Mt 15

Mɨchî əbeŋ mɨ̀mbǎʼ rəŋwe

(Mk 7.1-13)

1Mɨ̀Farisiî mbɨ məchwiə̀ rɨ̀kə̌ nyaʼa nɔ̀ʼ rɨ ə Jèrusalèm wò əsɨ Yeso pè biirɨ ɨ bɔ ni, 2“Əton nɨ chəi mbe mə̀mə̀ə̀nɨ̀-ɨnû ə nùŋ mɨchî əbeŋ mbe nɨ mɨ̀mbǎʼ rəŋwe nyaʼa nuŋɨ kɨ ɨmbə̀ʼ ə yè ə? Chəi mɨ̀mə̌d ə sò ɨbɔ ɨchî nɨ rɨkə chwiə bɔŋ jɨg.”

3Wɨ̀ nyaʼa wììrɨ̀ əmbɨ mɨ̀mə̌d ni, “Əton nɨ chəi mbə̀ə nùŋ tɨkə rɨ Ŋwìə̀, mbə bən nùŋ yeʼ mɨchî əbeŋ mbe nɨ mbə mɨ̀mbǎʼ nyaʼa nuŋɨ kɨ ɨmbə̀ʼ ə yè ə? 4Ŋwìə̀ ə ghà ni, 'Wumnɨ e mbǎʼ bə̀ wumnɨ e nɨ̌ŋ,' fɔrɨ ni, 'Mbɨ berɨ zwiirɨ wə̀d we nɨ zɔm i mbǎʼ kɨ̀ i nɨ̌ŋ.' 5Àyɨə mbə̀ mbɨə ghàə̀ ni wə̀d mɔʼɔ mɨ ghà əmbɨ i mbǎʼ kɨ̀ əmbɨ i nɨ̌ŋ ni, 'Ə̀wèèrɨ̀ ze nɨ mə kəʼ berɨ naʼ ɨ ne, mə fə nàʼ əmbɨ ə Ŋwiə̀,' 6əne chəi əton ənɨ tɨ wɨ̀ wɨrɨ 'wumnɨ i mbǎʼ.' Əzɔ̂ ə zɨə chwi ɨchî nɨ mbən ə tə̀ə̀nɨ̀ ɨŋgam Ŋwiə̀ ɨmbə̀ʼ beenɨ əbɔʼ mbə mɨchî əbeŋ. 7Mbə̀ yɨ ɨbekɨ bə̂d! Wə̀d ɨ̀kə̀n Ŋwìə̀ Aizayà nyaʼa ghà ɨnû nɨ kuʼnɨ ɨmbə̀ʼ əwən ənɨ wɨ̀ nyaʼa ghǎ ni,

8'Bə̂d mbɔ̂ mbɨə wumnɨ əmɨ ənɨ mbə mɨchù,

àyɨə fîŋ tɨ mɨ̀mə̌d tɨ əsa əgha.

9Ɨ mbɨə wumnɨ əmɨ ətu ə̀kǒ.

Ɨ mbɨə chwiə tɨkə rɨ bə̂d ɨghabɨ ni à yɨ tum.'”

Ɨghɨ mbe nɨə ghɨ̀ ni tɨ wə̀d zeŋ i

(Mk 7.14-23)

10Yeso nyaʼa tɔŋ ɨnɔ̂n bə̂d we əsɨ ni, ghà əmbɨ mɨ̀mə̌d ni, “Mbə̀ zu mbə ɨtu zeŋ: 11kaʼi əghɨ ze nɨə nyɨ ɨŋga ɨchû wə̀d ə ghɨ̀ə̀ ni tɨ wɨ̀ zeŋ i. Əze nɨə ghɨ̀ə̀ ni tɨ wɨ̀ zeŋ i yɨ əze nɨə jwɨ̀ rɨŋga ɨchû məd.”

12Mə̀mə̀ə̀nɨ̀-ɨnû mbe nyaʼa wò əsɨ məd pè biirɨ ɨ bɔ ni, “À kyerɨ ni ənû ze nɨ à ghǎ ə kə̀ʼ chə̀kɨ̀ fîŋ tɨ mɨ̀Farisiî ə?”

13Wɨ̀ nyaʼa wììrɨ̀ ni, “Mbɨ bɨrɨ chɔʼrɨ ɨghɨjìm mbe nɨ chəi mɨ Mbǎʼ rɨkaŋ konɨ. 14Mbə̀ saŋ mɨ̀mə̌d! Mbɨ yɨ mɨfɨgɨ̀ nɨə chàə̀ mbɨ cherə. Ɨfɨgɨ mɨ yim mbàŋ əmbɨ wɨ cherə, mɨ̀mə̌d mbe mɨ̀be bɨrɨ feŋ ɨŋga ɨbɨgɨ.”

