Mâk 13

Jisòs jîs kum nì bobhî ndâ Fùyèn yì chìk

(Mat 24.1, 2; Lûk 21.5, 6)

1À ndùku mô te Jisòs shihi lô a ndâ Fùyèn a Jèlusalèm jùmtìbàm yì wûn yìlè ben jis ha wun na, “Chichà, yen te jûŋà, nâ ni ba jûŋì te ghɨ fate ba nì ghɨna!”

2Jisòs fîsì jis ha wun na, “Te wò yena ba jûŋ yin ni, yu kpene bênàlò shyəma ghɨ bwuti nâ à jɨ̀m ma ti nê hi fê bu a tô yile ghɨ bè bwutè bɨn atɨna nâ à jɨ̀m.”

Jisòs jîs kum ngə̂k yì chìk ye yì bènà

(Mat 24.3-14; Lûk 21.7-19)

3À hì mô te Jisòs kwoka ndoko a kùn à Olìfs yi jin yi ndâ Fùyèn yì chìk, Bità ghê Jêms nì Jon nì Andùlù nyamti jis ha wun na, 4“Fòkti ha ghàh na gha mɨ ghɨ̂n bè gânà a wùni tuku agha? À bè hì mô ghɨ̀ni chwena hi chwùtì na gha ghɨ̂n kəta hi gàn agha?” 5Jisòs jis ha ghɨna na, “Ghàn hi tôknè kə ghɨ bê lehi ghàn.” 6Ghɨta bè hì bênà dô kə ni na ghɨ bênà a mu yi yet, a bênà nâbi nde jîsà na, ‘À mò kə nâ mu mu we ni!’ Ma bê lehi ghɨt a dona wu lum afân. 7Ghàn bê ki yû na ghɨ tuma a tu woŋ hadà fî yu na tu letu bakhe bênàlò kə ghàn fan beka gha ghɨ̂n kətalò hi gàn, biyani gokhini baha mô hi bèn. 8Lak tu bè hì nô tu letu, fə̂ntù nô tu letu, kunsu senâ, ma jìŋ fê kwo a tu lùk a tu lùk, gha mɨ ghɨ̂n bè hì gânà ni a baha mô kə mu lɨ̂m mù ngə̂k yì chìk.

9“Ghàn hi tôknè, ghɨ bè kwolò ghàn ma fo na ghɨ sak ghàn, ma sam ghàn a ndasu yuŋtesu, ma ghàn fê timi a ghɨt a saka ashyə̂ nì fə̂ntù kum mu, ghàn fokti tum yì jùŋ kum mu ha ghɨna. 10Ghɨ kəta hi fòktì tum yì jùŋ a tu lak tu mbyi tu tù jɨ̀m shyəma gokhini ben. 11Ghɨ kwo ghàn hì yênà nì ghàn wù lùk wu sù saku, kə ghàn hi kana nâ ghàn nè yê jîsà na ghə agha. Ghàn yên, ghàn jis kə gha ye yi fwo na ghàn jis kə yu mefû beka à bè hì jîsà wijə ghàn, à bè hì jîsà a Yohnà Yulena. 12Tuk muna bè bê ni, ma wùt bê hi lyê wâ nè wûn fo na ghɨ ywi, bì lyê wan fo na ghɨ ywi, ma mwəlà bê lote a bê ghɨna nì ghɨna wù wùn hi fê nì na ghɨ ywiti ghɨna. 13Nâ ghɨt à jɨ̀m bè bânàlò ghàn kə kum mu biyani ma à wunhi nâbi nde hi tàn a gokhi, ma wù bê bon.”

Ngòŋngòŋ yì bəmana yìlè liŋa tu luk

(Mat 24.15-28; Lûk 21.20-24)

14(Wùt wu taŋana tòkà yuti yinâ). “Ghàn bê ki yen a ngòŋngòŋ yì bəmana yìlè yi bobhe tu luk, yi mô wu lùk ma yì yê hì kəta wi hi tè mò afû, nâbi nde a Jùdiyà let à kwok a sùkùn. 15Wùt hì mô nâbi a tô ndâ kə wù fî kaha chwo, kə wùt fî lyi nâbi a ndâ hi lyè a shyə. 16Wùt hì mô nâbi a fùk kə wù fi kahi kolo hi lyè waf a wuna a ndâ. 17Tuk mù tɨ̂n bè hì bəmalò hanɨ̂ŋ ha ywen ghe ghɨ mô mu lâ nì ha ywen ghe ghɨ lê mwəlà. 18Ghàn hi jə̂mà na kə gha ghɨ̂n bê gan ma bɨ̀ŋ ti chwû tə̂mnà. 19Beka à bè hì mô a mu tuk afû ma ghɨta yen ngə̂k yìlè teka ghɨ timè yen nâ te Yènfù tì fate mbyî, bu hi bè fè yên. 20Yi ni mò na Bâba ti fâbtì tuk mu ngə̂k muna, bu ni ma wùt bê tè bòn. Wù fàbti tuk muna kə kum ghɨt a wuna ghe wù chwoka hi bònhì.”

