Mako 8

Yesu aliisa babaandu bikana bine

(Matayo 15.32-39)

1Khu shifukhu shishindi, lituuli lye babaandu ni lyaba nga lyabusaane, Yesu walaanga baleekelwa beewe, waabaloma ari, 2“Shiisa shamambiile babaandu bano, khulwekhuuba babeele ni nase khumala bifukhu bitaru, nga imbaawo sheesi baliilekho ta. 3Ise n'inoma ndi imbasibule busa khukhwilayo ingo nga bali ntsala, kane bayekhelele bakwe mu ntsila. Khulwekhuuba balala bamiile aleeyi.”

4Kila baleekelwa beewe bamureeba bari, “Mu mubiimbi muno unyala wamisa waheena biilyo bye khuliisa babaandu boosi bari?”

5Yesu wabareeba ari, “Muli ni kimikaati kyeenga?”

Nabo belamo bari, “Kili musaafu.”

6Kila Yesu alakila lituuli lye babaandu khukhwikhala aasi; wabukula kimikaati tsana musaafu, wakiloombela ikhabi. Nga waamalile khukiloombela ikhabi, wakimenyulamo wakiwa baleekelwa beewe khukikabila babaandu. Baryo bakikabila babaandu khuulya. 7Naluundi baaba ni bunyeeni bufwiiti buri. Yesu n'amala khubuloombela bunyeeni ubwo ikhabi, walakila baleekelwa beewe khubukabila babaandu.

8Boosi baalya khukhwoolisa ni bekura; lwanyuma babuusanisa buubuya bubwoolisa bibiipo musaafu. 9Babaandu babaalya abe boola babaandu nga bikana bine (4,000). 10Yesu n'amala khuubasibula, waaniina mu likhoŋolo ni baleekelwa beewe baatsya mu shisiintsa shishilaangibwa shiri Dalamanusa.

Bafarisaayo bakana she kamakaanga

(Matayo 12.38-42; 16.1-4)

11 # Mat 12.38; Luka 11.16 Bafarisaayo beetsa isi Yesu bananikha khukhabisana ni naye, nga bamunuutsilisa bari abokese khabonelo khukhwaama mwikulu. Khuno khwaba khumukhakilisa. 12#Mat 12.39; Luka 11.29Yesu wekhiliisa kumwoyo kila aloma ari, “Shiina kila kumuboolo kwe babaandu bano, kuweentsa she khabonelo khe kamakaanga? Ilala imbaboolela ndi, imbaawo khabonelo khe kamakaanga khakane khokesanisibwe isi muli ta.”

13Niye wabalekha awo waatsya. Kila enjila mu likhoŋolo luundi waatsya shanjelekha we nyaantsa.

Kamamela ke Bafarisaayo ni ka Herode

(Matayo 16.5-12)

14Baleekelwa ba Yesu abe bebiliile khuusuta kimikaati kikiibamala, nga mu likhoŋolo mulimo kumukaati mutweela kwonyene. 15#Luka 12.1Kila Yesu abareewula nga aloma ari, “Muli ni khumanya shino: ni mwiliinde; ni mwiliinde kamamela ke Bafarisaayo ni kamamela ka Herode.”#8.15 Kamamela kokesanisa tsisaambo tsa Herode ni Bafarisaayo tsitsaba tse khukhwonakisa babaandu babaandi.

16Kila bashikutakho bonyene nga baloma bari, “Alikho aloma aryo bari khulwekhuuba sikhwasutile kimikaati ta.”

17Ne Yesu n'amanya shino waabaloma ari, “Shiina kila mulikho mukanikha khu bye khulekha khusuta kimikaati ta? Simunyala mwamanya sheesi indikho imanyisa ta? Shiina kila kimyoyo kyeenywe kikhawaamba bibiindu mangu ta? 18#Yer 5.21; Ezek 12.2; Mako 4.12Mukhaba nga babafwa tsimoni babaakhabona, namwe nga bamiinyi mu maru babaakhawulila ta. Shiina kila mwibilila mangu muryo? 19Nga ni namenyulaka kimikaati kiraano mwakabila babaandu bikana biraano, mwabuusa buubuya bubwolisa bibiipo byeenga?”

Baamwiilamo bari, “Khwabuusa bibiipo liikhumi na bibili.”

20Waabareeba luundi ari, “Ne ni namenyulakamo kimikaati musaafu mwaakabila babaandu bikana bine, mwabuusa buubuya bubwoolisa bibiipo byeenga?”

Bamwiilamo bari, “Bibipo musaafu.”

21Kila abareeba ari, “Ari isho sishikila mwaamanya sheesi indi khuulomakho ta?”

