Luuk 16

1Wa yaa ŋman weeni wa ŋaaŋviirɔma ayen, <<Jigsirɔ ale jam boro a ta tomteerɔ, ate ŋmiŋmaasa yaa paari wa ayen nuruwa de kaasi wa ŋantaŋa kama. 2Jigsirɔwa yaa wi wa a bek ayen, <Ka boan jaab wari ate mi a wom a magsi chaab ale fi dila? Pai m ŋantaŋa meena a te mu, fi an ŋman baga a chim waai ale a nya m ŋantaŋa meena zuk la.> 3Tomteerɔwa yaa weeni wadek ayen, <M nyɔnɔwa a yaali ayen wa yiak mu kama tuimaŋa po. M be le nye ka sɛ? M be ka pagrim a kpa, chivie abe ta mu ase m nin nyiem a juisi. 4M seba m le m nye dii yɔgyɔgla de la, ate m dan jɔk m tuimaŋa abe m ta doaba baai ale ba nye m tia ase m nin cheŋ ba yeeŋa la.> 5Wa yaa wi nuru baai meena ale ta wa nyɔnɔwa pama la, ate ba jam wa nyɔnɔwa jigi a bek niŋ denɔwa ayen, <Fi ta m nyɔnɔwa pami ka dina?> 6Nuruwa yaa tulisi ayen, <M ta ka kpaam samɔnsa kook pami.> Wa yaa weeni wa ayen, <Pai fi pamini gbaŋka nwuli a ŋmarisi ka po ayen fi ta ka kpaam samɔnsa pisinu pami.> 7Wa ŋman pilim bek nuru wa choa dila dekdega, ate nuruwa tulisi wa ayen, <Mi ta ka ŋanbie busisa tusidi pami.> Wa ŋman pilim weeni wa mɛ ayen, <Wa ŋmarisi a nyo wa pamini gbaŋka po nwuli ayen wa ta ka ŋanbie busisa kobsinaaniŋ pami.> 8Kpagni yaa pak wa, wa korisika nyiŋ ayen tɛŋka po demma a korisi ale badek wie a gaam baai ale seba Wen kama. 9Dila nyiŋ, Mi a weeni kama ayen ni pai tɛŋzuk de jigsika a dɛ doata ale nuruba ate jigsika a dan kan boro, abe ba nye ni tia wenŋmazuk yeeŋa po.

10<<Nuru waai ale ta wensie wie fiisa zuk la, a ta wensie kama mɛ ale wakpiema. Waai mɛ abe ale kan ta wensie wie fiisa zuk la, a ka wensie mɛ ale wakpiema. 11Ni be dan ta wensie ale tɛŋzuk de jigsika, ka wana ale wa pai wensie jigsika a te fu? 12Ni be dan kan ta wensie ale nuru yoŋta ŋanta, ka wana ale wa pai ŋan baai ate fidek soa la a te fu? 13Tomteerɔ an baga a tom a te kpaga ŋaye, wa le kisa ka wanyi abe wa a yaali nwala yaase wa le va ka wanyi abe wa zɛri wanyi. Fi kan baga a tom a te Wen ale a yaali ligra.>>

14Farisiima ale wom nyaŋa de meena la, ba yaa nye wa a la dii nyiŋla, ba ka nuru baai ale a yaali ligra nna yegayega la. 15Yeezu yaa weeni ba ayen, <<Nama ka baai ale chim nuruba nimbie po ayen ba pai ni chim nuru maŋsa alege ka Wen nyiini ale seba ni suiniimaŋa po ale ka diila. Dii nyiŋla, wie ŋaai ate nurubiik a pai ŋa a chim wamaŋsa la, ŋa ka ŋaai ate Wen kisa la.

16<<Moosis Sinsaŋŋa ale Wen biisiteerɔma biisaŋa a jam boro kama a ta jam paari diipo ate Jɔɔn Sokateerɔwa a jam boro la, alege a zaani dipo, nuruba a kasim a wom Wen naamu wamaŋsaŋa sinsaŋŋa kama ate waai meena a fɛ ayen ba jo bu po. 17Ku le nye moali ate wenŋmazuk ale tɛŋzuk de a muriŋ bɛ alege ku pagra kama ate Sinsaŋŋa wa fiik a muriŋ bɛ.

18<<Nuru waai a dan zɛri wa pok alege faari wa choa, kula nyɔnɔwa a nye ka kaboŋ. Nuru waai mɛ abe ale a faari nipok waai ate ba zɛri la, a nye ka kaboŋ mɛ.

19<<Jigsirɔ ale jam boro a kasim a jo garuk tii diak ale pagra nna yegayega la. Daa meena wa kasim jam a dɛ ka masim. 20Wa nansuiŋku nɔi jajak ale jam kasim a duak du, wa yuei jam le Lazarus, wa nyiŋka meena jam ka nira, 21wa jam a dɛ ka ŋandiin tii ale nyini jigsirɔ wa dɛka jigini a lo tɛŋka la ate baasaŋa mɛ a leeli wa niraŋa. 22Jajakka yaa jam kpi ate Wen maarɔma a ta wa ga nyo Abrayam nigoruk po. Ku an beni ya ate jigsirɔwa mɛ a kpi ate ba gu wa. 23Kpiluŋ tɛŋ wa jam bo ka nyiŋdomma po, jigsirɔwa yaa nya Abrayam niŋniŋŋa ale Lazarus a bo wa gauŋ. 24Wa yaa kaari a wi Abrayam ayen, <M koa Abrayam, ta jiirim ale mu abe fi tom ate Lazarus pai wa nandummu a lusi nyiam po ate bu zi m giŋgeluŋ ku nyiŋ, m nyiŋka meena ale a dom nna yegayega bolimu de po.>

25<<Alege Abrayam yaa tulisi wa ayen, <M biiga, a teeri diipo ate fi jam vua la, fi jam ta ka ŋanmaŋsaŋa meena alege Lazarus a jam soa ŋanbaataŋa meena. Alege yɔgyɔgla de, wa boro a dɛ ka masim dela jigini, alege ate fi ta nyiŋdomma. 26Daa dila nyiini, ka goluk ale limisa a dua tama ale fi suŋsuŋ, ate baai ale a yaali ayen ba nyini dela a jam fi jigi la, an baga a taamu, yaase waai mɛ abe dan a yaali ayen wa nyini fi jigi a jam tama jigi wa an baga a taamu.> 27Jigsirɔwa yaa weeni ayen, <Mi a saalim kama m koa ayen fi tom Lazarus ate wa cheŋ m kowa yenni, 28Mi ta ka m suata tinu. Tom ate wa ga kaam ba, kan daa di ba mɛ a cheena ka ninammu po.> 29Alege Abrayam yaa tulisi wa ayen, <Fi suataŋa a ta Moosis ale Wen biisiteerɔma sinsaŋŋa kama ate ŋa a kaam ba ayen ba lak tue a wom ŋa ale a weeni ba diila.> 30Jigsirɔwa a yaa ŋman tulisi ayen, <M koa Abrayam, aaya, alege nuru a dan yiri tama baai ale ka kpilima la po a cheŋ ga weeni ba ku a fɛ kama ayen ba basi ba tuimbaataŋa tomka.> 31Abrayam ŋman tulisi wa ayen, <Ba dan kan a yaali ayen ba wom Moosis ale Wen biisiteerɔma sinsaŋŋa ale a weeni diila, nuru a dan poom yiri kpilima po mɛ a ga weeni ba, ba kan diem a wom.> >>

Currently Selected:

Luuk 16: BWU

Highlight

Copy