Dua-blas enkam de zi hip de aïsïl 2

Alap mo Enhona kim hatakake:

1Yahudi mo yakla yala Pentakostanak#2:1 Paska hyanak yaklana 50kam naït gwibik, dekam zep Pentakostanak zauk gwek. Yahudi zini dekam gandum dansa de taran hyanak Alapsa man isrip-sri në gweblak. (Im. 23:15-21) kim zauk, dekam tïngare Yesussu de taïblïblan wenya aha-erenak lowe heꞌak. 2Mumuk ennak zep nglï nakore asese yala nasal gubluk. Gola men zëwe lowe heꞌak, zao zep hëndep tïl zïka. Man zë wal-wale gweka. 3Dekam zep zi mahal makare syauk hïtïn beyam-byana hla nulidak. Syauknu in hëndep zëno mae mo nol bol tahannak zep mawa mo kim ëzauk ine gweꞌanzak. 4Alap mo Enhona dekam zep ing gwe hebiridaka, dekam zep Alap zëre onakore sosonkam owas ola donbiꞌik– zëre mae mo tame gun srëm olkam.#Kis. 4:31; 10:44-46; 19:6; Mrk. 16:17

5Dekam Yahudi zini, dawemkam de Alapsa betek gwe-gweblan wenya, zen mes tïngare lang nakon yakla yala in hap Yerusalemk ëtagal gwesïk. 6-119 Lang bosem-sena in dekore zi ëtagal gwek–

Partia, Media, Elam,

Mesopotamia, Kapadokia, Pontus, Asia,

10 Prigia, Pamfilia, Mesir,

hen langna Libia mo ë yala Kirene mo ïrïk gïn ë-ë nakon,

hen ë yala Roma kon.

11a Ahakon hen lang tekna Kreta kon,

hen langna Arab kon.

Ahakon Yahudi mo ausu nakorena,

hen ahakon men zen aha zi ausu nakore zini Yahudi hon bïtï gwekke.

6 Zini in kim asese aukuna insa ësak, dekam zep anakare hap ëhlu-hluk gwezak, “An ba owas zë lwaꞌan?” Zen dekam zep auna ëhlozak: Sap zen zëre mae mo ë-ë nakore olkam de ëtorannak Alap mo Enho nabare wenya insa sane dabiꞌinzak. 7 Ëtenggwaran hap zep hëndep zënaka nenbiridak, “Zini an zen ëtonꞌan, zen sap tïngan Galilea kore zi. 8 Nen hwëna ba habe nëre mae mo olkam de tonbinnik sane labiꞌin? 11b Zen hwëna owas tangan hap am nëno mae mo olkam Alap mo owas syal gwe-gwibinni donbiꞌin!” 12Zen man tangan sërkam de tenggwanbiridan hap enlala nik topse neibiridaꞌak, “An ba hap ki zë lwaꞌan?”

13Ahakon hwëna man swrë dabik. Man nenbiridak, “In ho mamaksa de mamkam otdebin hip ki ëgwër.”

Petrus kim zi trana in hap srip gulsuzimkike:

14Petrus ki zep seblaskam de wal bose wal zem in han golëluk taka, zëna ki zep ol mam-mamkam zi trana insa tonbiridaka: “Aha lang nakore aya-wal oso-wal, hen tïngare Yerusalemk awe de lowehe gwen wenya, ëe anik srip gulsuzimk. Dawemkam ësane gwek. 15Zini an ho mamakna hom notdebir. Em bap kirekam kïl lïbir! Sap an nama kaknak– yakla nwena sembilannak. Kire jamnak ho mamakna hom notde gwibirin. 16Hwëna an Alap mo ol ayang gul gwen zini Yoel Bak mo ol gu-gun sun ki lwanan. Zen a kirekam mo gu-gukuye:

17‘Alap man gu-gubiridaꞌara,

“Aumwa hap de yaklanak, Ëe asa ëre mo Enhosa tïngare zi hip hlë ta sonezim.

Eno mae mo zi walasna hen wenam tol-tola hamal hap de olsa sa donbirida gwer.

Eno mae mo wal sei-siwiri nwena sa ëlirisin gwe-gwizim.

