Baroma 1

Khuusheesa

1Ibaluwa yino yaama isi ise Paulo, nga ndi umwakaanisi uwa Yesu Kristo, naluundi naalangibwa khuuba umurume. Ne khufuura ndi uwarobolebwa khuulaangilila Kamakhuuwa Kamalayi kakaama isi Wele.

2Kamakhuuwa Kamalayi kano Wele aakasuubisa khaalekho nga abirira mu baŋoosi beewe, nga ni bili mu byaronebwa bikhosefu. 3Kamakhuuwa kamalayi kawaamba khu mwaana weewe uwasaalikha nga umuundu, nga ali uwe mu shikuuka sha Dawudi, 4nga niye Yesu Kristo, Umukasya weefwe. Niye okesanisibwa nga ali Umwaana wa Wele khulwe kamaani k'Omwoyo Umukhosefu, nga n'alamusibwa khukhwaama mu bafu. 5Khuubirira mu Yesu uyo, ifwe khwaweebwa bubweela ni buraambi bwe khuuba baarume, nga khumanyisa kamanaambo koosi khuri bari ni khutsiila khu bye khufukiilila mu lisiina lyeewe. 6Ni nanywe muli litweela khu manaambo ako, kakalaangibwa khuuba ba Yesu Kristo.

7Isi inywe mweesi babaali i Roma beesi Wele akana, naluundi babalaangibwa khuuba bakhosefu, inoma indi, bubweela ni lukoosi bibyaama isi Wele Paapa weefwe, ni isi Umukasya Yesu Kristo, bibe ni nanywe.

Khuuloomba ni Khuusiima

8Khunyoowa, ise isiima Wele nga imbirira mu Yesu Kristo, khulweenywe mweesi, khulwekhuuba khuufukiilila khweenywe khufuma mu shiibala shoosi. 9Wele isi ise nisaaya niye ali umujulisi wase. Umweene uyo niye isi ise ikhalaabanila khukhwakaanisa ni kumwoyo kwase kwoosi nga imboolela babaandu Kamakhuuwa Kamalayi kakawaamba khu mwaana weewe. Wele wamanya ari ise busheele ishebulila khubaloombela inywe mu khuloomba khwase. 10Nga busheele ise inoomba ndi abe nga Wele washisiimile, khali kumuluundi kuno anyalisile ise niitsa imbakyeniyilakho inywe. 11Khulwekhuuba ingana naabi khuubabonakho nio akile imbareerere tsikhabi tse kumwoyo, nio munyalise khuuba ni kamaani. 12Sheesi inoma shili ndi, buli mutweela anyalise khukhwisamo khufukiilila khw'owashe kamaani. Nga inywe muntsisamo ise kamaani, ni nase nga imbesamo inywe kamaani.

13 # Bur 19.21 Bebuulebe, ingana mushimanye muri, nakhakakho khurekekha khukhwiitsa isi muli, ne ibatsakawo bihangafu, bibiishingilila khukhwoolelesa shino. Ingana niitse iyo nio manya inyoole bibyaamo mus'iinywe, ni khukhwaama mu Banaambo babaramile boosi. 14Ise indi busa nga uuli ni likobi isi babaandu babatsowatsowana ni isi banaambo; isi babaali ni kamakhula ni isi babaakhali ni kamakhula ta. 15Nashiryo ndi ni kameelu kamakali ke khulaangilila Kamakhuuwa Kamalayi isi inywe nanywe babamenya mu Roma.

Kamaani ke Kamakhuuwa Kamalayi

16 # Mako 8.38 Ise Kamakhuuwa Kamalayi sikamambisa kamaŋaanyu ta. Khulwekhuuba kali niko kamaani ka Wele, kakaareera buwonesi isi buli muundu yeesi uuli ni khuufukiilila mu Wele. Ne khuunyoowa isi Bayudaaya, ne khwiilekho Banaambo nabo. 17#Habk 2.4Khulwekhuuba khuubirira mu Makhuwa Kamalayi kano, bukwalaafu bubwaama isi Wele bwokesanisibwila mu khufukiilila khwonyene. Nga bibyaronebwa bikhosefu ni biloma biri, “Umuundu uli umukhosefu khulwe khuubirira mu khufukiilila, alibatsaka umulamu.”

