Piilimka 8

1Alege Wen yaa teeri Nowa wari ale gɔi duŋsaŋa ale yeri duŋsaŋa ale bo ŋaaruŋku po ale wa la wari. Wa yaa basi ate viok yaa fuk ate nyiamu yaa siŋ. 2Yɔgyɔgla de Wen yaa lik wenzukku ate ŋmorukku basi nika. Tɛŋka mɛ nyiamu basi nyini ka. 3Nyiamu a yaa siŋ nna maga maga. Da dii ale nye daa kook ale pisinuwa la, nyiamu yaa ŋman siŋ gum du. 4Chiisa siyopɔiwa po da pi ale ŋayopɔiwa danni ŋaaruŋku yaa siŋ zaani Ararat guutaŋa zuk. 5Nyiamu yaa kasim a siŋ a ta ga paari chiisa piwa po piilimka danni ate guutaŋa yaa a nya.

6Daa pisinaansi ale taam la Nowa yaa lak ŋaaruŋku ate wa nye la tuokparuku 7a yaa tom tagaaruk ate ku nyini a gilim de ale de ate nyiamu ga kpeeri tɛŋka zuk. 8Ate wa ŋman tom nangbaŋ ayen ka nyini nya ase nyiamu a siŋ alege tɛŋka ya. 9Alege nangbaŋka an nya jigi a kali ya dii nyiŋla nyiamu diem jam lik tɛŋka kama. Ka yaa ŋmani cheŋ Nowa jigi ŋaaruŋku po. Wa yaa laari wa nisaŋa a yik ti ka jo wadek jigi ŋaaruŋku po.

10Wa yaa limisi paari daa ŋayopɔi a ŋman tom nangbaŋka ate ka nyini ŋaaruŋku po. 11Nangbaŋka ale pilim ŋman wa jigi junɔinni la, wa yaa nya ka ta tiib viok yɔgsuk ka nɔnni po. Ate Nowa yaa seba ayen nyiamu siŋ kama. 12Wa ŋman limisi paari daa ŋayopɔi a tom ka ate ka nyini, alege ka an ŋman ga wa jigi ya.

13Ben dii ate Nowa nya bena kobsiyuebi ale dinyi la, chiik kaai ale a piilim beni la, piilimka danni nyiamu yaa kpeeri meena. Nowa yaa zagri jabuui ale lik ŋaaruŋku la a nya nyiamu ale kpeeri alege tɛŋka la. 14Benni po chiik kaai ale a nye siye la, daa pisiye ale ŋayopɔiwa danni tɛŋka yaa ko cheksegi.

15Wen yaa weeni Nowa ayen, 16<<Nyini ŋaaruŋku po nyini ale fi powa ale fi nidoabilisaŋa ale fi nidoabilisaŋa pooma. 17Ta javuk meena ale bo ŋaaruŋku po ale fu la nyini. Nuinsa, duŋsa, ale ŋan baai meena ale a cheŋ tɛŋzuk ate ba biak abe ba wɔgri a piisi a sueri tɛŋka meena.>> 18Nowa ale wa powa, ale wa nidoabilisaŋa, ale wa nidoabilisaŋa pooma yaa nyini. 19Duŋsaŋa meena ale ŋan baai meena ale a vuuri tɛŋ la, ale nuinsa, ŋan baai meena, ale a cheŋ tɛŋka zuk la, yaa nyini ŋaaruŋku po ba beŋ ba beŋ.

20Ate Nowa yaa sɛ kuŋkuŋ a pai duŋ sii ale magsi Naawen teka ale nuin sii ale magsi Naawen teka la a ko a ju te wa. 21Naawen yaa wom nyummu le masa la a yaa weeni wa suinum po ayen, <<Wa kan ŋman ka te tɛŋka diipo diipo nurubiik nyiŋŋa, dila wa suinummu po poom ka biem nyiini, nyini wa biik po. M kan ŋman kaasi ŋanvuta meena ase m ni nye dii nna. 22Ase tɛŋka ale kasim boro nna, borik daa ale cheka daa ŋoota ale wulum, yoei ale wenkarik yok ale kantueŋ a kan maa kpegli.>>

Currently Selected:

Piilimka 8: BWU

Highlight

Copy