Luka 14

Yesu awonesa umusaani umulwaale

1Lutweela khu shifukhu sha Sabato, Yesu waatsya mu ntsu y'Omufarisaayo, uwaba mutweela khu bawuli, khuulya biilyo. Ne babaandu baaba bamwilolelesa lukali. 2Aabawo umusaani mutweela iburaangisi weewe uwaba wabiimba bikyele ni kamakhono keene. 3Yesu wareeba baleekeli be Kamakaambila ka Musa ni Bafarisaayo ari, “Shili shilayi khuwonesela khu shifukhu sha Sabato namwe ta?” 4Ne nibo basila busa. Kila Yesu wawaamba umusaani wamuwonesa, wamulekha waatsya.

5 # Mat 12.11 Lwanyuma Yesu wabareeba ari, “Naanu khwiinywe unyala khuuba n'umusoleeli weewe, namwe iyeeyi yeewe, nga shitweela khu nibyo shakwiile mwilowo, ukhanyala wabirusamo khaangu akho khu shifukhu sha Sabato?”

6Ne nibo balekha khunyala khumwiilamo mu mulomo yino ta.

Yesu aleekela khu buwolu

7Lwanyuma n'abona bakyeni babalaangiwa nga berobolela biifwo bye biriifwa, waababoolela lusimo luno ari: 8#Nikh 25.6,7“Noola umuundu yeesi waakhulaangile khu mayiiya ke bukhwaale, ukhatsya wekhala khu shitsoloŋo she angaaki ta, winyoola nga inyala khuubayo umuundu ukhufuura iwe shiriifwa ulaangiwile. 9Ni nooyo ubalaangile inywe mweembi, anyala weetsa waakhuloma iwe ari, ‘Sikulila yuno shiifwo shino.’ Iwe uryo ni khuswala khukali, wutsya khukhwikhala mu shifwo she nyuma. 10Ne ni baba nga bakhulaangile, tsya wikhale mu shifwo she nyuma, ni nooyo ukhulaangile kane etse is'uli, akhulome ari, ‘Mulebe, yinyukha wisyende ano mu shifwo she mu moni.’ Ni nawe kane ufune shiriifwa shikali, mu moni tse bakyeni babaandi. 11#Mat 23.12; Luka 18.14Lwekhuuba buli muundu yeesi uwiniinisa, alikhisibwa aasi; ni nooyo uwiyisa aasi, aliniinisibwa angaaki.”

12Lwanyuma Yesu waloma umulaangile khu mayiiya ari, “N'uba wateekhele kamayiiya ke she kumuusi, namwe she ashilo shikali, ukhalaangatsaka basaale boowo, namwe babandaayo, namwe balebe boowo, namwe babesanwa boowo bayindifu ta, lwekhuuba n'ukhola uryo, nabo kane bakhulaange, baryo babe nga bakhuliyila, lw'ebyo byeesi wabakholela. 13Ne n'uteekha kamayiiya, ulaangatsaka bataambi, ni babaakataala, ni baaleme, ni baabofu, 14ni nawe uliweebwa ikhabi. Lwekhuuba nibo sibali ni she khuukhuliyila ta, ne Wele niye ulikhuliyila khu shifukhu she khuulamukha khwe bakhosefu.”

Lusimo lwe Kamayiiya kamaboofu kameene

(Matayo 22.1-10)

15Kila mutweela khuubo babekhala ni naye nga balya, n'awulila bilomo ibyo, waaloma Yesu ari, “Nga ali ni khabi umuundu uyo uliba khu mayiiya mu Buyiinga bwa Wele.”

16Yesu welamo ari, “Aabawo umusaani mutweela uwateekha kamayiiya kamaboofu kameene, walaanga babaandu bakali. 17Isaawa iye khurusa kamayiiya ni yoola, waarumana umwakaanisi weewe mutweela, khuutsya aboolele bakyeni beewe baalaange ari, ‘Ni mwiitse, lwekhuuba bibiindu byoosi biŋooneŋoone khaale.’

