Lk 4

Debɨ̀rə̀ nyaʼa numbɨ ə Yeso

(Mt 4.1-11; Mk 1.12-13)

1Əzwî ə Zeŋɨ ə nyaʼa swi ɨŋga Yeso, əne wɨ̀ nyaʼa bə̀ndɨ̀ rɨ ɨgyɨ̂ Jodàn. Əzwî ze ə nyaʼa nɨŋ əməd 2mbɨ wò ɨŋga ɨbad rɨkwàʼi əsɨ nɨ Debɨ̀rə̀ nyaʼa numbɨ əməd ɨni ɨwum kwè. Chəi wɨ̀ nyaʼa jɨg əghɨ ə mɔʼɔ ɨŋga ɨni mbe. Ənɨ ɨni mbe nyaʼa mì i, njì rɨ nyaʼa zaŋ əməd.

3Debɨ̀rə̀ we nyaʼa ghà ɨ bɔ ni, “Àwɔ̀ mɨ kàŋ yeʼ Wan Ŋwìə̀, ghà əmbɨ ɨti wɔ̂ ni wɨ̀ beŋ ənɨ ə ŋgə̀ŋ.”

4Yeso nyaʼa wììrɨ̀ ɨ bɔ ni, “Ə zɨ ɨŋga Ə̀ŋwàʼnɨ̀ ə Ŋwiə̀ ni, 'Ka wə̀d wɨə chub i ɨkǎ àmei ɨmbə̀ʼ ŋgə̀ŋ.'”

5Debɨ̀rə̀ we nyaʼa nɨŋ əməd mbɨ kɔʼ wò ɨkaŋ əsɨ ə mɔʼɔ. Wɨ̀ nyaʼa pè nɨŋ akə nyùmə̀ chwi ɨbeŋ jìm ɨgwɨ ɨsɨg ɨ bɔ, 6ghà ɨ bɔ ni, “Mə bɨrɨ naʼ ɨka ɨ ne ni à tumbɨ ɨbeŋ mbɔ̂ jìm bə̀ jɨg ɨghɨ chɔ̀m jìm mbe nɨ yeʼ ɨŋga. Ŋwìə̀ fə naʼ ɨka jìm ɨ num, əne mə we tɨ̀ mə̀ nàʼ ɨka we əmbɨ wə̀d we nɨ mə ghaʼi. 7Əne à mɨ wumnɨ əmɨ, mə bɨrɨ naʼ ɨghɨ mbɔ̂ jìm ɨ ne.”

8Yeso nyaʼa wììrɨ̀ ɨ bɔ ni, “Ə zɨ ɨŋga Ə̀ŋwàʼnɨ̀ ə Ŋwiə̀ ni,

'À berɨ wumnɨ Ə̀nùŋɨ̀sɨg e Ŋwiə̀,

bə̀ fàʼ àmei ɨ bɔ.'”

9Debɨ̀rə̀ we nyaʼa nɨŋ əməd mbɨ wò ə Jèrusalèm. Wɨ̀ nyaʼa pè ghɨ̀ wɨ̀ kɔʼ təm ɨdom mbàn Ŋwìə̀, əne gha ɨ bɔ ni, “Àwɔ̀ mɨ kàŋ yeʼ Wan Ŋwìə̀, à təm əgha tòm ə si. 10Ə zɨ ɨŋga Ə̀ŋwàʼnɨ̀ ə Ŋwiə̀ ni,

'Ŋwìə̀ bɨrɨ gha əmbɨ mbi mbɨ̀aŋgɨrə̀ ni mbɨ nəŋgɨ əwe,'

11fɔrɨ ni, 'Mbɨ bɨrɨ yim əwe ənɨ mbə ɨbɔ, ɨmbə̀ʼ tɨ à nun əwe mbe ɨwu ənɨ ɨti.'”

12Yeso nyaʼa wììrɨ̀ ɨ bɔ ni, “Ə zɨ ɨŋga Ə̀ŋwàʼnɨ̀ ə Ŋwiə̀ ni, 'Tɨrə̀ numbɨ e Ə̀nùŋɨ̀sɨg e Ŋwìə̀.'” 13Ənɨ Debɨ̀rə̀ we nyaʼa maanɨ nɨ numbɨ ə Yeso, wɨ̀ nyaʼa sàŋ əməd nɔ̀ʼ wò i. Wɨ̀ nyaʼa wo chubɨ pè ənɨ wɨ̀ bɨrɨ wɨrɨ berɨ əpan ə cherə.