Sheesi Babaandu Boonaka

18Lirima lya Wele lyokesanisibwa khukhwaama mwikulu khulwe bunyaalu ni bibyoonako bye babaandu, khulwekhuuba bubwoonaki bwaabwe bwikhilisa bwa ŋali, bwalekha khubonekha ta. 19Ibyo byeesi banyala khumanya bibiwaamba khu Wele, byayokesanisibwa lubuula isi bali. Wele umweene wabokesanisa lubuula. 20Khukhwaama nga Wele n'abuumba shiibala, isaambo isi niye alimo, iyokesanisibwila mu maani keewe kakakhawawo ta, ni bwa Wele bweewe, byayokesanisibwa bulayi busa khuubirira mu biindu byeesi abuumba. Nashiryo sibali ni she khukhwihaambilisakho ta. 21#Efes 4.17,18Khulwekhuuba akhaba nga bamanya Wele, ne sibamwisamo shiriifwa nga Wele ta. Namwe sibamusiima ta. Ne akhali baloondelelatsaka bibyambaaso byaabwe bibikhalimo itsamu ta. Ni khulwe shisheene isho, kimyoyo kyaabwe kimisilu kyayitsula shishiilima. 22Mu khwiyinga bari bali bakyesi, bekyele basilu. 23#Maka 4.16-18Shino shakila mu shifwo she khukhwisaaya shiriifwa sha Wele uliwo biilo ni biilo, besaaya bifwaani bibiifwaana nga umuundu, namwe bibiifwaana nga binywiinywi bye mukyeewa, namwe bibiifwaana nga bisolo, namwe bibiifwaana nga bisolo bibyalaamila khwiloba.

24Nashiryo Wele waalekha babaandu abo khuukhola nga khukhwikoomba khwe kimyoyo kyaabwe ni khuli, nga bonyene na bonyene bakhola bibiindu bibiwaambisa kimibili kyaabwe bunyaalu. 25Khulwekhuuba bawaamba bwa ŋali bwa Wele baabukalusa khuuba bye bubeeyi, nga besaaya naluundi baaba babakaanisi be shibuumbe sheesi Wele aabuumba. Bakhola shino, mu shifwo she khukhwisaaya Wele umweene umubuumbi, isi baakha khuruuya, biilo ni biilo. Amiina.

26Khulwe ilomo yino, Wele waabalekha khuukhola bye kamaŋaanyu nga ni bakana. Bakhasi baabwe mu shifwo she khuukana basaani, bakana bakhasi bashaabwe. 27Ni basaani nabo mu shifwo she khuukana bakhasi nga ni shili she busaalikhana, baliliilila khuukana basaani bashaabwe. Basaani bakhola bye kamaŋaanyu nga betubaasa ni basaani bashaabwe. Mu khukhola shino, wakila benyoola nga bereereera babeene shitaambiso shishibashila khulwe khukhola buubi khwaabwe.

28Khukhwaama ni bakhashibona bari shili shilayi khumanya Wele ta, Wele naye wabalekha mu khumooyana, nga bakhola bibiindu bibikhabashila ta. 29Baaba nga betsuule bubwoonaki bwe tsisaambo tsingali, nga nimwo mumuuli khuuba baabi, be kumuluungo, ni khuuba be lirima. Naluundi nga betsuule libuba, khukhwiira, khuulomana, bubeeyi ni likoko khu bashaabwe. 30Naluundi bali ni kamakuto, bayinikha bashaabwe tsilomo, babiiyila Wele, bali ni lulimi luwalafu, beemanya babeene bonyene, beyaangalisa khukhola buubi, naluundi sibawulila basaali baabwe ta. 31Babaandu bano bali baasilu, bayukhaŋana busa, sibali ni kimyoyo kimilayi ta, naluundi sibalimo shiisa ta. 32Bamanyila ilala bulayi bari likaambila lya Wele liloma liri, babaandu babaakhola bibiindu nga bino baakhila khuuhela. Ne shitweela busa nibo batsya mu moni ni khuukhola bibiindu ibyo. Naluundi shishifuurisila ilala buubi, baalekha khukhwikiitsa babaandu babaandi babaabikhola.

Currently Selected:

Baroma 1: LPE

Highlight

Copy