18“Ne boosi buli mutweela waarakikha khukhwisonesa. Uwanyoowa waaloma ari, ‘Nakulile liiswa lyase, nakhiile khuutsya khuulibona. Inoomba untsiyakhile.’ 19Ukuundi waaloma ari, ‘Nakulile tsiyeeyi tsase tsiraano, indikho intsya khutsitsema. Inoomba untsiyakhile.’ 20N'ukuundi naye waaloma ari, ‘Nio naama khukhwa umukhasi, ni nashiryo, sinanyalile khukhwiitsa ta.’

21“Umwakaanisi waakobolayo, waaboolela umukhulu weewe bino byoosi. Umukhulu we intsu waakhalala naabi, kila aloma umwakaaanisi ari, ‘Rura khaangu utsye mu mikhoosi ni mu ntsila tse mu shiriimba, ureere ano, bataambi, babakataala, ni baabofu, ni baaleme.’ 22Kila umwakaanisi aloma ari, ‘Musakhulu, sheesi undakiile naashikholile ne ishiliyo biifwo.’

23“Umukhulu uyo waaloma umwakaanisi ari, ‘Rura utsye mu mikhoosi, ni mu ntsila tse mu byaalo, ubawanyiinye boosi beetse, nio manya intsu yase yitsule bakyeni. 24Imbaboolela ndi, mbaawo na mutweela khuubo babaalaangiwa, ulikhoombakho khu mayiiya kaase ta.’ ”

Buwaangafu bubuuli mu khuba umuleekelwa

(Matayo 10.37-38)

25Babaandu bakali ni baaba bakyeenda ni Yesu batsya, weshebukha isi bali waabaloma boosi ari, 26#Mat 10.37“Mbaawo umuundu uwiitsa isiindi, unyala khuuba umuleekelwa wase ta, khurusakho nga wabiiyiile paapawe, ni maayiwe, umukyelemawe ni babaana, babandaaye, ni bakooko; ilala ni khutubaasakho bulamu bweewe bubweene. 27#Mat 10.38; 16.24; Mako 8.34; Luka 9.23Ni nooyo ukhakane asute kumusalaba kweewe anoondelele, s'anyala khuuba umuleekelwa wase ta. 28Lwekhuuba naanu mus'iinywe ukana khukhwombekha intsu ye goroofwa, ukhanyoowa khukhwikhala aasi, wabalilila bibikanibwa, ni khubona nga ali ni tsinusu tsitsimala khumalilisa intsu? 29Lwekhuuba n'alekha khukhola aryo, asimama kumusiinji, kweesi akhalinyala khumalilisa intsu ta. Ni naabo babaalibona shino, balimutsekhelela, 30nga baloma bari, ‘Umusaani uyu, arakikha khukhwombekha intsu, ne bona s'anyala khumala kumulimo kweewe ta.’

31“Namwe muyiinga shiina uba nga akana khuutsya mu busoolo n'umuyiinga ukuundi, ukhanyoowa khukhwikhala aasi, khubona nga oba kane anyale busoolo nga ali ni basilikhale bikana liikhumi, khusoolanisa ibo babaali bikana kamakhumi kabili? 32Ne n'abona nga s'akane anyale ta, akaanisa buurume isi umuyiinga ukuundi uyo, abe esi atsya khusoolana naye, nga ashiili aleeyi, nga amuloomba abewo lukoosi. 33Musaambo niyo ndweela, mbaawo na mutweela khwiinywe, unyala khuuba umuleekelwa wase, nga wakhulekha byoosi byaali nabyo ta.”

Kumuunyu kumukhelekho

(Matayo 5.13; Mako 9.50)

34Yesu weloosela nga aloma ari: “Kumuunyu kuli kumulayi, ne kumuunyu kweene ni kuwamo itsamu, kunyala kuryeena khuukobosebwamo itsamu luundi? 35Kuba sikushaakha luundi ta, bakutuuma busa, lwekhuuba sikulimo kumukaso isi liiloba namwe isi isiina ta. Uyo uuli ni kamaru ke khuuwulila, n'awulile.”

Currently Selected:

Luka 14: LPE

Highlight

Copy