Mk 15

Mbɨ nyaʼa nɨŋ ə Yeso wò ɨfě Pailèt

(Mt 27.1-2, 11-14; Lk 23.1-5; Jn 18.28-38)

1Ɨtuʼ nyaʼa mɨ chɨg i chɨgɨ, bə̂d kyeŋ mbe rɨ ə mbàn Ŋwìə̀ mbɨ ə bə̂d kyeŋ mbe rɨŋga əbeŋ mbɨ məchwiə̀ rɨ̀kə̌ bə̀ fɔrɨ mə̀saʼ əbeŋ mɨ̀jìm nyaʼa yim ɨfetɨ əne taŋ ənû nɨ mbɨ bɨrɨ ghɨ̀ mbɨ Yeso. Mbɨ nyaʼa taŋ əne, kod əməd, nɨŋ wò nàʼ əmbɨ Pailèt. 2Pailèt nyaʼa biirɨ ɨ bɔ ni, “Àwɔ̀ kɨ ɨfɔ̀n mɨ̀Jû ə?”

Wɨ̀ nyaʼa wììrɨ̀ ɨ bɔ ni, “À yɨ ɨchî nɨ à ghǎ.”

3Bə̂d kyeŋ mbe rɨ ə mbàn Ŋwìə̀ nyaʼa zɨ̀ ɨnû nɔnɔʼ ɨgwɨ məd. 4Əne Pailèt nyaʼa bə̀ yì biirɨ ɨ bɔ ni, “Chəi à berɨ ə̀wììrɨ̀ ənɨ ɨnû mbɔ̂ ə? Zə ɨchî nɨ mbɨ fə zɨ ɨnû nɔnɔʼ ɨgwɨ ne.”

5Chəi Yeso nyaʼa wɨrɨ wììrɨ̀ ənû ə mɔʼɔ. Ənû ze ə nyaʼa chè ə Pailèt.

Pailèt nyaʼa sob ni mbɨ zwiirɨ ə Yeso

(Mt 27.15-26; Lk 23.13-25; Jn 18.39–19.16)

6À nyaʼa ɨgwɨ ɨni Əchwɨ̂ ə Che-ɨgun jìm, Pailèt wɨə nyaʼə chɨ̀ə̀ wə̀d ndəŋ fibɨ̀ sàŋə̀, nɨ yeʼ we nɨ mɨ̀Jû nyaʼa biirɨ ni wɨ̀ chɨə nàʼ əmbɨ mɨ̀mə̌d. 7Mbaŋə̀ mɔʼɔ nɨ ɨkum məd nyaʼə Barabas nyaʼa ə nəb ndəŋ mbɨ ə bə̂d mbe nɨ məd mbɨ mɨ̀mə̌d nyaʼa ghɨ̌ əchɔb ə gù mbɨ zwiirɨ wə̀d. 8Ɨnɔ̂n bə̂d we nyaʼa wò ghà əmbɨ Pailèt ni wɨ̀ ghɨ ɨchî nɨ wɨ̀ kɨə mɨə ghɨ̀ə̀. 9Wɨ̀ nyaʼa biirɨ əmbɨ mɨ̀mə̌d ni, “Mbə wa kə̀b ni mə chɨ ɨfɔ̀n mɨ̀Jû nàʼ ɨ nən ə?” 10Wɨ̀ nyaʼa kàŋ kyerɨ ni à yɨ ɨmbə̀ʼ ə̀dìì nɨ bə̂d kyeŋ mbe rɨ ə mbàn Ŋwìə̀ nyaʼa gywɨ əməd yeʼe nàʼ ɨ ni.

11Àyɨə bə̂d kyeŋ mbe rɨ ə mbàn Ŋwìə̀ nyaʼa no ɨnɔ̂n bə̂d we ni mbɨ ghǎ ɨ bɔ ni wɨ̀ chɨ yeʼ ə Barabas nàʼ ɨ nən. 12Pailèt nyaʼa yì biirɨ əmbɨ ɨnɔ̂n bə̂d we ni, “Mə̀ sɨ ghɨ ənû ye mbɨ ə mbaŋə̀ zɔ̂ nɨ mbə̀ə tɔŋ ənɨ ɨfɔ̂n mɨ̀Jû ə?”

13Mbɨ nyaʼa yì kyeŋ rɨkǎ ghà ni, “Kombɨ əməd əzed ə baʼnɨ!”

