Mako 12

Lusimo lwe baalimi mu mukuunda

(Matayo 21.33-46; Luka 20.9-19)

1 # Isay 5.1,2 Yesu waababoolela lusimo nga aloma ari, “Aabawo umusaani mutweela uwabyaala kumukuunda kwe kimisabibu. Nga waamalile, wombekha lumako webotokhelesa, lwanyuma waalima lilowo mweesi basuurira iviini. Naluundi wombekha kusiindi kweesi beemakho nga bebuula. Kumukuunda kuno waakupaangisa, umweene waatsya mu shiibala she aleeyi.

2“Bifukhu bye khuukyesa ni byoola, waarumana umwakaanisi weewe, isi abo beesi aapaangisa kumukuunda, ari bamuwekho bitweela khu byaamo khukhwaama mu mukuunda ukwo. 3Baalimi beesi aara mu mukuunda ukwo, baakulukhila umwakaanisi uyo, baamuwaamba baamukhupa, baamutimisa weelayo kamakhono kamaŋaara busa.

4“Kila umweene uwe kumukuunda arumana umwakaanisi ukuundi. Uyuno baamukhupa likuma naluundi baamubirisa musaambo iwaambisa kamaŋaanyu. 5Kila arumana umwakaanisi ukuundi. Uyuno baamuwaamba baamwiira. Ni musaambo niyo ndweela baabirisa babaandi baryo, nga bakhupa balala ne nga beera babaandi.

6“Aaba nga ashiiliyo n'umuundu ukuundi uwe khuurumana, nga yuno aba niye umwaana weewe umukanwa. Ikhumalilisa waabarumanayo umwaana uyo, nga ambaasa ari, ‘Umwaana wase kane bamwiisemo shiriifwa.’ 7Ne baraambi abo bekuta bonyene baaloma bari, ‘Imbo yuno niye umusikha. Ni mwiitse khumwiire, busikha bube bubweefwe.’ 8Nashiryo bawaamba umwaana uyo baamwiira. Baatuuma kumulaambo ibulafu we kumukuunda.”

9Kila Yesu areeba ari, “Mwaambaasa muri umweene uwe kumukuunda n'aliitsa, alikhola aryeena? Aliwaamba babaandu bano abeere, lwanyuma apaangisise babaandu babaandi kumukuunda ukwo. 10#Zab 118.22,23Ilala mwakhusomatsakakho bibyaronebwa bikhosefu bibiloma biri,

‘Libaale lyeesi babombekhi bekaana khuuraambisa,

nilyo lilishuukhile lyekyela nilyo liliitikiya musoonda?

11Umukasya niye umweene uwakhola shino,

naluundi shili shishiyaangisa mu moni tseefwe.’ ”

12Baraangilisi bamanya busa bari Yesu abe alikho abakanikha khu nibo, nashiryo bakana bari bamuwambe batsye bamubowe. Ne khulwe khuurya babaandu, bamulekha baatsya.

Shireebo khu bye khuuwaanda kumusolo

(Matayo 22.15-22; Luka 20.20-26)

13Bafarisaayo atweela ni naabo abe babaali baloondeleli ba Herode, bekutila atweela kila barumana babaandu khuutsya khukhakilisa Yesu musaambo yeesi akanikhamo bari nio bamisilekho bamuwambe. 14Baatsya isi Yesu bamuloma bari, “Umuleekeli, ifwe khwamaanya nga iwe ukanikha bibiindu bya ŋali. Naluundi babaandu boosi iwe ubabirisa ni shiriifwa, akhali khuromboola ta. Iwe uleekela bya ŋali bya Wele, byeesi akana babaandu bakhole. Khuboolele: Khuwaanayo kumusolo isi Kayisaali,#12.14 Kayisaali abe niye umuyiinga uwe Baroma khu mbuka iyo, ne abe awula Yuda nayo. shiba she khulondelela kamakaambila, namwe shiba shifuniaaka kamakaambila? Khuwaneyo kumusolo, namwe khukhawaanayo kumusolo ta?”

