Piilimka 14
14
1Dila po Sinar naawa Amrapel ale Ellasar naawa Ariok ale Iilam naawa Chedorlaomer ale Goyim naawa Tidal, 2yaa cheŋ ba nye kpaliŋ ale Sodom naawa Bera ale Gomora naawa Birsa ale Adma naawa Sinab ale Zeboiim naawa Sɛmeber ale Bela naawa. Zoar jam le la. 3Nalimaŋa de ate ba siti la, jam tigsi ka chaab Siddim Viaka po, Yesa Nyakpiemu le la. 4Bena pi ale ŋaye nalimaŋa de jam siak te Chedorlaomer kama, alege bena pi ale ŋatawa po ba zɛri wa nɔi.
5Bena pi ale ŋanaansiwa po, Chedorlaomer ale nalimaŋa yaa nye nɔiyeŋ a cheŋ ga nak dɛ Arefa demma ale bo Asterot Karnaim la ale Zuzi demma ale bo Yɛm la ale Emi demma ale bo Saveya Kiriataim la 6ale Yori demma ale bo Seir ate ka ta guuta la, a ta ga paari El Paran ale moata gɔnni la. 7Ba yaa ŋman viriŋ ŋaaŋ a cheŋ En Mispat yaase Kades, a nak dɛ Amalek demma tɛŋsaŋa meena ale Amori demma ale jam bo Yazazon Tamara la.
8Ate Sodom naawa ale Gomora naawa ale Adma naawa ale Zeboiim naawa ale Bela yaase Zoar naawa a yaa gɔk santiri a ga tom chaab bari zaani a magsi kpaliŋ Siddim Viaka po. 9Ayen ba siti Iilam naawa Chedorlaomer ale Goyim naawa Tidal ale Sinar naawa Amrapel ale Ellasar naawa Ariok. Nalima ŋanaansi ale ta chaab ale nalima ŋanu. 10Siddim Viaka jam ta ka gola ate ŋa sueri ale kotaali. Sodom ale Gomora nalimaŋa ale jam a chali la, nuruma gela yaa lo ŋa po alege nuru mbala chali jueli guutaŋa zuima. 11Nalima ŋanaansiwa yaa vari Sodom ale Gomora kɔlimaŋa meena ale ba ŋandiintaŋa meena a ta cheŋ. 12Ba jam ta Abram suoku nidoabinni Lɔti ale wa ŋantaŋa a cheŋ kama. Wa le tɔlim jam bo Sodom la.
13Ba wanyi ale jam chali bɛ yaa jam weeni dii le nye la a sak Yiburu denɔwa Abram. Abram le jam bo juijui la a moata ka Mamre, Amori denɔwa tiib kpieŋsaŋa. Mamre jam ka Eskol ale Aner suok. Bala meena jam nye ka nɔiyeŋ ale Abram. 14Abram le wom ayen wa suoku nidoabinni ba yik ta cheŋ la, wa yaa wi nuruma kobsita ale pi ale naanika ate ba biak ba wa yenni po a sak ba la a nyini ta ba a ga paari Dan. 15Yɔkku Abram yaa poori wa nuruma a siti ba a vi a nak ba dɛ. Wa vi ba ga paari ka Yoba, Damasikus wiiluk geŋsa. 16Wa tuesi wa suoku nidoabinni Lɔti ale wa ŋantaŋa meena ale nipooma ale nuru yontaŋa.
17Abram ale nak Chedorlaomer ale nalimaŋa ale nye nɔiyeŋka ale wa a dɛ la, Sodom naawa a yaa nyini ayen wa tu wa Saveya Viaka po. Viaka jam ka Naawa Viak le la.
18Salem naawa Melekizedek yaa ta boroborok ale daam a nyini. Wa jam ka Wen Dii Ale Bo Wenŋmazuk La kaabteerɔ. 19Ate wa yaa niak Abram ayen, <<Wen Dii Ale Bo Wenŋmazuk La a niak Abram, wa ka waai ale nye wenzuk ale tɛŋ. 20Abe niauŋ a bo Wen Dii Ale Bo Wenŋmazuk La jigi, wa ka waai ale pai fi dachaasaŋa a nyo fi nisima po.>> Abram yaa pai wa ŋantaŋa piika po bunyi a te wa.
21Sodom naawa yaa weeni Abram ayen, <<Te mu nuruma abe fi tanla kɔlimaŋa fidek.>>
22Alege Abram a weeni Sodom naawa ayen, mi zak ka nisa a sak Naawen, Wen Dii Ale Bo Wenŋmazuk La, a nye wenzuk ale tɛŋ la alege a pɛ, 23ayen mi kan tuesi jabuui ale ka fi jaab la, daa garuk miik yaase nuensiri gbain mɛ, ate fi kan baga a weeni ayen fi ale basi ate Abram jigsi. 24M kan siak a tuesi jaab fi jigiya alege ka mi nuruma ale dɛ ŋan baai la ale nuru baai ale va mu cheŋ la charuku. Bala ale Aner ale Eskol ale Mamre. Bala tuesi ba charuku.>>
Currently Selected:
Piilimka 14: BWU
Highlight
Share
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
