Lk 20

Ɨbiirɨ ɨmbə̀ʼ wə̀d we nɨ naʼ ɨka əmbɨ Yeso

(Mt 21.23-27; Mk 11.27-33)

1À nyaʼa əni ə mɔʼɔ ənɨ Yeso nyaʼə chwi ɨnû ɨŋga mbàn Ŋwìə̀ bə̀ ghà ɨkə̂n chɔ̀m, bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ fɔrɨ bə̂d kyeŋ mbe rɨŋga əbeŋ nyaʼa wò 2ghà ɨ bɔ ni, “Gha ɨ na. À kɨə we naʼ ɨka ɨ ne ni à ghɨ ɨnû mbɔ̂ ə? À kɨə we naʼ ɨka wɔ̂ ɨ ne ə?”

3Wɨ̀ nyaʼa wììrɨ̀ əmbɨ mɨ̀mə̌d ni, “Mə bɨrɨ bɨ biirɨ ənû mɔʼɔ ɨ nən. Mbə̀ gha ɨ num. 4À kɨə Ŋwìə̀ nyaʼa naʼ ɨka əmbɨ Jɔ̌n ni wɨ̀ nàʼ mɨnib kɨ̀ à kɨ̀ ə bə̂d ə?”

5Mbɨ nyaʼa zu əne, kɔ ghambɨ mbənə mbənə ghàə̀ ni, “Tɨ̀ mɨ ghà ni, 'À yɨə Ŋwiə̀,' wɨ̀ bɨrɨ biirɨ ɨ na ni, 'À nɨə yeʼ əne, njɨ chəi mbə̀ nyaʼa ben əməd ɨmbə̀ʼ ə ye ə?' 6Tɨ̀ mɨ bə̀ ghà ni, 'À yɨə bə̂d,' bə̂d mbɔ̂ mɨjìm bɨrɨ tumbɨ əwa ənɨ əti, ɨmbə̀ʼ ɨghəm nɨ mbɨ ben ni Jɔ̌n yɨə nyaʼə wə̀d ɨ̀kə̀n Ŋwìə̀.”

7Əne mbɨ nyaʼa wììrɨ̀ ni, “Chəi tɨ̀ kyerɨ əsɨ ze nɨ wɨ̀ nyaʼa nɨŋ ɨka rəŋgu.”

8Yeso nyaʼa bə̀ sɨ ghà əmbɨ mɨ̀mə̌d ni, “Chəi mə bɨrɨ bɨ gha wə̀d we nɨ naʼ ɨka ɨ num ni mə̀ ghɨ ɨnû mbɔ̂.”

Ənû ə mɨgɨ ɨmbə̀ʼ bə̂d nɨ nyaʼa yim mbeŋ vaìn

(Mt 21.33-46; Mk 12.1-12)

9Yeso nyaʼa kɔ gha ənû ə mɨgɨ zɔ̂ əmbɨ ə bə̂d mbe ni, “Wə̀d mɔʼɔ nyaʼa kon i mbeŋ vaìn, nàʼ mbeŋ ze əmbɨ ə bə̂d mɔʼɔ ni mbɨ yim fàʼ ɨŋga. Wɨ̀ nyaʼa nàʼ əne, nɔ̀ʼ wo ɨŋga əbeŋ ə cherə pè chub əŋgu ənɨ əgha ə se. 10Ənɨ nyùmə̀ nyaʼa kuʼu nɨ kwəŋ rɨtam vaìn te, wɨ̀ nyaʼa chà i wə̀d ə̀fàʼì əmbɨ ə bə̂d mbe nɨ nyaʼa yim mbeŋ ze ni mbɨ naʼ tɨtam mɔʼɔ ɨ ni. Àyɨə bə̂d mbe nɨ nyaʼa yim mbeŋ ze nyaʼa som wə̀d ə̀fàʼì we, chà əməd rəbɔʼ ɨbɔ-ɨbɔ. 11Wə̀d we nɨ nyaʼa berɨ mbeŋ ze nyaʼa yì chà wə̀d ə̀fàʼì cherə, àyɨə mbɨ nyaʼa bə̀ som əməd, naʼ tɨ̀nìd ətu ɨ bɔ, chà əməd rəbɔʼ ɨbɔ-ɨbɔ. 12Wɨ̀ nyaʼa yì chà we nɨ nyaʼa pe ənɨ mbɨ tad. Mbɨ nyaʼa tòʼ ətu əmbɨ we, chɨ̀ əməd rɨŋga mbeŋ ze màʼ ɨsɨg. 13Wə̀d we nɨ nyaʼa berɨ mbeŋ ze nyaʼa ghà ni, 'Mə kɨə wo ghɨ̀ ye ə? Mə bɨrɨ tom mɨ wan nɨ mə̀ ghaʼi kwàʼ rɨŋgəʼ, ɨghə̀m mbɨ bɨrɨ wumnɨ əməd.' 14Àyɨə ənɨ bə̂d mbe nɨ nyaʼa yim mbeŋ ze nyaʼa zə wan we, mbɨ nyaʼa ghà mbənə mbənə ni, 'À yɨ əjɨnəb məd wɔ̂. Tɨ̀ zwiirɨ əməd ɨmbə̀ʼ ɨghɨ məd sɨ yeʼ mba.' 15Mbɨ nyaʼa ghà əne chɨ̀ əməd rɨŋga mbeŋ ze màʼ ɨsɨg zwiirɨ.