15Pità nyaʼa ghà ɨ bɔ ni, “Toʼrɨ ənû ə mɨgɨ zɔ̂ ɨ na.”

16Əne wɨ̀ nyaʼa ghà əmbɨ mɨ̀mə̌d ni, “Chəi mbə̀ ɨtu bə kɨrɨ zeŋ ə? 17Chəi mbə̀ zə ni əghɨ ze nɨ nyɨ ɨŋga ɨchû bɨrɨ swiʼi wò nyɨ ɨbum əne jwɨ̀ ə? 18Əghɨ ze nɨə jwɨ̀ rɨŋga ɨchû yɨ rɨŋga fîŋ. Ə zɨə ghɨ̀ə̀ ni tɨ wə̀d zeŋ i, 19ɨmbə̀ʼ ɨghəm nɨ tɨkɔndɨ rɨbɔ̀ŋ tɨə jwɨ̀ rɨŋga fîŋ. Tɨkɔndɨ te tɨə ghɨ̀ ni wə̀d zwiirɨ wɨ cherə, ni wə̀d ni əyi kɨ̀ ɨnom wə̀d cherə, ni wə̀d ni məyi kɨ̀ mbaŋə̀ əbəŋ əbəŋ, ni wə̀d jɨ, ni wə̀d ben zərɨmbin mɨ̀ghab fɔrɨ ni wə̀d chəkɨ rɨkum bə̂d. 20Mbɔ̂ yɨ ɨnû mbe nɨə ghɨ̀ə̀ ni tɨ wə̀d zeŋ i, kaʼi ənû nɨ jɨg zɨ rɨ so ɨbɔ.”

Ɨbenɨ fîŋ əyi nɨ nyaʼa rɨ ə Kanàan

(Mk 7.24-30)

21Yeso nyaʼa nɔ̀ʼ rɨ ə Gènesarèt wò əbà əbeŋ ze rɨ ə Taì fɔrɨ ə Sidòn. 22Əyi mɔʼɔ nɨ nyaʼa rɨ ə Kanàan, nɨ nyaʼə chub əbà əbeŋ ze nyaʼa wò əsɨ məd pè kyeŋ rɨkǎ ghà ni, “Masà! Wan Dèvîd! Diirɨ əmɨ! Əzwî rɨbɔ̀ŋ ə fə nyɨ ɨŋga mɨ wan əyi. Ə zɨə kàŋə̀ chə əməd kwàʼ rɨŋgəʼ.”

23Chəi Yeso nyaʼa wiirɨ ənû ə mɔʼɔ ɨ bɔ. Mə̀mə̀ə̀nɨ̀-ɨnû ɨməd nyaʼa wò buʼ ɨbɔ ɨ bɔ ghà ni, “Gha əyi wɔ̂ wo i, ɨmbə̀ʼ ɨghəm nɨ ɨ wɨə yènə̀ ja ɨsɨ ənjìm na.”

24Wɨ̀ nyaʼa wììrɨ̀ ni, “Ŋwìə̀ nyaʼa tom əmɨ àmei əmbɨ njɨ̀g te nɨ nyaʼa nim rɨŋga ɨnəbɨ Izre.”

25Ənɨ wɨ̀ nyaʼa ghà əne, əyi we nyaʼa wò chìndɨ̀ ɨtu ɨnywɨ ɨfě ɨ bɔ ghà ni, “Masà, kaŋ weerɨ əmɨ.”

26Yeso nyaʼa wììrɨ̀ ni, “Zɨ̀ rɨka bɔ̀ŋ i ni mbɨ nɨŋ ɨghɨjɨg bɔn màʼ əmbɨ ə bu.”

27Əyi we nyaʼa bendɨ ni, “À yɨ əne, kyɨə masà, àyɨə kaʼ àbei bu tɨə jɨgə tɨkə rɨ ɨghɨ te nɨə feŋ rɨ ɨgun ə tebrə̀ mɨ̀mbǎʼ mɨ̀mə̌d.”

28Yeso nyaʼa wììrɨ̀ ɨ bɔ ni, “Əyi, e ɨbenɨ ə kà! Əne əghɨ ze nɨ à kə̀bɨ, à bɨrɨ berɨ.” Àmei əwu əwən, wan əyi məd we nyaʼa bɔtɨ i.

