Buraambi 18

Paulo nga ali i Korinso

1Lwanyuma lw'ebyo, Paulo waarura mu Asene, watsya i Korinso. 2Ibweene iyo wanyoolayo Umuyudaaya uwasaalikha i Pontusi isi balaanga bari Akula. Akula yuno aba n'umukyelema weewe bari Pulisikila, nga nibo balikoboole khukhwaama i Itali, lwekhuuba Kilawudiyo aba walakiile Bayudaaya boosi khurura mu Roma. Paulo watsyayo khubabona. 3Naluundi abe lwekhuuba Paulo naye ali uwe buraambi bwe khukhola tsiweema nga nabo. Aryo wamenya ni nabo nga bakhola kumulimo kweene ikwo. 4Abe buli shifukhu sha Sabato, Paulo akhaandisanila mu ntsu iye khukhwisaayilamo, nga akhakakho khukhonjelesa Bayudaaya ni Bayonaani.

5Ne Silasi ni Timosewo ni boola khukhwaama i Masedoniya, Paulo waba nga atitikhana ni kumulimo kwe khuboolela shilomo, nga awayo bujulisi isi Bayudaaya ari Yesu uyo niye Kristo. 6Ne ni bamukhaandisa luundi bamufwotsola, wabasisakulila lufuumbi khukhwaama mu tsingubo tseewe nga aloma ari, “Kumusaango kurame khu mirwe kyeenywe mwabeene! Ise siindi ni kumusaango ta. Khukhwaama ari, ise khantsye isi Banaambo.”

7Aryo Paulo waarura mu ntsu iye khukhwisaayilamo, watsya muungo mw'omuundu mutweela ulaangiwa Tito Yusito, uwaba umuundu uwisaaya Wele. 8Kurisipo uwaba umuraangilisi we ntsu ye khukhwisaayilamo, wafukiilila mu Mukasya, ni be muungo mweewe boosi, ni babaandi swa busa be Korinso ni barekeeresa Paulo nabo bafukiilila naluundi babatisibwa.

9Shiilo shitweela, Umukasya waabonekhela Paulo mu marooro, nga amuloma ari, “Ukharya ta, naluundi ukhasila busa ta, yiloosela khuukanikhatsaka. 10Lwekhuuba ise ndi ni nawe. Mbaawo umuundu na mutweela ukane akhwibwakale, namwe akhukhole buubi ta. Ise ndi ni babaandu bakali naabi mu shiriimba shino.” 11Aryo Paulo waamalayo kumwiiko mutweela ni kimyeesi kisesaba, nga aleekela mu baandu abo Ilomo ya Wele.

12Mu mbuka isi Galiyo aabeela gafana wa Akaya, Bayudaaya betubaasa atweela bebwakaala Paulo, baamuwaamba baamuyila isi bakhalila kimisaango. 13Baamuwaabila bari, “Umusaani uyu akhonjelesa babaandu khukhwisaaya Wele musaambo ifuniaaka kamakaambila ka Musa.”

14Paulo naye n'aba nga akana khukhwiilamo, Galiyo waloma Bayudaaya ari, “Bayudaaya, iba nga iliwo kumusaango kweesi Paulo akholile, namwe aba nga ufuniaakile likaambila, khali ise imbekhalilikhile inywe imbarekeeresa. 15Ne nga ni shili busa bireebo bibiwaambakana ni bilomo, ni kamasina ni kamakaambila keenywe, mwabeene ni mubikwalaase. Ise singene ikhale kumusaango mu biindu nga bino ta.” 16Aryo wabalakila ari barure isi bakhalila kimisaango batsye. 17Nabo baryo kila bawaamba Sosisenesi, umuraangilisi we ntsu ye khukhwisaayilamo iye Bayudaaya, bamukhupila iburaangisi we ntsu ye khukhalilamo kimisaango. Ne Galiyo niye shalekha khumuwaambakho ta.

Paulo akobolayo i Antiyoki

18 # Bala 6.18 Lwanyuma lwa bino, Paulo weloosela khuumenya i Korinso khuumala bifukhu bibiindi bikalikho. Ne lwanyuma waasibula be buulebe, wambukha waatsya i Siriya, nga ali ni Akula ni Pulisikila. Ne n'ola i Kengeliya waabekakho litsuune lyeewe, khulwe shishitsubo abe sheesi aakhola. 19Baryo lwanyuma boola i Efeso, Paulo walekhayo Pulisikila ni Akula, niye wenjila mu ntsu iye khukhwisaayilamo, wakhaandisana ni Bayudaaya. 20Nabo lwanyuma lwayo bamuloomba bari amenyekho ni nabo khumalakho imbuka indeeyi, ne niye waloba. 21Ne n'aba nga abasibula, waabaloma ari, “Nga Wele wasiimile, indikobola luundi.” Aryo waarura mu Efeso, wambukha inyaantsa waatsya. 22Aryo n'ola i Kayisaliya, watsya washeesakho babafukiilila mu Yesu, lwanyuma weekha watsya i Antiyoki.

23Ne naamalayo bifukhu bibyoola mukhono, waarurayo wakyeendana mu bifwo bikhali bitweela ta. Wabirira mu shisiintsa she Galatiya, ni Firigiya, nga awandalasa baleekelwa boosi.

Apolo nga ali mu Efeso ni mu Korinso

24Aabawo Umuyudaaya ulaangiwa Apolo, nga asaalikhana i Alekizandereya, uweetsa mu Efeso. Umusaani yuno abe ali umukanikhi umulayi, naluundi nga wamanya bulayi naabi bibyaronebwa bikhosefu. 25Abe iliwo umuundu uwamuleekela khu biwaamba khu bulamu bw'Omukasya. Isaambo yeesi abamo naabi ni kameelu ke khuleekela mu mwoyo kweewe, wakanikha, naluundi waleekela bulayi bilomo bibyeene bibiwaamba khu Yesu. Ne niye abe wamanyakho khubatisibwa khweesi Yokana areera khwonyene.

26Aryo Apolo waarakikha khuukanikhila mu ntsu iye khukhwisaayilamo nga s'arya ta. Pulisikila ni Akula ni baamuwulila nga aleekela, baamuyila baatsya ni naye ingo waabwe, bamwibaalusila bulayi bubweene khuleekela khwa Wele nga ni khuli.

27Ne Apolo n'akana ari ambukhe atsye mu Akaya, be buulebe bamwiisamo kamaani, naluundi baronela baleekelwa khumwakaanila bulayi. Ne n'olayo, wayeeta naabi ibo babafukiilila, khuubirira mu bweela bwa Wele. 28Lwekhuuba niye afuuratsaka Bayudaaya mu khukhabisana nga bali mu baandu, nga abokesanisa khuubirira mu byaronebwa bikhosefu ari, Yesu niye Kristo.

Currently Selected:

Buraambi 18: LPE

Highlight

Copy