Luka 16

Lusimo lw'omubiikhi Umukyesi

1Yesu waloma baleekelwa beewe ari: “Aabawo umusaani umuyindifu mutweela, uwaba n'umubiikhi we bibiindu byeewe. Babaandu baamuwabayo bari, umubiikhi uyu asalanisaka busa bibiindu byeewe. 2Kila umusaani umuyiindifu alaanga umubiikhi uyu, waamureeba ari, ‘Shiina shino sheesi imbulila khwiiwe? Balilila khaangu bibiindu byase byeesi ubeele ulolelela, lwekhuuba s'unyala weloosela khuuba umubiikhi luundi ta.’

3“Umubiikhi tsana yuno welomela mu mwoyo kweewe ari, ‘Ari inakhola ndyeena? Lwekhuuba umukoosi wase atsya khumboona khu buraambi bwase. Ise s'indi ni kamaani kakalima ta, luundi iswala khusabilisa. 4Ari namanyile sheesi intsya khukhola, niye ni kane amboone khu buraambi bwase, nio basaale baase bantsakaanile mu ntsu tsaabwe.’

5“Kila umubiikhi yuno alaanga buli mutweelatweela khu baandu abe beesi umukoosi weewe abaantsa. Wareeba unyoowa ari, ‘Umukoosi wase akhubaantsa bibyoola biryeena?’ 6Welamo ari, ‘Kamatebe ke kamafura shitoondo shitweela.’ Umubiikhi kila amuloma ari, ‘Aso, amba lupapula lulikho likobi lyoowo, wikhale aasi khaangu, uronekho kamatebe kamakhumi karaano.’

7“Wareeba ukuundi ari, ‘Ne iwe, ubaantsibwa bibyoola biryeena?’ Uyo naye welamo ari, ‘Tsipipa shitoondo shitweela tse ŋaano.’ Luundi waalomela yuno ari, ‘Aso, bukula lupapula lulikho likobi lyoowo, uronekho kamakhumi shinaane.’

8“Umukoosi waruuya umubiikhi we bibiindu byeewe yuno, uwaba abe ukhola bye bubwoonaki bwe kamakyesi, lwekhuuba babaandu be mu shiibala shino bakyesikyesi naabi musaambo yeesi bawaambamo kumuboolo kwawe, khufuura babaandu be buwaanga. 9Nashiryo, ise imbaloma ndi, ni mwikwanile basaale nga muraambisa bye bubwoonaki bwe buyiindifu bwe shiibala, kale ni buliwawo, munyale khusyendesebwa mu bwikhalo bubukhawawo ta. 10Uyo yeesi uba umwiyikinwa mu biindu bikyeekhe, aba umwiyikinwa ni mu bikali nabyo. Ne uyo ukhali umwiyikinwa mu biindu bikyeekhe, s'anyala khuuba umwiyikinwa mu bikali nabyo ta. 11Aso, ni mulekha khuuba babeyikinwa mu bye buyiindifu bwe shiibala, naanu unyala khubeyikina, mu bye buyiindifu bwa ŋali? 12Naluundi, ni mulekha khuuba babeyikinwa mu biindu bibiili byabeene, ne bibyandibeele bibyeenywe naanu ulibibawa?

13 # Mat 6.24 “Mbaawo umwakaanisi unyala khukhwakaanisa bakoosi babili ta. Lwekhuuba anyala wabiiyila mutweela, wakana ukuundi, namwe wahandalalila khu mutweela, waleekelesa ukuundi. Simunyala khukhwakaanisa Wele, mwakaanisa ni buyiindifu nabwo ta.”

Bilomo bya Yesu bibiindi

(Matayo 11.12-13; 5.31-32; Mako 10.11-12)

14Ne Bafarisaayo babaaba bakana naabi tsinusu, ni bawulila bino batsekhelela Yesu busa. 15Ne naye waabaloma ari, “Inywe mwabeene nibo babekhola khuuba balayi mu moni tse babaandu, ne Wele amanya kimyoyo kyeenywe. Lwekhuuba babaandu sheesi bambaasa khuuba shikhulu, shiba she mbikho mu moni tsa Wele.”