Yeso nyaʼa vɨ̀ bə̂d mɨ̀nɔnɔʼ

29Yeso nyaʼa nɔ̀ʼ rɨ əsɨ ze wò chè ɨban ə sà ze rɨ ə Galiliî. Wɨ̀ nyaʼa wò kɔʼ ɨkaŋ ɨwum pè chub ə si. 30Mɨnɔ̂n bə̂d nyaʼa wò əsɨ məd mbɨ ə bə̂d nɨ nyaʼə tèʼ ɨwu, mbɨ mbe nɨ ɨbɔ nyaʼa kwɨ, mbɨ mɨfɨgɨ̀, mbɨ mbɨ̀rɨ̀ghàm fɔrɨ mbɨ ə bə̂d əwɔn cherə nɔnɔʼ. Mbɨ nyaʼa pè nùŋ mɨ̀mə̌d ɨfě ɨ bɔ, əne wɨ̀ nyaʼa vɨ̀ mɨ̀mə̌d. 31Bə̂d mbe nyaʼa yiirɨ ɨchî nɨ mbɨ nyaʼa zə nɨ mbɨ̀rɨ̀ghàm ə ghàmə̀, mbe nɨ ɨbɔ nyaʼa kwɨ bɔtɨ, mbe nɨ nyaʼə tèʼ ɨwu yèn ɨchî chɔ̀m bə̀ yiirɨ ɨchî nɨ mɨfɨgɨ̀ ə zə ɨsɨ. Əne mbɨ nyaʼa yiirɨ Ŋwìə̀ mɨ̀Izre.

Yeso nyaʼa jə mbaŋə̀ chuʼ rɨ̀kwè

(Mk 8.1-10)

32Yeso nyaʼa tɔŋ mbi mə̀mə̀ə̀nɨ̀-ɨnû əsɨ ni ghà ni, “Mə wɨə kàŋə̀ kə̀n ɨmbə̀ʼ ɨnɔ̂n bə̂d wɔ̂, ɨmbə̀ʼ ɨghəm nɨ mbɨ fə chubɨ mbɨ num ɨni tad, əne chəi mbɨ wɨrɨ berɨ əghɨ mɔʼɔ nɨ tɨ̀ mbɨ jɨg. Chəi mə̀ kə̀b ni mbɨ nɔʼ rɨ əgha njì, njɨ mbɨ bɨrɨ gu ɨnə̂njɨ̀ nə̀ŋə̀.”

33Mə̀mə̀ə̀nɨ̀-ɨnû mbe nyaʼa biirɨ ɨ bɔ ni, “Tɨ̀ kɨə wò zə ŋgə̀ŋ nɨ kuʼ ə yi əgha ɨŋga ɨbad rɨkwàʼi nɨ jə ɨnɔ̂n bə̂d wɔ̂ əŋgu ə?”

34Yeso nyaʼa biirɨ əmbɨ mɨ̀mə̌d ni, “Mbə berɨ chiŋ ŋgə̀ŋ rɨ̀səʼ ə?”

Mbɨ nyaʼa wììrɨ̀ ni, “Tɨ̀ berɨ chiŋ ŋgə̀ŋ sambe mbɨ əgwi ə kwa kwa mɔʼɔ.”

35Yeso nyaʼa zu əne ghà əmbɨ ɨnɔ̂n bə̂d we ni mbɨ chub ə si. 36Ənɨ mbɨ nyaʼa chubɨ, wɨ̀ nyaʼa nɨŋ chiŋ ŋgə̀ŋ te sambe bə̀ nɨŋ əgwi ze, kɔŋgɨ ə Ŋwiə̀, bəʼrɨ, nàʼ əmbɨ mə̀mə̀ə̀nɨ̀-ɨnû mbe ni mbɨ nàʼ əmbɨ mɨnɔ̂n bə̂d mbe. 37Mɨ̀mə̌d mɨjìm nyaʼa jɨg kod. Mə̀mə̀ə̀nɨ̀-ɨnû mbe nyaʼa fetɨ tɨkə te nɨ buʼu, tɨ swi mbɨ̀rɨkaʼ sambe. 38Mbaŋə̀ te nɨ nyaʼa jɨgɨ yɨə nyaʼə ɨghabɨ ə chuʼ rɨ̀kwè, nɨ chəi mbɨ taŋ məyi fɔrɨ bɔn. 39Ənɨ wɨ̀ nyaʼa fə cha mɨnɔ̂n bə̂d mbe mbɨ wò əwən, wɨ̀ nyaʼa nyɨ əbaŋ ɨgyɨ̀, wò əbà əbeŋ ze rɨ ə Magadàn.

Currently Selected:

Mt 15: mgo

Highlight

Copy