Khuurakikha 25

Be lisaaye lya Iburayimu babaandi

(1 Bye Kimiboolo 1.32-33)

1Iburayimu aayila umukhasi ukuundi lisiina lyeewe bari Ketura, 2wasaala ni naye basooleli basesaba nga nibo: Zimurani, Yokushani, Medani, Midiyani, Ishibaka, ni Shuwa. 3Nga waatsowele, Yokushani ekyela paapa wa Sheba ni Dedani. Dedani naye nga waatsowele, aasaala basooleli bataru nga nibo Ashurimu, Letushimu, ni Lewumimu. 4Midiyani naye aasaala basooleli baraano nga nibo Efa, Eferi, Hanoki, Abida, ni Elida. Bano boosi baaba lisaaye lilyaama mu Ketura.

5Bye buyiindifu byoosi byeesi Iburayimu aaba ni nabyo, aabilekhela umusooleli weewe Isaaka. 6Ne naaba nga ashiili mulamu, basooleli beewe babaandi beesi aasaala ni Hagari ni Ketura, aabawa busa biiwaanwa, lwanyuma waabasiibula khuurura isi Isaaka, khuutsya khuumenya mu shibala shishaba i bwaamanyaanga.

Khuufwa khwa Iburayimu

7Kimiiko kyeesi Iburayimu aamala khu shibala kyoosi kyaba kyoola kimiiko shitoondo shitweela ni kamakhumi musaafu na kiraano (175). 8Lwanyuma lwayo Iburayimu waafwa, nga waakhulile mu miiko, baryo baamusiikha. 9Baasooleli beewe, Isaaka ni Ishimaeli nibo babaamusiikha mu Lifuluma lya Makipela, lilyaba aambi ni Mamure, mu mukuunda kukwaba kwa Efuroni umusooleli wa Zohari umu Hiiti. 10#Rak 23.3-16Kumukuunda kuno nikwo kweesi Iburayimu aakula khukhwaama khu ba Hiiti, nimwo mubweene umwo mweesi niye atweela n'umukyelama weewe Sara baasiikhibwa. 11Lwanyuma lwe khuufwa khwa Iburayimu, Wele aawa naabi Isaaka tsikhabi, khu mbuka iyo aaba nga amenya i Beya Lahayi Royi.

Lisaaye lya Ishimaeli

(1 Bye Kimiboolo 1.28-31)

12Lino nilyo lisaaye lya Ishimaeli, umusooleli wa Iburayimu, isi Hagari, umukhasi umu Misiri, uwaba umwakaanisi wa Sara, aasaalila Iburayimu. 13Ishimaeli aasaala basooleli likhumi na babili, ni kamasiina kaabwe khuusiintsiila mu khusaalikha niko kano; Nebayosi, Kedari, Adibeeli, Mibusamu, 14Mishima, Duma, Masa, 15Hadadi, Tema, Yeturi, Nafishi, ni Kedema. 16Buli mutweela khu basooleli ba Ishimaeli bano, aaba nga niye umukhulu we shikuuka sheewe, ni kamasiina kaabwe kaatyukhibwa bisiintsa byeene. 17Ishimaeli awangaala woolesa kimiiko shitoondo shitweela ni kamakhumi kataru na musaafu (137) kye buukhulu. Lwanyuma lwayo waafwa, baamusiikha. 18Lisaaye lya Ishimaeli lyamenya mu shisiintsa shishaba akari a Havila ni Shuri, aambi ni lulwaakha lwa Misiri, khuulola kwe Asiriya. Bano baamenya bonyene, nga sibawaambakana ni babetsukhulu ba Iburayimu babaaramile ta.

Khuusaalikha khwa Esawu ni Yakobo

19Luno nilwo luukano lwa Isaaka, uwaba umusooleli wa Iburayimu. 20Isaaka aaba oolesa kimiiko kamakhumi kane khu mbuka isi aayililakho Rebeka, umukhaana wa Besweli umu Arameya, khukhwaama i Padani Aramu#25.20 Padani Aramu: shisiintsa shino shaba nisho Mesopotamiya. Rebeka yuno aaba umukooko wa Labani.

