Buraambi 2

Khukhwiitsa khw'Omwoyo Umukhosefu

1 # Lev 23.15-21; Maka 16.9-11 Shifukhu sha Pentekote ni shoola, abe bafukiilisi mu Kristo boosi baabuusaniile mu shifwo shitweela. 2Lubaluba, baawulila khuuyilila nga khuwuuma khukhwaama mu ngaaki, nga khuli nga imbewo iye kamaani ni wuutsa. Khuwuuma khuno khwetsusa intsu yoosi mweesi baaba bekhaalemwo. 3Lwanyuma abonekhawo shishafwaana nga tsinimi tse kumulilo tsitsawukhanamwo tseekha tsaakwa khu buli mutweela. 4Boosi betsusibwa n'Umwoyo Umukhosefu, baryo baarakikha khuukanikha mu nimi tsitsiindi busa, nga Umwoyo n'abawa khuutsiloma.

5Mu mbuka iyo aabawo Bayudaaya babaaba bamenya mu Yerusalemu, ni babaandu babaaba babelama naabi abe babaamile mu buli linaambo lyoosi, liliili aasi we likulu. 6Ne babaandu abe babamenya mu Yerusalemu bano ni baawulila kamakono kano, boosi babuusana atweela, nga beyaanga, lwekhuuba abe buli mutweela awulila bafukiilisi mu Yesu nga bakanikha mu lulimi lwe waabwe. 7Lituuli lye babaandu bano baasamilila busa, luundi nga beyaanga nga baloma bari, “Babaandu babaali khuukanikha bano boosi sibali ba Galilaaya? 8Ne ari shiitsa shiryeena ifwe buli mutweela khuuwulila nga bakanikha mu lulimi lweewe lusaalikhana? 9Ifwe khwaama i Paruti, babaandi i Mediya ni Elamu, ni babamenya i Mesopotamiya, Yuda ni Kapadokiya, be Pontusi ni Asiya. 10Babaama i Firigiya, ni Panfiliya, be Misiri, ni be mu bisiintsa bye Libiya bibiwulibwa ni Kurene. Balala bali bakyeni khukhwaama i Roma, ni babaandi Bayudaaya ni naabo bakhali Bayudaaya ta. 11Bayudaaya ni Banaambo babashuukha bekyela Bayudaaya. Baalala khwaama i Kurete ni mu Buwarabu, bona khubawulila nibo nga bakanikha mu nimi tsitseefwe tsinyene bibiwaamba khu bye kamakaanga bya Wele.” 12Baryo boosi beyaanga luundi bakaraangarana busa, nga baloma bonyene bari, “Ne makhuuwa shiina kano?” 13Ne babaandi babaramile batsakhilila baloondeleli ba Yesu, nga baloma bari, “Iviini ishiili iŋana yabameesile.”

Bubakha bwa Petero

14Ne Petero wenyukha atweela ni basheewe liikhumi na mutweela, wasuta likono lyeewe angaaki, wakanikha isi babaandu nga aloma ari, “Babaandu be mu Yuda ni nanywe mweesi babamenya mu Yerusalemu, mweesi mwakhiile khumanya shino, nashiryo ni murekeerese bilomo byase. 15Babaandu bano sibameelile nga inywe ni mwaambaasa ta, lwekhuuba bona ari tsili tsisaawa tsitaru busa tse kumutikhinyi. 16Khurusakho bino nibyo byeesi Umuŋoosi Yoweli aloma ari,

17 # Yow 2.28-32 ‘Wele aloma ari,

mu bifukhu bimaliilisi,

inditsukha Umwoyo wase khu baandu boosi,

ni babaana beenywe besiinde ni bakhaana balikanikha bye buŋoosi.

Babaana beenywe besiinde balibona khubonekhelwa,

ni basaani basakhulu beenywe baliroora kamarooro.

18Ilala mu bifukhu ibyo inditsukha Umwoyo wase

khu bakaanisi baase

besaani ni bekhasi,

nio bakhole bye buŋoosi.

19Indyokesanisa bye kamakaanga angaaki mwikulu

ni khu shiibala aasi nokesanise bye khubonelakho,

kamafuki, ni kumulilo,

ni khukhwituukha khwe liliisi.

20Nga shifukhu sh'Omukasya shishiili khwoola ta,

shifukhu shikhulu naluundi she khukhwiyokesana,

inyaanga ilishuusibwa yikyele shishiilima,

ni kumweesi kulikyela kumubesemu nga kamafuki.

21Naluundi khu shifukhu isho, shiliiba ndi buli muundu yeesi uliloomba mu lisiina ly'Omukasya, aliwonesebwa.’

22“Baandu ba Isiraeli bashaase, ni muwulile bilomo bino: Yesu uwe Nazareesi, ali umuundu isi Wele asiindikha isi muli, nga abirira mu buraambi bwe kamaani, ni bye kamakaanga, ni bye khubonelakho, byeesi Wele akhola nga abirira mu niye nga mweesi mubona. Nga inywe mwabeene ni mumanyile lwekhuuba byakholebwela akari enywe. 23#Mat 27.35; Mako 15.24; Luka 23.33; Yok 19.18Yesu yuno uwawaanibwayo khulondekhana ni bibyamala khuŋoonebwa khaale ni khumanya khwa Wele, inywe mwamutsaangilila khu musalaba naluundi mwamwiira nga muraambisa kamakhono ke babaandu babonaki. 24#Mat 28.5,6; Mako 16.6; Luka 24.5Ne Wele umweene wamulamusa khukhwaama mu bafu, nga waamalile khumukangulula khukhwaama mu butsiina bwe khuufwa, lwekhuuba abe sishinyalikha khuufwa khumuwaambilila niye nga umubowe ta. 25#Zab 16.8-11Lwekhuuba Dawudi naye amulomakho ari,

‘Nabona Umukasya mu moni tsase bifukhu byoosi.