14Pailèt nyaʼa biirɨ əmbɨ mɨ̀mə̌d ni, “Əton kɨ ni yè ə? Wɨ̀ gu ənû ə ye ə?”

Ənɨ wɨ̀ nyaʼa biirɨ əne, mbɨ nyaʼa màànɨ̀ yì kyeŋ rɨkǎ ghà ni, “Kombɨ əməd əzed ə baʼnɨ!”

15Pailèt nyaʼa kə̀b ni ɨnɔ̂n bə̂d we ghaʼrɨ, əne wɨ̀ nyaʼa chɨ̀ ə Barabas nàʼ əmbɨ mɨ̀mə̌d. Ənɨ wɨ̀ nyaʼa fə ghɨ̌ ni mbɨ te ə Yeso ənɨ ə ŋgwad, wɨ̀ nyaʼa nàʼ əməd ni mbɨ wo kòmbɨ̀ əzed ə baʼnɨ.

Mɨ̀sɔgyɨ̀ nyaʼa baʼrɨ ə Yeso

(Mt 27.27-31; Jn 19.2-3)

16Mɨ̀sɔgyɨ̀ nyaʼa nɨŋ ə Yeso wò ɨŋga tɔʼ. Tɔʼ ze yɨə nyaʼə tisɔ̀ŋ gɔmnà. Mbɨ nyaʼa pè tɔŋ mɨ̀sɔgyɨ̀ mɨ̀jìm mbɨ wò fetɨ. 17Mbɨ nyaʼa chɨ̀ ngywɨ̌ rɨ məd, əne zɨ̀ ngywɨ̌ ɨfɔ̀n ɨbòm ɨ bɔ. Mbɨ nyaʼa bə̀ nɨŋ ɨ̀jə̀ŋɨ̀ kad ɨghabɨ ɨdəm ɨfɔ̀n zɨ̀ ətu ɨ bɔ. 18Mbɨ nyaʼa kɔ chaʼrɨ əməd ghàə̀ ni, “Mbèè! Ŋgə̀ə̀! Tɨ̀ wɨə chàʼrɨ̀ əwe, kyɨ ɨfɔ̂n mɨ̀Jû!” 19Mbɨ nyaʼa buʼ ətu əməd ənɨ ə mbàŋ, chèd mad ənɨ məd bə̀ chìndɨ̀ ɨtu ɨnywɨ ə si wumnɨ əməd. 20Ənɨ mbɨ nyaʼa fə baʼrɨ əməd, mbɨ nyaʼa chɨ ngywɨ̌ ɨfɔ̀n ze wɨrɨ zɨ rɨ məd ɨbòm ɨ bɔ. Mbɨ nyaʼa ghɨ̀ əne nɨŋ əməd ɨ wo kòmbɨ̀ əzed ə baʼnɨ.

Mɨ̀sɔgyɨ̀ nyaʼa kòmbɨ̀ ə Yeso əzed ə baʼnɨ

(Mt 27.32-44; Lk 23.26-43; Jn 19.17-27)

21Mɨ̀sɔgyɨ̀ mbe nyaʼa pè ɨnə̂njɨ̀ zə mbaŋə̀ mɔʼɔ nɨ nyaʼa rɨ ə Sìrin nɨ ɨkum məd nyaʼə Saimòn. wɨ̀ nyaʼə che i che. Wɨ̀ nyaʼa nɔ̀ʼ rɨ ə mbeŋ sɨə wò ə Jèrusalèm. Əne mbɨ nyaʼa nyèŋ əməd ni wɨ̀ nɨŋ əzed ə baʼnɨ ze rɨ əmbɨ ə Yeso bèʼ. Saimòn yɨə nyaʼə mbǎʼ Àlèzandà mbɨ Rufùs. 22Mɨ̀sɔgyɨ̀ mbe nyaʼa nɨŋ ə Yeso wò əsɨ ze nɨ mbɨ nyaʼə tɔŋ ənɨ ə Golgotà, (əne yɨ mbɨ ghà ni Tɨmbin Ɨwɔʼ-ətu). 23Mbɨ nyaʼa nàʼ mɨnoʼ ɨ bɔ nɨ mbɨ nyaʼa nyamɨ mbɨ ə myrrh, àyɨə chəi wɨ̀ nyaʼa nɔ. 24Mbɨ nyaʼa kòmbɨ̀ əməd əzed ə baʼnɨ, əne sɔ̀ŋ mbaŋ ɨmbə̀ʼ zə əbà ə ngywɨ̌ ze nɨ wə̀d mɔʼ mɔʼ bɨrɨ nɨŋ. Mbɨ nyaʼa ghɨ̀ əne ghàpɨ̀ ngywɨ̌ rɨ məd əkaʼ mɨ̀mə̌d mɨ̀jìm.