Yeso nyaʼa kɔ ə̀fàʼì ə Galiliî

(Mt 4.12-17; Mk 1.14-15)

14Yeso nyaʼa bə̀ndɨ̀ wò ə Galiliî. Əzwî ə Ŋwiə̀ ə nyaʼa fə nàʼ ɨka ɨ bɔ ɨ swi. Ɨnû ɨmbə̀ʼ əməd nyaʼa jàŋ ɨŋga əba əbeŋ ze əjìm. 15Wɨ̀ nyaʼa chwi ɨnû ɨŋga nəb tɨ ə̀kàtɨ̀ te nɨ nyaʼa ɨŋga ɨsɨ mbe. Wə̀d jìm we nɨ nyaʼa zu ɨnû mbe nyaʼa yiirɨ əməd.

Bə̂d mbe rɨ ə Nazàret nyaʼa ton ə Yeso

(Mt 13.53-58; Mk 6.1-6)

16Yeso nyaʼa wò ə Nazàret, nɨ yeʼ əsɨ ze nɨ wɨ̀ nyaʼa kwi əŋgu. À nyaʼa ɨgwɨ əni əkwɨ mɨ̀Jû, wɨ̀ nyaʼa wò ɨŋga nəb ə̀kàtɨ̀ ze rɨ əsɨ ze, ɨchî nɨ wɨ̀ nyaʼa mɨ̀ə̀ ghɨ̀ə̀. Wɨ̀ nyaʼa nɔ̀ʼ təm rətiə ɨ foŋ ɨŋgam Ŋwiə̀, 17əne mbɨ nyaʼa nɨŋ ə̀ŋwàʼnɨ̀ ə karɨ ze nɨ wə̀d ɨ̀kə̀n Ŋwìə̀ Aizayà nyaʼa ŋwaʼnɨ nàʼ ɨ bɔ. Wɨ̀ nyaʼa zà ə̀ŋwàʼnɨ̀ ze, zə əsɨ ze nɨ mbɨ ŋwaʼnɨ əŋgu ni,

18“Əzwî Ə̀nùŋɨ̀sɨg ə zɨ ɨgwɨ num,

ɨmbə̀ʼ ɨghəm nɨ Ə̀nùŋɨ̀sɨg fə zɔʼ əmɨ ni mə gha ɨkə̂n chɔ̀m əmbɨ ə bə̂d ɨkwaŋ.

Wɨ̀ fə tom əmɨ ni mə̀ saʼ ni Ŋwìə̀ bɨrɨ chɨ bə̂d ndəŋ sàŋɨ̀,

fɔrɨ ni mɨfɨgɨ̀ bɨrɨ zə ɨsɨ

bə̀ fɔrɨ ni mbɨ bɨrɨ saŋ bə̂d mbe nɨ mbɨə nyèm mɨ̀mə̌d,

19bə̀ saʼ ni nyùmə̀ fə kùʼi

nɨ Ə̀nùŋɨ̀sɨg bɨrɨ ghɨ ɨ̀chɔ̀m ənɨ ə bə̂d.”

20Ənɨ wɨ̀ nyaʼa foŋ əne, wɨ̀ nyaʼa wɨrɨ kad ə̀ŋwàʼnɨ̀ ze, nàʼ əmbɨ wə̀d ə̀fàʼì nəb ə̀kàtɨ̀ ze, wò chub ə si. Bə̂d mɨjìm mbe nɨ nyaʼa ɨŋga nəb ə̀kàtɨ̀ ze nyaʼa toŋ əghə ɨgwɨ məd. 21Wɨ̀ nyaʼa kɔ gha əmbɨ mɨ̀mə̌d ni, “Tə̀chɔ̀ŋ, əsɨ ə̀ŋwàʼnɨ̀ zɔ̂ ə fə jwɨ̀ ənɨ rəsìʼ, mbə zu.”

22Mɨ̀mə̌d mɨjìm nyaʼa ghà ɨŋgam chɔ̀m ɨmbə̀ʼ əməd, əne yiirɨ ɨŋgam əbɔrəbɔd we nɨ nyaʼa jwɨ rɨ ɨchû məd. Mbɨ nyaʼa yiirɨ əne ghà ni, “Ɨmbə̀ʼ wɔ̂ yɨə wan Jòsêf ə?”

