Khuurakikha 19

Bubwoonaki bwe mu shiriimba Sodomu

1Tsaba tsinyaanga tse angoloobe, bamalayika babili boola mu Sodomu, nga Loti abe wekhaale aambi ni shilibwa she shiriimba. Naye aryo nga waababoone, wenyukha waatsya khuubakaanila, weenamisa kumurwe aasi khwiloba. 2Kila abalomela ari, “Basakhulu, imbaloomba ndi mwinjilekho muungo mwase. Mwiitse musiinge bikyele byeenywe, mukonelekho iwase ano shiilo shino, nio nga bwasheele kumukaamba, mwiiloosele ni lukyeendo lweenywe.”

Ne nibo baamwiilamwo bari, “Taawe, kane khukonele mu nguudo tse mu shiriimba.” 3Ne Loti niye weeloosela khuubekoontselela naabi, shaakila baafukiilisa benjila muungo mweewe. Aryo Loti waabakholela kamayiiya baalya, waabakhalaangilayo kumukaati kukukhasiila ta, bekhala baalya.

4Ne Loti ni bakyeni beewe ni baaba nga bashiili khutsya khukona ta, basaani boosi be mu shiriimba sha Sodomu, bakyeekhe ni baakhulu beene, beetsa beebotokhelela intsu ya Loti. 5#Baak 19.22-24Kila balaangilila isi Loti bari, “Basaani babaama khwiitsa iwoowo ano bali eena? Baruse ibulafu ano khukone ni nabo khubakhole bakhasi.”

6Loti umweene waarura ibulafu khuubakaanana, weekalawo kumulyaango inyuma weewe. 7Lwanyuma waabalomela ari, “Baandayase, naabekoontseleele mukhakhola shishiindu shiibi nga isho ta! 8Ise ndiwo ni bakhaana baase babili, babaali tsindungubaasi busa. Ari khayo imbareere ibulafu ano, inywe mubakhole nibo sheesi mukana khuukhola. Ne basaani bano mukhabakholakho shishiindu shoosi ta, lwekhuuba nibo bali bakyeni mu ntsu mwase.”

9Ne basaani be mu shiriimba bano beelamwo bari, “Khururire mulyaango! Iwe weetsa ano nga umuwuuyi busa. Iwe wilaanga naanu khuukhuboolela ifwe she khuukhola? Ari nga shiryo, ifwe khunakhukhola iwe buubi naabi khuuminyisa nibo.”

Kuryo kuubuli kwe babaandu bano kweloosela khukhwimiinilisa naabi isi Loti. Lwanyuma baaba nga boolile khu mulyaango batsya khukufuniaaka. 10Ne bamalayika babili tsana babaaba mu ntsu baakhweesa Loti baamukobosa mukari, baakhomekha kumulyaango. 11#2 Bay 6.18Lwanyuma baabofwaasa tsimoni tse basaani boosi babaaba ibulafu, bakyeekhe ni baakhulu beene, baabuukabuuka busa nga baweentsa kumulyaango isi kuli.

12Kila bamalayika bano balomela Loti bari, “Iwe uliyo ni babaandu babaandi boosi mu shiriimba shino? Oba basaani babaatsya khuyila bakhaana boowo, namwe basooleli boowo, namwe bakhaana boowo, namwe umuundu ukuundi yeesi uuli uwoowo mu shiriimba shino? Barusemo boosi, mururemo mutsye, 13lwekhuuba khuli khuutsya khuuhesa shiriimba shino. Umukasya umweene waaboone buubi bwoosi bweesi babaandu be mu Sodomu bali khuukhola. Shikila Umukasya akhurumanile ifwe khushihese.”

14Aryo Loti weenyukhilamo waatsya isi basaani abe babaatsya khuyila bakhaana beewe, waabalomela ari, “Yuubakho, mwinyukhe murure mu shiriimba shino! Lwekhuuba Umukasya ali khuutsya khushihesa.” Ne nibo bambaasa busa bari Loti alikho enyaha busa.

15Antsye ni bwaaba bulikho bubuluukha, bamalayika bakhakakho naabi khuubona bari Loti aruramwo. Baamulomela bari, “Yuubakho! Iwe n'umukyelama woowo, ni bakhaana boowo, babaali ano, ni murure ano mu bwaangu naabi nga ni shinyalikha, mulekhe khuhelela mu shiriimba shino sheesi Umukasya ali khuutsya khuhesa ta.” 16#2 Pet 2.7Ne Loti niye waarama nga ashimaamayisakila awo. Ne lwekhuuba Umukasya aamuwaambila naabi shiisa, nga s'akana ahele ta, kila bamalayika baamuwaamba kumukhono, n'umukyelama weewe, ni bakhaana beewe, baabaraangilila baabarusa khukhwaama mu shiriimba. 17Baryo nga baabarusile ibulafu we shiriimba, mutweela khu bamalayika waabalomela ari, “Ni mwikhuune tsiindimo khulwe buulamu bweenywe! Mukhalolakho inyuma ta. Namwe mukhakhakakho khuuwolela aandu oosi khu musaleela ukwo ta. Ni mutime mutsye mu ngoongo, nio mulekhe khuhela ta.”

