Lk 17

Ənû nɨ waʼ ɨnû rɨbɔ̀ŋ

(Mt 18.6-7, 21-22; Mk 9.42)

1Yeso nyaʼa ghà əmbɨ mbi mə̀mə̀ə̀nɨ̀-ɨnû ni, “Ɨnû mbe nɨə ghɨ̀ ni bə̂d ghɨ ɨnû rɨbɔ̀ŋ berɨ yeʼe, àyɨə ŋgəʼ bɨrɨ nyɨ ɨgun ə wə̀d we nɨ ɨnû mbe chè ənjìm məd yeʼe! 2Zɨə bɨrɨ bɔ̀ŋ ni mbɨ tiŋ ɨti ŋgə̀ŋ ədɔʼ ɨ bɔ wò màʼ əməd ɨŋga rɨ̀bàà, chè ɨchî nɨ tɨ mbɨ sàŋ ni wɨ̀ ghɨ̀ wan kwa mɔʼɔ rəbɔʼ mbɔ̂ ghɨ ənû rɨbɔ̀ŋ. 3Mbə̀ we əwən!

“We aŋgɔb mɨ ghɨ̀ ənû rɨbɔ̀ŋ, à ghàm əbɔʼ məd. Wɨ̀ mɨ bèŋ i fîŋ, à waʼ ɨnû rɨbɔ̀ŋ məd. 4Wɨ̀ mɨ ghɨ̀ ənû rɨbɔ̀ŋ ənɨ ə ne ɨghəm sambe ɨgwɨ əni, bə̀ yeʼe ghà ɨ ne ɨghəm sambe ni, 'Mə fə beŋ mɨ fîŋ, waʼ mbɨ ɨnû rɨbɔ̀ŋ,' à berɨ waʼ ɨnû rɨbɔ̀ŋ məd.”

Ənû ɨmbə̀ʼ ɨbenɨ

5Bə̂d tom Ə̀nùŋɨ̀sɨg nyaʼa ghà ɨ bɔ ni, “Ghɨ ni à ɨbenɨ kaanə!”

6Ə̀nùŋɨ̀sɨg nyaʼa wììrɨ̀ əmbɨ mɨ̀mə̌d ni, “Mbə mɨ kəʼ berɨ ɨbenɨ nɨ kə ɨghabɨ sǎm ə̀wɔ̀mɨ, njɨ mbə mbe tɨ mbə̀ ghà əmbɨ əzed ə sikamò zɔ̂ ni, 'Chɔʼ rɨ ə si wò kon e ɨŋga rɨ̀bàà,' əne zɨə bɨrɨ zuunɨ əwən.”

Ətu ə̀fàʼì wə̀d ə̀fàʼì

7“Tɨ̀ wə̀d mɔʼɔ rəbɔʼ nən, nɨ berɨ i wə̀d ə̀fàʼì nɨə niʼ ɨbən kɨ̀ nɨə nə̀ŋgɨ ə njɨ̀g, nɨ bɨrɨ gha ɨ bɔ ənɨ wɨ bə̀ndɨ̀ rɨ ə mbeŋ ni, 'Zambɨ yeʼe jɨg ə'? 8Ka wɨ̀ wa bɨrɨ ghà i ɨ bɔ yeʼ ni, 'Tekɨ mbɨ ɨghɨjɨg rɨ ɨkwirɨ, bə̀ tekɨ e ɨnyod yeʼe nàʼ ɨghɨjɨg mbe ɨ num pè ənɨ mə fə jɨg bə̀ nɔ. Mə nɨə fə jɨg bə nɔ, à sɨ bə̀ wò jɨg e bə̀ nɔ e ə?' 9Ɨ wɨə wa nàʼə̀ məben-əwe əmbɨ wə̀d ə̀fàʼì we ɨmbə̀ʼ ɨghəm nɨ wɨ̀ ghɨ ənû ze nɨ wɨ̀ gha ɨ bɔ ə? 10À yɨ əndəŋ əndəŋ mbɨ nən. Ənɨ mbə̀ fə ghɨ̀ ɨnû jìm mbe nɨ mbɨ gha ɨ nən, mbə̀ gha ni, 'Tɨ̀ yɨ àmei bə̂d ə̀fàʼì. Əne tɨ̀ fə ghɨ̀ yeʼ ɨnû mbe nɨ tɨ̀ berɨ nɨ ghɨ̀.'”