Hen eno mae mo bong-bongna abe hap dena eisirkim sa kara nul gwer.

18Hen sap bose srëm wenya men zen zi nik ëbabu gwe-gwenan, Ëe asa zëbe mae hap hen ëre mo Enhosa hlë ta sonezim–

sap wekam dena, hen sap zikim dena.

Zen hen dekam sa hamal hap de ola donbirida gwer.

19Ëe asa owas-owassa syal gwe-gwibir–

nglïnak hen kamanak, kalkam dena, syaukkum dena, hen ahakon butkam denaka.

20Yakla nwena sa kawesïk gwera,

hen benna zi kal mo kim sa kal-kal gwe-gwer.

Bian mo hatan yakla yala in de golek de gwenkam, kirekam sa lwa gwer.

21Dekam men zen de Biansa anakan dakenblaꞌak, ‘Asa Emki ngaya tan,’

zen zen sa ëngaya gwer.”’”#Yl. 2:28-32

22Petrus ki zep etan ayang gulzimki, “Israelk de zi, asa sane lak. Ena tawana: Nazaret walya Yesus hup Alap man owas-owasna syal gwe-gwibir-blika– em dikim anakan tame tan hap, ‘An Zen tangan– Alap zëre mo zer sonen Zi niye.’ 23Hwëna Alap, zëre mo hamal hap de enlala gwibin sin ki kirekam ebe mae hap tapbla tazimki. Hëndep em dekam zebe karek gol gwen zi niban apdenak te-lidak sonnak de makan ta irinkim lak. 24Hwëna juwen zi mo langnak kim sap ati gwe ineka, hwëna Alap dekon etan zeser soneka, dekam zep etan luwen taka. Sap Alap mo Tanena in, Zen bëjen hëndep denaban zëwe gwë gwen. 25Yesus hup dena Daud Bak mes ki hen anakarekam guku,

‘Ëe ama Biansa anakan tame tak,

Zen sa asa zergwë gwera.

Zen man asa dam taha nakon zerzauk sone gweꞌara,

ëe zep asa tatem zauk gwer.

26Ano enhona in zep sam gwesïk gwenda,

hen mipkam tërkam asa Alapsa isrip-sri gwe-gweblal.

Ëe hen ama ëre mo tim hip dena anakan taïblï gweblaꞌan, “Zen sa ano timni tïn hyanak ap ëse gulblula.”

27Sap asa men zao nër dwanuꞌak, Alap, Em molye zë asa da tasïkï.

Ere mo lalak Zini ano timni zëwe molya batrek.

28Sap em mese ngaya gwen hap de orana abe hap zertrëblaka.

Zep ëe kimë eno dang gwënnak hataꞌak,

sërkam tangan asa isrip-sri gwe-gwer.’”#Mzm. 16:8-11

29Petrus ki zep ayang gulzimki, “Aya-wal oso-wal, ëe damnak emsa nëre mae mo auyanna Daud Bak hap denaka gubiridaꞌan: Zen mes tïlkï, ki zep nër dwanuk. Men zao nër dwanuk, zen nama hëndep angkam nëre mae mo ngïrïnnïk lwaꞌan. Zep Daud mo ola in, batren srëm hap dena, zen zëre hap hom ki guku. Zen hwëna Auyan-tane zem Yesus hup ki gu-guku. 30Daud in hen Alap mo olsa de ayang gul gwen hap de zi, hen Alap mes ki desa anakan gu-guk gweblaka, ‘Eno ïrïk gïnnï ere mo auyan-tane hap asa golblal.’#2Sam. 7:12 31Zen ngein sin dep nësa de ngaya tabin hip de Zi hip dena mes tame gulku, zep zëbe hap dena anakan hamal hap gu-guku, ‘Alap molya Desa drë nwanunnak da tasïkï, hen zëno timni molya zëwe batreblak.’ 32Zep eiwa mes tangan dam gwesïnïn: Yesus Zen Zen! Alap mes Desa tïn nïkon etan ngaya taka. Aena mesë kïtak hla lak. 33Zen angkam Alap mo dam taha nakon teipsïnkïm nikinꞌira, hen Alap mes zëre mo Enhona zëbe hap zerblaka. Zen in zep hen Desa abe mae hap namen an hlë ta sonezimnira– in kirekam ena asa kara labiꞌin hen sane labiꞌinye. 34-35Sap Daud Bak zëna hom ngatan zi mo lang san dep sewe seka. Hwëna zen man Teipsïn nïka dan ake seka. Zep anakan guku,

‘Bian Alap ano Teipsïnnï man gubluka,

“Ëre mo dam taha nakon emki nikirin– dekon de hen teipsïnkïm ïrïk gïn hïp.

