Khuurakikha 18

Basuubisa Iburayimu umwaana umusiinde

1Aabawo lutweela, Iburayimu aaba nga wekhaale amulyaango kwe lisari lyeewe, lilyaba aambi ni kimisaala kye kamaani kya Mamure. Tsaba tsinyaanga tse kumuusi mwihangilwe, nga inyaanga yebaanduule naabi. 2#Heb 13.2Kila uri Iburayimu enyusa tsimoni tseewe, waabona basaani bataru nga beemikhile aambi awo. Aryo wenyukhilamwo khaangu waatsya khuubakaanila, weenamisa kumurwe kweewe aasi khwiiloba. 3Lwanyuma waabalomela ari, “Basakhulu, inywe siinga mubona muri shili shiilayi, imbaloomba ndi mukhaambiriirira busa ta. 4Khayo imbareerereyo kameetsi, musiingekho bikyele byeenywe, lwanyuma mwikhalekho aasi e kuusaala, muwolekho. 5Lwanyuma kane intsye imbareerereyo khe khuulya, nio munyale khuufuna kamaani kakaakane kabanyalisise khukhwiilooselayo ni lukyeendo. Inywe mwambeesile ise lukoosi khukhwiitsa isi indi, mufukiilise imbakaanise.”

Nabo baamwiilamwo bari, “Shiilayi, n'utsye ukhole nga niwaama khuloma.”

6Iburayimu waatimaka khaangu waatsya mu lisari, waalomela Sara ari, “Yuubakho! Bukula khaangu isawu iye buufu, ubuŋooneŋoone, ukholeyo kumukaati.” 7Nga waamalile aryo, waatimaka khaangu waatsya mu litaala lyeewe lye tsikhaafu, waabukulayo imasoti, inere, ifuurayo buulayi, waakiwayo isi umuraambi, khuutsya khukisala. 8Lwanyuma lwayo, waabireera, waakabulila bakyeni beewe kamabeele kamabwowu, ni kamabeele busa, atweela ni nyama tsana intsoshe.

Baryo ni baaba nga balikho balya, Iburayimu umweene waaba nga weemikhile aambi awo, mwisina mwe kuusaala. 9Kila bamureeba bari, “Umukyelama woowo Sara ali waheena?”

Naye waabeelamwo ari, “Ali mukari mu lisari.”

10 # Roma 9.9 Kila Umukasya aloma ari, “Ise indikobola ano khu mbuka nga yino kumwiiko kukwiitsa, n'umukyelama woowo Sara aliba waasaalile umwaana umusiinde.”

Khu saawa iyo, Sara aaba nga weemikhile inyuma wa Iburayimu, a mulyaango kwe lisari. 11Iburayimu ni Sara boombi baaba nga bahaangaale mu miiko, ni Sara aaba waabira khaale kimiiko kye khuusaala babaana. 12#1 Pet 3.6Aryo Kila Sara atsekha, nga elomela umweene ari, “Ise naakora khaale ndi, n'umusakhulu wase naye waakora, khunyala khwasaala umwaana mu miiko kino?”

13Kila Umukasya areeba Iburayimu ari, “Lwashiina kila Sara atsekhile? Lwashiina aloma ari, ‘Kane inyale indyeena khuusaala umwaana nga naamala khuukora ndi?’ 14#Luk 1.37Manya iliwo shishiindu shishikhaasa Umukasya khuukhola? Nga niimalile khaale khuuloma, ikhaakobole ano khu mbuka yino mu mwiiko kukwiitsa, ni Sara akhaabe nga waasaala khaale umwaana umusiinde.”

15Ne Sara waaba nga waariire, kila ekaana nga aloma ari, “Ise sinatsekhilekho ta.”

Ne Umukasya waaloma ari, “Khuutsekha nikhwo utsekhile.”

Iburayimu ekoontselela lwa Sodomu

16Lwanyuma basaani tsana bataru bano, benyukha nga bakana khutsya, baalola kwe Sodomu, ni Iburayimu waakyeendakho ni nabo nga abaroongesa. 17Kila Umukasya elomela umweene ari, “Ilala ise kane imbisabise Iburayimu sheesi indi khuutsya khuukhola? 18Ate Iburayimu yuno atsya khwikyelamwo linaambo lye kamaani luundi likhulu naabi, ni kamanaambo koosi ke mu shibala katsya khuuweebwa tsikhabi khuubirira mu niye. 19Ise naamuroboore niye khuubona ari aleekela babaana beewe, ni babetsukhulu beewe boosi khuuloondelela kamakaambila kaase, khuukhola byeesi ise ingana. Lwe shisheene isho, intsya khukhwoolelesa isho sheesi namusuubisa khuumukholela.”

