Luka 2

Khuusaalikha khwa Yesu

1Mu bifukhu ibyo, Kayisaali Agusito waarusa likaambila mu baandu be mu buyiinga bweewe bwoosi ari batsye khukhwiwandikhisa. 2Khuno nikhwo khuubala babaandu khukhwanyoowa khubawo nga Kuriniyo niye uwula Siriya. 3Nashiryo buli muundu waatsya khukhwiwandikhisa mu shiriimba she waabwe.

4Ni Yusufu naye waama i Nazareesi shiriimba she Galilaaya, waatsya i Yuda, mu shiriimba sha Dawudi shishilaangibwa Beselehemu. Yusufu atsyayo lwekhuuba naye umweene aaba uwe muunda naluundi uwe mu shikuuka sha Dawudi. 5Yusufu aatsya khukhwiwandikhisa ni Malyamu isi aba akanikhisa, n'enga Malyamu aba ali shisoombo. 6Ne ni baaba nga bali iyo, bifukhu bya Malyamu bye khusaala byoola. 7Aryo wasaala umwaana weewe umukiboole umusiinde,#2.7 Mu Bayudaaya umwaana umusiinde umukiboole baamuwaanatsakayo isi Umukasya. wamubiimbilila mu ngubo tsye babaana baŋaalye, wamwalisa imukali mwikhoŋolo mweesi bibyaayo biliila, lwekhuuba sibabona shiifwo mu bukono bwe bakyeni ta.

Babaayi ni Bamalayika

8Ne mu shaalo isho, yabayo babaayi be kamasheese mu maayilo, babaaba baliinda kamasheese kaawe shiilo. 9Malayika w'Omukasya wababonekhela, ni shiriifwa sh'Omukasya shabafuusilisa nga shimulikhamulikha, nabo baarya naabi. 10Ne Malayika waabaloma ari, “Mukharya ta, lwekhuuba bona nabarereere kamakhuuwa kamalayi ke kumwikhoyo kumukali kukuliba n'isi babaandu boosi. 11Shaleelo shino, mu shiriimba sha Dawudi, mwasaalikhilemo Umuwonesi weenywe, niye Kristo Umukasya. 12Khano nikho khakane khabe khabonelo isi muli: kane mubone umwaana umuŋaalye wabiimbiwile mu ngubo, nga walisibwile imukali, mwikhoŋolo mweesi bibyaayo biliila.”

13Lubaluba abawo bamalayika babaandi be mwiihe lye mwikulu, nga bali ni malayika uyo, nga baruuya Wele, nga baloma bari,

14“Shiriifwa shibe isi Wele Uuli Angaaki Lukali, ni mu shiibala lukoosi lube mu baandu boosi beesi Wele asiima.”

15Nga bamalayika baarurirewo isi babaayi bano belileyo mwikulu, babaayi baloma bari, “Khakhutsye i Beselehemu, khubone shishiindu shino shishibeleyo, sheesi Umukasya ama khu khumanyisa.”

16Baryo beyunakho baatsya wangu, babona Malyamu ni Yusufu, n'Umwaana umuŋaalye nga bamwalisile imukali mwikhoŋolo. 17Babaayi ni baamala khubona Umwaana, baboolela babaandu babaabawo shilomo sheesi Malayika akanikha khu mwaana uyo, 18ni naabo boosi babawulila belaliila lwe'byo byeesi babaayi baakanikha. 19Ne Malyamu waliinda bilomo ibyo byoosi, nga abyambaasakho naabi mu mwoyo kweewe. 20Babaayi belayo, nga babuyila luundi nga baruuya Wele lwe'byo byoosi byeesi bawulila luundi babona, nga byoosi bili nga malayika n'ababoolela.

Yesu bamutwiikha lisiina

21 # Lev 12.3; Luka 1.31 Bifukhu shinaane ni byoola bye khumukhebelamo imbalu, bamutwiikha lisiina bari Yesu; lisiina lyeesi malayika amuwa nga ashiili khukwa ni munda ta.

Yesu bamuwaanayo mu Lisaayilo Likhulu

22Ne bifukhu ni byoola bye khukhwiŋoona nga kamakaambila ka Musa ni kaloma, Yusufu ni Malyamu bayila umwaana i Yerusalemu khumuwaanayo isi Umukasya, 23#Luky 13.2,12nga ni sharonebwa mu makaambila k'Omukasya shiri, “Buli shikiboole shiseetsa, kane shibatsake shikhosefu isi Umukasya,” 24#Lev 12.6-8ni khuwaanayo tsisaayilo nga baloondelela byeesi kamakaambila k'Omukasya kaloma: bukuruku bubili namwe buwuusi bubwaana bubili.

