Tuima 2

1Daa Pisinu Tigini #2:1 Kaabka 23:15-21; Teerika 16:9-12; Tuima 20:16 ale jam paari la, ba meena yaa jam jigi yeŋ. 2Nuemka yaa nyini wenŋmazuk a jam nna ase viok pagrik la a yaa jam sueri yenni meena ate ba jam kala di po la. 3Ba yaa nya bolim ŋiak a siŋ jam kala ba zuimaŋa zuk tɔgatɔga a nye ase giŋgeluŋta la. 4Ate Wen Chiika a jam sueri ba meena a te ba pagrim ate ba deri a biisi biik sii ale kan daa badek tɛŋsaŋa biisa la.

5Yɔgyɔgla de Juuba ale jam bo Jerusalem baai nina ale muni ale Wen puusika la a nyini tɛŋka meena a jam Jerusalem. 6Ba ale wom dii ale nye la, nuru boanni a yaa tigsi chaab ate ku yaa cha ba, dii nyiŋla ba wom kama ale ba a biisi ale badek tɛŋsaŋa biisa. 7Ku jam ka wakperikaliik ba jigi ate ba weeni chaab ayen, <<Nuru baai ale a biisi nna la, daa Galili demma? 8Ku nye ka sɛ ate tama a wom ale ba a biisi ti wanyi wanyi tɛŋsaŋa biisa? 9Tama ka Patiya dem ale Miidi dem ale Iilam dem ale Mesopotamiya dem ale Judia dem ale Kapadosia dem ale Pontus dem ale Asia dem 10ale Firijiya dem ale Pamfiliya dem ale Ejipiti dem ale Libia demma baai ale kala moata Sairini la. Ti ba gela ka Juuba, ti ba gela daa Juuba a va Juuma suiku la a yaa chim nicham a nyini Aroom tɛŋka la. 11Tama gela ka Kariti dem ale Arab dem. Tama a biisi ka biisa tɔgatɔga, alege tama a wom ba ale a biisi ale tidek tɛŋsaŋa biisaŋa a magsi chaab ale Naawen tuimkperisaŋa wie ale ka diila kama.>> 12Ku jam cha ba meena kama ate ba butim a bek chaab ayen, <<Kude kiri ale boa?>> 13Alege mbala mɛ a nye Yeezu ŋaaŋviirɔma a la ale a weeni ayen, <<Nuruma de a nyu ka daam a yib.>>

14Alege Piita yaa yiti zaani ŋmai ale ŋaaŋviirɔba pi ale wanyiwa a biisi ate ku jueli ayen, <<Judia demma ale nama baai meena ale bo Jerusalem la, ni seba kude abe ni wom wie ŋaai ate mi a yaali m biisi la. 15Ni a poli kama ayen nuruma de a nyu ka daam a yib, alege ku daa wensie. Nama kan nya ku ale diem ka saluik baŋ neok la? 16Kude ate Biisiteerɔwa Joel a jam biisi ku wari ayen, 17Wen weeni ayen, <Da Kpeglimaŋa po, mi le pai m Chiika a nyo nuru meena po, ni nidoabilisaŋa ale ni liema ale mooli Wen wie. Ni nuru paalukku ale nya gɔdaasima po wie ate ni nuru kpagsaŋa ale gɔdaasim. 18Nidoa baai ale nipok baai ale tom a te mu da ŋala po la, m le pai m Chiika a nyo ba mɛ po ate ba biisi chum po wie ase Biisiteerɔba la. 19M le nye wakperikaliisa wenŋmazuk abe m tom wakinkagla tɛŋzuk de ate nuruba nya. Ba ale nya ziim, ale bolim ale nyuisa nna kpitɔ. 20Nidoa baai ale nipok baai ale tom a te mu da ŋala po la, m le pai m Chiika a nyo ba mɛ po ate ba biisi chum po wie ase Biisiteerɔba la. Wenbinni le sobri, ate chiika tagri a muni nna ase ziim la alege ate ti Naawenni Dakpienni a jam. 21Ate waai meena ale a wi Naawen la ale nya varibasika. (Joel 2:28-32)

