Matiu 4

1Ate Wen Chiika yaa jam dɛ Yeezu niŋ a ta wa cheŋ ga jo sagni po, ayen jabioku a nye wa nya. 2Yeezu yaa jam bobi nɔi a paari daa pisinaansi, ate kom yaa jam ta wa nna yegayega. 3Jabioku yaa jam wa jigi a weeni wa ayen, <<Fi dan sum ka Wen Nidoabili, bɛ nye ate tintanaŋa dɛ a chim boroborok a te fu.>>

4Yeezu yaa tulisi ayen, <<Ba ŋmarisi Wen gbaŋka po kama ayen, <Nurubiik an boro ka ŋandiinta nyiini nyiŋŋa, alege wa boro ka wari dii meena ale a nyini Wen nɔi po a nyini la nyiŋ.> >> (Teerika 8:3)

5Jabioku yaa ŋman ta Yeezu cheŋ tɛŋ weleŋka a ta wa ga jueli zaani Wen yenni zukparukku 6yaa weeni wa ayen, <<Fi dan ka Wen Nidoabili, yɔk nyini dela a zi tɛŋ, ale ku ŋmarisi kama ayen, <Wa le weeni wa maarɔma baai ale gilim fu la, ba le zak fu ta nisa po ate fi kan pai fi naŋ a nak tintain ya.> >> (Yiila 91:11-12)

7Yeezu yaa ŋman tulisi wa ayen, <<Ba ŋmarisi Wen Gbaŋka po mɛ kama ayen, <Kan nye Naawen fi Wenni a nya.> >> (Teerika 6:16)

8Jabioku yaa ŋman ta Yeezu cheŋ ga jueli guuk woŋ zuk a yaa dak tɛŋzuk de naataŋa meena ale si nalimu a sak wa, 9yaa le ge weeni wa ayen, <<Fi dan siak ayen fi kpi duna tɛŋ mi niŋ a te mu zula, m le basi ate fi soa ŋantaŋa de meena.>>

10Yeezu yaa ŋman tulisi wa ayen, <<Sitaana, cheŋ du. Ku ŋmarisi ayen, <Fi puusi a te Naawen fi Wenni abe fi a tom a te wala nyiini.> >> (Teerika 6:13)

11Jabioku ale wom dii ate Yeezu a weeni la, wa yaa deri basi wa ale ge cheŋ. Wen yaa tom maarɔba ayen ba jam maari Yeezu.

12Yeezu ale wom ayen ba yik Jɔɔn a lik la, wa yaa yiti cheŋ ga jo Galili po. 13Yeezu yaa ga va Nazaret tɛŋka po a taam a ga bo Kapernaum tɛŋka, ate ka bo Zebulun ale Nafitali po a moata Galili nyakpiemu nɔi la. 14Yeezu jam cheŋ dula jigini kama ayen dii ate Wen biisiteerɔwa Azaya a ŋmarisi Wen Gbaŋka po la, a chim wensie. Wa jam ŋmarisi ka, 15<<Zebulun ale Nafitali wie ate si bo suik kuui ale a cheŋ nyakpiemu nɔi la. Si bo ka Jodan benni kauk kunkula, Galili po. Nuru baai ale jam bo dula la daa Juuba. 16Nuru baai ale jam bo legi kpien po la yaa nya bolim kpiem kama. Bolim yaa jam baai ale jam bo kum yisuŋ po la kama.>> (Azaya 9:1-2)

17A nyini da ŋala po a ta a cheŋ, Yeezu nyiem a jam kasim a sak nuruma kama ayen, <<Ni basi ni wabaataŋa abe ni ge va Wen wensie suiku. Wen naamu a moata kama.>>

18Yeezu ale jam bo Galili nyakpiemu nɔi a cheŋ la, wa yaa nya suata tiye, Simon ate ba a wi Piita la ale wa suoku Andiru ale ba za a yuk ba ŋmiak a basi nyiamu po diila ba jam ka jum yigrisa. 19Yeezu yaa weeni ba ayen, <<Ni jam va mi ate ni nye ate nuruba a va mi.>> 20Ba yaa deri pai ba ŋmaasaŋa a basi ale ge jueli a va wa ŋaaŋ.

21Wa le ŋman ga cheŋ magadek la, wa yaa ŋman nya suata tiye Zebedi nidoabinni Jeemsi ale wa suoku Jɔɔn. Ba le ba kowa a jam kala ka ba ŋaaruŋku po a laŋ ba ŋmaasaŋa. Yeezu yaa wi ba, 22ate ba me deri basi ba kowa ale ŋaaruŋku ale ge yiti a cheŋ ga va wa.

23Va ŋala po Yeezu kasim jam bo ka Galili po a nyeemu, ale a jo ba tuka diinaŋa po a sak nuruma Wen wamaŋsaŋa wie a weeni ba ayen, Wen naamu a moata kama. Wa jam maari a tebi nyiŋtuila ale tueta tɔgatɔga kama. 24Yeezu wie yaa jam waaŋ Siriya po meena. Kula a jam basi kama ate baai meena ale jam bo tɛŋ kala po la, a jam ta ba yuarɔba a jam wa jigi ayen wa tebi ba. Chichirik baata ale jam bo ba gela zuima po, ba gela a lo kpiŋkpinsa, ate mba me nisima ale ba naŋsa a jam kpi. Yeezu a jam tebi ba meena kama. 25Nuru boari yegayega yaa jam nyini Galili tɛŋka ale Jerusalem ale Judia ale Dekapolis tɛŋsaŋa ale tɛŋ sii meena ale bo Jodan benni kunkɔŋni la, meena a jam va Yeezu.

Currently Selected:

Matiu 4: BWU

Highlight

Copy