18Ne Loti naye weelamwo nga ekoontselela ari, “Taawe basakhulu. 19Inywe mwantsokesanisile ise bubweela bweenywe, luundi mwamaambiile ise shiisa naabi khuuwonesa buulamu bwase. Ne siinanyalisa khuutima khuutsya iyo mu ngoongo itsyo ta. Inaba nga indi khuutima ndyo, buukosi buno buntsolekho, ifwe. 20Ne bona iliyo shiriimba isho. Ni muusaasile indime intsye mu bweene umwo. Shili shiifwo shikyeekhe, ne namanyile ndi khunawonelamwo, siinga mukhufukiilisa khwaatsya mu bweenemwo.”

21Malayika weelamwo ari, “Kale n'utsye. Naafukiilile khuuloomba khwoowo, singene imbese shiriimba isho sheesi ukanikhilekho ta. 22Yuubakho! Tima khaangu utsye! Ari mbaawo sheesi inakhola khukhwoolesa nga woolile ibweene iyo.”

Lisiina lye shiriimba isho abe bari Zowari.#19.22 Zowari: Mu Luheburaniya shimanyisa shiri “Khakyeekhe”.

Khuuhela khwa Sodomu ni Gomora

23Imbuka isi Loti aatsya khwoolela i Zowari, inyaanga yaba ili khuurura. 24#Mat 10.15; 11.23-24; Luka 10.12; 17.29; 2 Pet 2.6; Yuda 1.7Lubaluba, Umukasya waaronyesa khukhwaama mwikulu buunoro bubwaburukha ni kumulilo khu biriimba Sodomu ni Gomora. 25Musaambo iyo, waahesa biriimba ibyo byoombi, ni kumusaleela ukwo kwoosi, na buli muundu yeesi uwaba mu biriimba, atweela ni biilime bibyatsowa khwiloba byoosi byaahela. 26#Luka 17.32Ne umukyelama wa Loti weshebukha waalola inyuma, wekyela shisiindi she kumuunyu.

27Kumutikhinyi mu mamilimili, Iburayimu waawuuna waatsya mu shifwo mweesi emikha nio waakanikha n'Umukasya. 28Aryo weemikha waalolelela i Sodomu ni Gomora, ni kumusaleela kwoosi, waabona lisuusi liniina mu ngaaki khukhwaama ibweene iyo, lyaaba lyafwaanile busa nga lisuusi lilyaama mwiruumbi.

29Aryo Wele n'aba nga ahesa biriimba bye khu musaleela ibyo mweesi Loti aamenyatsaka, waashebulila indakaano isi aakholela Iburayimu, waawonesa Loti, khuulekha khuhelelamwo ta.

Ba Mowabu ni ba Amoni

30Aryo Loti ni bakhaana beewe baamenyakakho mu Zowari. Ne lwanyuma waatsya ni bakhaana beewe tsana baamenya mwifuluma mu shibala she mu ngoongo, lwekhuuba aarya khuumenya mu Zowari. 31Shifukhu shitweela umukhaana weewe umukhulu waalomela umukyeekhe weewe ari, “Bona ari paapa weefwe wahangaale mu miiko, ni khu shibala khuno khwoosi mbaawo umusaani ukane eetse akhuyile ifwe ta. 32Khukholeyo iviini anywe ameele. Lwanyuma kane khukone ni naye, khunyale khuufuna lisaaye.” 33Shiilo isho baakholayo iviini, baamuwa waanywa waameela, kila umukhaana umukhulu waatsya waakona ni naye. Ne Loti niye waalekha khushimanyakho ari waakonilekho ni naye ta.

34Uri khu shifukhu shisheelakho, umukhaana tsana umukhulu waalomela umukyeekhe weewe ari, “Bona ise natsiile nakona ni paapa mu shilo she ngoloobe. Ari ingana ndi khukhole iviini, anywe luundi ameele mu shilo she shaleelo, nio nawe utsye ukone ni naye, nio feembi khunyale khuufuna lisaaye ni naye.” 35Kila baryo mu shilo isho, baanyweesa paapa waabwe iviini waameela, umukhaana umukyeekhe naye waatsya waakona ni naye. Ni khu mbuka yino ndi paapa waabwe s'ashimanyakho ari waakonilekho ni naye ta.

36Musaambo iyo, bakhaana ba Loti boombi baahesa babaana khuubirira mu paapa waabwe. 37Umukhaana umukhulu wasaala umwaana umusiinde, waamutwiikha lisiina ari Mowabu. Umweene yuno niye umukuuka we ba Mowabu, ni khukhwoolesa khu shifukhu she shaleelo shino. 38Umukhaana umukyeekhe naye waasaala umwaana umusiinde, waamutwiikha lisiina ari Beni Ami. Umweene yuno niye umukuuka we ba Amoni, khukhwoolesa khu shifukhu she shaleelo shino.

Currently Selected:

Khuurakikha 19: LPE

Highlight

Copy