20Lwanyuma kila Umukasya aloma Iburayimu ari, “Ise naawuliile bari babaandu ba Sodomu ni Gomora, bali khuukhola bibiindu biibi naabi, ni bubwoonaki bwaabwe bwaabiriirire naabi. 21Nashiryo ari indi khuutsyayo nibonelekho samweene, oba nga ilala babaandu abo bali baabi naabi nga nishili khuuwulilikha. Ne siinga baba nga si bali baryo ta, ingana khuushiimanya.”

22Baryo basaani bano baashuukhila abweene awo, baarakikha lukyeendo lwe khuutsya i Sodomu. Ne Iburayimu niye waarama nga weemikhile mu shifwo mubweene n'Umukasya. 23Lwanyuma kila Iburayimu esyeenda aambi waareeba ari, “Umukasya, ilala uli khuutsya khuhesela atweela babaandu bakwalaafu ni baabi beene? 24Ne siinga mu shiriimba umwo munyoolekhanamwo babaandu bakwalaafu kamakhumi karaano? Iwe s'unyala waasaasila shiriimba isho khulwe babaandu kamakhumi karaano ako ta? 25Abe sishaakha khuuba shiryo ta. Iwe s'unyala waahesa babaandu bakwalaafu atweela ni baabi beene ta. Sishinyalikha bakwalaafu khuukabananila atweela mu shitaambiso isho ta. Iwe s'unyala waakhola isho ta. Iwe uli Umukayi uwe shibala shoosi, ukhola bibyaakhila.”

26Kila naye Umukasya amwiilamwo ari, “Siinga nga inyoolayo babaandu kamakhumi karaano bakwalaafu mu Sodomu, kane isaasile shiriimba isho khulwaabwe.”

27Iburayimu ndi waakanikha luundi nga aloma ari, “Khukhwaama niindakikhile khuukanikha lubuula ndyo isi Umukasya, abe yakhaba nga indi litosi busa luundi likokhe, isaasile busa. 28Ne siinga unyoolamwo babaandu kamakhumi kane na baraano bonyene babaali bakwalaafu? Kane uwese shiriimba isho shoosi lwekhuuba babaandu baraano si balikho ta?”

Umukasya weelamwo ari, “Singene imbese shiriimba isho ta, siinga inyoolamwo babaandu kamakhumi kane na baraano bakwalaafu.”

29Luundi ndi Iburayimu waareeba ari, “Ne siinga munyoolekhamwo kamakhumi kane konyene?”

Umukasya weelamwo ari, “Khulwe kamakhumi kane ako, singene imbese shiriimba isho ta.”

30Iburayimu waaloma luundi ari, “Umukasya ukhaakhalalila nga naareebile luundi ta. Ne siinga unyoolamwo babaandu baalayi kamakhumi kataru konyene?”

Umukasya weelamwo ari, “Khulwe kamakhumi kataru ako, singene imbese shiriimba isho ta.”

31Lwanyuma kila Iburayimu aloma ari, “Khukhwaama nga ninyalisile khuukanikha isi Umukasya, khayo indeebe, ne siinga munyoolekhamwo kamakhumi kabili konyene?”

Umukasya weelamwo ari, “Khulwe kabili abo, singene imbese shiriimba ta.”

32Lulwakamayo Iburayimu waaloma ari, “O Umukasya, ukhaakhalalila ta, ne khayo indeebeyo kumuluundi kuno mutweela kwonyene. Ne siinga unyoolamwo likhumi bonyene?”

Umukasya weelamwo ari, “Khulwe likhumi abo, singene imbese shiriimba isho ta.”

33Lwanyuma lwayo nga Umukasya waamalile khuukanikha ni Iburayimu, waamulekha waatsya, ni Iburayimu naye waakobolayo ingo weewe.

Currently Selected:

Khuurakikha 18: LCE

Highlight

Copy