23Wɨ̀ nyaʼa ghà əmbɨ mɨ̀mə̌d ni, “Mə kyerɨ ni mbə bɨrɨ gha ɨŋgam maʼi wɔ̂ ɨ num ni, 'Wə̀d ɨfuʼ, vɨ e ɨnyod!' Bə ghɨ̀ ɨnû mbe nɨ tɨ̀ zu ni à nyaʼa ghɨ̀ ə Kàpenàhom ɨŋga əsɨ zɔ̂ nɨ mbɨ gywɨ əwe.” 24Wɨ̀ nyaʼa yì ghà ni, “Mə ghà rəsìʼ ɨ nən ni, chəi bə̂d ə benə wə̀d ɨ̀kə̀n ɨŋga əsɨ ze nɨ mbɨ gywɨ əməd. 25Mə ghà rəsìʼ ɨ nən ni mɨku əyi nɔnɔʼ nyaʼa ɨŋga Izre ənɨ ə nyùmə̀ Èlaijà, əwu ze nɨ Ŋwìə̀ nyaʼa wub ɨkaŋ ɨghəm ɨwu tad mbɨ əmɨg rɨ̀fuə, əne njì kǎ kǎ nyaʼa nyɨ ɨŋga əbeŋ əjìm. 26Chəi Ŋwìə̀ nyaʼa tom Èlaijà əsɨ wɨ mɔʼɔ rəbɔʼ mɨ̀mə̌d, chè rɨ ənɨ ɨku əyi we nɨ nyaʼa ə Zarefàt ɨŋga əba əbeŋ ze rɨ ə Sidòn. 27Bə̂d mɨ̀nɔnɔʼ nɨ nyaʼə wɔ̀n əpabɨ nyaʼa ɨŋga Izre ənɨ ə nyùmə̀ Èlaishà, àyɨə chəi əpabɨ ə nyaʼa mi rɨ ənɨ wɨ̀ mɔʼɔ, chè rɨ ənɨ ə Namàn nɨ nyaʼə wə̀d rɨ ə Sirià.” 28Ənɨ mbɨ nyaʼa zu ənû zɔ̂, bə̂d mɨ̀jìm mbe nɨ nyaʼa ɨŋga nəb ə̀kàtɨ̀ ze nyaʼa sə ɨtəm. 29Əne mbɨ nyaʼa nɔ̀ʼ rətiə tin əməd chɨ̀ rɨŋga əsɨ ze. Mbɨ nyaʼa nɨŋ əməd wò pè ɨbom bam ɨgun ɨwum we nɨ mbɨ nyaʼa kod əsɨ mɨ̀mə̌d ze. Mbɨ nyaʼa kɔndɨ ni mbɨ bɨrɨ tin əməd rətuŋə. 30Àyɨə wɨ̀ nyaʼa nyeʼ chè ɨŋga mɨgharə̀ mɨ̀mə̌d wò i.

Yeso nyaʼa chɨ̀ əzwî rɨbɔ̀ŋ rɨŋga mbaŋə̀ mɔʼɔ

(Mk 1.21-28)

31Yeso nyaʼa swiʼi wò ə Kàpenàhom, nɨ nyaʼa əsɨ ə mɔʼɔ əba əbeŋ ze rɨ ə Galiliî. Wɨ̀ nyaʼa pè chwi ɨnû əmbɨ ə bə̂d mbe rəŋgu əni əkwɨ mɨ̀Jû. 32Bə̂d mbe nɨ nyaʼa zu ɨnû mbe nyaʼa yiirɨ ɨchî nɨ wɨ̀ nyaʼə chwiə, ɨmbə̀ʼ ɨghəm nɨ ɨ wɨə nyaʼə ghàm ɨghabɨ ə wə̀d nɨ berɨ ɨka nɨ ghɨ əne.

33Mbaŋə̀ mɔʼɔ nyaʼa ɨŋga nəb ə̀kàtɨ̀ ze ni əzwî rɨbɔ̀ŋ ə nyaʼa ɨŋga məd. Wɨ̀ nyaʼa kɔ kyeŋ rɨ̀kǎ ghà ni, 34“Aa! Yeso rɨ ə Nazàret! À berɨ ənû ə ye nɨ ghɨ̀ mbɨ na ə? À wa fə yeʼe ɨmbə̀ʼ nimnɨ əwa ə? Mə kyerɨ wə̀d we nɨ àwɔ̀ yeʼ wɨwən. Àwɔ̀ yɨə Wə̀d Zeŋɨ we nɨ Ŋwìə̀ tomɨ.”

35Yeso nyaʼa ghàm əbɔʼ əzwî rɨbɔ̀ŋ ze ghà ni, “Kəm rəziə, jwɨ̀ rɨŋga məd!” Ənɨ əzwî rɨbɔ̀ŋ ze ə nyaʼa fə tum mbaŋə̀ ze ə si əkaʼ mɨ̀mə̌d, zɨə nyaʼa jwɨ̀, nɨ chəi zɨə ghɨ əghəm ənɨ məd.

