ari, “Ise naaweele umusaani woowo bisiintsa bye feetsa shiikana shitweela (1,000), khukhwookesanisa isi buli muundu yeesi shiri mbaawo shiibi shoosi sheesi ukholile ta.” 17Lwanyuma Iburayimu waaloomba isi Wele, aryo Wele waawonesa Abimeleki, umukyelama weewe, atweela ni baakulwa beewe be khasi, babaaba muungo mweewe nio baanyalisa nabo khuusaala babaana. 18Lwekhuuba abe Umukasya waayikala bisoombo bye bakhasi babaaba muungo mwa Abimeleki boosi, khuuba nga she khuureewula isi Abimeleki, lwekhuuba aayila umukyelama wa Iburayimu.

Currently Selected:

Khuurakikha 20: LCE

Highlight

Copy