16 # Mat 11.12,13 “Kamakaambila ka Musa ni baŋoosi byaba biraamba khukhwoola khu Yokana, ne khukhwaama abweenewo, Kamakhuuwa kamalayi ke Buyiinga bwa Wele ari niko kaboolelwa, na buli muundu akhakakho khukhwinjilamo ni kamaani.

17 # Mat 5.18 “Ne shili shaangu likulu ni shiibala khuwawo, khufuurisa kharonyesi khe nukuta ndweela iye Kamakaambila ka Musa khuwawo.

18 # Mat 5.32; 1 Kor 7.10,11 “Buli muundu yeesi uwoona umukhasi weewe, ne wakhwa ukuundi, umuundu uyo aba wayeyaane. Ni nooyo ukhwa umukhasi uwawoonebwa n'umuseetsa weewe, naye aba wayeyaane.

Umusaani umuyindifu ni Lazaaro

19“Aabawo umusaani umuyindifu mutweela, uwakwaaratsaka tsingubo tsimiliwu naabi, uwameenyatsaka mu bulamu bwe angaaki buli shifukhu. 20Ne aabawo umusaani umutaambi lisiina lyeewe Lazaaro, uwekhalatsaka amulyaango kw'omuyindifu yuno, n'enga aba waarundukhaka kamakoontsyo kumubili kweewe kwoosi, 21nga niye ekoomba busa khuulya khu buubuya bubwakwatsaka khukhwaama khu meetsa y'omuyindifu. Ni tsiimbwa natso nga tsiitsa tsakhoombaka kamakoontsyo keewe.

22“Imbuka ni yoola umusaani umutaambi waafwa, bamalayika baamusuta baamuyila mu mbafu mwa Iburayimu. N'umusaani umuyindifu naye waafwa, baamusiikha. 23N'enga ali i makoombe mu khutaambisibwa, wenyusa tsimoni tseewe, waabona Iburayimu, nga ali aleeyi, ni Lazaaro, nga ali mu mbafu mweewe. 24Aryo welootsela angaaki ari, ‘Wo paapa Iburayimu, n'umaambile shiisa, urumane Lazaaro, eetse asiikhe lulwaala lweewe mu meetsi, ambosawosekho khu lulimi lwase, lwekhuuba ndi mu butsiina bukali mu mulilo kuno.’

25“Ne Iburayimu waamwiilamo ari, ‘Mwaana wase, shebulila nga iwe ni wafunatsaka bilayi byonyene nga ushiili mulamu, ni Lazaaro naye nga n'afunatsaka biibi byonyene. Ne ana ari, niye ali mu khwikhoyesebwa, ne iwe nga uli mu khutaambisibwa. 26Naluundi akari efwe ni nanywe, aliwo luumya luleeyi lulwareebwawo lukhwawukhanisamo ifwe ni nanywe, nio ilekhe khubawo ibo babakana khukhwambukha khukhwaama ino khukhwiitsa iyo ta, namwe umuundu yeesi khukhwaama iyo khukhwiitsa isi ifwe khuli ta.’

27“Shikila umusaani amwiilamo ari, ‘Kale, aso paapa, ikhwikontselela urumane Lazaaro atsye mu ntsu ya paapa wase, 28lwekhuuba ndiyo ni babandaayase baraano, abareewule, nabo balekhe khwiitsa mu shifwo shino she kumutaambo ta.’

29“Iburayimu wamwiilamo ari, ‘Bandaayo bali ni Musa, ni baŋoosi, ni babawulile babeene ibo.’

30“Nomusaani waaloma ari, ‘Taawe, paapa Iburayimu, ne umuundu mutweela khukhwaama mu bafu nga watsiileyo isi bali, balibiiyisa.’

31“Ne Iburayimu waaloma ari, ‘Noola sibawulilisa Musa, ni baŋoosi, umuundu akhaama mu bafu, sibalimuwulilisa ta.’ ”

Currently Selected:

Luka 16: LPE

Highlight

Copy