Buraambi 14

Paulo ni Balunaba nga bali mu Ikoniyo

1Ni lwoola, Paulo ni Balunaba nga bali mu Ikoniyo, baatsya mu ntsu iye khukhwisaayilamo iye Bayudaaya (nga ni bakholatsaka busheele). Baakanikha buulayi, shino shareerera lituuli likali lye Bayudaaya ni Bayonaani khufukiilila. 2Ne Bayudaaya bakhafukiilila ta, baasuluusa Banaambo, baashuusa kimyoyo kyaabwe, baakila baabiiyila bafukiilisi mu Kristo. 3Baryo Paulo ni Balunaba, baamenyayo bifukhu bikalikho, nga bakanikha ni kamaani khu Mukasya, akhali khuurya ta, nga bawayo bujulisi khu shilomo she bubweela bweewe. Nga naye Umukasya aryo nga aŋaŋasa buurume bwaabwe, nga abanyalisisa khuukhola bye khuubonelakho, ni bye kamakaanga. 4Ne babaandu be mu shiriimba umwo baawukhanamo; balala baaba khu luwaande lwe Bayudaaya, ne babaandi baaba khulwe Baarume. 5Lwanyuma abawo khukhwikuta akari e Banaambo ni Bayudaaya, bafukiilisanila atweela ni baraangilisi baabwe khukhola baarume buubi, ni khubakhupa kamabaale. 6Ne Baarume ni bashimanyakho, batitukha baatsya mu biriimba bya Likoniya bibilaangibwa Lisitura, ni Derube, ni shiibala shishiililanilewo. 7Ibweeneyo, beloosela khuboolela kamakhuuwa kamalayi.

Mu Lisitura ni Derube

8Ne mu Lisitura mwabamo umusaani uwakataala bikyele, nga umuleme khukhwaama nga n'asaalikha, nga s'akyeendatsakakho ta. 9Umusaani yuno wekhala aasi warekeeresa Paulo byeesi aba akanikha. Paulo wamwomiisilakho tsimoni wamubona nga ali ni khufukiilila khukhunyala khumuwonesa. 10Wamuloma ni likono likali ari, “Yinyukha wiime bukwalaafu khu bikyele byoowo.” Umusaani wesuta, warakikha khukyenda. 11Ne lituuli lye babaandu ni baabona sheesi Paulo akholile, bayokesela angaaki mu lulimi lwe waabwe Lulikoniyo bari, “Bawele bekyelile babaandu beetsile isi khuli!” 12Balaanga Balunaba bari, “Zeusi,” ni Paulo bamulaanga bari, “Herimesi,” lwekhuuba niye uwafuura khukanikha. 13Ne umusaayi wa wele Zeusi, wele uwaba ni lisaayilo lyeewe abulafu we shiriimba, wareera tsiwuunwa ni bimuli amulyaango kwe shiriimba, lwekhuuba niye atweela ni babaandu bakana khuwayo tsisaayilo isi baarume.

14Ne baarume Balunaba ni Paulo ni bawulila baryo, bonuulaka tsingubo tsaabwe, batima baatsya isi lituuli lye babaandu, nga bayokesela angaaki bari, 15#Luky 20.11; Zab 146.6“Basaaninywe, lwashiina mukhola bino? Nafwe khuli babaandu busa nga inywe, ne khubaboolela Kamakhuuwa Kamalayi khuri, mulekhe ibyo bikhalimo ta, mwiile isi Wele uwabuumba likulu ni shiibala, ni tsinyaantsa, ni bibiindu byoosi bibilimo. 16Mu mbuka iye khaale, Wele afukiilisa babaandu be kamanaambo koosi khukyenda mu ntsila tseesi bekanatsakila. 17Ne s'alekha khukhwiyokesana bujulisi bweewe ta, lwekhuuba eyokesanatsaka mu bilayi byeewe byeesi akhola, nga abawa ifula khukhwaama mu ngaaki, ni biilyo mu biseela byabyo bibyeene. Abawa biilyo bibimala, luundi wetsusa kimyoyo kyeenywe ni kumwikhoyo.”

18Baarume bakhaba nga baloma bilomo bino, sibyanyala khukhingilila babaandu khubareerera tsisaayilo ta. 19Ne lwanyuma abawo Bayudaaya babeetsa khukhwaama i Antiyoki she mu Pisidiya ni Ikoniyo, bakhonjelesa babaandu khubiyila Paulo. Baryo bamukhupa kamabaale, bamukhuruura, bamurusa ibulafu we shiriimba, nga bambaasa bari wafwiile. 20Ne baleekelwa ni bamwibotokhelela, wenyukha aasi, welayo mu shiriimba. Shifukhu shishelakho, waaruramo ni Balunaba, baatsya i Derube.

Khuukobolayo mu Antiyoki she mu Siriya

21Paulo ni Balunaba baboolela Kamakhuuwa kamalayi mu Derube, baakalusayo babaandu baakali khukhwikyela baleekelwa. Baryo bafuumba baakobolayo i Lisitura, Ikoniyo, ni Antiyoki; 22nga bawandalasa kimyoyo kye baleekelwa, nga bababoolela khukhwiloosela khuwandalalila mu khufukiilila. Babaleekela bari, “Ifwe shikhwakhila khubira mu bikosi bikali, nio khwinjile mu Buyiinga bwa Wele.” 23Paulo ni Balunaba baabarobolela baraangilisi mu buli shifwo mumwaba baafukiilisi. Baryo mu khuloomba ni mu khubuya ntsala, baabawayo mu mikhono ky'Omukasya isi bafukiililamo.

24Lwanyuma nga babirira mu Pisidiya, boola i Panfiliya. 25Ne ni baamala khuuboolela Ilomo ya Wele mu Peruga, beekha baatsya i Ataliya. 26Nga bali i Ataliya, baambukha luundi i Antiyoki, isi baawaanibwilayo mu bweela bwa Wele, lwe buraambi bweesi baaba baamalile khuukhola. 27Ne ni boola mu Antiyoki, baabuusanisa baafukiilisi atweela, baababoolela byoosi byeesi Wele aaba waabaraambisile khuukhola, naluundi ni saambo isi ekulawo kumulyaango kwe khuufukiilila isi Banaambo. 28Baryo baamenyayo bifukhu bikalikho nga bali atweela ni baleekelwa.

Currently Selected:

Buraambi 14: LPE

Highlight

Copy