Lwekhuuba ali khu mukhono kwase kumulayi, nase singene indengasiwe ta.

26Nashiryo, kumwoyo kwase kwaba ni kumwikhoyo,

ni lulimi lwase lwaba ni sangaalo.

Ni shishifuurisa, iseese nakhaba nga ndi umuundu busa,

bulamu bwase bulimenya mu khwiyikina.

27Lwekhuuba iwe s'ulilekha kumwoyo kwase i makoombe ta,

namwe s'ulilekha umukwalaafu woowo khubola ta.

28Iwe wantsokesile tsintsila tsye buulamu,

ulintsitsusa ni kumwikhoyo lwekhuuba indiiba mu moni tsoowo.’

29“Bebuulebe ba Isiraeli bashaase, inyala khubaboolela ni khubawandalasa ndi, umukuuka weefwe Dawudi afwa luundi wasiikhiwa, khuli ano ni ŋani yeewe khukhwoolesa khu shifukhu she shaleelo shino. 30#Zab 132.11; 2 Sam 7.12,13Ne lwekhuuba aba umuŋoosi, amanya ari Wele wamwitsubila shishitsubo ari, mutweela khu betsukhulu beewe alikhala khu shitsoloŋo nga umuyiinga. 31Dawudi ashibona nga bushiili nio wakanikha khu biwaamba khu khulamukha khwa Kristo khukhwaama mu bafu, nga aloma ari, Kristo s'alekhebwa i makoombe ta, namwe kumubili kweewe sikwabola ta. 32Yesu yuno Wele amulamusa khukhwaama mu bafu, ni bibiwaamba khu sheene shino, ifwe khuli bajulisi. 33Nashiryo niye n'aba nga aniinisibwa mu ngaaki khuuba khu mukhono kumulayi kwa Wele, niye wafuna Umwoyo Umukhosefu isi Paapa amulomela, nashiryo byeesi mubona shaleelo bino ni byeesi muwulila bino nibyo biwaanwa byeesi akhutsukhiliile ifwe. 34#Zab 110.1Lwekhuuba Dawudi niye s'aniina mwikulu ta, ne niye umweene aloma ari,

‘Umukasya aloma Umukasya wase ari,

yikhala khu mukhono kwase kumulayi,

35khukhwoolesa lweesi indireera baasiku boowo boosi aasi

esi ukhaandakakho bikyele byoowo.’

36“Nashiryo kha babaandu boosi ba Isiraeli bamanye akhali khukhwiririkana ta, bari Wele wakhola Yesu yuno isi mwatsaangilila khu musalaba, khuuba Umukasya luundi Kristo.”

37Ne babaandu ni bawulila bilomo bino, byabatsiina naabi mu myoyo kyaabwe, kila bareeba Petero ni baarume babaramile boosi bari, “Bebuulebe ifwe kane khukhole khuryeena?”

38Petero naye wabeelamo ari, “Ni mwibiiyise bibyoonako byeenywe, luundi buli mutweela khusiinywe abatisibwe mu lisiina lya Yesu Kristo, nio bibyoonako byeenywe kane bibeyakhilwe. Muryo nanywe kane mufune shiwaanwa sh'Omwoyo Umukhosefu. 39Lwekhuuba khusuubisa khuno khuli khukhweenywe n'isi babaana beenywe, n'isi ibo boosi babaali aleeyi, ni naabo boosi beesi Umukasya Wele alaanga khukhwiitsa is'ali.”

40Aryo Petero wokesanisa munganikha yeewe nga araambisa bilomo bikali naluundi wabakhupilisa nga aloma ari, “Ni mwiwonese mwabeene khurura mu muboolo kuno kumubi.” 41Nashiryo ibo boosi babakaanila shilomo sha Petero babatisibwa. Ni khu shifukhu sheenesho, babaandu bikana bitaru (3,000) babelooselakho.

42Baryo beloosela khuwandalalila khu byeesi baarume babaleekela ni mu khutubaanila atweela, ni mukhumenyulila kimikaati atweela, ni mu khuloombela atweela.

Bulamu bwe bafukiilisi

43Bibiyaangisa ni bye kamakaanga bikali byakholebwela mu baarume, shino shareerera babaandu bakali khuurya. 44#Bur 4.32-35Ne ibo boosi babekyela bafukiilisi bamenyatsaka atweela, naluundi bakabananila atweela bibiindu byoosi byeesi baaba ni nabyo. 45Naluundi baryo baba nga bakulisaka bibiindu byeesi baaba nabyo, babikabananisa isi boosi, nga buli mutweela abe nga n'akana khuyeetebwa. 46Buli shifukhu boosi batsyatsaka mu Lisaayilo Likhulu, ni khumenyulila atweela kimikaati muungo tsaabwe, nga bakabanana biilyo byaabwe ni kumwikhoyo naluundi nga babaandu bali ni kumwoyo kukuwaana. 47Baryo baruuyatsaka Wele, naluundi nga babaandu boosi babakana. Umukasya walooselatsakakho bukali bwe babaandu buli shifukhu ibo abe babaali khuwonesebwa.

Currently Selected:

Buraambi 2: LPE

Highlight

Copy