Buraambi 2

Khukhwiitsa khw'Omwoyo Umukhosefu

1 # Lev 23.15-21; Maka 16.9-11 Shifukhu sha Pentekote ni shoola, abe bafukiilisi mu Kristu boosi babusaniile mu shifwo shitweela. 2Lubaluba, bawulila khuyilila nga khuwuuma khukhwaama mu ngaaki, nga khuli nga imbewo iye kamaani ni wuutsa. Khuwuuma khuno khwetsusa intsu yoosi mweesi baaba bekhalemwo. 3Lwanyuma abonekhawo shishafwana nga tsinimi tse kumulilo tsitsawukhanamwo tseekha tsaakwa khu buli mutweela. 4Boosi betsusibwa n'Umwoyo Umukhosefu, baryo barakikha khukanikha mu nimi tsitsiindi busa, nga Umwoyo n'abawa khutsiloma.

5Mu mbuka iyo abawo Bayudaaya babaaba bamenya mu Yerusalemu, ni babaandu babaaba babelama naabi abe babamile mu buli linaambo lyoosi, liliili asi we likulu. 6Ne babaandu abe babamenya mu Yerusalemu bano ni bawulila kamakono kano, boosi babusana atweela, nga beyaanga, lwekhuba abe buli mutweela awulila bafukiilisi mu Yezu nga bakanikha mu lulimi lwe waabwe. 7Lituuli lye babaandu bano basamilila busa, lundi nga beyaanga nga baloma bari, “Babaandu babaali khukanikha bano boosi si bali ba Galilaaya? 8Ne ari shiitsa shiryeena ifwe buli mutweela khuwulila nga bakanikha mu lulimi lweewe lusaalikhana? 9Ifwe khwama i Paruti, babaandi i Mediya ni Elamu, ni babamenya i Mesopotamiya, Yuda ni Kapadokiya, be Pontusi ni Asiya. 10Babaama i Firigiya, ni Panfiliya, be Misiri, ni be mu bisiintsa bye Libiya bibiwulibwa ni Kurene. Balala bali bakyeni khukhwaama i Roma, ni babaandi Bayudaaya ni naabo bakhali Bayudaaya ta. 11Bayudaaya ni Banaambo babashuukha bekyela Bayudaaya. Balala khwama i Kureti ni mu Buwarabu, bona khubawulila nibo nga bakanikha mu nimi tsitseefwe tsinyene bibiwaamba khu bye kamakaanga bya Wele.” 12Baryo boosi beyaanga lundi bakaraangarana busa, nga baloma bonyene bari, “Ne makhuwa shiina kano?” 13Ne babaandi babaramile batsakhilila baloondeleli ba Yezu, nga baloma bari, “Iviini ishiili iŋana yabameesile.”

Bubakha bwa Petero

14Ne Petero wenyukha atweela ni basheewe liikhumi na mutweela, wasuta likono lyeewe angaaki, wakanikha isi babaandu nga aloma ari, “Babaandu be mu Yuda ni nanywe mweesi babamenya mu Yerusalemu, mweesi mwakhiile khumanya shino, nashiryo ni murekeerese bilomo byase. 15Babaandu bano si bameelile nga inywe ni mwambaasa ta, lwekhuba bona ari tsili tsisaawa tsitaru busa tse kumutikhinyi. 16Khurusakho bino nibyo byeesi Umuŋoosi Yoweli aloma ari,

17 # Yow 2.28-32 ‘Wele aloma ari,

mu bifukhu bimaliilisi,

inditsukha Umwoyo wase khu baandu boosi,

ni babaana beenywe besiinde ni bakhaana balikanikha bye buŋoosi.

Babaana beenywe besiinde balibona khubonekhelwa,

ni basaani basakhulu beenywe baliroora kamarooro.

18Ilala mu bifukhu ibyo inditsukha Umwoyo wase

khu bakaanisi baase

besaani ni bekhasi,

nio bakhole bye buŋoosi.

19Indyokesanisa bye kamakaanga angaaki mwikulu

ni khu shiibala asi nokesanise bye khubonelakho,

kamafuki, ni kumulilo,

ni khukhwituukha khwe liliisi.

20Nga shifukhu sh'Omukasya shishiili khwoola ta,

shifukhu shikhulu nalundi she khukhwiyokesana,

inyaanga ilishuusibwa yikyele shishiilima,

ni kumweesi kulikyela kumubesemu nga kamafuki.

21Nalundi khu shifukhu isho, shiliiba ndi buli mundu yeesi uliloomba mu lisiina ly'Omukasya, aliwonesebwa.’

22“Bandu ba Isiraeli bashaase, ni muwulile bilomo bino: Yezu uwe Nazareti, ali umuundu isi Wele asindikha isi muli, nga abirira mu buraambi bwe kamaani, ni bye kamakaanga, ni bye khubonelakho, byeesi Wele akhola nga abirira mu niye nga mweesi mubona. Nga inywe mwabeene ni mumanyile lwekhuba byakholebwela akari enywe. 23#Mat 27.35; Mrk 15.24; Luk 23.33; Yoh 19.18Yezu yuno uwawaanibwayo khulondekhana ni bibyamala khuŋoonebwa khaale ni khumanya khwa Wele, inywe mwamutsaangilila khu musalaba nalundi mwamwiira nga muraambisa kamakhono ke babaandu baboonaki. 24#Mat 28.5,6; Mrk 16.6; Luk 24.5Ne Wele umweene wamulamusa khukhwaama mu bafu, nga wamalile khumukangulula khukhwaama mu butsiina bwe khuufwa, lwekhuba abe sishinyalikha khuufwa khumuwambilila niye nga umubowe ta. 25#Zab 16.8-11Lwekhuba Daudi naye amulomakho ari,

‘Nabona Umukasya mu moni tsase bifukhu byoosi.