Yeso nyaʼa vɨ̀ mbaŋə̀ wum nɨ nyaʼə wɔ̀n əpabɨ

11Ənɨ Yeso nyaʼə wò ə Jèrusalèm, wɨ̀ nyaʼa chè ɨŋga mɨgharə̀ Sàmàriyà mbɨ Galiliî. 12Ənɨ wɨ̀ nyaʼa wò nyɨ ɨŋga əsɨ ə mɔʼɔ, mbaŋə̀ wum nɨ nyaʼə wɔ̀n əpabɨ nyaʼa wò kumnɨ əməd. Mbɨ nyaʼa təm əsa əgha 13kyeŋ rɨ̀kǎ ghà ni, “Yeso, masà, diirɨ əwa.”

14Ənɨ Yeso nyaʼa zə mɨ̀mə̌d, wɨ̀ nyaʼa ghà əmbɨ mɨ̀mə̌d ni, “Mbə̀ wo chwi ə ɨnyod əmbɨ ə bə̂d mbàn Ŋwìə̀.”

Ənɨ mbɨ nyaʼə wòə̀, əpabɨ ze nɨ nyaʼa ɨgun mɨ̀mə̌d ə nyaʼa mì. 15Ənɨ wɨ̀ fibɨ̀ rəbɔʼ mɨ̀mə̌d nyaʼa zə ni i ɨnyod fə zeŋ i, wɨ̀ nyaʼa bə̀ndɨ̀ wò rəbɔʼ, yènə̀ yiirɨ ə Ŋwiə̀ ənɨ gɨ̂ nɨ kǎ 16pè gù ɨban ɨwu Yeso, nàʼ məben-əwe ɨ bɔ. Mbaŋə̀ ze yɨə nyaʼə wə̀d rɨ ə Sàmàriyà. 17Yeso nyaʼa biirɨ ni, “Ɨmbə̀ʼ à yɨə mbaŋə̀ wum nɨ mə kəʼ ghɨ̀ əpabɨ ə mì rɨ ɨgwɨ mɨ̀mə̌d ə? Mbɨ əbuə mbi ə? 18Chəi wɨ mɔʼɔ nɨ bə̀ndɨ̀ yeʼe yiirɨ ə Ŋwiə̀ chè rɨ ənɨ wə̀d rɨ̀sɔ̀ʼɔ̀ wɔ̂ ə?” 19Wɨ̀ nyaʼa ghɨ̀ əne ghà əmbɨ ə mbaŋə̀ ze ni, “Nɔʼ rətiə, wò e. E ɨbenɨ fə ghɨ̀ ni à bɔtɨ e.”

Ənû ɨfɔ̀n ə Ŋwiə̀ ə fə sɨ i əkaʼ ə bə̂d

(Mt 24.23-28, 37-41)

20Mɨ̀Farisiî mɔʼɔ nyaʼa biirɨ ə Yeso ɨmbə̀ʼ ə nyùmə̀ we nɨ ənû ɨfɔ̀n ə Ŋwiə̀ ə bɨrɨ yeʼe. Wɨ̀ nyaʼa wììrɨ̀ əmbɨ mɨ̀mə̌d ni, “Chəi ənû ɨfɔ̀n ə Ŋwiə̀ ə bɨrɨ yeʼe mbɨ ɨnweenɨ nɨ bə̂d bɨrɨ zə. 21Chəi wə̀d mɔʼɔ bɨrɨ gha ni, 'Zə, əzɔ̂ əgha!' kɨ̀ ni, 'Ə zɨ ə yɨə!' ɨmbə̀ʼ ɨghəm nɨ ənû ɨfɔ̀n ə Ŋwiə̀ ə fə sɨ i əkaʼ nən.”

22Yeso nyaʼa yì ghà əmbɨ mbi mə̀mə̀ə̀nɨ̀-ɨnû ni, “Nyùmə̀ wɨə yeʼe nɨ mbə bɨrɨ kəb chub ka àbei əni ə mɔʼ mbɨ Wan Wə̀d, àyɨə chəi mbə bɨrɨ zə əmɨ ənɨ ə nyùmə̀ we. 23Bə̂d bɨrɨ yeʼe pè ghà ɨ nən ni, 'Mbə̀ neŋ ə yɨə!' kɨ ni, 'Mbə̀ neŋ əgha!' Tɨ mbə wò ə. Tɨ mbə̀ bɨ beenɨ ə əbɔʼ mɨ̀mə̌d. 24Ɨchî nɨ ɨbi mbə̀ŋ ə ŋwàŋə̀ teə rɨ əba ɨkaŋ ə fibɨ̀ wò pè ənɨ əzɨ cherə, yɨ bə̀ ɨchî nɨ Wan Wə̀d bɨrɨ wɨrɨ yeʼe. 25Àyɨə wɨ̀ bɨrɨ be zə ŋgəʼ ənɨ ɨnû nɔnɔʼ, ɨghəm bə̂d wɔ̂ ton əməd.