Ki asa hwëna ebe hap de jal zini ere mo tana ïltïkïnnïk sisik gulin.”’#Mzm. 110:1

36Zen in zep, Israelk de zi, emki dam taha nakon de nikirin Zini insa tame tan. Yesussu, men Desa ena te-lidak sonnak makan la inkke, Zen Desa Alap teipsïnkïm drë neka. Zen in Zen– nësa de ngaya tabin hip de Zi niye!”

37Petrussu in kim kirekam sane daꞌak, zëno ola in man tangan zëno mae mo enhonak tïsïk. Dekam zep Petrussu zëre mo wal bose walya in han dakensibiridak, “Aya-wal oso-wal, ëe ki basa asa syal eibir?– Alap dikim etan asa sam gwesibiridan hapye.”

38Petrus ki zep ding gulzimki, “Em ëhalek! Dekam ëe asa emsa kïtak Kristus Yesus mo bosekam baptis labir. Dekam sa Alap eno mae mo karek-karekna tap gulsuzimdi. Zen dekam sa hen zëre mo Enhona ebe mae hap hlë ta sonezimdi. 39Zëre mo Enhosa de hlë ta sonezimdin hip dena mensa Alap gu-gubiridaka, zen hwëna nëbe mae en hap hom. Hwëna tïngan men desa Alap Kristussu de taïblïblan hap dam tasibiꞌinka, zen hen zëbe mae hap– sap eno mae mo walas, aza-tane wal, hen sap langanak de zi ausu, hëndep lang topse gwennak dena.”

40Kirekam-kirekam ol zïm-zïmkïm zë tonbirida gweꞌanka. Hen dekam de ëhalen hap anakan tïtï ta gwibiꞌinka, “Ëngaya gwen hap de ëdwam gwenna, karek-karek gulin hana gwen zi nikon emki ëwet so gwen.” 41Men zen Petrus mo ola in kon ëhalek, desa dekam zep baptis dabik. Yaklana inkam in zen Yesussu daïblïblak, beyana san ha tiga ribu enkam mes yap.

Yesussu de taïblïblan wenya kim aha-ere enlalakam lowehe gwekke:

42Men zen Yesussu daïblïblak, dekam dua-blaskam de zini in mo tawa tabinnik isrip-sri naban ëtagal gwe-gwek. Zen gol-gol san aha-ere enlala naban hen tagal gwenda gwek– dekon de Alapsa abe ta gwen hap, hen Bian Yesussu de enlala gweblan hap de rotisa twenblanda gwen hap, hen zep de anggursu otde gwibin hip. 43Dekam dua-blaskam de dam tasibin zini in owas-owasna beya tangankam syal neibirida gwek, zep dekam kïtak man denggwanbirida gwek. 44Zen kïtak aha-erenak lowehe gwek, hen zëre mae mo kire-kirena apdekam bi nëblanda gwek. 45Ahakon zëre mae mo kamana hen kire-kirena te-ala hap lirak da gwibik. Te-alana desa tahalha wenya kip kap da gwizimk. 46Hen dekam Alap mo golak mwin-mwankam ëtagal gwe-gwek– dekon de Alapsa gu sone gweblan hap. Zëre mae mo gol-gol san hen apdekam isrip-sri naban tembane tanda gwek. Zëno mae mo enlalana dekam Alap en mo bosesa de 47teip gulsublun en hap lwa gwizimki. Dekam tïngare zini man sam neisibirida gwek. Hen Bian mwin-mwankam zini zëbon mae de bïtï gwen hap mas-mas gul gweka– Zëna men desa ëngaya gwen hap dam tasibirkike.#Kis. 4:32-35

Currently Selected:

Dua-blas enkam de zi hip de aïsïl 2: ury

Highlight

Copy