15Ne Yesu waaba nga waamanyile luwomelo lwaabwe. Wabareeba ari, “Khulwashiina kila mukhakilisa ise? Ni mundereere idinari ingibone.”

16Ni bareera idinaari baamuwa, Yesu waabareeba ari, “Shifwaani ni lisiina bibiilikho bili bya naanu?”

Baamukobolamo bari, “Bili bya Kayisaali.”

17Kila Yesu abalomela ari, “Aso, bya Kayisaali ni mubiwe Kayisaali, bya Wele ni mubiwe Wele.” Babaandu bano beyaanga naabi isaambo yeesi Yesu aabeelamo.

Shireebo khu bye khuulamukha mu bafu

(Matayo 22.23-33; Luka 20.27-40)

18 # Bur 23.8 Aabawo Basadukaayo, nga nibo babaakhafukiilila bari lwanyuma lwe khuufwa iliyo khuulamukha khukhwaama mu bafu ta. Beetsa isi Yesu kila bamureeba bari: 19#Maka 25.5“Umuleekeli, ifwe Musa aakhuronela ari, umusaani n'aba waayilile umukhasi, ne waafwa busa nga waakhusaala umwaana n'umukhasi uyo ta, wandaaye w'omusaani uyo eela khu namulekhwa, wasaalila wandaaye babaana. 20Lutweela aabawo basaani musaafu, nga boosi bali wandaaye ni wandaaye. Umukiboole waakhwa umukhasi, ne waafwa busa nga bashiili khusaala umwaana ta. 21Uwe khabili weela khu namulekhwa, ne naye waafwa busa nga bashiili khusaala babaana ta. Akhaba uwe khataru naye aryo waafwa busa, nga umwaana twa, 22khukhwoolisa boosi musaafu ni baafwa baawawo nga mbaawo usaalile ni namulekhwa uyo umwaana ta. Lwanyuma umukhasi naye umweene waafwa. 23Ari mu khulamukha khwe baafu, umukhasi uyo aliba mwene wa naanu? Khulwekhuuba aabakho umukhasi uwa boosi musaafu.”

24Yesu waabeelamo ari, “Ilomo ikila mwakoraana ili ndi simwamanya bibyaronebwa bikhosefu ta! Naluundi simwaamanya bibiwaamba khu maani ka Wele ta. 25Khulwekhuuba babaandu ni baba nga balamukha khukhwaama mu bafu, sibayila bakhasi namwe bakhwaalikha ta. Baba nga bamalayika be mwikulu. 26#Luky 3.6Ne bibiwaamba khu bye khulamukha khukhwaama mu bafu, inywe simwaasomakho mu burone bwa Musa byeesi buloma ta? Khasiintsa khakhawaamba khu shitsakha she kamawa sheesi niye aabona nga shilikho shisha, Wele aamulomela ari, ‘Ise ndi Wele wa Iburayimu, Wele wa Isaaka, naluundi ndi Wele wa Yakobo.’ 27Ni nashiryo inywe Basadukaayo kila bibakhaasa, simumanya muri Wele s'ali Wele uwe baafu ta, ne ali Wele we balamu.”

Likaambila lilifuura bukhulu

(Matayo 22.34-40; Luka 10.25-28)

28Aabawo mutweela khu baleekeli be Kamakaambila ka Musa, uweetsa waarekeeresa nga Basadukaayo balikho bakhaabisana ni Yesu. Umuleekeli uwe Kamakaambila yuno n'awulila nga Yesu elamo bireebo bulayi, kila amureeba ari, “Likaambila shiina nilyo liliiminyisa koosi bukhulu?”

29 # Maka 6.4,5 Yesu weelamo ari, “Likaambila liikiboole liloma liri, ‘Babaandu ba Isiraeli, ni murekeerese: Umukasya Wele weefwe, niye uli Umukasya yenyene; 30uli ni khuukanatsaka Umukasya Wele woowo ni kumwoyo kwoowo kwoosi, ni buulamu bwoowo bwoosi, ni kamakyesi koowo koosi, ni kamaani koowo koosi.’ 31#Lev 19.18Likaambila liliikhola khabili nilyo lino, ‘Kanatsaka umwesanwa woowo nga iwe ni wikana wamweene.’ Imbaawo likaambila liliindi lilifuura kano bukhulu ta.”