25Mbɨ nyaʼa kòmbɨ̀ əməd ənɨ mɨ̀nyùmə̀ əbuə ɨsɔsɔ. 26Ənû nɨ mbɨ nyaʼa ŋwàʼnɨ̀ kòmbɨ̀ ɨgwɨ ətu əməd ɨ chwiə ənû ze nɨ wɨ̀ nyaʼa gǔ yɨ ni, “Wɔ̂ yɨ ɨfɔ̀n mɨ̀Jû.” 27Mbɨ nyaʼa bə̀ kòmbɨ̀ mɨjɨ be mbɨ məd, wɨ fìbɨ̀ əbà əbɔ ə jɨgɨ, wɨ fìbɨ̀ əbà əbɔ ə tweŋ. [ 28Ənû zɔ̂ ə nyaʼa jwɨ̀ bòmnɨ̀ mbɨ ɨŋgam Ŋwiə̀ we nɨ ghà ni, “Mbɨ nyaʼa fɔtɨ əməd əbɔʼ bə̂d nɨə ghɨ̀ ɨnû rɨbɔ̀ŋ.”] 29Bə̂d mbe nɨ nyaʼə chè ɨban əsɨ ze mbɨə nyaʼə baʼrɨ əməd, bə̀ mə̀ʼə̀ mbə ɨtu ghàə̀ ni, “Zweʼe! Àwɔ̀ we nɨ bɨrɨ saʼ mbàn Ŋwìə̀ wɨrɨ nɨŋ ɨni tad kod, 30kaŋ jwɨ e rəŋgəʼ, swiʼi rɨ əzed ə baʼnɨ ze!” 31À yɨə bə̀ əndəŋ əndəŋ nɨ bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ nyaʼa bə̀ baʼrɨ əməd ghàə̀ mbənə mbənə ni, “Ɨ wɨə nyaʼə chɨ̀ə̀ bə̂d cherə rəŋgəʼ, àyɨə chəi ənɨ tɨ məd ziə jwɨ̀ rəŋgəʼ! 32Wə̀d we nɨ Ŋwìə̀ zɔʼɔ, nɨ yeʼ ɨfɔ̀n mɨ̀Izre, swiʼi rɨ əzed ə baʼnɨ ze tɨ̀nîn ɨmbə̀ʼ tɨ̀ zə benɨ!” Mbaŋə̀ te nɨ mbɨ nyaʼa kombɨ mbɨ məd nyaʼa bə̀ zɔ̀m əməd.

Ɨchî nɨ Yeso nyaʼa kwɨ

(Mt 27.45-56; Lk 23.44-49; Jn 19.28-30)

33Ənɨ əzi ə nyaʼa kǎ, ɨsɨ nyaʼa fin əbeŋ əjìm. Mbɨ nyaʼa fin əne wò pè ənɨ mɨ̀nyùmə̀ tad. 34Ənɨ mɨ̀nyùmə̀ tad nyaʼa kuʼu, Yeso nyaʼa kyeŋ rɨkǎ ghà ni, “Èloi, Èloi, lama sabaktanì?” əne yɨ ni, “Mɨ Ŋwiə̀, mɨ Ŋwiə̀, à waʼ əmɨ ɨmbə̀ʼ ə yè ə?”

35Bə̂d mɔʼɔ rəbɔʼ mbe nɨ nyaʼa təmbɨ ɨban ɨban nyaʼa zu, əne ghà ni, “Mbə̀ zwetɨ, ɨ wɨə tɔŋ ə Èlaijà #15.35Ənɨ ɨŋgam Hibrù 'Mɨ Ŋwiə̀' yɨ ɨghabɨ ni 'Èlaijà'. ni wɨ̀ yeʼe wèèrɨ̀ əwi.” 36Mbaŋə̀ mɔʼɔ rəbɔʼ mɨ̀mə̌d nyaʼa nòrə̀ wò nɨŋ jûʼ, chùb ɨŋga twàŋ tɨ mɨnoʼ, fàm ətu fɨzed nàʼ ɨ bɔ ni wɨ̀ sɔɔrɨ. Ənɨ wɨ̀ nyaʼə ghɨ̀ə̀ əne ɨ wɨə nyaʼə ghàə̀ ni, “Mbə̀ kəm tɨ̀ zə ni Èlaijà wa bɨrɨ yeʼe ɨ swi əməd ə si ə?”

