Yokana KHUKHWAANTSULA
KHUKHWAANTSULA
Kamakhuuwa Kamalayi nga ni kaaronebwa ni Yokana, kokyesa Yesu nga naali Ilomo iya Wele ikhawawo ta. Nga shiitabo shino shisheene ni shiloma, Kamakhuuwa kano kaaronebwa khuuyeeta abo babaakasoma bafukiilile Yesu nga niye Umuwonesi uwalomebwakho isi babaandu, naluundi nga Umwaana wa Wele, ni khuubirira mu khumufukiilila nio bafune buulamu bubuukhawawo ta (20.31).
Mu shisiintsa shishinyoowa mu shitabo shino, nga khukhwantsula khwaweele, umuroni akhwokyesa Yesu nga n'ali Ilomo iya Wele iyekyela umuundu, shikanikha khu bye khukhwiyaangisa bikali ilala bibyokyesa bili Yesu niye Umuwonesi yeesi baalomakho, naluundi ilala nga niye Umwaana wa Wele. Nga ibyo byaweele, bibilakho bikhusontsoola shiina shishikanibwa mu bye kamakaanga ibyo. Shisiintsa sheene shino shikhwokyesa nga babaandu balala ni bekyela baleekelwa beewe, ne shonyene nga babaandi bawukhanamo nga bekaana khumufukiilila.
Tsisuula 13-17 tsisontsoola isaambo isi Yesu ekhala atweela ni baleekelwa beewe mu shilo mweesi basiku beewe bamuwaambilamo, nga ababoolela bilomo bibibaŋoonaŋoona, luundi bibibeesamo kamaani khu shifukhu isho, nga khuumuwaamba khushiili khwoola ta.
Tsisuula tsitsakamayo tsisontsoola khu Yesu nga n'awaambibwa, baamukhalila kumusaango kwe khuufwa, baamutsaangilila khu musalaba khweesi aafwiila, aryo lwanyuma waalamukha mu bafu, naluundi waabonekhela baleekelwa beewe lwanyuma lwe khuulamukha mu bafu.
Bilomo bibikanikha khu mukhasi uwawaambibwa mu khuyeyana (8.1-11), bili mu bumako ( ) lwekhuuba burone bulala mumuuli bibyaamamo shiitabo shino sibibiramwo ta, biryo bibira mu shifwo shishiindi.
Yokana akanikha naabi khu shiwaanwa she buulamu bubuukhawawo khuubirira mu Kristo. Shiwaanwa shino shirakikhilawo ari, luundi shiitsila abo babaafukiilila Yesu nga niye Intsila, ŋali luundi nga niye buulamu. Shishiindu shaburaawa mu njili ya Yokana, nikhwo khuraambisa bye khubonelakho bye buulamu bwa busheele nio anyale khurumbula bilomo bikhulu bye kumwoyo. Yokana araambisa bibiindu nga; Kameetsi, Kumukaati, Buwaanga, Umwaayi, ni Kamasheese, Kumusabibu ni binyaamo byakwo.
Inoondekhana iye bibiilimo
Bilomo bibinyoowelakho (1.1-18)
Yokana Umubatisa ni baleekelwa ba Yesu babaanyoowa (1.19-51)
Buuraambi bwa Yesu bwa rubuula (2.1—12.50)
Bifukhu bibyakamayo nga ali aambi naluundi nga ali mu Yerusalemu (13.1—19.42)
Khuulamukha ni khubonekha khw'Omukasya (20.1-31)
Biilomo biimaliliisi (21.1-25)
Currently Selected:
Yokana KHUKHWAANTSULA: LPE
Highlight
Share
Copy
Want to have your highlights saved across all your devices? Sign up or sign in
The Bible in Lumasaaba © Bible Society of Uganda, 2016.