Yesu awonesa umubofu i Besusaida

22Yesu ni baleekelwa beewe ni boola i Besusaida, aabawo babaamureerera umusaani uwabofwaala tsimoni. Bekontselela Yesu bari amutiilekho. 23Yesu wahaamba umusaani uyo kumukhono, waamuyila besyeenda baarura mu shifwo isho baatsya mu shifo shishiindi. Yesu n'amala khuumuwakha kamare khu moni, ni khuumurakho kamakhono, waareeba umusaani tsana ari, “Ari ulikho ubonakho shishiindu shoosi?” 24Umusaani wenyusa tsimoni waamoka, kila aloma ari, “Indikho imbona babaandu nga bakyeenda, ne bafwaanana nga kimisaala.”

25Yesu indi luundi waatiila khu moni tsy'omusaani tsana; kumuluundi kuno umusaani waamoka buulayi. Tsimoni tseewe tsaaba nga tsawonesebwele, aryo waabona buli shiindu buulayi bubweene. 26Yesu waamusiibula khuutsya ingo, ne waamulomela khuulekha khutsya mu shaalo ni khuulekha khuboolelakho babaandu ta.

Yesu niye naanu

(Matayo 16.13-20; Luka 9.18-21)

27Lwanyuma Yesu ni baleekelwa beewe beloosela baatsya boola aambi ni shiriimba shishilaangibwa Kayisaliya Filipi. Ni baaba nga bali khu ntsila batsya, Yesu wabareeba shireebo ari, “Ise babaandu banomakho bari indi naanu?”

28 # Mako 6.14,15; Luka 9.7,8 Baamuloma bari, “Babaandu balala baloma bari iwe niye Yokana Umubatisa; babaandi bari iwe niye Eliya; ne babaandi bari iwe uli mutweela khu baŋoosi.”

29 # Yok 6.68,69 Kila Yesu abareeba ari, “Ne inywe muloma ise indi naanu?”

Petero waamwiilamo ari, “Iwe niye Kristo.”#8.29 Kristo shimanyisa shiri “Umuwonesi.”

30Yesu waabakhoonyakilila ari balekhe khuboolelakho umuundu yeesi bilomo bino bibimuwaambakho ta.

Yesu akanikha khu khutaambisibwa khweewe

(Matayo 16.21-28; Luka 9.22-27)

31Abweene awo Yesu waarakikha khuuleekela baleekelwa beewe bibiindu bibiitsya khumukholikhakho. Waababoolela ari, “Umwaana w'Omuundu ali ni khutaambisibwa mu saambo tsingali, basaayi bakhulu balimwikaana, ni baleekeli be kamakaambila ka Musa, lwanyuma bamwiire. Ne lwanyuma lwe bifukhu bitaru, alilamukha khukhwaama mu bafu.” 32Bibiwaamba khu lomo yino, Yesu wabasontsoola sheesi aba amanyisa. Ne Petero wamwisa andulo wananikha khumubiiyisa khulwe khuloma aryo. 33Ne Yesu ni ishebukha waabona baleekelwa babaandi, kila abiiyisa Petero ari, “Yiila inyuma wase Sitaani! Khulwekhuuba isaambo isi iwe waambaasamo shiili iya Wele ta, ne ili isaambo yeesi babaandu bambaasamo.”

34 # Mat 10.38; Luka 14.27 Yesu walaanga lituuli lye babaandu ni baleekelwa beewe khukhwiitsa is'ali, kila abalomela ari, “Noola umuundu yeesi akana khuuba umulondeleli wase, ni eyikaane umweene, etyuukhe kumusalaba kweewe anoondelele. 35#Mat 10.39; Luka 17.33; Yok 12.25Khulwekhuuba uyo yeesi ukana khuuwonesa buulamu bweewe, alibufwilwa; ne uyo ufwilwa buulamu bweewe khulwase naluundi khulwe Kamakhuuwa Kamalayi, alibuwonesa, 36Mafuurisa shiina keesi umuundu afunamo, khulwe khuwula shiibala shoosi, ne wafwiilwa buulamu bweewe? 37Shiina sheesi umuundu anyala wahaanayo khuusikula buulamu bweewe? 38Umuundu yeesi uwaambibwa kamaŋaanyu khulwase ni khulwe bilomo byase, mu muboolo kuno kwe babaandu babaakharya Wele ta, naluundi babonaki, ni musaambo niyo indweela Umwaana w'Omuundu naye aliwaambibwa kamaŋaanyu khulw'omuundu uyo, n'aliitsa mu shiriifwa sha Paapa, atweela ni bamalayika beewe bakhosefu.”

Currently Selected:

Mako 8: LPE

Highlight

Copy