36Bə̂d mɨ̀jìm mbe nɨ nyaʼa əŋgu nyaʼa yiirɨ, əne ghà mbənə mbənə ni, “À kɨ ɨkwɨ ɨŋgam ye wɔ̂ ə? Wɨ̀ berɨ ɨka nɨ gham əbɔʼ ɨzwî rɨbɔ̀ŋ mbɨ jwɨ̀ rɨŋga wə̀d!” 37Ɨnû ɨmbə̀ʼ əməd nyaʼa jàŋ ɨŋga ɨsɨ jìm mbe nɨ nyaʼa ɨban ɨban.

Yeso nyaʼa vɨ̀ bə̂d mɨ̀nɔnɔʼ

(Mt 8.14-17; Mk 1.29-34)

38Yeso nyaʼa nɔ̀ʼ sàŋ nəb ə̀kàtɨ̀ ze, wò nyɨ ɨŋga nəb Saimòn we nɨ nyaʼə ə̀mə̀ə̀nɨ̀-ɨnû məd. Nyɔ̂ Saimòn wɨə nyaʼə wɔ̀nə̀ mbɨ ɨfə ka ka, əne mbɨ nyaʼa buʼ ɨbɔ əmbɨ Yeso ni wɨ̀ vɨ əməd. 39Wɨ̀ nyaʼa wò təm ɨban əbàʼ ze, ghàm əbɔʼ ɨfə we. Ɨfə we nyaʼa sàŋ əməd. Àmei əwu əwən wɨ̀ nyaʼa nɔ̀ʼ nàʼ əghɨjɨg əmbɨ mɨ̀mə̌d.

40Ənɨ nyùmə̀ nyaʼa sɨə wo nyɨ ɨkòb, bə̂d mɨ̀jìm mbe nɨ nyaʼa berɨ bə̂d nɨ nyaʼə wɔ̀nə̀ tɨkwɨrɨ əwɔn jìm, nyaʼa nɨŋ bə̂d əwɔn mbe wò əsɨ məd. Wɨ̀ nyaʼa zab mbi ɨbɔ ɨgun mɨ̀mə̌d, vɨ mɨ̀mə̌d. 41Ɨzwî rɨbɔ̀ŋ nyaʼa bə̀ jwɨ̀ rɨŋga bə̂d mɨ̀nɔnɔʼ. Mbɨ nyaʼə kyeŋə ghàə̀ ni, “Àwɔ̀ yɨə Wan Ŋwìə̀!” Àyɨə wɨ̀ nyaʼa ghàm əbɔʼ mɨ̀mə̌d. Chəi wɨ̀ nyaʼa ben ni mbɨ ghàmə̀, ɨmbə̀ʼ ɨghəm nɨ mbɨ nyaʼa kyerɨ ni məd yɨə Wə̀d we nɨ Ŋwiə̀ zɔʼɔ.

Yeso nyaʼa ghà ɨŋgam Ŋwiə̀ ɨŋga nəb rɨ ə̀kàtɨ̀

(Mk 1.35-39)

42Ənɨ ɨtuʼ nɨ nyaʼa chɨgɨ, wɨ̀ nyaʼa nɔ̀ʼ rə̀zìʼ wi wò əsɨ nɨ chəi nyaʼa bə̂d əŋgu. Bə̂d mbe mbɨə nyaʼə kə̀b əməd. Ənɨ mbɨ nyaʼa zə əməd, mbɨ nyaʼa wò kɔɔrɨ. Əne chəi mbɨ nyaʼa ben ni wɨ̀ wɨrɨ sàŋ əwən. 43Àyɨə, wɨ̀ nyaʼa ghà əmbɨ mɨ̀mə̌d ni, “Mə berɨ bɨ gha ɨkə̂n chɔ̀m ɨmbə̀ʼ ənû ɨfɔ̀n ə Ŋwiə̀ ɨŋga ɨsɨ cherə, ɨmbə̀ʼ ɨghəm nɨ à yɨ ɨmbə̀ʼ ənû ɨfɔ̀n zɔ̂ nɨ Ŋwìə̀ nyaʼa tom əmɨ.”

44Əne wɨ̀ nyaʼa wò kɔ ghanə ghà ɨŋgam Ŋwiə̀ ɨŋga nəb ə̀kàtɨ̀ te rɨ ə Jùdeyà.

Currently Selected:

Lk 4: mgo

Highlight

Copy