26“Ɨchî nɨ zɨə nyaʼa ənɨ ə nyùmə̀ Noà, yɨə bə̀ ɨchî nɨ zɨə bɨrɨ yeʼ ənɨ Wan Wə̀d bɨrɨ wɨrɨ yeʼe. 27Wə̀d jìm wɨə nyaʼə jɨgə bə̀ nɔə. Ɨ mbɨə nyaʼə namə bə̀ namnə mbə bɔn. Ɨ mbɨə nyaʼə ghɨ̀ əne wò pè əni ze nɨ Noà nyaʼa nyɨ ɨŋga əbaŋ ɨgyɨ̀ ze nɨ Ŋwìə̀ nyaʼa gha ɨ bɔ ni wɨ̀ tekɨ. Mɨnib nyaʼa kubrɨ ɨsɨ, zwiirɨ mɨ̀mə̌d mɨjìm.

28“Àyɨə bə̀ ɨchî nɨ zɨə nyaʼa ənɨ ə nyùmə̀ Lɔ̂t. Ɨ mbɨə nyaʼə jɨgə bə̀ nɔə. Ɨ mbɨə nyaʼə zon ɨghɨ bə̀ fendɨ ɨghɨ. Ɨ mbɨə nyaʼə kon ɨghɨ bə̀ bɔm ə nəb, 29àyɨə ɨgwɨ əni ze nɨ Lɔ̂t nyaʼa jwɨ rɨ ə Sodòm, ɨwid mbɨ sɔlfò nyaʼa nɔʼ rɨkaŋ zwiirɨ mɨ̀mə̌d mɨjìm. 30Àyɨə bə̀ ɨchî nɨ ɨnû bɨrɨ ghɨ̀ əni ze nɨ Wan Wə̀d wɨrɨ yeʼe.

31“Əni ze, tɨ wə̀d we nɨ yeʼ ɨdom nəb swiʼi ɨ wo nɨŋ ɨghɨ mbe nɨ yeʼ ɨŋga nəb məd. Əne bə̌, tɨ wə̀d we nɨ yeʼ ə mbeŋ wɨrɨ bə̀ndɨ̀ i rəbɔʼɔ. 32Mbə̀ kɔndɨ ənû ze nɨ nyaʼa ghɨ ənɨ ɨwi Lɔ̂t! 33Wə̀d mɔʼɔ we nɨə kə̀b nuŋ i ɨ̀tènɨ̀, bɨrɨ sam ɨ̀tènɨ̀ we, àyɨə we nɨ sam i ɨ̀tènɨ̀ bɨrɨ wɨrɨ jɨg ɨ̀tènɨ̀ we. 34Mə ghà ɨ nən ni ɨzimɨ we, bə̂d mɨbe bɨrɨ yeʼ ɨgun əbàʼ ə mɔʼ, mbɨ nɨŋ wɨ fibɨ̀ sàŋ wɨ fibɨ̀. 35Məyi mɨbe bɨrɨ yeʼə wɔ̀ʼ ə ŋgə̀ŋ ɨnɔ̂n, mbɨ nɨŋ wɨ fibɨ̀ sàŋ wɨ fibɨ̀.[ 36Mbaŋə̀ rɨ̀be bɨrɨ yeʼ ə mbeŋ, mbɨ nɨŋ wɨ fibɨ̀ sàŋ wɨ fibɨ̀.”]

37Mə̀mə̀ə̀nɨ̀-ɨnû mbe nyaʼa biirɨ ɨ bɔ ni, “Ə̀nùŋɨ̀sɨg, ənû zɔ̂ ə kɨ wo ghɨ ə yi ə?”

Wɨ̀ nyaʼa wììrɨ̀ əmbɨ mɨ̀mə̌d ni, “Əsɨ ze nɨ əvɨ ə nyam ə yeʼ əŋgu, mɨzam bɨrɨ wo fetɨ əŋgu.”

Currently Selected:

Lk 17: mgo

Highlight

Copy