“Mbə kɔn əzən ni wə̀d we nɨ berɨ mbeŋ ze kɨə wo ghɨ ye mbɨ mɨ̀mə̌d ə? 16Wɨ̀ bɨrɨ wo zwiirɨ bə̂d mbe nɨ nyaʼa yim mbeŋ ze, sɨ nàʼ mbeŋ ze əmbɨ ə bə̂d cherə.”

Ənɨ bə̂d mbe nyaʼa zu ənû zɔ̂, mbɨ nyaʼa ghà ni, “Tɨ Ŋwìə̀ ben i!”

17Àyɨə Yeso nyaʼa nèŋ mɨ̀mə̌d ghà ni, “Əton ənɨ Ɨŋgam Ŋwiə̀ wɔ̂ kɨ ni ye ə?

'Ɨti we nɨ məbɔmɨ nəb nyaʼa tonɨ,

fə bèŋ ənɨ ɨti rɨ ɨbu nəb.'

18Wə̀d jìm we nɨ gu ɨgwɨ ɨti wɔ̂ bɨrɨ sopə tɨkə rɨkə. Ɨti we mɨ bə̀ feŋ ɨgun ə wə̀d mɔʼɔ, wɨ wɔ̀ʼ əməd.”

Ɨbiirɨ ɨmbə̀ʼ ənû nɨ maʼ mɨ̀tagsɨ̀

(Mt 22.15-22; Mk 12.13-17)

19Məchwiə̀ rɨ̀kə̌ mbɨ ə bə̂d kyeŋ mbe rɨ ə mbàn Ŋwìə̀ mbɨə nyaʼa kə̀b ni njɨ mbə gywɨ̀ ə Yeso ənɨ nyùmə̀ we, àyɨə ɨ mbɨ nyaʼə bɔə ni bə̂d bɨrɨ bu əchɔb. Ɨ mbɨə nyaʼa kəb gywɨ̀ əməd ɨmbə̀ʼ ɨghəm nɨ mbɨ nyaʼa kyerɨ ni ɨ wɨə nyaʼə ghà ənû ə mɨgɨ ze ɨmbə̀ʼ əwən. 20Mbɨ nyaʼa kɔ kəb əpan nɨ gywɨ əməd. Əne mbɨ nyaʼa chà mɨ̀-ànàŋgɔŋ, nɨ nyaʼa begrɨ ɨghabɨ ni mbə yɨə bə̂d rəsìʼ, ni mbɨ wo zɨ̀ ətam gywɨ̀ əməd ənɨ ɨŋgam məd. Mbɨ nyaʼa ghɨ̀ əne ɨmbə̀ʼ mbɨ gywɨ̀ əməd wò nàʼ əmbɨ gɔmnà ni wɨ̀ saʼ əməd ɨmbə̀ʼ ɨghəm nɨ à yɨə gɔmnà nyaʼa berɨ ɨka ɨgwɨ mɨ̀mə̌d mɨjìm. 21Mɨ̀-ànàŋgɔŋ mbe nyaʼa pè biirɨ ɨ bɔ ni, “Əchwiə̀-ɨnû, tɨ̀ ə kyerɨ ni à wɨə ghà ɨnû bə̀ chwi ɨnû ɨchî nɨ kuʼnɨ. Chəi àwɔ̀ ə ghɨ̀ ɨghə, àyɨə à wɨə chwi rəsìʼ ɨmbə̀ʼ ɨchî nɨ Ŋwìə̀ kəbɨ ni bə̂d chubɨ. 22Tɨkə ə wa chwiə ni tɨ̀ maʼ mɨ̀tagsɨ̀ əmbɨ Kaisà, kɨ̀ chə ə?”

