Mako 10
10
Yesu aleekela khu bye bukhwaale
(Matayo 19.1-12; Luka 16.18)
1Yesu n'arura awo waatsya i Yuda, naluundi wambukha shanjelekha we luluutsi Yorudaani. Indi luundi kamatuuli ke babaandu kabuusanila isi aba; ne nga ni yaba isaambo yeewe, indi luundi Yesu weloosela khubaleekela.
2Aabaawo Bafarisaayo babaakana khuukhakilisa Yesu. Kila bamureeba bari, “Shifukiilisibwa mu makaambila keefwe umusaani khuuloba umukhasi weewe waamuwoona waatsya?” 3Yesu waabareeba ari, “Ne mu makaambila Musa aabalakila khuukhola muryeena?”
4 #
Maka 24.1-4; Mat 5.31 Beelamo bari, “Musa afukiilila umusaani khuurona buurone bwe khuuwoona umukhasi, lwanyuma waawoona umukhasi khuutsya.”
5Ne Yesu wabeelamo ari, “Musa aarona aryo likaambila khulwekhuuba kimyoyo kyeenywe sikilekikhila ta. 6#Rak 1.27; 5.2Ne busa khukhwaamila ilala makiboole ke khubuumbibwa khwe shiibala, ‘Wele aabuumba boombi, umusaani n'umukhasi. 7#Rak 2.24Ni khulwe ilomo yino, umusaani alekha paapawe ni maayi weewe, waatsya waayila umukhasi. 8Niye n'umukhasi weewe bekyela nga umuundu mutweela.’ Ni nashiryo baba sibashiili babili ta, ne njeeba baba bekyelile kumubili mutweela. 9Nashiryo sheesi Wele amalile khutubaasa atweela, umuundu yeesi s'akha washawukhanisa ta.”
10Nga bamalile khukhwilayo mu ntsu, baleekelwa beewe bamureeba luundi khu biindu bibiwaamba khu lomo yino. 11#Mat 5.32; 1 Kor 7.10,11Yesu waabaloma ari, “Buli muundu yeesi uloba umukhasi weewe waamuwoona, naluundi waayila umukhasi ukuundi, aba wasaalile kumusaango kwe khuumulekha niye, waatsya waakhola buyeyani. 12Namwe umukhasi uloba umuseetsa weewe waatsya wakhwaalikha khu museetsa ukuundi, umukhasi uyo aba wasaalile kumusaango kwe khuukhola buyeyani.”
Yesu awa babaana bakyeekhe tsikhabi
(Matayo 19.13-15; Luka 18.15-17)
13Aabawo babaandu babaareera babaana bafwiiti bari Yesu abarekho kamakhono nga abawa tsikhabi. Ne baleekelwa beewe baarafuyila abo babaareera babaana.
14Ne Yesu n'abona shino shaalekha khumusangaasa ta, kila abalomela ari, “Ni mulekhe babaana bafwiiti beetse isi ndi, mukhabakhaangabisa ta; khulwekhuuba Buyiinga bwa Wele buli bwe babaandu babafwaanana nga bano bari. 15#Mat 18.3Ilala, imbaboolela ndi, umuundu yeesi n'akhakaanila Buyiinga bwa Wele nga umwaana umufwiiti n'akhola, s'alibwingilamo ta.” 16Yesu wahaamba babaana mu makhono keewe, waabawa tsikhabi, nga abarakho kamakhono.
Umusaani umuyindifu
(Matayo 19.16-30; Luka 18.18-30)
17Yesu n'aba nga ali khu ntsila atsya, aabawo umusaani mutweela uweetsa butima, waafukhamila mu moni tsa Yesu, waareeba ari, “Iwe Umuleekeli umulayi, ikhole shilayi shiina nio ningile mu bulamu bubuukhawawo ta?”
18Yesu waamureeba ari, “Lwashiina unaanga uri indi umulayi? Mbaawo umuundu umulayi ta, akhali Wele yenyene. 19#Luky 20.13; Maka 5.17; Luky 20.14; Maka 5.18; Luky 20.15; Maka 5.19; Luky 20.16; Maka 5.20; Luky 20.12; Maka 5.16Iwe wamanya kamakaambila ni kali: ‘Ukheera ta, ukhayeyana ta, ukheeba ta, ukhaapa umuundu washoowo liyino ta, ukhalyakhana ta, yiisatsakamo paapawo ni maayiwo shiriifwa.’ ”
20Umusaani tsana welamo Yesu ari, “Umuleekeli, ise khukhwaama mu bwaana bwase, nawaamba kamakaambila ako koosi.”