37Yeso nyaʼa kyeŋ rɨkǎ sɨ mèndɨ̀.

38Ngywɨ̌ ze nɨ mbɨ nyaʼa tam ɨŋga mbàn Ŋwìə̀ nyaʼa san ɨba be, kɔ rɨ ətu wò pè əton. 39Ənɨ ətu ɨgwɨ mɨ̀sɔgyɨ̀ mbe, nɨ nyaʼa təm ɨ neŋ əməd, nyaʼa zə ni wɨ̀ fə mèndɨ̀, wɨ̀ nyaʼa ghà ni, “À yɨ rəsìʼ ni mbaŋə̀ zɔ̂ yɨə kə̀ʼ ə Wan Ŋwìə̀!”

40Məyi mɔʼɔ nyaʼa bə̀ əŋgu nɨ nyaʼə nèŋə̀ rɨ əsa əgha. Mbɨ mɔʼɔ rəbɔʼ mɨ̀mə̌d yɨə nyaʼə Mèri Màgdàlen, Mèri ɨŋgɔb Jems bɔd mbɨ Josès fɔrɨ ə Sàlomè. 41Məyi mbɔ̂ nyaʼə beenɨ əbɔʼ ə Yeso yènə̀ wèèrɨ̀ əməd kɔ rɨ ənɨ wɨ̀ nyaʼa kɨrɨ ə Galiliî. Məyi mɨ̀nɔnɔʼ cherə nyaʼa bə̀ əŋgu nɨ nyaʼa kɔʼ wò ə Jèrusalèm mbɨ məd.

Ɨchî nɨ mbɨ nyaʼa tweŋ ə Yeso

(Mt 27.57-61; Lk 23.50-56; Jn 19.38-42)

42À nyaʼa sɨ ɨkwirɨ ɨkwirɨ, ɨchî nɨ à nyaʼa əni nɨ mbɨ nyaʼə tekɨ ɨnyod, əne yɨ əni bɔŋ əni əkwɨ mɨ̀Jû, 43Jòsêf rɨ ə Àrimàtiyà nyaʼa yim fîŋ wò əsɨ Pailèt, pè ghà ɨ bɔ ni wɨ̀ naʼ əvɨ ə Yeso ɨ ni tə wò tweŋɨ. Məd yɨə wə̀d nɨ mbɨ nyaʼə wumnɨə rəbɔʼ mə̀saʼ əbeŋ. Ɨ wɨə nyaʼə bə̀ wòm ənû ɨfɔ̀n ə Ŋwìə̀. 44Pailèt nyaʼa yiirɨ əku ɨ zu ni Yeso fə kwɨ. Əne wɨ̀ nyaʼa tɔŋ ətu ɨgwɨ mɨ̀sɔgyɨ̀ biirɨ ɨ bɔ ni, “Yeso wa fə kwɨ ə?” 45Ənɨ ətu ɨgwɨ mɨ̀sɔgyɨ̀ nyaʼa ghà ɨ bɔ ni wɨ̀ fə kwɨ, wɨ̀ nyaʼa ben ni Jòsêf wo swi əvɨ ze nɨŋ wò tweŋɨ. 46Jòsêf nyaʼa wò zon ngywɨ̌ linen, wò swi əvɨ ə Yeso, nib ɨŋga ngywɨ̌ linen ze, wò boŋ ɨŋga ɨ̀sì nɨ mbɨ nyaʼa chəb ɨŋga ɨwɔ̌. Wɨ̀ nyaʼa boŋ əne, biŋ ɨti kubrɨ ɨchû ɨ̀sì we əŋgu. 47Mèri Màgdàlen mbɨ Mèri ɨŋgɔb Jòsêf nyaʼa zə əsɨ ze nɨ mbɨ nyaʼa boŋ əvɨ ze əŋgu.

Currently Selected:

Mk 15: mgo

Highlight

Copy