23Yeso nyaʼa kyerɨ əbekɨ mɨ̀mə̌d, əne wɨ̀ nyaʼa ghà əmbɨ mɨ̀mə̌d ni, 24“Mbə̀ chwi ɨkab ətənɨ mɔʼɔ ɨ num.” Mbɨ nyaʼa chwi ɨ bɔ. Əne wɨ̀ nyaʼa biirɨ əmbɨ mɨ̀mə̌d ni, “Ɨfě wɔ̂ mbɨ ɨkum wɔ̂ kɨ wɨ̀ we?”

Mbɨ nyaʼa wììrɨ̀ ni, “À yɨ wɨ Kaisà.”

25Wɨ̀ nyaʼa ghà əmbɨ mɨ̀mə̌d ni, “Əne mbə̀ naʼ ɨghɨ Kaisà əmbɨ Kaisà, bə̀ nàʼ mbɨ Ŋwiə̀ əmbɨ ə Ŋwiə̀.”

26Chəi ɨchî nɨ tɨ̀ mbɨ nyaʼa yim əməd ɨfě bə̂d ɨmbə̀ʼ ɨŋgam we nɨ wɨ̀ nyaʼa ghamɨ, àyɨə mbɨ nyaʼa yiirɨ ɨchî nɨ wɨ̀ nyaʼa wiirɨ ɨŋgam we, əne chəi mbɨ nyaʼa wɨrɨ berɨ ənû nɨ ghà.

Ɨbiirɨ ɨmbə̀ʼ ənû nɨ zwemə

(Mt 22.23-33; Mk 12.18-27)

27Mɨ̀Sadusiî mbɨə nyaʼə ghàə̀ ni chəi bə̂d bɨrɨ zwemə. Əne mbɨ mɔʼɔ rəbɔʼ mɨ̀mə̌d nyaʼa wò əsɨ Yeso 28pè biirɨ ɨ bɔ ni, “Əchwiə̀-ɨnû, Mose nyaʼa ŋwàʼnɨ̀ ɨ na ni aŋgɔb mbaŋə̀ mɔʼɔ nɨ berɨ əyi mɨ kwɨ nɨ chəi bɔn, mbaŋə̀ ze berɨ nɨŋ ɨku əyi we gywɨ bɔn mbɨ məd, nɨ bɨrɨ yeʼ bɔn aŋgɔb məd we nɨ nyaʼa kwɨ. 29Tɨ̀nîn, bɔŋgɔb mbaŋə̀ mɔʼɔ sambe nyaʼa əŋgu. Wɨ̀ rɨtu nyaʼa nam əyi kwɨ nɨ chəi bɔn. 30We nɨ nyaʼa beenɨ 31mbɨ we nɨ nyaʼa pe ənɨ mbɨ tad nyaʼa nam ɨku əyi we. À yɨ əndəŋ əndəŋ nɨ mɨ̀mə̌d mbe sambe nyaʼa kwɨ nɨ chəi mbɨ gywɨ bɔn. 32Əyi we nyaʼa bə̀ sɨ nwìə̀ kwɨ. 33Ənɨ bə̂d bɨrɨ zwemə, əyi we kɨə wo yeʼ ɨwi we ɨchî nɨ mɨ̀mə̌d mbe sambe nyaʼa nam əməd ə?”