Lwekhuba ali khu mukhono kwase kumulayi, nase singene indengasiwe ta.

26Nashiryo, kumwoyo kwase kwaba ni kumwikhoyo,

ni lulimi lwase lwaba ni sangaalo.

Ni shishifuurisa, iseese nakhaba nga ndi umuundu busa,

bulamu bwase bulimenya mu khwiyikina.

27Lwekhuba iwe s'ulilekha kumwoyo kwase i makoombe ta,

namwe s'ulilekha umukwalaafu woowo khubola ta.

28Iwe wantsokesile tsintsila tsye bulamu,

ulintsitsusa ni kumwikhoyo lwekhuba indiiba mu moni tsoowo.’

29“Be buulebe ba Isiraeli bashaase, inyala khubaboolela ni khubawandalasa ndi, umukuuka weefwe Daudi afwa lundi wasiikhiwa, khuli ano ni ŋani yeewe khukhwoolesa khu shifukhu she shaleelo shino. 30#Zab 132.11; 2 Sam 7.12,13Ne lwekhuba aba umuŋoosi, amanya ari Wele wamwitsubila shishitsubo ari, mutweela khu betsukhulu beewe alikhala khu shitsoloŋo nga umuyiinga. 31Daudi ashibona nga bushiili nio wakanikha khu biwamba khu khulamukha khwa Kristu khukhwaama mu bafu, nga aloma ari, Kristu s'alekhebwa i makoombe ta, namwe kumubili kweewe sikwabola ta. 32Yezu yuno Wele amulamusa khukhwaama mu bafu, ni bibiwaamba khu sheene shino, ifwe khuli bajulisi. 33Nashiryo niye n'aba nga aniinisibwa mu ngaaki khuuba khu mukhono kumulayi kwa Wele, niye wafuna Umwoyo Umukhosefu isi Paapa amulomela, nashiryo byeesi mubona shaleelo bino ni byeesi muwulila bino nibyo biwaanwa byeesi akhutsukhiliile ifwe. 34#Zab 110.1Lwekhuba Daudi niye s'aniina mwikulu ta, ne niye umweene aloma ari,

‘Umukasya aloma Umukasya wase ari,

yikhala khu mukhono kwase kumulayi,

35khukhwoolesa lweesi indireera basiku boowo boosi asi

esi ukhaandakakho bikyele byoowo.’

36“Nashiryo kha babaandu boosi ba Isiraeli bamanye akhali khukhwiririkana ta, bari Wele wakhola Yezu yuno isi mwatsaangilila khu musalaba, khuuba Umukasya lundi Kristu.”

37Ne babaandu ni bawulila bilomo bino, byabatsiina naabi mu myoyo kyaabwe, kila bareeba Petero ni baarume babaramile boosi bari, “Be buulebe ifwe kane khukhole khuryeena?”

38Petero naye wabelamo ari, “Ni mwibiiyise bibyonako byeenywe, lundi buli mutweela khusiinywe abatisibwe mu lisiina lya Yezu Kristu, nio bibyonako byeenywe kane bibeyakhilwe. Muryo nanywe kane mufune shiwaanwa sh'Omwoyo Umukhosefu. 39Lwekhuba khusuubisa khuno khuli khukhweenywe n'isi babaana beenywe, n'isi ibo boosi babaali aleeyi, ni naabo boosi beesi Umukasya Wele alaanga khukhwiitsa is'ali.”

40Aryo Petero wokesanisa munganikha yeewe nga araambisa bilomo bikali nalundi wabakhupilisa nga aloma ari, “Ni mwiwonese mwabeene khurura mu muboolo kuno kumubi.” 41Nashiryo ibo boosi babakaanila shilomo sha Petero babatisibwa. Ni khu shifukhu sheenesho, babaandu biikana bitaru (3,000) nibo babelooselakho.

42Baryo beloosela khuwandalalila khu byeesi baarume babaleekela ni mu khutubaanila atweela, ni mukhumenyulila kimikaati atweela, ni mu khuloombela atweela.

Bulamu bwe bafukiilisi

43Bibiyaangisa ni bye kamakaanga bikali byakholebwela mu baarume, shino shareerera babaandu bakali khuurya. 44#Bur 4.32-35Ne ibo boosi babekyela bafukiilisi bamenyatsaka atweela, nalundi bakabananila atweela bibiindu byoosi byeesi baaba ni nabyo. 45Nalundi baryo baba nga bakulisaka bibiindu byeesi baaba nabyo, babikabananisa isi boosi, nga buli mutweela abe nga n'akana khuyeetebwa. 46Buli shifukhu boosi batsyatsaka mu Lisaayilo Likhulu, ni khumenyulila atweela kimikaati mungo tsaabwe, nga bakabanana biilyo byaawe ni kumwikhoyo nalundi nga babaandu bali ni kumwoyo kukuwaana. 47Baryo baruuyatsaka Wele, nalundi nga babaandu boosi babakana. Umukasya walooselatsakakho bukali bwe babaandu buli shifukhu ibo abe babaali khuwonesebwa.

Currently Selected:

Buraambi 2: LCE

Highlight

Copy