21À bè hì mô a mu tuk afû, wùt jis ha ghàn na, ‘Ghàn yen Klistù wuna afân makə wù jis na, wù wokô a fokô kə ghàn bimi gha ye wù jìsa.’ 22Klistù su fəmsu nì fòktì su fəmsu bè fwolò a mu tuk afû chwûtè chwènu, mômà gha kanana kə hi mômhì hi yen na ghɨna làhi lehi nâbi ghɨt ghe Yènfù mò ma fu ti chwok lem hi bònhì. 23Ghàn hi tôknè! Mu ti fôktì lem gha mɨ ghɨ̂n ha ghàn kə à jɨ̀m ghɨ baha yê mô hi bè gàn.

Bên yì Wâ Wùtì

(Mat 24.29-31; Lûk 21.25-28)

24“À bè hì mô a mu tuk afû, a yu afa ngə̂k yì chìk mi yê me, ma yu chwi kahà fin, ma njoŋ hi fê bana wi, 25ma njèn me mù mò a nyə̂ ma mù hi chemlê, ma mwə̀ me mù mò a nyə̂ nâ mù jɨ̀m ma mù hi nêkà. 26Yi bàm yi tɨ̂n, ma ghɨ yen Wâ Wùt wu chwo bênà atɨ̂n à sù mbàk kəta a jyak a kanana nì ban yi chiki. 27Wù bê tum anjèlsù Fùyènsu a bûlà tu nyə tu nì tu chyə tu tù jɨ̀m na su gbê yuŋti ghɨt ghe Yènfù chwoka hi bònhì.”

Ghàn yiki gha ha kâk fù fikfù

(Mat 24.32-35; Lûk 21.29-33)

28Ghàn yiki gha ha kâk fù fikfù. Ghàn yen nâbi yini te fu kaha sa bênà, ghàn hi khə na bɨ̀ŋ chwô bênàlò. 29Yi mô kəbi yi ghəl te ghàn bè yena gha ghɨ̂n te ghɨ gânà, ghàn yên, ghàn hi khə na bên yì Wâ Wùtì hì bakhe bênàlò. 30Mu jìsà ha ghàn hamok na, ghɨt a mbye ghɨ̂n chîn bè kpute mihè wi bu na gha ghɨ̂n à jɨ̀m be ganlô. 31Nyə bè chyâlàlò ma chyə bê chya, biyani ma gha yile bê tè kwunâ atɨ̂n à gha afâ mu jìsa.

Nâ wùt khə wi tuk wu benanu Wâ Wùt

(Mat 24.36-44)

32“Nâ wùt wù mòk khə wi tuk we makə yu we gha ghɨ̂n bè gânà atɨ̂n. Nâbi anjèlsù Fùyènsu a nyə̂ khə wi, nâbi Wâ Wùt khə wi, a bu kə Bì. 33Ghàn hi tôknè fê gbûtè beka ghàn khə wi yu we gha ghɨ̂n bè gânà atɨ̂n. 34Yi mô kəbi yi ghəl te wùt shihi yèn à yi gbî wu lem ghɨt a fetana wuna na ghɨna faŋ à hi nê fêt yì wuni, wu jis ha we wu mô yi jwô mbàn na wù hi fate kê. 35Ghàn hi mô gbûtè beka ghàn khə wi nâ bè ndâ nè bênà wu yu kolô ma, a ntên ntuksu ma, ma wù nè bênà a yu afa lɨm à ngwû toŋa ma, ma wù nè bênà mbisìmbisi agha? 36Wù ki bûŋtè bèn yi bên kə wù yen ghàn bwunê. 37Gha ye mu jìsà ha ghàn yi yênà kə ha ghɨt à jɨ̀m. Ghàn hi gbûtè!”

Currently Selected:

Mâk 13: bmv

Highlight

Copy