34Yeso nyaʼa wììrɨ̀ əmbɨ mɨ̀mə̌d ni, “Ɨghəm bə̂d wɔ̂ rɨ̀nîn wɨə namə, mbɨ bə̀ nàʼə̀ mbə bɔn ə nəb ɨnamɨ. 35Àyɨə chəi bə̂d mbe nɨ kuʼ nɨ zwemə, əne chub ənɨ ə nyùmə̀ we nɨ bɨrɨ yeʼe, bɨrɨ nam kɨ̀ bè nàʼ bɔn ə nəb ɨnamɨ. 36Chəi mbɨ bɨrɨ wɨrɨ kwɨ ɨmbə̀ʼ ɨghəm nɨ mbɨ yɨ əndəŋ əndəŋ mbɨ mbɨ̀aŋgɨrə̀. Mbɨ yɨə bə̀ ə bɔn Ŋwiə̀ ɨchî nɨ mbɨ zwemə. 37Mose nyaʼa chwi ni bə̂d mbɨə zwemə ɨŋga əsɨ ə̀ŋwàʼnɨ̀ ze nɨ gha ɨmbə̀ʼ ɨchî nɨ ətud ə nyaʼə fɨə, ənɨ wɨ̀ nyaʼa tɔŋ Ə̀nùŋɨ̀sɨg ni məd yɨə Ŋwìə̀ Abràham, Ŋwìə̀ Aizìk mbɨ Ŋwìə̀ Jakɔ̂b. 38Əne yɨ ni, ka məd yɨ i Ŋwìə̀ ɨvɨ bə̂d. Məd yɨə Ŋwìə̀ bə̂d mbe nɨ yeʼ ɨkǎ. Bə̂d mɨjìm mbɨ ɨkǎ ɨmbə̀ʼ əməd.”

39Məchwiə̀ rɨ̀kə̌ mɔʼɔ nyaʼa zu əne ghà ni, “Əchwiə̀-ɨnû, à fə ghàm ɨchî chɔ̀m!” 40Chəi wə̀d mɔʼɔ nɨ tɨ̀ wɨ̀ nyaʼa wɨrɨ yim fîŋ biirɨ ənû ə mɔʼɔ ɨ bɔ.

Ɨbiirɨ ɨmbə̀ʼ Wə̀d we nɨ Ŋwìə̀ zɔʼɔ

(Mt 22.41-46; Mk 12.35-37)

41Yeso nyaʼa biirɨ əmbɨ mɨ̀mə̌d ni, “Mbɨ kɨə ghàə̀ ni Wə̀d we nɨ Ŋwìə̀ zɔʼɔ yɨə wan tɨ ənɨ əghaŋ ə Dèvîd rɨ ye ə? 42Dèvîd ziə nyaʼa ŋwàʼnɨ̀ ɨŋga ə̀ŋwàʼnɨ̀ ə mɨ̀Sâm ni,

'Ə̀nùŋɨ̀sɨg nyaʼa ghà əmbɨ mɨ Ə̀nùŋɨ̀sɨg ni,

Chub ənɨ mɨ əbɔ ə jɨgɨ,

43pè ənɨ mə nuŋ mbe bə̂d pə̀n

ənɨ ɨghɨ nɨ à bɨrɨ teerɨ mbe ɨwu ɨgun.'

44Dèvîd mɨ yeʼə tɔŋ əməd ni Ə̀nùŋɨ̀sɨg, wɨ̀ sɨ wɨrɨ yeʼ wan tɨ ənɨ əghaŋ əməd rɨ ye ə?”

Yeso nyaʼa patɨ bə̂d dè məchwiə̀ rɨ̀kə̌

45Yeso nyaʼa ghà əmbɨ mbi mə̀mə̀ə̀nɨ̀-ɨnû ənɨ bə̂d mɨjìm nyaʼə zuə ni, 46“Mbə̀ we əwən ɨmbə̀ʼ məchwiə̀ rɨ̀kə̌. Ɨ mbɨə ghaʼə nɨ zɨ ngywɨ̌ rɨ se ghanə yènə̀ mbɨ rɨwən. Ɨ mbɨə bə̀ ghaʼə ni bə̂d chaʼrɨ əwən mbɨ ɨwumnɨ ɨŋga mɨ̀wǐn. Mbɨ ghaʼ nɨ chub ɨgun ɨtən mbe nɨ yeʼ ɨfě ɨŋga nəb tɨ ə̀kàtɨ̀, bə̀ ghaʼ ɨsɨ ɨwumnɨ ənɨ bə̂d kaʼ ɨchwɨ̂. 47Ɨ mbɨə tambɨə mɨku əyi ɨmbə̀ʼ fe ɨghɨ mɨ̀mə̌d. Mbɨ mɨ nɨə ghɨ̀ əne, mbɨ sɨ bègrɨ̀ kɔ̀ŋgɨ̀ ə Ŋwiə̀ ənɨ əgha ə se. Ŋwìə̀ bɨrɨ zɨ ɨsaʼi nɨ che əbɔ ɨgwɨ mɨ̀mə̌d.”

Currently Selected:

Lk 20: mgo

Highlight

Copy