32 # Maka 4.35 Umuleekeli uwe Kamakaambila ka Musa welamo ari, “Umuleekeli, uli mutufu khuuloma uri, mu ŋali ali Wele ali mutweela yenyene, naluundi mbaawo Wele ukuundi ta. 33#Hos 6.6Naluundi khuli ni khuukanatsaka Wele ni kumwoyo kwoosi, ni kamakyesi koosi, ni kamaani koosi, ni khuukana umwesanwa woowo nga wamweene ni wikana. Kamakaambila kano kafuura tsisaayilo tsoosi ni biwaanwa byoosi byeesi umuundu awaanayo.”

34 # Luka 10.25-28 Yesu n'abona nga umuleekeli yuno welilemo bulayi aryo, kila amulomela ari, “Uli aambi ni Buyiinga bwa Wele.” Ni khukhwamila abweene awo, imbaawo umuundu yeesi uwakhakakho khumureeba shireebo shoosi luundi ta.

Shireebo shishiwaamba khu Kristo

(Matayo 22.41-46; Luka 20.41-44)

35Yesu n'aba nga aleekela mu Lisaayilo Likhulu, kila areeba ari, “Baleekeli be Kamakaambila ka Musa banyala baryeena khuloma bari Kristo ali umwitsukhulu wa Dawudi? 36#Zab 110.1Dawudi umweene, Umwoyo Umukhosefu n'amuraangilila aloma ari,

‘Umukasya alomela Umukasya wase ari,

Yikhala khu mukhono kwase kumulayi,#12.36 Khu mukhono kumulayi shimanyisa shifwo she bunyala ni shiriifwa.

khukhwoolisa ise n'indiwaamba basiku boowo imbekyelise

shitsoloŋo sheesi usambakho bikyele byoowo.’

37“Dawudi umweene amulaanga ari ‘Umukasya’; ni nashiryo ama aryeena ndi waba umwitsukhulu weewe?”

Babaandu babaabawo ni bawulila bino baaba ni kumwikhoyo kumukali.

Yesu ni baleekeli be Kamakaambila ka Musa

(Matayo 23.1-36; Luka 20.45-47)

38Yesu n'aba nga alikho aleekela kila aloma ari, “Muli ni khukhwiliinda khulwe baleekeli be Kamakaambila ka Musa. Khulwekhuuba nibo bakana khukyenda nga bakwaarire tsingubo tsindeeyi naabi, naluundi bakana bari babaandu babakaanile mu khatale, babasheese ni shiriifwa shikali. 39Nga batsiile mu ntsu tsye khukhwisaayilamo ni khu mayiiya, bakana bekhale mu bifwo bye shiriifwa. 40Ne nibo babaandu tsana batweela babaatsya muungo tsye banamulekhwa babanuulakho byeesi bali ni nabyo; naluundi mu khuloomba khwaabwe bakana busa khukhwiyokesana bari baloomba lukali. Babeene abo nibo babaalifuna shitaambiso shishiminyisawo.”

Shiwaanwa sha namulekhwa

(Luka 21.1-4)

41Yesu wekhala mu Lisaayilo Likhulu, aambi n'isanduuku iye libiikhilo lye tsinusu. Waabona nga babaandu bakali bara tsinusu tsingali naabi mu libikhilo lino. 42Aabawo namulekhwa umutaambi naye uweetsa waaramo bunusu bubili bwonyene. 43Yesu walaanga baleekelwa beewe kila abalomela ari, “Ilala imbaboolela indi namulekhwa umutaambi yuno waareeremo shiwaanwa shishifuurisa bukali khufuura boosi babaareere tsinusu mu sanduuku iye libiikhilo. 44Khulwekhuuba babaaramile boosi babukulekho khukhwaama khu biindu bikali byeesi bali ni babyo. Ne namulekhwa yuno mu butaambi bweewe, wareeremo byoosi byeesi abeele ni nabyo, byoosi bye mu bulamu bweewe.”

Currently Selected:

Mako 12: LPE

Highlight

Copy