21Lwekhuuba Rebeka aamalakho imbuka ndeeyi nga waakhusaala umwaana ta, shaakila Isaaka waaloomba isi Umukasya khulw'omukyelama weewe. Aryo Umukasya weelamwo khuuloomba khweewe, umukyelama weewe waaba shisoombo. 22Ne mu shisoombo sheewe mwaaba nga mulimo babaana babili, baaba nga basoolanila mukari, shikila Rebeka ereeba umweene ari, “Lwashiina shishiindu nga shino shilikho shiikholikha khusiise?” Ilomo iyo yaakila waatsya khukhwiireebakho isi Umukasya.

23 # Roma 9.12 Umukasya waamwiilamwo ari,

“Mu shisoombo shoowo mulimo kamanaambo kabili.

Ukhasaale babaana babili, babaakhaamemwo kamanaambo kabili,

kakaakhaalobe khuwaambakana ta.

Mutweela khu nibo akhaabe uwe kamaani khuufuura uwashe,

n'umukhulu akhaabe umwakaanisi w'omukyeekhe.”

24Imbuka yeewe iye khuusaala ni yoola, wasaala babaana bakhwaana. 25Uwanyoowa khuurura aaba umurandaafu, naluundi aabakho bubwooya burandaafu, niye baamutwiikha bari Esawu. 26Umwaana uwe khaabili khuurura, aarura nga waakuumiile luundi woomiisile isukunyi iya waandaaye Esawu. Niye baamutwiikha lisiina bari Yakobo#25.26 Yakobo: Lisiina lino mu Luheburaniya liwulilikha nga Isukunyi. Isaaka aaba nga oolesa kimiiko kamakhumi kasesaba kye buukhulu isi babaana bano baasaalikhila.

Esawu erusakho kumukabo kwe khuuba umwaana umukiboole

27Nga Esawu ni Yakobo baatsoyilekho, Esawu wekyela umuyiifwi we tsisolo uwe kamakhula ke angaaki naabi, nga niye akana naabi khuuba ibulafu mu kyeewa, ne Yakobo niye aaba umusaani uwasila busa, nga akana naabi khukhwiikhala ingo mu masari. 28Isaaka waaba nga akana naabi Esawu, lwekhuuba aalyatsaka tsinyama tse tsisolo tse mwirome tseesi aamureeratsakila, ne Rebeka niye waakana naabi Yakobo.

29Shifukhu shitweela, Yakobo aaba nga alikho ateekha supu, Esawu waakobola ingo nga intsala imuli buubi naabi. 30Kila alomela Yakobo ari, “Intsala yaantsira! N'umbekho supu woowo umurandaafu uyo khaangu!” (Isho shaakila lisiina lyeewe baamulaanga bari Edomu.)

31Yakobo naye weelamwo ari, “Ingana iwe ungulise ise kumukabo kwoowo kwe khuuba umwaana umukiboole.”

32Esawu waamwiilamo ari, “Bona ise ari intsya khufwa, kumukabo kwe khuuba umwaana umukiboole kunanjeetakho shiina?”

33 # Heb 12.16 Ne Yakobo waamwiilamwo ari, “Nyoowa untsitsubile nio.” Aryo Esawu wetsuba shishitsubo she khuukulisa isi Yakobo kumukabo kweewe.

34Lwanyuma Yakobo waawakho Esawu kumukaati atweela ni supu. Esawu n'amala khuulya ni khuunywa, weenyukhawo busa, waakyeenda waatsya. Isho shokyesanisa isaambo isi Esawu aakhambaasakho naabi khu mukaso kwe kumukabo kwe khuuba umwaana umukiboole ta.

Currently Selected:

Khuurakikha 25: LPE

Highlight

Copy