Baroma 13

Baawuli be mu shiibala

1Buli muundu akhiile awulile baawuli be mu shiibala. Khulwekhuuba bunyala bwe khuuba bawuli bwoosi bwaama isi Wele. Ni baawuli babaaliwo Wele niye uwabarawo. 2Nashiryo uyo yeesi ukhaandisa baawuli aba alikho amiinyalila sheesi Wele aamala khuukhalawo. Abo babaaminyaalila Wele, babeene bereerera kumusaango. 3Khulwekhuuba baawuli sibaliwo khulwe khuriisariisa abo babaakhola bibiindu bilayi ta. Babaandu babaakhola bibiindu biibi nibo babeyembeelela bawuli. Noola s'ukana khuuba ni khukhwiyembelela isi baawuli ta, khola bibiindu bilayi. Ni babaali mu buwuli kane bakhusiime. 4Khulwekhuuba baawuli bali babakaanisi ba Wele, khulwe buulayi bweenywe. Ne noola uli umuundu ukhola bibiindu biibi, uli ni khukhwiyembelela be buwuli, khulwekhuuba sibali ni bunyala bwa busa ta. Bunyala bulimo kamakhula kaamwo: bawuli bali babakaanisi ba Wele, nashiryo bokesanisa lirima lya Wele, isi abo babaakhola buubi. 5Nashiryo khulwe ilomo yino, mwakhiile khuurya baawuli, shiili bari khulwe khukhwiyembelela muri munafuna shitaambiso shishaama isi Wele ta, ne khuulondekhana ni byeesi kimyoyo kyeenywe kibaboolela.

6 # Mat 22.21; Mako 12.17; Luka 20.25 Ni khulwe lomo yino, nanywe ni muwaanatsakeyo kimisolo, khulwekhuuba bawuli bali babakaanisi ba Wele. Ni baba babuusa kimisolo, baba balikho bakaanisa Wele. 7Nashiryo ni muwanatsakeyo isi bawuli ibyo byoosi byeesi bakhiile khufuna. Ni muwaaneyo kimisolo isi abo babakhiile khuukibuusa; muwe shiriifwa isi abo babakhila khuufuna shiriifwa. Ni mwokesanise khuurya isi abo beesi mwakhiile khuurya.

Buufunisi bwa buli muundu isi uwashe

8Mukhabatsaka ni likobi isi umuundu yeesi ta, khurusakho likobi lye khuukanana mwenyene na mwenyene. Khulwekhuuba ukana uwashe aba wolelesile kamakaambila. 9#Luky 20.14; Maka 5.18; Luky 20.13; Maka 5.17; Luky 20.15; Maka 5.19; Luky 20.17; Maka 5.21; Lev 19.18Kamakaambila kaloma kari, “Ukhakhola bye buyeyani ta, ukheera ta, ukheeba ta, ukhekoomba bibiindu bya beene ta,” ni kamakaambila kakaramile koosi, bakabusilisila mu likaambila litweela liliiloma liri, “Kanatsaka umwesanwa woowo, nga ni wikana wamweene.” 10Buli muundu ukana uwasheewe, s'anyala wamukholakho buubi bwoosi ta. Nashiryo umuundu n'aba ni khuukana aba wolelesile kamakaambila.

11Inywe mwamanya nga inyaanga n'ili alunaari. Mwamanya muri imbuka yoolele isi inywe mwakhiile khusisimukha khukhwaama mwiilo. Khulwekhuuba buwonesi ari buli aambi, khuminyisa nga ni khwaambaasa amataayi, isi khwekyelela bafukiilisi mu Wele. 12Shiilo shaweelekho, ari antsye bukana khusha. Nashiryo kha khwiyabule bikholwa bye shishilima, khukwaare bikwaaro bye khusoolanilamo mu buwaanga. 13Lekha khwibirise bulayi nga babakyeendela mu buwaanga, ne shiili nga babaali khukalulukhila mu bumeesi, namwe mu buyeyani, namwe mu lukhobe, namwe mu khulomana ni mu libuba ta. 14Ni mukwaare Umukasya Yesu Kristo, mulekhe khukhwibaasilisila mu khukhola bibyoonako, khusangaasa kumubili nga ni kukana ta.

Currently Selected:

Baroma 13: LPE

Highlight

Copy