22<<Izirali demma, ni wom wieŋa de. Wen lueri Yeezu Nazaret denɔwa kama. Wa be va ka wala nyiŋ a nye wakpiema ale wakperikaliisa ale wakinkagla nama nimbie po. Ni be seba nya kude a chak kama nalimnyiini. 23Yeezuwa de ate nama a yik a te tuimbaata nyam ayen ba ko wa. Ka Wen ale poli ayen ku nye dila. 24Alege Wen a vari wa kama kum po a basi a nak wa a yiti kum po dii nyiŋla wa jam daa waai ate kum a baga yik wa a tara. 25Deevid jam weeni wa wie kama ayen, <Mi kasim jam a nya ti Naawenni kama m niŋ, wa boka m juga geŋ, wari a kan nye mu. 26Dila nyiŋ m sui a jam peenti kama ate m pak wa. M nyiŋka a ta yiila kama. 27Dii nyiŋ la, Fi kan zɛri mu a basi ate m cheŋ kpiluŋŋoa, yaase fi basi ate fi weleŋsa nuruwa a puak vɔrumu po. 28Fi sak mu nyeboka suiku kama. Fi basi ate m sui peenti kama fi le bo ale mu la nyiŋ.> >> (Yiila 16:8-11)

29Piita yaa ŋman biisi ayen, <<M suata, ni basi ate m biisi lak a sak ni ale sebchakka ayen ni kokpieŋka Deevid a kpi kama ate ba gu wa. Wa boosuku abe diem boro kama a jam paari jinla. 30Wa ale jam ka Biisiteerɔ a seba Wen ale puulim dii ale wa ayen wa le nye ate wa ŋaaŋbisaŋa po wanyi a chim naab la,#2:30 Yiila 132:11 31Wa ŋaam jam nya kama ale biisi Kirisitawa kum po yiti ka wie ayen, <Wa an jam wari kpiluŋŋoa yaase wa nyiŋka a poak ya.>#2:31 Yiila 16:8-11 32Yeezuwa de ate Wen nak yiti la, dii ate tama meena a chim seerɔba la. 33Waai ale nya zula a bo Wen juga geŋsa la a tuesi Chiika pagrimu pumpuulimaŋa a nyini Kowa jigi, Yeezu yaa pai Wen Chiika a te ni dila ale soa ate ŋade meena a nye jinla la. 34Daa Deevid ale jam jueli wenŋmazuwa, alege ka wadek ale weeni ayen, <Naawen a weeni mi Nyɔnɔwa ayen, <<Kali mi juga geŋ 35ate m ga basi ate fi dachaasaŋa a chim fi naŋsa tabika jaab.> (Yiila 110:1)

36<<Nama Izirali demma ku a fɛ kama ayen ni seba chak ayen ka Yeezuwa dɛ ate ni yik kpi jabarimu nyiŋla ate Wen basi ate wa chim ti Nyɔnɔ ale Kirisita la.>>

37Nuruma ale jam wom kude la ba sue yaa kaasi, ate ba bek Piita ale tuimtomdɔ mbala, ayen, <<Ti suata, ti be ti nye ka sɛ?>>

38Piita yaa tulisi ba ayen, <<Ni meena basi ni tuimbaataŋa abe ni tuesi soka Yeezu Kirisita yuei nyiŋ ate wa vɔŋ ni wabaataŋa a te ni ate ni yaa nya Wen Chiika tiirimu. 39Diila pumpuulimaŋa ka nama ale ni bisaŋa ale ni ŋaaŋbisaŋa ale soa. Baai meena ate Naawenni ti Wenni a lueri la ale soa ŋa.>>

40Piita jam biisi ka wa boari, wa jam saalim ba kama ayen, <<Ni vari nidek a ta nyini gaŋ bioku de po a basi.>> 41Baai ale jam siak wa wanni la a jam tuesi ka soka, baai ale jam siak a te Wen la a jam ka nuruba tusa ŋata (3,000) a gum du. 42Ba jam pai ba boka po meena a zamsi ka ŋaaŋviirɔma sinsaŋŋa ale a tu chaab a de ale chaab ale a puusi ale chaab.

43Yɔgsum ale jam yik waai meena. Wen a jam va ka tuimtomdɔma nyiŋ a nye wakperikaliisa ale wakinkagla, ŋaai ale a sak ayen Wen bo ale ba kama la. 44Baai meena ale ta siaka a va wensuiku la, a kasim jam boro ale ka chaab a nye wie ale chaab 45a pai ba ŋantaŋa a da a pai ligraŋa a chari baai ale a silim la. 46Daa meena ba kasim a nye ka tuka ale popola yena Wen yenni po. Ba maa chaab mɛ ba yeeŋa po a dɛ ŋandiinta ale suipeentik ale chaab 47ale a pak Wen, ale ta suipeentik ale nuruba meena. Daa meena ti Naawenni a ta ka nuru baai ale a nya varibasika la jam a gum ba po.

Currently Selected:

Tuima 2: BWU

Highlight

Copy