21Yesu wamulolelela, waamukana isaambo yeesi elamo. Kila alomela umusaani tsana ari, “Utaambakho shishiindu shitweela shonyene. N'utsye ingo woowo, ukulise bibiindu byoowo byoosi byeesi uli ni nabyo, tsinusu tsitsyamamo utsikabile bataambi, nio unyalise khuuba ni buyiindifu mwikulu. Lwanyuma wiitse unondekho.”
22Ne umusaani n'awulila bino, waawamo kamaani naluundi waatsya nga wakhalale. Khulwekhuuba aaba umusaani umuyindifu naabi.
23Lwanyuma Yesu webotokhelesa tsimoni mu baleekelwa beewe, waabaloma ari, “Nga shili shihangafu abo babaali ni buyiindifu khukhwinjila mu Buyiinga bwa Wele!”
24Bilomo bino byeyaangisa baleekelwa beewe. Ne Yesu weloosela ari, “Baana baase, nga shili shihangafu khukhwinjila mu Buyiinga bwa Wele!#10.24 Bibyaronebwa bitweela bilooselakho biri, “Abo babaara bubwiyikinwa mu buyiindifu.” 25Shili shishaangu iŋamya khuubirira mu mwaanya kwe mbiso, khufuurisa umuundu umuyindifu khukhwinjila mu Buyiinga bwa Wele.”
26Shino shabeyangisa ni khufuurisakho, kila bereeba bonyene bari, “Naanu unyala khuwonesebwa?”
27Yesu wabalolelela, kila aloma ari, “Khusintsilila khu baandu ni bashilolelela seshinyalikha ta. Ne khusintsilila khu Wele shinyalikha, khulwekhuuba mbaawo shishinyala shakhaasa Wele ta.”
28Petero wamuloma ari, “Bona ifwe khwalekha bibiindu byoosi khwetsa khukhulondelela iwe.”
29Yesu wamwilamo ari, “Ilala, mbaboolela ndi, buli umuundu yeesi uwalekha be shikuuka sheewe, namwe babandaaye beewe ni bakooko, namwe maayi weewe, namwe paapa weewe, namwe babaana, namwe liiswa, khulwe khubeela ise ni khulwe khubeela Kamakhuuwa Kamalayi, 30alifuna kumukheemba. Kumukheemba kuno akufuna ari mu bulamu buno nga aweebwa babandaaye ni bakooko ni bamaayi ni babaana ni kamaswa, khukhupanisamo kimiluundi shitoondo shitweela, ni mu muboolo kukwiitsa, alifuna buulamu bubukhawawo ta. 31#Mat 20.16; Luka 13.30Ne babaandu bakali babaali babanyoowa ari, baliba babamalilisayo, ni babamalilisayo ari, baliba nibo babanyoowa.”
Yesu akanikha luundi khu bye khuufwa khweewe
(Matayo 20.17-19; Luka 18.31-34)
32Ni baaba nga bali khu ntsila baniina i Yerusalemu, Yesu wabaraangilila, baleekelwa beewe ni babaandu babaandi babamuloondakho baarya naabi. Yesu indi luundi weesa andulo baleekelwa beewe, wananikha khubaboolela bibiindu abe bibiitsya khumubakho. 33Wabaloma ari: “Ari khulikho khuniina i Yerusalemu; ne nga khwoolile iyo, Umwaana w'Omuundu kane bamuwaaneyo mu makhono ke basaayi bakhulu ni baleekeli be Kamakaambila ka Musa. Kane bamukhalile kumusaango kwe khuufwa, lwanyuma bamuwaaneyo isi Banaambo.#10.33 Yesu aba amanyisa Baroma babaaba nga nibo bawuli mu biseela ibyo. 34Banaambo bano balimubirisa buubi, bamufuutsile kamare, bamukhupe, nio bamwiire. Lwanyuma lwe bifukhu bitaru alilamukha khukhwaama mu bafu.”