25Ne khu mbuka nyene iyo mu Yerusalemu mwabamo umusaani lisiina lyeewe Simeoni, umuundu uwaba umulayi, luundi nga arya Wele. Umusaani uyu aba waliinda khubona khuwonesebwa khwa Isiraeli, naluundi aba wayitsula Umwoyo Umukhosefu. 26Umwoyo Umukhosefu aba wamubimbulila ari s'alifwa nga ashiili khubona khu Kristo w'Omukasya ta. 27Simeoni waraangililwa n'Umwoyo Umukhosefu, wiitsa mu Lisaayilo Likhulu. Basaali ni bareera umwaana khumukholela byeesi kamakaambila ka Musa kaloma, 28Simeoni wasuta Umwaana mu makhono keewe, wabuyila Wele nga aloma ari,

29“Aso Umukasya, ari n'usiibule

umwakaanisi woowo atsye mu lukoosi, nga ni iwe ni wasuubisa,

30lwekhuuba tsimoni tsase tsyaboone buwonesi bubwama is'uli,

31bweesi warengekharengekha mu moni tse babaandu boosi,

32 # Isay 42.6; 49.6; 52.10 khuuba buwaanga kwe khubimbulila shiisa shoowo isi Banaambo,

ni khureera shiriifwa shoowo isi babaandu boowo ba Isiraeli.”

33Paapa ni Maayi b'Omwaana beyaanga lwe bilomo byeesi Simeoni aamulomakho. 34Aryo Simeoni wabaloombela ikhabi, ne waalomela Malyamu, maayi wa Yesu ari: “Umwaana yuno waarobolebwele ni Wele, lwe khuuhesa baalala ni khuuwonesa babaandi khu bakali mu Isiraeli, luundi aliiba khaabonelo khakhaama isi Wele kheesi balikhaandisa, 35nio bimoonyo bye bibyambaaso bye kimyoyo kye babaandu bakali bibimbuliwe. Ni kumutaambo kumwooki kukuuli nga lurima, kuliwuna kumwoyo kwoowo.”

36Aabawo naye umuŋoosi uwekhasi ulaangiwa Ana, umukhaana wa Fanueli, uwe mu shikuuka sha Asheri. Anna aaba umuloosi, ne mu bukhaana bweewe, aabaakho n'umuseetsa mu bukhwaale khuumala kimiiko musaafu kyonyene, 37ne lwanyuma lwayo wekyela namulekhwa, nga ari khu mbuka yino aaba waayolesa kimiiko kamakhumi shinaane na kine kye bukhulu. Niye s'aruraatsakakho Mwisaayilo Likhulu ta, aaba nga esaaya Wele shiilo ni kumuusi, nga abuya ntsala luundi nga aloomba. 38Mu mbuka nyeneyo nga Yusufu ni Malyamu ni Yesu bali Mwisaayilo Likhulu, Anna naye woola isi bali, waabuyilisa Wele, waakanikha khu mwaana, nga aboolela boosi babaaba baliindilila Wele khuusikula Yerusalemu.

39 # Mat 2.23 Nga Yusufu ni Malyamu baamalile khuukhola byoosi nga kamakaambila k'Omukasya ni kaloma, baakobolayo i Galilaaya, mu shiriimba she waabwe i Nazareesi. 40Umwaana waatsowa weloosela khuuba ni kamaani, witsusibwa ni kamakhula, ni bubweela bwa Wele bwaamubatsakakho.

Yesu nga ali mu Lisaayilo Likhulu

41 # Luky 12.1-27; Maka 16.1-8 Abe buli mwiiko, basaali ba Yesu batsyatsaka i Yerusalemu khuuba khu Mayiiya ke Khuubirakho. 42Ne Yesu n'aba nga wolisile kimiiko liikhumi na kibili kye bukhulu, baatsya ni naye i Yerusalemu khu mayiiya nga isaambo yaabwe ni yaba. 43Nga bifukhu bye kamayiiya byaweelekho, basaali beewe baaba bakobolayo ingo, Yesu warama mu Yerusalemu. Ne basaali beewe balekha khushimanyakho ta. 44Ne nibo ni bambaasa bari ali mwituuli lyaabwe, nashiryo bakyeenda lukyeendo lwe shifukhu shitweela. Ne lwanyuma barakikha khumuweentsa mu balebe, ni mu basaale baabwe. 45Ne ni balekha khumunyoola ta, bakobolayo i Yerusalemu, nga bamuweentsa. 46Lwanyuma lwe bifukhu bitaru, bamunyoola wikhaale mu Lisaayilo Likhulu akari mu baleekeli, nga abarekeeresa luundi nga abareeba bireebo. 47Boosi babaamuwulila beyaanga lwe kamakyesi ni khukhwiilamo khweewe. 48Basaali beewe ni baamubona basamilila busa. Kila maayi weewe amureeba ari, “Mwaana wase, lwashiina kila ukhukholile ifwe uri? Lola paapawo ni nase khubeele khweyembeleele naabi nga khukhuweentsa.”

49Naye wabakobolamo ari, “Lwashiina kila mubeele mumeentsa? Simwaamanyile muri shintsakhila ise khuuba mu ntsu ya Paapa?” 50Ne nibo balekha khumanya bulayi sheesi abeelamo ta.

51Lwanyuma Yesu wakobolayo ni nabo i Nazareesi, wabawulilatsaka. Ne maayi weewe waliindatsaka bilomo ibyo byoosi mu mwoyo kweewe. 52#1 Sam 2.26; Nikh 3.4Aryo Yesu watsowa mu mubili ni mu makyesi, nga akanibwa ni Wele ni babaandu.

Currently Selected:

Luka 2: LPE

Highlight

Copy