Tuima 18

1Kude ŋaaŋnyiŋ Pɔɔl yaa basi Atens tɛŋka ale cheŋ Korinti tɛŋka. 2Dula jigini wa yaa nya Juu wanyi. Wa yuei ale Akiila. Wa nyini ka Pontus ale bo Itali tɛŋka po la ale wa powa Pirisila. Dii nyiŋ la Kilɔdiyus a jam weeni Juuma meena kama ayen ba basi Aroom tɛŋka ate wa yaa cheŋ wa nya ba. 3Wa jam a goa ale ka bala ale a tom ale ba dii nyiŋla Pɔɔl jam a baali ka duŋsa gbaŋsa a da ase Akiila ale wa powa ale jam a nye diila. 4Juuma Vuusum Daaŋa meena wa nyiem a nak ka nanpaga ale ba, ba tuka yenni po ayen wa tagri Juuma ale baai ale kan daa Juuba la.

5Silas ale Timoti ale nyini Masidoniya a jam la, ba jam a paari ale Pɔɔl yaa kasim jam pai ka daaŋa meena wa boka po a kasim a sak Juuma Wen wamaŋsaŋa a biisi ate ku a lagri ayen Yeezu ale Kirisitawa. 6Ase ba le jam zɛri wa ale a weeni dii la, wa yaa kpaanti wa gattaŋa ale weeni ba ayen, <<Ni ziimu a jam nidek zuk, mi zɛ wari noa po. A zaani yɔgyɔgla de a cheŋ, m le cheŋ baai ale kan daa Juuba la jigi.>>#18:6 Ezekiel 33:4 7Pɔɔl yaa basi ba ale cheŋ nuru wanyi yeri. Wa yuei ale Titus Jasitus. Wa jam ka Wen puusirɔ. Wa yenni jam za moata ka Juuma tuka yenni. 8Wen yenni kpagni Kirisipus a jam ta siaka ale Naawen kama ale wa dɔkdemma meena. Korinti demma ale jam wom Pɔɔl la a jam ta siaka kama a tuesi soka.

9Yɔkku po, Naawen yaa weeni Pɔɔl goadaasini po ayen, <<Kan chali yɔgsummoa, gum du biisi te nuruma a cheŋ kan sina. 10Mi bo ale fu kama waai an baga nye fu wari ya dii nyiŋla m nuruma yega a bo tɛŋ kpieŋka de po kama.>> 11Pɔɔl jam bo dula jigini ate ku paari ka bein ale geli a sak nuruma Wen wanni.

12Galiyo ale jaa nya Akaaya tɛŋka zuk diipo la, Juuma yaa jam nye nɔiyeŋ a siti Pɔɔl a ta wa jam buusa boka dɔkku. 13Ba jam a weeni kama ayen, <<Nuruwa de, a sak nuruma ayen ba a te Wen zula ŋaai ale kan a va sinsaŋŋa ale a sak diila.>>

14Pɔɔl ale deri lak nɔi ayen wa biisi a vari wadek basi la, Galiyo yaa weeni Juuma ayen, <<Ku daam dan ka wari dii ale ka wabiok yaase wakaasuŋ ate wa nye, ku te nala kama ate m ta chichiiba ale nama Juuma nna, 15alege ku ka wa dii ale ka nanpaga wari a magsi chaab ale wie ŋaai ate ni pai a biisi la, ale nuruba yue la, ale sinsak ŋaai ate nama nyiini a va la, ku a fɛ kama ayen nidek abe biisi a magsi chaab. Mi kan chim wieŋa de chaab boteerɔ.>> 16Wa yaa yiak ba ate ba nyini buusa dɔkku po a nyini. 17Ba meena yaa yik Sositenisi waai ale jam ka tuka dɔkku kpagni la a zaani buusa dɔkku niŋ a nak. Alege dila an jam daani Galiyo ale maga mɛ.

18Pɔɔl jam bo Korinti tɛŋka ale Kirisita bisaŋa ate ku beni kama. Dai yeŋ wa ale Pirisila ale wa chorɔwa Akiila a yaa banti ba ale ge jueli ŋaaruŋ a cheŋ Siriya. Ba ale jam zaani Kenkrea ayen wa jueli ŋaaruŋku a cheŋ la, Pɔɔl jam poni wa zukku kama, dii nyiŋla wa puulim kama a magsi chaab ale dila. 19Ba ale jam paari Efisos tɛŋka la, wa yaa basi Pirisila ale Akiila dula jigini. Pɔɔl yaa biisi biik ale Juuma ba tuka yenni po. 20Ba yaa weeni wa ayen wa goa maga ale ba alege Pɔɔl zɛri 21alege weeni ba ayen, <<Ku dan ka Wen yaalika m le pilim ŋman jam ni jigi.>> Pɔɔl weeni dila ale jueli ŋaaruŋ a zaani Efisos a cheŋ.

22Wa ale jam paari Siizariya la, wa yaa cheŋ Jerusalem a ga puusi Kirisita bisaŋa ale a tu chaab dula jigini la ale ge a yaa cheŋ Antiok. 23Wa ale beni maga dula jigini la, wa yaa basi dula, ale va Galatia ale Firijiya tɛŋsaŋa po a deŋsi Kirisita bisaŋa kpa.

24Juu wanyi ate ba a wi ayen Apolos ate ba biak wa Alezandiria la, yaa jam Efisos. Wa jam ka waai ale baga a biisi nna yegayega ale seba Wen Gbaŋka wieŋa nna yegayega mɛ. 25Nuruba ale poom liŋ jam sak wa Naawen suiku wieŋa nna yegayega ate wa a biisi ale a sak ale nin muna a va suiku nalimnyiini wensie ŋaai ale a magsi chaab ale Yeezu la. Alege soka kaai nyiini ate wa jam seba la ale soka kaai ate Jɔɔn te la. 26Wa yaa piilim a biisi nyaŋa de meena ba tuka yenni po ale kan chali yɔgsum. Alege Pirisila ale Akiila ale wom biika la, ba yaa yik wa a tɔgi Wen suiku meena wieŋa ate ŋa lagri a te wa nalimnyiini. 27Apolos yaa poli ayen wa jueli ŋaaruŋ a cheŋ Akaaya tɛŋka. Kirisita bisaŋa ale jam bo Efisos la a yaa deŋsi wa kpai a ŋmarisi gbaŋ a te Akaaya Kirisita bisaŋa a saalim ba ayen ba tuesi wa nalimnyiini. Wa ale jam paari du la, wa jam maa maari baai meena ale va Wen ŋmanteka nyiŋ a chim Kirisita bisa la. 28Wa jam a nak ka nanpaga ale Juuma nna pagrik pagriga nuruma meena niŋ, a basi ate ba miŋ chak a nyini Wen wieŋa po ayen Yeezu ale Kirisitawa.

Currently Selected:

Tuima 18: BWU

Highlight

Copy