Khuuloomba khwa Yakobo ni Yokana
(Matayo 20.20-28)
35Yakobo ni Yokana, babaana ba Zebedaayo, baatsya isi Yesu baamuloomba bari, “Umuleekeli, iliwo sheesi khulikho khukhuloomba ukhukholele.”
36Kila abareeba ari, “Mukana imbakholele shiina?” 37Beelamo bari, “Nga wolile mu Buyiinga bwoowo bwe shiriifwa, khufukiilile ifwe khukhwikhala ni nawe, mutweela khu mukhono kwoowo kumulayi ukuundi khu munyeletsi.”
38 #
Luka 12.50
Ne Yesu wabeelamo ari, “Inywe sheesi mulikho muloomba simwashimanyile ta. Inywe munyala khuunywa khu shikopo she butsiina#10.38 Mu byaronebwa bikhosefu, “Khunywa khu shikopo” shimanyisa khutaambisibwa. sheesi ise intsya khunywakho? Namwe inywe munyala mwafuna khuubatisibwa khweesi ise intsya khubatisibwamo?”
39Bamwiilamo bari, “Ee, khunyala.”
Kila Yesu abalomela ari, “Shikopo sheesi intsya khunywakho, ni nanywe mulinywakho; akhaba ni khubatisibwa khweesi ise intsya khufuna, ni nanywe muli khufuna. 40Ne bye khubafukiilila khukhwikhala oba khu mukhono kwase kumulayi namwe kumunyeletsi, ibyo sibili ise niye ukhalawo ta. Ibyo bamala khubiŋoonaŋoonela babeene babyo.”
41Baleekelwa babaramile liikhumi ni bawulila shino, bakhalalila Yakobo ni Yokana.
42 #
Luka 22.25,26 Ne Yesu walaanga baleekelwa beewe boosi atweela kila aloma ari, “Mwamanya nga abo babaali bawuli mu Banaambo ni babayila ni kamaani. Naluundi baraangilisi baabwe be angaaki babalikho ni bunyala. 43#Mat 23.11; Mako 9.35; Luka 22.26Ne mus'iinywe, shikhaba shiryo ta; khayo buli ukana khuuba umuraangilisi mus'iinywe, abe niye umwakaanisi wenywe. 44Uyo ukana khuuba unyoowa mwiinywe, aakha khuuba niye umwakaanisi uwa boosi. 45Khulwekhuuba Umwaana w'Omuundu eetsa khuuba umwakaanisi, ne akhuba indi abewo babamwakaanisa niye ta. Naluundi eetsa khuwaanayo bulamu bweewe nga nibwo bubusikula babaandu bakali.”
Yesu awonesa Batimayo
(Matayo 20.29-34; Luka 18.35-43)
46Yesu atweela ni baleekelwa beewe, ni lituuli lye babaandu bakyeenda boola i Yeriko. Ni baaba nga baama i Yeriko batsya, umubofu abe usabilisa bibiindu, bari Batimayo, nga ali umwaana uwa Timayo, waba abe wekhaale khu ndulo khwe intsila. 47Ne n'awulila ari Yesu uwe i Nazareesi niye uli khubira, kila arakikha khukuukuulila angaaki nga aloma ari, “Yesu, umwitsukhulu uwa Dawudi, n'umambile shiisa!” 48Babaandu bakali bamukhookhela bari, “Sila busa.” Ne niye weloosela ni khulookha khuminyisakho nga aloma ari, “Umwitsukhulu uwa Dawudi, n'umambile shiisa.”
49Yesu wema kila aloma ari, “Ni mumulaange etse.”
Kila bamulaanga nga baloma bari, “Alikho akhulaanga. Yiitsa, ukharya ta!” 50Batimayo watuuma ingubo yeewe, wenyukha waatsya isi Yesu.
51Yesu waamureeba ari, “Ukana ikhukholele shiina?”
Naye welamo ari, “Umuleekeli, ingana tsimoni tsase tsibimbukhe, imbone.”
52Yesu waamuloma ari, “N'utsye, khulwekhuuba lwe khufukiilila khwoowo wawonisibwile.”
Ni abweene awo tsimoni tseewe tsaabimbukha waarakikha khuubona, waalondelela Yesu.
Currently Selected:
Mako 10: LPE
Highlight
Share
Copy
Want to have your highlights saved across all your devices? Sign up or sign in
The Bible in Lumasaaba © Bible Society of Uganda, 2016.
