Khuurakikha 15

Indakaano ya Wele ni Iburamu

1Lwanyuma lwa bino byoosi, Umukasya waakanikha isi Iburamu mu marooro, nga amulomela ari, “Iburamu, ukharya ta. Ise kane ikhukhiinge iwe naabi, naluundi kane ikhuwe shiwaanwa she kamaani.”

2Ne Iburamu naye weelamwo ari, “O Umukasya Wele, shiina shisheene sheesi iwe kane umbe ise, ate nga bona ise s'indikho ni babaana ta? N'umuundu ukane abe umusikha we bibiindu byase niye Eliyazaari uwe Damasiko!” 3Iburamu waalooselakho luundi waaloma ari, “Bona iwe waakhuumbatsakakho babaana ta, nashiryo umuundu ukane asikhile bibiindu byase byoosi niye umwakaanisi wase yuno.”

4Umukasya waamwiilamwo ari, “Umusaani yuno singene abe niye umusikha woowo ta. Iwe ukhasaale umwaana uwesiinde uwoowo umweene. Niye ukhaabe umusikha woowo.” 5#Roma 4.18; Heb 11.12Kila Umukasya arusa Iburamu ibulafu, waamulomela ari, “Yinyusa tsimoni tsoowo ulole mu ngaaki mwikulu, ubone noola unyala waabala tsinieniesi itso.” Umukasya waalooselakho ari, “Babetsukhulu boowo baliba baakali khuufwaana baryo.”

6 # Roma 4.3; Gal 3.6; Yak 2.23 Iburamu waafukiilisa Umukasya, ni shisheene isho shaakila Umukasya waamubala niye khuuba umukwalaafu.

7Umukasya waaloma Iburamu ari, “Ise niye Umukasya uwakhureera iwe ano, nga ikhwaamisa i Uri mu ba Kaludaaya, khuukhuwa liiswa lino libe lilyoowo.”

8Ne Iburamu ndi waamureeba ari, “O Umukasya Wele, ise inashimanya ndyeena ndi liiswa lino kane libe lilyase?”

9Kila Umukasya amulomela ari, “Indeerere ano ikhaafu imasoti, iyoolesa kimiiko kitaru kye buukhulu, imbusi ikhasi nayo iyoolesa kimiiko kitaru kye buukhulu, limiiku nalyo lilyoolesa kimiiko kitaru kye buukhulu, liwuusi litweela, ni khakabuuruku khatweela.”

10Iburamu waatsya waareera bisolo bino ni binywiinywi. Lwanyuma waabikhalakamwo bisiintsa bibili biili buli shitweela. Aryo bisiintsa bino waabyaantsa mu nyilili tsibili luubeka ni luubeka, nga byaalolelaniile, ne shonyene ndi binywiinywi nibyo s'abikhalakamwo ta. 11Lwanyuma kamanywiinywi namuturu keetsa bari kalye tsinyama, ne Iburamu waakatimisa.

12 # Yob 4.13-14 Inyaanga ni yaba nga ilikho ikwa, liilo lye kamaani lilyeene lyawaamba Iburamu, shishiilima namukoto shawaamba antsye, ni khuurya khuukali khwaabawo. 13#Luky 1.1-14; Bur 7.6Lwanyuma kila Umukasya alomela Iburamu ari, “Iwe uli ni khuushimanyila ilala buulayi uri, babetsukhulu boowo balimenya nga baawuuyi mu shibala shishikhali shishaabwe ta. Bakhaabe baakulwa ibweene iyo, naluundi babirisibwe buubi naabi nga babamiinilisa khuumala kimiiko bitoondo bine (400). 14#Luky 12.40-41; Bur 7.7Ne ise ikhaawe linaambo ilyo lililibataambisa shitaambiso. Ne lwanyuma lwa byoosi, balirura khukhwaama mu linaambo ilyo, nga bali ni bye buyiindifu biikali naabi. 15Ne iwe wamweene ukhahaangale, woolise kimiiko kimilayi kimyeene kye buusakhulu, lwanyuma ufwe bakhusiikhe mu lukoosi. 16Ne ikhaabirewo kimiboolo kine kimibuufu, nio babetsukhulu boowo bakobole mu shifwo shino, beeyilile liiswa lino. Lwekhuuba ise sikhaawoonemwo babaandu ba Amori khukhwaama muno ta, khukhwoolesa nga boonakisile naabi, naluundi nga baakhila shitaambiso.”

17Lwanyuma nga inyaanga yaamaliile ilala khuukwa, naluundi nga aantsye amaliyiile ilala, Iburamu waabona inyuungu ilikho yituukha, ni kumulilo nga kwaaburukha, nga ilikho ibirira akari e biisiintsasiintsa bye tsinyama tsana. 18#Bur 7.5Kila khu mbuka nyene iyo, Umukasya akhola indakaano ni Iburamu, waamulomela ari, “Isuubisa khuukabila babetsukhulu boowo liiswa lino, khukhwaamila ilala khu luutsi luluuli khu lwaakha ni Misiri, khuutsya khukhwoola khu luutsi Efurati. 19Nibo bakheyilile liiswa abe liliili lye ba Keni, ni ba Kenizi, ni ba Kadimoni, 20ni ba Hiti, ni ba Perizi, ni ba Refayimu, 21ni ba Amori, ni ba Kanaani, ni ba Girugashi, ni ba Yebusi.”

Currently Selected:

Khuurakikha 15: LPE

Highlight

Copy